Luka 12
12
Obuchesiyii khukobukaatii
1Nebutswa mundaalo etsio, olwa abemikanda bali nibakhung'aaniile halala ebikhumila nebikhumila, okhuula olwa bafwindikana, yachaaka okhuboolela abeechibe olwambeli, ari Mwiyile kahala khulwa amamela kabaFarisayo, akali obwikaatii. 2Ne libulaho elifumlikhwa elirafuunukha ta; kata elibiswa, elirabisukha ta. 3Khulwako, aka mwaboolile mushiilima kalahuliilikha mubulafu; naka mwamoonyile mushirwi shiomundu mushisika eshiomukari, kaleelwatswa ebulafu khubilama bietsinzu.
Oukhoyile okhuriibungwa
(Mat. 10.28-31)
4Nasi emusunjila inywe abeetsa banje, mbu murabariitsanga abeera omubili ne olunyuma nibarali nende elindi elia banyala okhukhola ta. 5Ne ndalamuchesiyia khuwa mukhoyile okhuriitsanga, mbu niye wina; mumuriitsenje omwenoyo ouli nende obunyali okhumusukuna muGehena olwa aba namalile okhumwira; toto, emusunjila mbu mumuriitsenje omwenoyo. 6Amarorelesi karaano shikakulwa tsisende tsibili? Ne kata elala khuko shiliibililwa imbeli waNyasaye tawe. 7Ne kata buli Iwoya Iweliswi lieenywe lwabalwa. Murariitsanga tawe; inywe mushila amarorelesi amanji.
Akokhwiyama Kristo imbeli wabandu
(Mat. 10.32-33; 12.32; 10.19-20)
8Nasi emusunjila mbu buli mundu yesi oulandiyama isie imbeli wabandu, Omwana wOmundu yesi alamwiyama ye imbeli wabamalaika baNyasaye; 9ne oyo oundiyambakhana imbeli wabandu, aleeyambakhanwa imbeli wabamalaika baNyasaye.
10Ne buli mundu ouboola likhuwa nafukula Omwana wOmundu, alaleshelwa; ne khumwenoyo ounyeka Roho Omutakatifu, shialaleshelwatawe.
11Ne olwa balamuleera imbeli wetsisinagogi nende abaami, nende abobunyali, murahenda mbu namukalusie murie, kata mbu namukalusie shiina, kata mbu nishiina eshia namuboole, tawe; 12shichila Roho Omutakatifu alamwechesia habwene nahabwene khushise shieneshio aka mukhoyile okhuboola.
Oluchelo Iwomuyinda omusilu
13Mana mulala khubomumukanda namusunjila mbu Omwechesia, laka omusiani weefwe yangabile khubulaame bweefwe. 14Naye namusunjila mbu Omusaatsa iwe, niwina owa'khola mbu embe omuyaasii kata omukabukhasii khwinywe? 15Nabasunjila mbu Mwirecheshe, muleshenje okhukhaayilwa ebindu; shichila obuIamu bwomundu shibuli mubunji bwebindu ebia ali ninabio ta. 16Mana naboopela oluchelo, nasunga mbu Emikunda chiomuyinda undi chieerikha muno; 17nakanakania mumwoyokwe, ari Nekhole endie, olwa embula ewa embiikha imele yanje? 18Nasunga mbu Ndalakhola endi; mbu ndalalikulula ebiachi bianje, nikhupa ebindi ebikali; mana mubwenomwo ndalabiikhamwo imele yanje nende emiandu chianje chiosi. 19Mana ndalasunjila omwoyo kwanje, ndi Mwoyo kwanje, oli nemiandu eminji echibiishilwe khulwa emiyika eminji; ohuluushe, oliitsenje nonywa nende okhutsatsahala. 20Ne Nyasaye namusunjila mbu Omusilu iwe, eshilo shino omwoyokwo kwenywa; ne ebindu ebio ebia okasiye, nabibe ebiawina? 21Kho niIwo olwa ali owibiishila omwene libiikho, nareeyindihasia ewaNyasaye ta.
Akobuhendi
(Mat. 6.25-34)
22Nabasunjila abeechibe ari Niko akachila nimuboolela, mbu murahendelanga akobulamu bweenywe, ebia mwitsa okhulia, kata emibili chieenywe, ebia mwitsa okhwifwala, tawe 23Okhuba obulamu bushila ebiliibwa, omubili nakwo kushila ebiifwalo. 24Yililisie khumakhookho, shinga olwa kararaakanga kata okhuchesa ta, shikalikhwo nende libiishilo kata eshiachi ta; ne Nyasaye akaliisinjia; inywe shimushila muno amanyonyi? 25Ne niwina khwinywe, khulwa obuhendi obwa ahendanga, wakhanyala okhwimeetela kata isaa khubuyindifubwe? 26Kho mana, olwa muranyala okhukhola kata elili lituututa, nishiina eshichila nimuhendelanga akandi kosi?
27Mwechele khumataanye shinga olwa kakhulanga; shikanyakhananga emilimo, kata shikasiiranga obuusi ta; nebutswa emuboolela mbu kata Sulemani mung'oonoye yosi shiyayeefwala shinga elala khuko ta. 28Ne Nyasaye olwa abufwalanga obunyasi obwomubulimo ebiifwalo biabwo birio, obubaho leelo, ne mukamba busukunwa mumulilo, shialashila okhumufwala inywe ario, kata olwa muli abobusuubili obutuutu? 29Inywe, muleshenje okhukhaaba eshia namulie kata eshia namunywe, kata murabeetsanga nobukanakanii mumioyo ta. 30Okhuba ebienebio biosi nibio ebia amahanga akomushialo kakhaabanga; shichila Seenywe yamanya shinga olwa mukhoyile okhuba nebindu ebio. 31Nebutswa mukhaabe obwamibwe, nebindu bino mulameetelwa.
