Ro 7
7
Qodaloqotenaĝana da'me 'nonáĝac
1Ami yaqaya'olqa, ami auatetoñi ga'me namaĝajoĝonaĝac ca'li qoyanem ñe'me Moisés, nataq'aen auayachiñe da'me 'uo da'me 'lañaĝac ga'me namaĝajoĝonaĝac 'me nejaliaĝatelegue ga'me jiyaĝaua qom cha'li nec'aletaye. 2Cha'li jaloqotenaĝana jaga'me yauo jo'ne 'uo ga'me loua, qama'le necoñeteguet ga'me namaĝajoĝonaĝac qom cha'li nec'aletaye joga'me, qalaĝaja qom ga'me loua yeleu, jaga'me yauo male uojotañi ga'me naqataĝac jo'ne necoñeteguet q'aen joga'me. 3Qama'le naq'aeta qom jaga'me 'uoneguet ga'me jiyaĝaua laqaya, qom cha'li nec'aletaye ga'me 'uaeñe loua, qanach'e jaga'me taue da'me lequejeguetaĝa, qalaĝaja qom joote yeleu ga'me loua jaga'me, ga'me namaĝajoĝonaĝac 'me necoñeteguet male yejoye, qama'le ja taue da'me lequejeguetaĝa da'me yitaĝa ya'uo loua laqaya.
4Nach'e ena'am naq'aeta, ami yaqaya'olqa, da'me auoqochiuo'o ñe'me Cristo oviyaue da'me leleuaĝa joñe'me, qaedi oquiya'e da'me namaĝajoĝonaĝac, qama'le uoja'ega anecoñiteguet, nach'eñe ñe'me jo'ne ca'li joote yem da'me yeleu, qama'le yitaĝa 'niyelaĝajeguem. Qama'le naq'aeta da'me onaĝaic ga'me jalayaĝac 'me janemaĝam ñe'me Dios. 5Qa'a ca'li jouaqataue da'me qo'mi loeco lo'olpi, da'me namaĝajoĝonaĝac nach'edata da'me ch'e noqotoĝon gaa'me ja 'noe'n lamaico naa'me qadapa'che qama'le nach'edata ñaqataĝañi da'me qadeleuaĝa. 6Qalaĝaja nayi joote qadeleu, jachiyajaqauelo gaa'me namaĝajoĝonaĝaco jo'ne qo'mi jouaqa'tot da'me 'lañaĝac, naq'aeta da'me qo'mi male uojotedañi qaedi jo'onataĝanoqot ñe'me Dios joda'me dalaĝaic qat'oyaĝac 'me chiyaqayi ñe'me Lepaqal, nataq'aen ja jouaqa'tot ga'me toijec namaĝajoĝonaĝac.
Da'me ja no'en yepitaqatenac 'me tauet da'me namaĝajoĝonaĝac
7Qama'le da'me jouaĝat da'me dojo': ¿qo'li jenaqaac queda'me yataqachiñe ja no'en da'me namaĝajoĝonaĝac? ¡Qa'ejo' ja naq'aeta! Temaqaedita ta'le ja naqaedaua daa'me namaĝajoĝonaĝaco jayem ja jayaten ga'me ja no'en. Yataqachiñe ja jayatenaq da'me nepitaqataĝanaĝac, ta'le da'me namaĝajoĝonaĝac ja enaac: “Ena'te auepita'a joga'me loĝot joga'me adaqaya.” 8Qalaĝaja da'me ja no'en yepitaqatenac da'me dojo', nataq'aen taue da'me 'lañaĝac da'me namaĝajoĝonaĝac noqotoĝo'n gaa'me yodapecache lamaico da'me ñejiyaĝauayaĝac. Qa'a ca'li cha'li qaya'te namaĝajoĝonaĝac, da'me ja no'en ja nec'aletaye.
9Uo'oe ca'li jaa'me noloqo'ote qaya'te yanomaĝac joda'me 'yoyaĝac; qalaĝaja ca'li novi' da'me namaĝajoĝonaĝac, male jayaten da'me jayem loeco lo'o. 10Qama'le jayem male jeleu, naq'aeta ga'me chiyaqayi da'me namaĝajoĝonaĝac jo'ne jayem yanem ga'me 'yoyaĝac, jayem yaueque'tague da'me yeleuaĝa. 11Qa'a da'me ja no'en yepitaqatenac da'me taue ga'me namaĝajoĝonaĝac qama'le jayem yoqovin nataq'aen nach'eda da'me namaĝajoĝonaĝac jayem yanem da'me yeleuaĝa.
