JOHN 4
4
Jisu Aru Samaria Laga Tiruta
1Ketiya Jisu pora baptisma di kene, baptisma diya John pora bhi besi chella khan bonai ase eneka Pharisees khan pora kua Jisu pora hunise, 2Jisu nijor pora nahoi kene Tar laga chella khan pora he baptisma kori thakile bhi, 3Tar Judea shari kene Galilee te ghurai jaise. 4Aru Tar Samaria par kori kene he jabole laga raasta thakise. 5Tetiya Tar Samaria te thaka Sychar nagor te ahhise, eitu nagor tu Jacob pora tar laga putro Joseph ke diya jaga thakise. 6Tate Jacob laga kungwa thakise; tetiya Jisu jatra te bhagor hoi kene eitu kungwa usor te bohi thakise. Eitu soi ghonta homoi#4:6 12 noon nisna homoi te hobo nisna thakise.
7Tate Samaria laga tiruta ekjoni paani uthabole ahhise. Jisu he tai ke koise, “Moi ke paani pibole dibi.” 8Kilemane Tar laga chella khan sohor te bhojon kinibole jai kene thakise. 9Samaria tiruta pora Tar ke koise, “Apuni Jews ekjon hoi kene, keneka moi, Samaria laga tiruta pora paani pibole mangi ase?” (Kilemane Jews khan pora Samaria logot te eku bhi mil milap nai). 10Jisu he tai ke jawab di koise, “Tumi jodi Isor laga upohar janise hole, aru kon pora tumi ke ‘Moi ke paani pibole dibi,’ eitu koi ase eitu janise hole, tumi Tar ke hudibo aru Tar pora tumi ke jivon paani di dibo.” 11tetiya hei tiruta pora Tar ke koise, “Sahab, apuni paani uthabole eku bhi nai, aru kungwa tu besi doha ase. Kot pora apuni eitu jivon paani tu anibo? 12Apuni tu amikhan laga Pitri Jacob pora bhi dangor ase neki? Tar nijor pi kene thaka eitu kungwa amikhan ke dise, aru eneka he tar laga khandan aru janwar sob paani pi ase.” 13Jisu pora tai ke koise, “Kon pora eitu paani pi ase, arubhi piyas lagibo, 14kintu kon pora moi dibole thaka paani tu pibo, tar ketiya bhi piyas nalagibo. Moi dibole thaka paani tu tar laga jivon te ekta jironi hoi jabo aru ananta jivon boi ulabo.” 15Tiruta pora Tar ke koise, “Sahab, moi ke eitu paani dibi, tetiya moi piyas nalagibo aru iyate paani uthabole ketiya bhi nahhibo.”
16Jisu he tai ke koise, “Jabi, aru tumi laga pati mati kene iyate ahhibi.” 17Tiruta pora Tar ke jawab di koise, “Moi laga pati nai.” Jisu he tai ke koise, “Tumi, ‘Moi pati nai,’ eneka kua tu hosa koise; 18kilemane tumi pansta pati thakise, aru etiya kon logot te thaki ase, eitu bhi tumi laga pati nahoi. Tumi ki koise, eitu thik he ase.” 19Tetiya tiruta pora Tar ke koise, “Sahab, apuni ekta bhavobadi ase, eneka moi janise. 20Amikhan laga pitri khan tu eitu pahar te aradhana korise, kintu apunikhan Jews pora Jerusalem tu he aradhana jaga ase eneka koi.” 21Jisu he tai ke koise, “Tiruta, moi ke biswas koribi, homoi ahhi ase, ketiya tumikhan pora eitu pahar te hole bhi, Jerusalem te hole bhi, Pitri ke aradhana nakoribo. 22Tumikhan pora ki najane eitu ke aradhana kori ase; kintu amikhan pora ki jani kene ase, eitu ke aradhana kori ase, kilemane mukti tu Jews pora ase. 23Kintu homoi tu ahhi ase, aru eitu iyate ase, ketiya hosa mon pora aradhana kora khan pora Pitri ke atma te aru hosa mon te he aradhana koribo, kilemane Pitri pora Tar ke aradhana koribole eneka manuh ke he bisari ase. 24Isor tu Atma ase, aru kon pora Tar ke aradhana kore, atma te aru hosa mon pora aradhana koribo lage.” 25Tiruta pora Tar ke koise, “Moi jane Messiah ahhi ase (Kon ke Khrista eneka mate) ketiya Tar ahhibo, tetiya Tar pora amikhan ke sob janai dibo.” 26Jisu he tai ke koise, “Kon pora tumi ke koi ase, eitu Tar ase.”
