JOHN 3
3
Tumi Notun Jonom Hobo Lage
1Heitu homoi te pharisees manuh ekjon nam Nicodemus thakise, tar Jews majot te ekjon odhikari thakise. 2Eitu manuh Jisu logot raati te ahhi kene koise, “Rabbi, amikhan pora jane, apuni Isor pora pathai diya bhall guru ekjon ase, kilemane jodi ekjon logot Isor nathake, tetiya apuni kora asorit sign tu kon pora bhi koribo naparibo.” 3Jisu he tar ke jawab dise, “Moi hosa kotha tumi ke kobo, jodi ekjon manuh duibar jonom nahole tar pora Isor rajyo nadekhibo.” 4Nicodemus pora Tar ke koise, “Keneka manuh ekjon bura hoi kene arubhi jonom hobo? Tar amaa laga pet te duibar jai kene jonom koribo paribo neki?” 5Jisu he tar ke koise, “Moi hosa kotha tumi ke kobo, jodi ekjon paani pora aru Atma pora jonom nahole tar pora Isor laga rajyo te jabo naparibo. 6Gau mangso te ki jonom hoise, eitu gau mangso ase, aru ki Atma te jonom loise, eitu Atma ase. 7‘Tumi notun jonom hobo lage,’ eneka moi kua karne tumi asorit nakoribi. 8Hava tu nijor kot phale jabole monn ase tate jai, aru tumi eitu laga awaz hune, kintu eitu kot pora ahhe nahole kot te jai eitu tumi najane. Teneka he Atma te jonom lua khan bhi ase.”
9Nicodemus pora Tar ke koise, “Eitu keneka hobo paribo?” 10Jisu he tar ke uttar di koise, “Tumi Israel laga ekta guru ase, kintu eitu kotha khan nabuje naki? 11Hosa kotha moi tumi ke koi ase, amikhan pora ki jani kene ase eitu laga he koi, aru ki dekhi kene ase, eitu laga sakhi he di ase, kintu tumikhan pora amikhan laga sakhi naloi. 12Moi prithibi laga kotha koi di ase, aru jodi tumi biswas nakore, tetiya jodi moi sorgo laga kotha kole tumi keneka biswas koribo paribo? 13Kon manuh bhi sorgo te uthi jua nai, kintu Manuh laga Putro, kon he tate pora ahhise, Tar he ase. 14Aru keneka jungol te Moses pora sanp uthaise, eitu nisna Manuh laga Putro bhi uthai dibo lagibo, 15tetiya kon pora he Tar ke biswas kori ase taikhan ananta jivon pabo.
Isor He Prithibi Iman Prem Korise
16“Kilemane Isor he prithibi iman prem korise, eitu karne Tar laga ekmatro Putro ke daan dise, tetiya kon pora Tar ke biswas kore, ketiya bhi naharabo, kintu ananta jivon pabo. 17Kilemane prithibi bichar koribole nahoi, kintu Tar pora prithibi bachabole karne Isor he nijor Putro ke pathaise. 18Kon pora Tar ke biswas kore, bichar nahobo, kintu kon pora Tar ke biswas nakore, taikhan tu bichar kori di dise, kilemane tar pora Isor laga ekmatro Putro ke biswas kora nai. 19Aru bichar tu eitu ase: Puhor tu prithibi te ahhi kene thakise kintu manuh khan pora puhor shari kene andhera he prem korise, kilemane tarkhan laga kam tu paap kam he thakise. 20Kilemane kon pora paap kam kore, tar pora puhor tu ghin kore aru puhor usor te nahhe, kilemane tar laga paap kam tu dekhai dibole monn nai. 21Kintu kon pora hosa kam kore, tar puhor te ahhe, tetiya tar laga kam tu Isor logot te he kori ase eneka thik pora dekhibo.”
Baptisma Diya John Pora Jisu Laga Sakhi Diya
22Eitu pasot te Jisu aru tar laga chella khan Judean laga desh phale jaise, aru tate tarkhan logot te Tar thaki kene baptisma di thakise. 23John pora bhi Salim usor te thaka Aenon te baptisma di thakise, kilemane tate paani besi thakise, aru manuh khan ahhi kene baptisma loise 24(kilemane eitu din tak te tu hole John bandhighor te napathai kene thakise).
25Heitu homoi te John laga chella khan konuba logot te Jews ekjon safa kora niyom laga kotha te alusona kori thakise. 26Aru tarkhan John logot te ahhi kene koise, “Rabbi, Jordan par kori kene apuni logot te kon thakise, kon laga sakhi apuni di thakise—sabi, Tar pora bhi baptisma di ase, aru sob manuh tar logot te jai ase.” 27John pora jawab dise, “Jodi sorgo pora nahole, manuh ekjon pora ekta bostu bhi lobo napare. 28Aru moi eneka kua tumi nijor sakhi ase, ‘Moi Khrista nahoi, kintu Tar laga aage te pathai diya he ase.’ 29Kon logot te dulhan ase Tar he dulha ase. Dulha laga bondhu tu hole usor te khara kori kene dulha laga awaz huni kene besi anando kori ase. Eitu karne moi laga anando tu etiya pura-puri hoise. 30Tar he besi besi aage jabo lage, kintu moi tu huru hoi jabo lage.”
31Kon upor pora ahhise, Tar he sob pora upor te ase. Kintu kon prithibi pora ase tar tu prithibi laga he ase aru eitu hisap te he kotha bhi koi ase. Kon sorgo pora ahhise tar he sob laga upor te ase. 32Tar pora ki dekhise aru hunise eitu laga sakhi di ase, kintu kon pora bhi Tar laga sakhi naloi. 33Kintu kon pora Tar laga sakhi loi ase, tarkhan pora Isor tu hosa ase eneka mohor mari loi ase. 34Kilemane Isor pora kon pathaise Tar pora Isor laga kotha koi ase, aru Tar pora genti nakori kene Atma di ase. 35Pitri pora Putro ke prem kore aru odhikar sob tu Tar laga haat te di dise. 36Kon pora Putro ke biswas kori ase tarkhan ananta jivon pai loise; kintu kon pora Putro ke biswas nakore tar jivon napabo, kintu Isor laga khong tar upor te thaki jabo.
ទើបបានជ្រើសរើសហើយ៖
JOHN 3: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