12Chane'eja, da'me 'loyaĝa'j daa'me naqataĝaco yataqachiñe ja 'nalegue, nataq'aen da'me namaĝajoĝonaĝac ja 'nalegue, nataq'aen chimaqachiñe nataq'aen 'noota. 13Qalaĝaja, da'me dojo' jo'ne 'noota, ¿qo'li nach'eda jo'ne jayem yaueque'ta da'me yeleuaĝa? ¡Aja'y! ¡Ja naq'aeta! Da'me nach'eda eeta queda'me jouaĝat ga'me yoec qaedi jayem yaloĝona queda'me yataqachiñe yoec, qama'le chiyaqayi ga'me yeleuaĝa taue ga'me 'noota. Qama'le naq'aeta chiyaqayi ga'me namaĝajoĝonaĝac male yataqachiñe qoyaloĝon da'me etaĝaloĝoc jo'ne yataqachiñe ja no'en.
Da'me lachoĝolaĝac ga'me ch'e jiyaĝaua
14Jayatenaq gaa'me namaĝajoĝonaĝaco jo'ne chiyoqodo'ot joñe'me Dios da'me 'yaĝatetedac ga'me ja di'yoq, qalaĝaja jayem qaya'te 'yañaĝac, nemenec 'me lelatac da'me etaĝaloĝoc. 15Ja jayatenegueta naa'me chiyaqapiyilo gaa'me mach'e 'yonataqa, qa'a ja je'et ga'me jo'ne jepaquetapega, qama'te gaa'me uo'oe jo'ne jiquiya'alo yataqachiñe naqaegaua je't. 16Qalaĝaja ga'me je'et jo'ne nach'ega ja jetaque ja'uo, jatetoneguet joga'me queda'me yataqachiñe 'noota ga'me namaĝajoĝonaĝac. 17Chane'eja ja naqayem ta'le jetaque je'et dite ga'me yoec jo'ne jayem netaye. 18Qa'a jayaten ga'me jayem netaye, dojo' yelo'teguet da'me ch'e nejiyaĝauayaĝac 'me netaye da'me loecoyaĝac, qaya'te 'noota 'me netaye; qa'a temaqaedi jediaĝalegue da'me je'et ga'me 'noota, qalaĝaja ja jañoĝot. 19Ja jañoĝot ga'me 'noota jo'ne jetaque je'et, dite ga'me ja no'en jo'ne ja jetaque ja'uo. 20Qama'le nayi, qom ja'uo ga'me jo'ne ja jetaque je'et, male ja naqayem ta'le ja'uo, dite ga'me yoec jo'ne jayem netaye.
21Jetadet'aguet da'me temaqaedi jetaque je'et ga'me 'noota, nach'edata ga'me ja no'en 'me jayem netaye jauana nale. 22Jena'me yauelyaĝac 'yamaqate'n gaa'me lamaĝajoĝonaĝaco ñe'me Dios. 23Qalaĝaja jauana ga'me jayem netaye jo'ne nautena ga'me 'lañaĝac ga'me yelnataĝac: nach'ega lamaĝajoĝonaĝac ga'me etaĝaloĝoc 'me jayem netaye, nataq'aen jayem yecoñedeta't. 24¡Yataqachiñe jayem choĝodaq! ¿Jach'e jogamaĝa jayem nec'alaĝategue qaedi da'me lañoqotaĝanaĝac da'me leleuaĝa jena'me yapat ja yovidalegue? 25Nach'eñeta ñe'me Dios, jo'ne nach'eñe janem da'me yamaic jo'ne chiyaqayi q'aen ñe'me Qadejaliaĝanec Jesucristo, jayaten da'me jouetaque ta'le joue'tot da'me lamaĝajoĝonaĝac ñe'me Dios, qalaĝaja da'me yachoĝolaĝac joue'tot da'me lamaĝajoĝonaĝac ga'me etaĝaloĝoc.
ទើបបានជ្រើសរើសហើយ៖
Ro 7: TSN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Nuevo Testament Toba del Oeste © 2010 Sociedad Bíblica Argentina
