Ro 4
4
Qodaloqotenaĝana ñe'me Abraham
1Chane'eja cha'li jenataqa'ta di'me Abraham, mach'e jachiyojoĝoguet: 2ta'le Abraham chiyaqayilo daa'me mach'e 'lonataqa da'me qoyen yataqatelegue, qama'le chimaqachiñe da'me ni'yoĝodetapela't, mate mane'e ja naqaeñe ñe'me Dios da'me 'nonaĝachigui. 3Qa'a naa'me nedii's eet'oi:
“Abraham p'iya'a ca'li ñe'me Dios,
qo'che' ñe'me Dios uenate'ta da'me dojo'
qama'le yanem da'me yataqatelegue q'aen ñe'me.”
4Qama'le nayi, qom 'uo ga'me t'onataĝan ja ena'am ta'le ch'e neme ga'me nejetenaguec 'me qoyanem, dite da'me qa'a qoyejeten da'me 'lonataĝanaĝac. 5Qalaĝaja qom 'uo ga'me p'iya'a ñe'me Dios jo'ne yataqatelegue q'aen ga'me loeco lo'o, qama'le da'me lepe'e yovidalegue da'me Dios yiyamaĝaden qama'le yataqatelegue q'aen, mate mane'e qaya'te 'lonataqa 'me yotaua'n da'me 'uo ga'me niyamaĝadenataguec. 6Nach'edi David 'yaĝatetac ca'li, ga'me jo'ne yedalegue da'me Dios ja uenate'talo gaa'me loeco 'me 'lonataqa, qama'le 'uo da'me niyamaĝadenataguec. 7Enaac di'me David:
“¡Made'tapolqa jogaa'me jo'ne Dios yapalaĝa't
gaa'me ja 'noe'n jo'ne te'me netayelo,
nataq'aen leuotalo'te da'me loeco!
8¡Matacolec ñe'me jiyaĝaua
qa'a ñe'me Jaliaĝanec ja uenate'talo ga'me loeco!”
9¿Qo'li qoyanema da'me niyamaĝadenataĝanaĝac jogaa'me jo'ne netayelo ga'me 'nanaĝajet, uotaĝa nach'e ena'ama qoyanema gaa'me jo'ne ja netayelo? Joote ñenaĝataĝaye da'me Dios yatetoneguet da'me lepe'e di'me Abraham qaedi qoyanem da'me qoyen yataqatelegue q'aen. 10Qalaĝaja joote yataqata jayatenaq joñe'me Dios queda'me yaconeguet ca'li ñe'me Abraham ca'li maliaĝa qaya'te 'nanaĝajet. 11Qama'le ca'li yoĝo'yi da'me yaconeguet ga'me 'nanaĝajet ñe'me Abraham, ena'am ta'le 'nanec uotaĝa ena'am ta'le qo'yamelegue da'me joote Dios yateton da'me yataqatelegue nataq'aen chimaqachiñe qa'a chiyaqayi da'me lepe'e. Nach'eda naq'aeta da'me Abraham chiyoqotelegue da'me male let'a't ena'uaque jogaa'me jo'ne 'uo da'me lepe'e', mate mane'e ja yacoteguet da'me 'nanaĝajet; qama'le naq'aeta da'me Dios nach'e ena'am yatetonegueta da'me yataqatelo'te q'ae'n jogaa'me. 12Qama'le Abraham nach'e ena'am let'a't jogaa'me, ja nach'edata da'me yacoteguet ga'me 'nanaĝajet dite da'me qa'a quetede'egue ga'me nepe'e jo'ne ua'ajop di'me jachiyojoĝoguet ca'li maliaĝa ja qoyanem da'me nichaĝajoĝonaĝac.
Dios yaqataĝanot da'me 'laqatac ñe'me Abraham
13Qa'a ñe'me Dios 'uo ga'me 'yaĝatem ca'li di'me Abraham nataq'aen gaa'me c'oqo'tepi qom'te qoyanema jena'me aleua. Qalaĝaja dojo' 'naqatac 'me qoyaloĝotapega di'me Abraham ja naqaeda ta'le yoqotelo'te ga'me namaĝajoĝonaĝacpi nale qodique'teguelo jogaa'me, dite da'me yataqatelegue 'me chiyaqayi da'me nepe'e. 14Qa'a ta'le jogaa'me yacoteguet ga'me Dios 'yaĝatem di'me Abraham, qom naqaegaua jogaa'me yoqotedelegue ga'me namaĝajoĝonaĝacpi, chane'eja ga'me nepe'e qaya'te chiyaqayi nataq'aen ga'me yaqataĝatapiñi da'me 'laqatac ñe'me Dios male qaya'te lajo'viyaĝac.
