Umak 9
9
1Ujeso a mbee de be le, “Mi de men, ki yi faale ifung le men besuso abe ma yi naa nyin, ma ba hwa ye kpam ma gbe nde kiteng kusu Unim na ki be be le ikeb.”
Ugie-ale he ashi
(Mat 17:1-13; Luk 9:28-36)
2Ati a gbe adyọng-ken, Ujeso a kpe Ipita le Ujems le Ujọn gye le be he lishi ukwel he befe-befe be le kwu ha. Be le wu ha, be nde Ujeso a gie. 3Bigbọ bima bi keb ata-ale, bi fel bifung-bifung kpela-dada. Ki yi le undi he igye anyin angwu u shi bigbọ bi fel bifung na mbee ye. 4Bendi-utung Ujeso be nde Elaija le Umosis be fem be kọng ha Ujeso.
5Ipita a de Ujeso le, “Itisha ukandi, kiteng ashin ki ngbeb ashi li ngyọ kwu i. Tyang li li kaa bebuu bekie, kugang ken, Umosis ken, Elaija ken.” 6(Ipita a ma tem ngye ashi u kọng ye, be ma fel he kushel kaang.)
7Kibu ki be le he kusi, be shi baa Ujeso kpem. Baa Ipita be gyo lingbam Unim le ha kibu ana le, “Angwun na u yi kiken Unwa-agi angwu ki nyin mi le he. Ma gyo he.”
8Nya kukwo-kukwo, be bel ashi shun kel-kel, be tem nde undi ususo pel ha Ujeso ye.
9Nya ana be ma shul ukwel be kutan, Ujeso a tye be uten le be de undi kiwọm ashi be nde ye kpam ufe Unwaa undi-gye u gbe hwo wum. 10Be ma ndọ uten umen i. Ukpọ be maa fel bii bende be-gyang le awum-ale le he lihwu ufe a ze le ana?
11Be kung bii Ujeso le, “Kibang ki yi atan-lengi angwu bitisha Iten be de le Elaija na ki yi kpe-kpe le u be be kushu?”
12Ujeso a fan abe le, “Ki ma yi kpe-kpe le Elaija u be kushu kigyang he u be tem le biwọm puu kam. Kibang ki ma ha yi atan-lengi angwu be ma fee he kushia le mi Unwaa undi-gye mi ba kpa bingie kaang, bendi be mbee zob mi? 13Mi de men le Elaija a be ma, bendi be shi-e kiwọm ashi be kee nya ana be fee gbe le he.”
Ujeso a mbee unwa-ani ungikye angwu ikeb ibibi i yi he ahe
(Mat 17:14-21; Luk 9:37-43a)
14Be ma tem be hwaa le bendi-utung Ujeso abe be teng. Be ma nde bendi gbam be sho fe be. Bitisha Iten be ma yi sho ha, be fa ifung ha bendi-utung Ujeso. 15Nyọng bendi abena be nde Ujeso nde-nde, ki kwu abe he kuhwo kaang, be buu le kọng le he.
16Ujeso a kung bii bendi-utung bema le, “Ma fa ifung ha abe gba le kibang a?”
17Undi ken le ha liwu bendi abena a kung fan he le, “Itisha ukandi, mi be le unwa-agi hwaa le wo likọye ikeb ibibi i yi he ahe, i kwọm he umbel. 18He kunyọng kuyang-ayang ahwu i kwu-e, i sha he u mbwa he itang. U zi bihwu he ungwu putu-putu-putu, u shib ishang fe ha bende, inyia-hwo ima i kwel sem. Mi de bendi-utung begang le be ndo ikeb ibibi ana, ukpọ be ndo angi mbee ye.”
19“Men ugbe angwu u yi faale abọng-ale, mi kwu utung ha amen le kigbe na a? Ma kee le mi ngib lityam utung ha amen le kigbe na a? Ma be le unwaa ungikye umen ana ke-m.”
20Be te le he le ke-e. Ikeb ibibi angina i nde Ujeso nde-nde, i shi unwa-ani ungikye umen ana a mbu he itang. U fel mung he itang, u tim gbel, zi bihwu he ungwu putu-putu-putu.
21Ujeso a kung bii atyam unwaa angwuna le, “Ki kpi-e ki gbe kigbe na a?”
A fan he le, “Ki kpi-e kung le ha kisun a. 22Kunyọng kususo ki kwa he fa he kinde, kunyọng kususo ki kwu-e fe he lishọ he ki gwu-e. Beshi be sha-a le bel, gbe ki yi le ashi wo shi mbee kpel li.”
23Gyo Ujeso le, “Kibang a, wo tyang ityang le, gbe mi yi le ashi mi shi mbee? Biwọm puu bi yi pie-pie ke undi angwu u yi le abọng-ale ha Unim.”
24Atyam unwaa ana a gie he ungwu kaang le, “Mi bọng ha Unim, ukpọ abọng-ale ugi a dyam ye! Ha kpel mi!”
25He kunyọng ahwu Ujeso a nde le bendi be ndu die ba hwaa le be, a kung gaa fe ikeb ibibi angi i kwọm unwaa umen ana umbel le i fem le he ahe, i tem be hwaa le he ye.
