Umak 8
8
Ujeso a ke bendi asi lisi kugbe lihwo lizi
(Mat 15:32-39)
1Ki gbe kigbe ye, bendi gbam be mbee be hwaa le Ujeso. Be ma yi le ashi be zi ye. Ujeso a ko bendi-utung bema de be le: 2“Bendi aben be kwu utung ha ami, ki fel ati akie. Beshi be fel sha-m le be likọye be tem yi le ashi be zi ye. 3Gbe mi de be le be ndu gye he ushu faale lizi azele be la tyan itung he kukwo likọye besuso be be le kigbe.”
4Bendi-utung bema be bii he le, “He kung nyin undi u ha nde lizi hen ugbaa-libeb angi li kpe ke bendi aben puu?”
5Ujeso a bii abe le be yi le bikem ibred bifung? Be fan he le be yi le bikem ibred bidyọng-ifee.
6A de bendi puu le be kwu ko he itang. A ha kpe ibred ana, pee Unim, kung angi bun ibun-ibun ke bendi-utung bema le be ke bendi abena. Bendi-utung bema be kpe ke be. 7Be ma mbee yi le inwaa ikwan zang. Ujeso a kung ipee ke Unim. U de bendi-utung bema le be kung angi ke bendi abena. 8Undi uyang-yang a ma zi gwul. Be gbọng bigem abi be zi bi teng, bi ma sho bitetel bidyọng-ifee. 9Bendi abe be ma zi lizi ana, be ma mbee asi lisi kugbe lihwo. Ujeso a ma de bendi abena le be ndu gye. 10A mbo ngwee he afee kinọng lishọ le bendi-utung bema bo ndo he kigie ashi be ko le Udalmanuta.
11Bendi Iferesis be be keb ifung afung-ale ha Ujeso, be kee le be gil he. Be de-e le, u shi kitaa tyung abe be ngye le Unim na a sọm he. 12Ujeso a ma shọm-ushang kaang, u bii le, “Kibang ki yi atan-lengi angwu bendi abe ati anyin be kee le be nda kitaa?” A ha de le, “Mi de men kigyang le, mi tyung amen kitaa ye.” 13Ujeso a gbe tyang abe le ngwee he kinọng lishọ gye he igbindi umbwo.
Ujeso a kọng gbe le Iyist Iferesis le Uherọd
14Bendi-utung Ujeso be ma wel kung ibred ye. Be ma kee-kee yi le kikem ibred ken a he afee kinọng kushu-kwan. 15Ujeso a de be le, “ma baa, ma kwu le kakang le ha iyist angi i shi ibred i mbwee, angi i be le ha Iferesis le Uherọd.”
16Be fel kọng ha bende le, “Ujeso a kọng ashin, le gbe li be le ibred ye a.”
17Ujeso a ma ngye ashi be kọng. A kung bii abe le, “Kibang a, ma kọng gbe le ibred angi ma be le ngi ye? Ma waa nda ọ nyọng ki nung amen ọ ye a? Ma teb atyam bee? 18Ma yi le atọng-shi, ukpọ ma nda ye a? Ma yi le atyung, ukpọ ma gyo ye a? Ma wel ye a? 19He kunyọng ahwu mi ma kung bikem ibred bidyọng bun ke bendi asi lisi kugbe lihwo le kugbe kafee le bendi asi lihwo be zi, bigem abi be ma zi bi teng bi ma sho bitetel bifung?”
Be fan he le bi ma sho bitetel lihwo le bi bifee.
20A bii abe le, “He kunyọng ahwu mi ma mbee kung bikem ibred bidyọng-ifee bun ke bendi asi lisi kugbe lihwo be zi, bigem abi be ma zi bi teng bi ma sho bitetel bifung?”
Be fan he le bi ma sho bitetel bidyọng-ifee.
21Ujeso a kung bii abe le, “Nyọng ki yi i ọ, ki wa nung amen ye a?”
Ujeso a mbee uhwọ-ashi he Ubesaida
22Ujeso befe le bendi-utung bema be be he Ubesaida. Bendi besuso be be le uhwọ-ashi ken be hwaa le he. Be tim he anung le u tyọ he kubwo. 23Ujeso a kung kubwo kwu uhwọ-ashi angwuna he kubwo gbe le he le ha ushokwo. Ujeso a kung akung sho wu-e he atọng-shi. A kung abwo pwọm he bii he le, “Wo nda ha a?”
24Ungikye ana a kung ashi gye he kusi. A kung de Ujeso le, mi nda bendi-gye be tan na ikwan na.
25Ujeso a ha mbee kung abwo pwọm he he atọng-shi. Ungikye ana, atọng-shi ama a buu, u fel nda ngwọng. 26Ujeso a de-e le u ndu gye. U tem gye he ushokwo ye.
Ipita a ko Ujeso le Ukristi
(Mat 16:13-20; Luk 9:18-21)
27Ujeso befe le bendi-utung bema be bo ndo he lishi Usesaria Filipai. Be le fel he kukwo, Ujeso a kung bii abe le, “Bendi be de le mi yi ayang a?”
28Be fan he le, “Bendi besuso be de le wo yi Ujọn angwu a maa wu bendi umbwo a. Besuso be de le wo yi Elaija a. Besuso be de le wo yi utye-ugie kisọm Unim le-iti a.”
29Ujeso a ha kung bii abe le, “Men ufe ma de le mi yi ayang a?” Ipita a kung fan le, “Wo yi Ukristi a.”
30Ujeso a ha tye be uten le be de undi gbe le he ye.
Ujeso a kọng gbe le lihwu lima
(Mat 16:21-28; Luk 9:22-27)
31Ujeso a keb bendi-utung bema biwọm ahwọ-ale le, ki yi kpe-kpe le ufe Unwaa undi-gye, u ba kpa kingie kaang. Bekandi kubọng le bekandi bishang Unim le bitisha Iten be ba swan he le he liwu libel. Be ba gwa he, ukpọ he liti lekie u tem ba wum le he lihwu. 32Ujeso a ma kọng ashin nya gboo. Ipita a ko he gye he item le swan de-e le u tem kọng na ye.
33Ujeso a bel ashi nde bendi-utung bema kung ben Ipita titi. A de-e le, “Usu bibibi, bel tang mi le he item. Ugim ugang u yi angwu undi-gye a, u yi angwu Unim a ye.”
Kukwo Kikpakpa
34Ujeso a ko liwu bendi le bendi-utung bema be he kiteng ken. A kung de be le, “Undi uyang-yang angwu a kee le u pwọm mi, u zob kuhwo-ma. U bọng lihwu kung kikpakpa ashi be maa he bee so, pwọm mi. 35Undi angwu a kee le u kpan lishi lima, ha u nim le kuhwo-ma. Undi angwu a bọng lihwu he kuhwo ahwu kugi le kisọm kinunung, na u be kwu le likpan. 36Kibang lifem angi li yi ke undi le u kwu le biwọm puu he igye anyin, ukpọ u nim kunyọng kuma? 37Kibang undi u nya be ke gie kpe kunyọng kuma? 38Undi angwu ishwia i shi-e le mi le igie igi he ugbe bendi abe be yi faale abọng-ale, be sho le biban he igye anyin, he kipi be ndọ iten Unim ye i, na ishwia i be shi-m mi Unwaa Undi-gye le he he kunyọng ahwu mi be be le ifem Atyagi le idengel igi.”
ទើបបានជ្រើសរើសហើយ៖
Umak 8: KUIL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.