27Thik eitu homoi te Tar laga chella khan ahhise. Tar tiruta logot kotha pati thaka dekhi kene tarkhan asorit lagise, kintu kon pora bhi, “Apuni ki bisari ase?” nahole, “Kile tai logot te kotha pati ase?” eneka kua nai. 28Tetiya tiruta pora tai laga kolsi tate shari kene nagor te jaise aru manuh khan ke koise, 29“Ahhibi aru sabi, manuh ekjon pora moi pahila ki kam kori thakise, eitu sob moi ke janai dise. Tar he Khrista hobo neki?” 30Tetiya taikhan sob nagor pora ulai jai kene Tar usor te ahhise.
31Heitu homoi te chella khan pora onurudh kori koise, “Rabbi, khai lobi.” 32Kintu Tar pora tarkhan ke koise, “Tumikhan pora najana khua lua moi ase.” 33Eitu karne chella khan ekjon pora ekjon ke koise, “Konuba pora Tar ke kiba khabole anidise neki?” 34Jisu he tarkhan ke koise, “Moi laga khua lua tu, kon pora moi ke pathaise, Tar laga itcha kora aru Tar laga kam thik khotom kora tu ase. 35Tumikhan pora eneka nakoi neki, ‘Etiya char mohina ase, tetiya dhan katibo?’ Sabi, Moi tumikhan ke koi ase, soku uthai kene sabi, kheti kati bole pura paki kene ase. 36Kon he dhan kati ase, tar hazira bhi pai ase aru ananta jivon karne phol jama kori ase, tetiya bijon hisai diya, aru dhan kati lua duijon bhi eke logot te anando koribo. 37Kilemane, ‘Ekjon he hisai dise, aru dusera ekjon he kati loise,’ eneka kua hosa ase. 38Tumikhan dukh nakora kheti katibole moi pathaise. Dusera khan pora he dukh kori kene rakha te tumikhan humai jai ase.”
39Eitu Samaria nagor te besi manuh pora tar logot te biswas korise, kilemane eitu tiruta pora tai laga sakhi koise, “Moi ki kori kene ahhise, eitu sob Tar pora koise.” 40Eitu karne ketiya Samaria manuh khan tar logot te ahhise, tarkhan logot te thakibole onurudh korise, aru tate Tar dui din thakise. 41Aru besi manuh he Tar laga kotha te biswas korise. 42Tetiya tarkhan pora tiruta ke koise, “Etiya khali tumi kua karne amikhan pora biswas kora nahoi, kilemane amikhan nijor pora huni loise, aru amikhan pora jane, eitu hosa pora bhi prithibi laga Trankorta ase.”
43Dui din pasot te Tar Galilee te jai jaise. 44Kilemane Jisu nijor pora jani loise, bhavobadi ekjon nijor jaga te sonman napai. 45Eitu nimite ketiya Tar Galilee te ahhise, taikhan pora Tar ke swagat korise, kilemane porokh homoi Jerusalem te Tar pora ki kam korise eitu dekhi kene thakise. Kilemane tarkhan bhi tate thakise.
Jisu Pora Solaongta ekjon Laga Putro Hustho Kora
46Tetiya Tar arubhi Galilee laga Cana jaga te ahhise, kon jaga te Tar he aage te paani pora draikhya-roh bonai dise. Tetiya Capernaum te ekjon solaongta laga putro bemar thakise. 47Ketiya Jisu Judea pora ghurai kene Galilee te ase eneka eitu manuh pora hunise, tar Jisu logot te jaise aru tar laga putro ke hustho kori dibi eneka hudise, kilemane lora tu moribo nisna bemar thakise. 48Eitu karne Jisu he tar ke koise, “Tumikhan pora asorit sign nadekhile biswas nakoribo.” 49Tetiya solaongta pora Tar ke koise, “Sahab, moi laga putro namora aage te ahhi kene hustho kori dibi.” 50Jisu pora tar ke koise, “Jabi; tumi laga putro jinda thakibo.” Jisu pora kua kotha te eitu manuh pora biswas korise aru tar nijor raasta te jaise. 51Tar nami jua homoi te tar laga nokor khan ahhi kene tar ke log korise aru koise tar laga lora tu bhall hoi ase. 52Tetiya tar pora homoi tu hudise, ketiya pora tar bhall hua shuru hoise, aru tarkhan pora tar ke koise, “Jua kali sat ghonta homoi#4:52 1:00Pm nisna homoi te hobo te bukhar pora tar ke shari dise.” 53Tetiya pitri pora jani loise, eitu homoi te he Jisu pora koise, “Tumi laga lora jinda thakibo.” Tetiya tar aru tarkhan laga porial sob pora bhi biswas korise. 54Eitu Jisu Judea pora Galilee te ahha pasot te ditiyo bar asorit kam kora thakise.
ទើបបានជ្រើសរើសហើយ៖
JOHN 4: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
