Ro 6
6
Cristo qo'mi yanema da'me qat'oyaĝac jo'ne dalaĝaic
1Qama'le, ¿jach'e ga'me jenaqaac? ¿Qo'li maliaĝa qolaqatalegue da'me jauoqo qadoec qaedi yataqata nichiguegue da'me lichoĝodenataĝanaĝac ñe'me Dios? 2¡Qa'ejo' ja naq'aeta! Qo'mi joote qadeleu da'me jachiyajaqauelo naa'me qadoeco; qama'le ¿toqoch'e maliaĝa qolaqatalo'te gaa'me qadoeco? 3Joote auayachiñe da'me male qademe'teguet ñe'me Cristo Jesús ca'li jaconaĝaguet da'me nachilaĝanataĝanaĝac, qama'le nach'e ena'am qademe'teguet joñe'me da'me yeleu ca'li. 4Qa'a jouaĝat da'me nachilaĝanataĝanaĝac nach'e ena'am qo'mi ena'am ta'le jouaĝaue jaga'me napa'l lae't jo'ne qoyachaue ca'li ñe'me Cristo, nataq'aen ena'am ta'le qadeleu ca'li qaedi qo'mi qo'niyelaĝachidijeguem nataq'aen qadec'alegue qaedi jaconaĝaguet da'me 'noyaĝac dalaĝaic, nach'e naq'aeta ca'li Cristo qo'niyelaĝachijeguem, chiyaqayi da'me let'adaic lañoqotaĝanaĝac ñe'me Let'a.
5Qom jecotaĝa ñe'me Cristo da'me qaedi qademe'teguet da'me neleuaĝa ena'am da'me ualegue ca'li ñe'me, nach'e ena'am qolaĝague joñe'me da'me 'niyelaĝajeguem. 6Jayatenaq ga'me qat'oyaĝac toijec ca'li qoyen caje'megue ñe'me Cristo ca'li qoyep'enajeguem, qaedi da'me qat'oyaĝac 'me etaĝaloĝoic joga'me qoyolaĝachigui nataq'aen male ja qolaqatalegue da'me qo'mi lelataqa daa'me qadoeco. 7Qa'a nale 'uo ga'me yeleu, male yaĝadegue gaa'me loeco.
8Qo'mi joote qolaqata'ñgui da'me qadeleu ñe'me Cristo, ja'amaqatenaq queda'me nach'e ena'am jouaqa'tajop joñe'me qom qadec'alegue. 9Jayatenaq da'me Cristo ca'li joote 'niyelaĝajeguem ja yitaĝa yeleu: da'me neleuaĝa qaya'te 'lañaĝac da'me ja yitaĝa nomat joñe'me. 10Qa'a Cristo ca'li yeleu, da'me leleuaĝa onolec jouaĝat da'me etaĝaloĝoc, qalaĝaja da'me 'niyelaĝajeguem male uetaue da'me Dios lec'alaqataĝanaĝac.
11Nach'e naq'aeta ami, oquiya'ae naa'me adoecodi', qama'le aueñe'tem ta'le joote adelevi, qalaĝaja oviyaue da'me lec'alaqataĝanaĝac ñe'me Dios queda'me ademii'teguet ñe'me Cristo Jesús. 12Chane'eja, ena'te anajeñe'teguet ta'le gaa'me adapa'chidi' lamaico nach'e eta't ami noma't, qa'a ami netayelo da'me adoiquiaqa'yaĝaqui, nataq'aen ta'le adapa'chidi' ami yepagaqatetapeque qaedi a'vichi. 13Ena'te auen at'onataĝanaĝat naa'me at'oyaĝac da'me aue'et ga'me ja no'en uotaĝa ta'le anemenoue ga'me adoec. Ja naq'aeta dite da'me 'noota ta'le anemeñiyot ñe'me Dios, ena'am ta'le da'me ami jiyaĝa'u jo'ne joote adelevi nataq'aen ami qo'niyelaĝachidijeguem, a'vichiyem naa'me adapa'chidi' da'me at'onataĝanaĝac qaedi a'vichi ga'me jo'ne yataqatelegue nale auajoyiya'aguet joñe'me nataq'aen anañila't. 14Qama'le naq'aeta da'me male qaya'te lañoqotaĝanaĝa'j gaa'me adoecodi' qaedi ami nejaliaĝatelo'te, qa'a ja ovi'tot ga'me namaĝajoĝonaĝac dite da'me lichoĝodenataĝanaĝac ñe'me Dios.
