Yohana 3
3
Yesu na Nikodemo
1Yaliho omundu owokhubaFarisayo oweliiralie mbu Nikodemo, omukhulundu mubaYahudi; 2omwenoyo namwitsila mushilo, namusunjila ari Rabi, khumanyile shinga olwa oli omwechesia ourula ewaNyasaye; shichila abulaho ounyala okhukhola ebilolelo bino ebia okholanga, narali Nyasaye ouli ninaye ta. 3Yesu nakalusia, namuboolela ari Toto mwene, ekhusunjila mbu omundu nareebulwa obwibulwi obuyia, shianyala okhulolakhwo obwami bwaNyasaye ta. 4Nikodemo namureeba ari Omundu anyala arie okhwibulwa nali omukofu? Anyala okhwinjila olwakhabili munda yanyina, weebulwa, noho? 5Yesu nakalusia mbu Toto mwene, ekhusunjila mbu omundu nareebulwa khulwa amatsi nende Roho, shianyala okhwinjila mbuwami bwaNyasaye ta. 6Eshiibulwa omubili shiba omubili; neshiibulwa Roho shiba roho. 7Orahuka shinga olwa ekhusunjiile mbu mukhoyile okhwibulwa obwibulwi obuyia, tawe. 8Omuyeka khuuutsanga aha kwenya, nawe ohulila oluyoka lwakwo, ne shiomanya ewa kurula kata ewa kutsia ta; nolwa ali buli mundu owibulwa khulwa Roho. 9Nikodemo nakalusia, namureeba ari Amakhuwa ako kanyalikha karie? 10Yesu nakalusia, namureeba ari Niwe omwibaali tsana waIsiraeli, ne shiohulilanga amakhuwa kano ta? 11Toto mwene, ekhusunjila mbu khuboolanga khuka khumanyile, nikhurumbula akobuloli khukeenako aka khwaluutsi; nineenywe nimurafuchiilila oburumbusi bweefwe ta. 12Nimba nimubooleele amakhuwa akomushialo, nimurasuubila ta, mulasuubila murie nimba nimuboolela akomwikulu? 13Ne abulaho owakulukha watsia mwikulu, habula omwennoyo oweekha narula mwikulu, niye Omwana wOmundu, oubeetsangaho mwikulu. 14Ne shinga Musa olwa yachinguula inzokha eyo mushitsiimi, niIwo olwa Omwana wOmundu akhoyile okhuchinguulwa ario; 15mbu omundu yesi ousuubila abe nobulamu bwobumeli muye.
16Okhuba Nyasaye yaheela muno eshialo, okhuula khukhuhaana Omwanawe omuteelwa, mbu omundu yesi oumusuubilila aleshe okhutiba, ne mbu abe nobulamu bwobumeli. 17Okhuba Nyasaye shiyaruma omwanawe mushialo okhuyaasia eshialo ta; ne mbu eshialo shihonibwe khululwe. 18Oumusuubilila shiayaasibwa ta; ourasuubila ta amalile okhukhalachilwa eshiina, shichila shiyasuubiliile eliira liOmwana omuteelwa waNyasaye ta. 19Ne obuyaasibwi bwene mbwobuno, mbu obulafu bwamala okhwitsa mushialo, nabo abandu baheela eshiilima okhushila obulafu; okhuba ebiima biabwe biali ebibii. 20Okhuba buli mundu yesi oukholanga obumayaanu akiyanga obulafu, kata shiyeetsela obulafu ta, ebiimabie bileshe okhubisulwa. 21Ne oukholanga obwatoto yeetselanga obulafu, mbu ebiimabie bifwimbulwe shinga olwa biakholelwa muNyasaye.
Yohana nende Yohana Omubatisi
22Olunyuma lwamakhuwa ako Yesu yatsia nende abeechibe mushibala shiabaYahudi; nahongayo ninabo halala, nabatisilinjiayo. 23Naye Yohana yesi yali nabatisilinjia ebweneyo eAinoni, ahambi neSalimu, okhuba amatsi kaliyo amanji; abandu nibatsiayo nibabatisibwa. 24Okhuba Yohana yali nashili okhureebwa mumbohe.
25Kho amayinje nikabuukha hakari wabeechi baYohana nende omuYahudi undi khumakhuwa kobwisiiyi. 26Nibatsia ewaYohana nibamusunjila bari Rabi, omwenoyo owa wali ninaye injelekha weYorodani, owa warumbula akobuloli khuye, lola, omundu tsana abatisinjia, nabandu bosi nabo nibatsiitsangayo. 27Yohana nakalusia, nasunga mbu Omundu shianyala okhunyoola eshindu shiosi narashiheelwe okhurula mwikulu ta. 28Inywe abeene muli abaloli banje shinga olwa ndasunga mbu isie shindi Kristo omwenoyo ta, habula mbu ndarumwa okhumuranjilila. 29Ouli nomweha neniye omwene shiselelo; ne omwitsa womwene shiselelo, ousinjilaho namuhulila, yeekhoyela muno omwoyo kwomwene shiselelo; niko akachila okhwikhoya khwanje khuno nikhuusibwa khurio. 30Ye akhoyile okhumeetekha, nasi ekhoyile okhuhweelela.
Oyo ourula mwikulu
31Oyo ourula mwikulu abeetsanga ikulu wabiosi; oyo ouli oweshialo, abeetsanga oweshialo, khandi aboolanga khukeshialo; oyo ourula mwikulu abeetsanga ikulu wabiosi. 32Aka yaluutsi nende okhuhulila, niko aka arumbulanga; ne abulaho oufuchiilila oburumbusibwe. 33Oyo owafuchiiliile oburumbusibwe yareelekhwo iseyi khwikhuwa lino, mbu Nyasaye nowatoto. 34Shichila omwenoyo owa Nyasaye yaruma aboolanga amakhuwa kaNyasaye; okhuba shiahaananga Roho khulwa eshichelo tawe. 35Samwana aheelanga Omwana, ne wamuheelesia ebindu biosi mumukhonokwe. 36Ousuubililanga Omwana ali nende obulamu bwobumeli; ne ouramuhulila Omwana ta shialalolakhwo obulamu tawe, ne oburima bwaNyasaye buba khuye.
ទើបបានជ្រើសរើសហើយ៖
Yohana 3: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975