Akobuyinda mwikulu
(Mat. 6.19-21)
32Leshenje okhuria, inywe lituuli lianje litiiti; okhuba Seenywe achamile okhumuheelesia obwami bwenobwo. 33Kusinjie ebia muli ninabio, nimuhaana ebieshisa; mwikholele abeene emifuuko echirakofula ta, libiikho mwikulu eliraakama ta, aha omwibi yesi arasitanga ahambi, kata litsilili okhwonoonia tawe; 34shichila libiikho lieenywe aha lili, niho aha emioyo chieenywe nachio chilabeetsanga.
Abasumba abali meeso
35Mwibohele tsingubo tsieenywe mubishienje, tsitaha tsieenywe natsio tsiashenje; 36neenyu abeene mube shinga abandu abalindanga omwami wabwe, olwa aba nakalukha okhurula mushiselelo; mbu olwa yeetsa nakhong'onda, bamwikulile habwene nahabwene. 37Nabeikhabi abasumba abo aba omwami aleetsa nabanyoola nibali meeso; emuboolela toto mbu aleeboha, nabeekhasia habiliibwa, natsia nabakhalabanila. 38Ne naba niyeetsa mukhuba meeso khwobulindi okhwakhabili, kata mukhwakhataru, nabanyoola ario, kho abasumba abo nabeikhabi. 39Ne mumanye likhuwa lino, mbu khane omusaatsa omwenengo niyakhamanyile isaa yene eya omwibi ali okhwitsilamwo, khane yakhabeelenje meeso, naralekha inzuye yiyabwe ta. 40Nineenywe mwesi murio, mwirecheshe; shichila khusaa eya murapaarakhwo ta, Omwana wOmundu yeetsa okhwitsa.
Omusumba omwisiikwa, nende ourali omwisiikwa ra
(Mat. 24.45-51)
41Petero nareeba mbu Omwami, okhupanga oluchelo luno khwifwe fwenyene, nohomba khubosi? 42Omwami naboola ari Kho yakhaba wina omunyapara omwisiikwa omuchesi, owa omwamiwe alamwemekha hekulu khubakholibe, mbu abakabilenje omukabo kwabwe kwebiliibwa khushise eshikhoyeele? 43Noweikhabi omusumba oyo, owa omwamiwe aleetsa nanyoola nakholanga ario. 44Emuboolela tieeli mbu alimwemekha hekulu khubiosi ebia ali ninabio. 45Ne omusumba oyo naba naboola mumwoyokwe ari Omwami wanje ashindile okhwitsa; mana nachaaka okhuupa abasumba, kata abeshisaatsa kata abeshikhasi, nalia nanywa nameela; 46omwami womusumba oyo aleetsela khunyanga eya arapaa-rangakhwo ta, khandi khusaa eya aramanya ta, namukhalasia hakari ebitonye bibili, namukabila omukabokwe halala nabarasuubilwa ta.
47Ne omusumba oyo owamanya aka omwamiwe yeenya, nareerechekha kata okhukhola akeenywa ta, alakhupwa amakhupache amanji; 48nebutswa oyo ouramanya ta, nakhola akachila nakwanile amakhupache, alakhupwa amakhupache amatuutu. Oyo ouheebwa ebinji, alabanzwa ebinji; noyo owechekhwa ebinji, alabanzwa ebishilaho.
Yesu yaleera obukabukhani
(Mat. 10.34-36)
49Ndeetsa okhufuuba omulilo khushibala; ne nikuba nikumalile okhuhambibwa, eshienya shiina? 50Ne endi nende obubatisibwi obwa ekhoyile okhubatisibwa ninabwo; ne endi mumatinyu amakhongo kamakana okhuula olwa buloosibwa. 51Mukaala mbu ndeetsa okhuhaana omulembe khushialo? Emukaania, mbu tawe; habula obukabukhani; 52okhuba okhurula olwa leelo baraano abomunzu ndala balaba nibakabukhaane, bataru nende babili, kata babili nende bataru. 53Balaba nibakabukhaane, samwana nende omwanawe, kata omwana nende samwana; nyina nende omukhaanawe, kata omukhaana nende nyina; nyakhufiala nende omukhaana, kata omukhaana nende nyakhufialanyene.
Akokhunoonelesia tsinduukho
(Mat. 16.1-4; Mk. 8.11-13)
54Khandi nababoolela abemikanda ari Olwa mulolanga lileesi nilirula mumbo habwenaho muboola muri Ifula yitsa; ne kamalanga kabe kario. 55Khandi olwa mulolanga omuyeka nikurula esautsi, muboola muri Omubasu kwitsa okhuba omululu muno; ne kamalanga kabe kario. 56Inywe abeekaatii, mumanyile okhunoonelesia obukondo bweshialo nende obwelikulu; ne mubeele murie nimukorwa okhunoonelesia akeinduukho yino?
Kasia amakhuwa nende oukhwinjilila itookho
(Mat. 5.25-26)
57Ne mbushiina inywe khubweenywe nimurakhalakanga akali habwene ta? 58Okhuba olwa oba noshilondokhana nende oukhwinjilila itookho okhutsia imbeli womwami, nimushili ninaye khunjila, teema shinga olwa onyala okhukasia ninaye likhuwa; aleshe okhukhukhwesa imbeli womuyaasii, omuyaasii naye nakhuhaana mumukhono kwomusikari, omusikari nakhwibala mumbohe. 59Ekhuboolela mbu shiolirulakhwomwo khandi ta okhuula olwa oba nomalile okhurunga isende yene eyihelelesia.
ទើបបានជ្រើសរើសហើយ៖
Luka 12: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975