Qodaloqotenaĝana ga'me nelatac
15Chane'eja, ¿jach'e ga'me eeta? ¿Qo'li jauoqo qadoec qa'a ja jouaqa'tot ga'me namaĝajoĝonaĝac dite da'me lichoĝodenataĝanaĝac ñe'me Dios? ¡Qa'ejo' ja naq'aeta! 16Ami yataqachiñe auayachiñe mañaĝa queda'me ta'le animiñiyoue da'me anelataguequi qaedi auoqochiiya ga'me adadipai, qama'le ami lelataqa ga'me nadipa jo'ne auoqochiiya. Qama'le da'me dojo' naq'aeta, ta'le auoqochiiyalo gaa'me adoecodi' 'me ami yauequeteda'ague da'me adeleuaqai, ena'am da'me auoqochiiya ñe'me Dios qaedi oviyaue da'me yataqatelegue da'me adec'alitaye. 17Qalaĝaja yamaic janem ñe'me Dios yajouaĝat da'me ami, ca'li ami lelataqa daa'me adoecodi', nayi naa'me adai'lidi' yoqochideta da'me 'loyaĝac da'me napaĝaguenataĝanaĝac 'me auacoñiyeguet. 18Da'me male ami uojotedañi da'me aĝañidegue gaa'me adoecodi', qanach'e ami male ayoue da'me a'vichi da'me yataqatelegue.
19(Ena'am ga'me ch'e jiyaĝaua lelnataĝac da'me dojo' 'yaqataĝanaĝac, qa'a ami qaya'te at'añaĝaqui, qama'le ja auaqanachichi ta'le auayachiñe naa'me naajo' uo'oe.) Naq'aeta dojo', ca'li animiñiyoue na'me adapa'chidi' da'me a'vichi ga'me paĝachigui nataq'aen ga'me ja no'en, qama'le nach'e ena'am nayi auemiñiyoue naa'me adapa'chidi' da'me a'vichi ga'me chimaqachiñe qaedi ami ue'tajopa da'me 'noyaĝac jo'ne yoqovita, da'me ja ami 'te 'nalo'te.
20Ca'li maliaĝa ami lelataqa gaa'me adoecodi', ja a'vichetac da'me chimaqachiñe. 21Qalaĝaja, ¿jach'e ga'me anaqachiñe ca'li? Qaya; nach'edata da'me nepocoĝo ami uetauelo da'me oquiya'a joñe'me Dios. 22Qalaĝaja nayi, auachiyoqoitelo'te naa'me adoecodi' da'me ami uojotedañi, male a'uoĝoñiuo'o da'me a'uonataĝañiuo'o ñe'me Dios. Dojo' qamqa'me eja 'uo ga'me anaviquila't, qa'a da'me chiyaqayi nach'eda 'noyaĝac 'me ja 'naidena'a. 23Joda'me lejetenataĝanaĝac ga'me adoec nach'eda neleuaĝa, qalaĝaja da'me lachetaĝanaĝac ñe'me Dios mach'e 'noyaĝac 'me ja 'naidena'a da'me joqotaqa'taguet ñe'me Cristo Jesús mach'e Qadejaliaĝanec.
ទើបបានជ្រើសរើសហើយ៖
Ro 6: TSN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Nuevo Testament Toba del Oeste © 2010 Sociedad Bíblica Argentina