26Ikeb ibibi ana i kung kaang, i shi unwaa ana a tung fọfọfọ mbu shi he itang. I ha fem be he igye. Unwaa umen ana a ma fel na likwọm na. Bendi gbam abe be ma yi ha, be fel kọng le a hwo. 27Ujeso a kung kubwo kwu-e he kubwo bo kinaa.
28Ujeso a bo gye he afee ushọm, bendi-utung bema be ha be bii he ha he kundyel le, “Kibang a, bel li ma nya ndo ikeb ibibi ana mbee ye?”
29Ujeso a fan abe le, be ndo ikeb ibibi angi kitaa ana gba he akọng-ale ha Unim ufe-ufe a.
Ujeso a kọng gbe le lihwu lima kugbe ahwu lefee
(Mat 17:22-23; Luk 9:43b-45)
30Ujeso befe le bendi-utung bema be bo le ha ana le gbe he Ugalili. Ujeso a ma kee le undi u ngye he kipi be yi ye, 31likọye a maa hwọ bendi-utung bema biwọm ha abwo. A maa bun da abe le undi u ba kung he ufe Unwaa undi-gye, ka bendi le be gwu-e. Ukpọ he liti angi lekie u ba tem wum le he lihwu. 32Ashi a ma kọng ki ma nung bendi-utung bema ye, ukpọ be ma yi le kushel na be bii he kibibi.
33Be be he kubọng ahwu be ko le Ukapanum. He kunyọng ahwu be ma yi he ushọm, Ujeso a bii abe le kibang ma yi fe ifung gbe le shi le kukwo? 34Be ma fan ye likọye be maa fa ifung le kukwo gba le undi angwu u yi ukandi hwo he liwu libel a.
35Ujeso a bel kwu ko, u de bendi-utung bema abe lihwo le be befee le be die be hwaa le he. A de be le, “Undi uyang-yang angwu a kee le u kwa kushu, u bel fel umbee-likel gbang, u fel ubọyi bendi puu.”
36A kpe unwa-ani be naa he liwu libel. U kung he wọm he abee, u de be le, 37“Undi angwu a kpe unwa-ani angwu kitaa i he lizen ligi, ha a kpe-m mi a. Undi angwu a kpe-m, ha a kpe-m mimi a ye, a kpe Ada angwu a sọm mi ọ titi.”
Undi uyang-yang angwu u yi linaa ha abel ye ha u yi ke li bel a
(Luk 9:49-50)
38Ujọn a kung de-e le, “Ukandi, li nde undi ususo u ndo ikeb ibibi le ha bendi he lizen ligang. Li swan le u ndo angi ye likọye u yi utung ha abel ye.”
39Ujeso a de-e le, “Kwom he kukwo ye, likọye undi angwu u shi bikwole-kuhwo he lizen ligi, u kọng kibibi gba le mi akikye ye. 40Undi uyang-yang angwu u yi linaa ha abel ye, ha u yi ke li bel a. 41Mi de men, kigyang-kigyang undi uyang-yang angwu a ke men umbwo ọ le ma ngwo le gbe ma yi bendi-utung begi mi Undi-likpan a, u ba kpa lifem kpe-kpe.”
Biwọm abi bi shi undi u gba limbu
(Mat 18:6-9; Luk 17:1-2)
42Ujeso a de le, “Bebwaa-ni abe be bọng ha ami nyin, gbe undi a shi abe, undi ken ọ, a shi kiban, ha ki ban kaang. A shi le be kung kukọ bikuko tye tyuu undi angwu ha he umbel le tye he umbwo ukandi, ki ngbeb hwo ashi le u shi undi u shi kiban. 43Gbe kubwo kugang ku sha-a wo shi kiban, wo tang ahwu tyang le hel. Ki ngbeb le wo kwu le likpan faale kubwo ken hwo ashi le wo kwu le abwo afee gye he kinde ashi ki nim ye ngyọ igye kpam. [44He kiteng ashina, ‘inyia angi i zi abe i hwa ye kpam, kinde ki nim ye kpam.’] 45Gbe kubee kugang ku sha-a wo gbaa limbu, wo tang ahwu tyang le hel. Ki ngbeb le wo kwu le likpan faale kubee ken hwo ashi le wo kwu le abee afee gye he kinde. [46He kiteng ashina, ‘inyia angi i zi abe i hwa ye kpam, kinde ki nim ye kpam.’] 47Gbe utọng-shi ugang na u sha-a le wo shi kiban, wo yi waa he tyang le hel. Ki ngbeb le wo gye he kiteng kusu Unim le utọng-shi ken hwo ashi le wo kwu le itọng-shi ifee gye he umọ-kinde. 48He kiteng ashina, ‘inyia angi i zi abe i hwa ye kpam, kinde ki nim ye kpam.’#9:48 Azaya 66:24
49Undi uyang-yang u ba to taa le umọ-kinde, u hwee ye na inyia angi be gbaa angi bendo.
50“Bendo be ngbeb, ukpọ gbe be tem nyin he ungwu ye, undi u nya sha abe na a he be be tem nyin? Ma kwu na bendo abe be nyin, he men ma kwu le ikwun ha bende.”
ទើបបានជ្រើសរើសហើយ៖
Umak 9: KUIL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.