15Qa'a daa'me namaĝajoĝonaĝaco ch'e qo'mi neda'alo ga'me qane'uaĝanaguec; qalaĝaja ga'me ua'a da'me qaya'te namaĝajoĝonaĝac, nach'e ena'am ua'a da'me qonepaten ga'me damaĝajoĝolegue ga'me naqataĝacopi. 16Qo'che' da'me 'naqatac 'me qoyanem di'me Abraham ja qaya da'me lajo'viyaĝac 'me qoyanema qomle gaa'me c'oqo'tepi, nach'eda ch'e qoyanem 'me qaya'te lajo'vi, chiyaqalegue da'me lepe'e'. Dojo' 'naqatac yelo'teguet da'me nach'edata yiyamaĝatem ena'uaque jogaa'me jo'ne yoqotelo'te daa'me namaĝajoĝonaĝaco, dite da'me nach'e ena'am ena'uaque gaa'me jo'ne yoqotedelegue da'me nepe'e, ena'am di'me Abraham. Qama'le nach'eda naq'aeta da'me ena'uaque qo'mi mach'e qadet'a jodi'me. 17Naq'aeta da'me 'laqatac ñe'me Dios 'me enaac: “Am je'etem da'me am let'a gaa'me qayoĝode' noyaqapi.” Naqaeñe ñe'me Dios 'me p'iya'a ca'li di'me Abraham, nach'eñe Dios jo'ne ya'uo 'loyaĝa'j gaa'me joote yele'u nataq'aen 'ye't yema gaa'me uo'oe 'me maliaĝa ja di'yo't.
18Ca'li male qaya'te neuataqataĝanaĝac, Abraham 'uo da'me lepe'e nataq'aen 'uo da'me lajoĝonataĝanaĝac, qama'le naq'aeta da'me yovidalegue da'me qoyen let'a gaa'me qayoĝode' noyaqapi, naq'aeta ga'me joote 'yaĝatem ñe'me Dios: “Naq'aeta gaa'me layoqote' gaa'me ac'oqo'tepi qomle.” 19Da'me lepe'e di'me Abraham ja choĝolaĝaic, mate mane'e yamta'le cien ga'me ne'uoidi, nataq'aen jañe'me Sara joote netadetapela't da'me naditapega ga'me loiquiaqa'yaĝac nataq'aen joga'me yataqachiñe 'yaĝaicachidi jogaa'me, qama'le ja yaqanate't ta'le 'uo ga'me c'oĝo't. 20Ja yoqoleguet nataq'aen ta'le ja p'iya'alo gaa'me 'laqataqa ñe'me Dios, dite da'me 'uo da'me lepe'e netaye 'me t'añañe. Chane'eja 'nonaĝachigui ca'li ñe'me Dios, 21yataqachiñe najaqachigui na'me lauel da'me yayaten ñe'me Dios da'me yaqanatet ta'le yepaquichigui yema ga'me 'laqatac, qa'a 'uo da'me lañoqotaĝanaĝac da'me ye'et ga'me joote yaqataĝañi. 22Qo'che' Dios yatetoneguet da'me dojo' qama'le qoyen yataqatelegue jodi'me.
23Qama'le da'me dojo' jo'ne Dios yatetoneguet, ja nach'edita di'me Abraham da'me qoyediñe; 24nach'e ena'am qo'mi nala'alo da'me qoyediñe. Qa'a Dios nach'e ena'am yatetoneguet da'me qadepe'e, qom jep'iyaqa ñe'me jo'ne 'niyelaĝachijeguem ca'li ñe'me Jesús, mach'e Qadejaliaĝanec, 25jo'ne qoyemenoue da'me leleuaĝa yajouaĝa't daa'me qadoeco nataq'aen 'niyelaĝajeguem qaedi qo'mi e'n yataqatelo'te.
ទើបបានជ្រើសរើសហើយ៖
Ro 4: TSN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Nuevo Testament Toba del Oeste © 2010 Sociedad Bíblica Argentina
