JOHN 2
2
Cana Te Saadi Kora
1Tin din pasot te Galilee te Cana jaga te saadi hoise aru Jisu laga amaa bhi tate thakise. 2Jisu bhi tar laga chella khan logot te eitu saadi te nimontron di kene matise. 3Ketiya draikhya roh khotom hoise, Jisu laga amaa pora tar ke koise, “Tarkhan draikhya-roh khotom hoise.” 4Aru Jisu he tai ke koise, “Hei tiruta, moi eitu nimite ki koribole ase? Moi laga homoi arubhi pongcha nai.” 5Tar laga amaa pora nokor khan ke koise, “Tar ki kobo eitu thik koribi.”
6Hei homoi te, Jews laga dhormo niyom hisap te safa kora laga paani rakha pathor laga kolsi soita thakise, ekta te bista nahole trista gallon paani rakhibo para laga thakise. 7Jisu he nokor khan ke koise, “Eitu kolsi khan sob paani pora bhorta koribi.” Aru tarkhan pora kolsi gola tak paani pora bhorta kori loise. 8Aru Tar pora tarkhan ke koise, “Etiya eitu olop uthai kene, bhojon laga malik ke di dibi.” tetiya tarkhan pora eitu korise. 9Ketiya paani pora draikhya-roh hoi jua tu malik pora pi saise, kintu eitu kot pora anise eitu najane (nokor khan kon pora eitu anise tarkhan pora tu jani thakise), bhojon laga malik pora dulha ke matise 10aru tar ke koise, “Sob manuh pora bhall draikhya-roh tu he pahila diye, aru manuh khan thik thak khua pasot te beya tu diye. Kintu tumi etiya tak bhall tu rakhi thakise.” 11Eitu, Tar laga asorit sign, Jisu pora pahila Galilee te Cana jaga te korise, aru Tar laga mahima dekhaise. Aru Tar laga chella khan pora Tar ke biswas korise.
12Eitu pasot te Tar laga amaa, bhai khan aru chella khan logot te Capernaum te nami jaise, aru tate tarkhan olop din thakise.
Jisu He Girja Ghor Safa Kora
13Jews laga Par-Hua Porokh usor te thakise, aru Jisu Jerusalem te uthi jaise. 14Aru Girja ghor te goru, mer, kobutor bikiri kora manuh khan aru poisa bodli kora manuh khan Jisu pora tate dekhise. 15Aru ekta sabuk ekta bonai kene, tar pora tarkhan sob girja ghor pora khedai dise, aru tarkhan logot te goru aru mer sob khedai dise. Aru naya poisa bodli kora manuh khan laga mez bhi ulta kori kene phelai dise. 16Aru kon pora kobutor bikiri kori thakise, tarkhan ke koise, “Eitu bostu khan loi jabi; Moi laga Pitri ghor tu bepari laga ghor hobole nadibi.” 17Tar laga chella khan pora eneka likhi thaka yaad hoise, “Tumar pobitro ghor itcha pora moi laga mon bhorta jui nisna jolai ase.” 18Tetiya Jews khan pora tar ke koise, “Tumi eitu kam koribole odhikar ase eneka janibole, ki sign dekhai dibo?” 19Jisu he tarkhan ke jawab dise, “Eitu mondoli bhangai dibi, aru tin din te moi eitu uthai dibo.” 20Tetiya Jews khan pora koise, “Eitu mondoli bonabole soi solis saal loise, aru tumi eitu tin din te uthai dibo neki?” 21Kintu Tar pora nijor gau laga mondoli kotha he koi thakise. 22Eitu karne ketiya Tar mora pora jinda uthise, tar laga chella khan pora eitu gau laga kotha he Tar pora koise eneka yaad korise, aru tarkhan pora Hastro aru Jisu he kua kotha te biswas korise.
Manuh Logot te Ki Ase Eitu Jisu He Jane
23Heitu homoi te ketiya Par-Hua Porokh te Tar Jerusalem te thakise, aru Tar pora kora asorit sign ketiya dekhise, Tar laga nam te besi manuh he biswas korise. 24Kintu taikhan logot te Jisu nijor pora tu biswas rakha nai, kilemane Tar pora manuh khan jani ase 25aru Tar karne sakhi dibole kon bhi nalage, kilemane manuh ekjon laga mon te ki ase eitu Tar pora jani thakise.
ទើបបានជ្រើសរើសហើយ៖
JOHN 2: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
