Yohana 2
2
Eshiselelo eKana
1Khunyanga yakhataru shialiho eshiselelo eKana muGalilaya; ne nyina Yesu yali naliho; 2naye Yesu yalangwa, nende abeechibe, mushiselelo tsana. 3Ne olwa idivai yabahweela, nyina Yesu namusunjila mbu Shibalikhwo nende idivai ta. 4Yesu namusunjila ari Mama, obeele orie ninasi? Eshise shianje shishili okhuula. 5Nyina nasunjila abakhalabani ari Elia amuboolela liosi, mulikhole. 6Ne tsialiho tsinzikha tsisasaba etsiabaatswa tsiamachina, nitsirenjekhwaho khulwa eshiima shiabaYahudi eshiokhwiyosia, buli ndala niyihela tsisiongo tsibili tsitaru. 7Yesu nababoolela ari Mwitsusie amatsi mutsinzikha. Nibatsiitsusia okhuula khululika. 8Nababoolela ari Tahekhwo bulaano, mumuyilile omwinjisii wabandu. Nibayila bario. 9Ne olwa omwinjisii wabandu yatsanzama khumatsi aka bulaano keekholile idivai, naramanya ewa karula ta, habula abakhalabani abali nibakatayile amatsi ako bamanya, omwinjisii wabandu nalanga omwene shiselelo, 10namusunjila ari Abandu bosi baranjililanga nibarenjekha idivai indayi; mana olwa abandu baba nibanyweele muno, baleeranga eyirali indayi muno ta; ne iwe obiishile idivai indayi okhuula bulaano. 11Obuchaachilo buno bwebilolelobie Yesu yabukhola eKana muGalilaya, nalolosia oluyalilwe; abeechibe nibamusuubilila.
12Olunyumakhwo yakholomokha natsia eKaperinaumu, ye omwene, nende nyina, nende abaana babwe, nende abeechibe; nibamenyayo tsindaalokhwo.
Yesu yeenjila muhehalu
(Mat. 21.12-13; Mk. 11.15-18; Lk. 19.45-46)
13Ne Pasaka yabaYahudi yali ahambi okhuula, naye Yesu natikulukha natsia eYersualemu. 14Ne muhekalu yanyoola abakusii betsing'ombe namakondi namahuusi nende abakalukhasii bamapeesa, nibeekhaale; 15mana nakhola omusharata kwetsinzaha, nabarusia bosi muhekalu, halala nende amakondi netsing'ombe, nasundula amapeesa kabakalukhasii, nafumamia tsimeesa tsiabwe; 16naboolela abakusii bamahuusi ari Yinie ebindu bino; murakhola inzu yaPapa yibe inzu yeinganga ta. 17Abeechibe nibeetsulila shinga olwa kahandiikwa, mbu Obulumilifu bweinzuyo bulandia bulia. 18Kho abaYahudi bakalusia, nibamureeba bari Neshilolelo shiina eshia okhulolosia, olwa okholanga amakhuwa kano? 19Yesu nakalusia nasunga mbu Sambulule ihekalu yino, mana mundaalo tsitaru ndalachisinjisia. 20Kho abaYahudi nibasunga bari Ihekalu yino yamala emiyika amakhumi kane nachisasaba niyumbakhungwa, nawe nochisinjisie mundaalo tsitaru? 21Ne yali naboolile khukeihekalu yomubilikwe. 22Kho mana olwa yali nalamuushe okhurula mukhufwa, abeechibe nibeetsulila shinga olwa yaboola amakhuwa ako; nibasuubila amahandiiko, nende likhuwa liene elia Yesu yali naboolile.
Yesu yamanya abandu bosi
23Ne olwa yali eYerusalemu khuPasaka, mundaalo tsielisabo, abanji basuubilila eliiralie, nibaluutsi ebilolelo ebia yakhola. 24Ne Yesu omwene shiyabasuubilila bo ta, shichila yamanya abandu bosi, 25kata shiyatamba mbu oundi amurumbulile akobuloli khukabandu ta; okhuba omwene yamanya akali mubandu.
ទើបបានជ្រើសរើសហើយ៖
Yohana 2: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975
