Luku 3
3
Dwɔn ɛbɔ ye gyima bo
1-2Wɔ ɛvolɛ ne mɔɔ tɔ zo bulu nee nnu wɔ Belemgbunli Taebilease Siza mekɛ zo la anu, Nana Nyamenle edwɛkɛ ne radwule Zɛkalaya ara, Dwɔn, mɔɔ ɛnee wɔ fiemgbole ne azo la anwo zo. Mekɛ ɛhye anu, ɛnee Paelɛte a le Dwudiya maanle ne azo amɛnlado a; yɛɛ Hɛlɔdo a nea Galeli maanzinli ne mɔ azo a; ɔ diema Felepe, noko a nea Ayetulia nee Telakonaetɛse maanzinli ne mɔ azɛlɛ azo a; yɛɛ akee Laesɛnease noko a nea Abelin maanzinli ne azo a; na ɛnee Anase nee Kayafase a le Dwuuma Azɛlɛvolɛ Mgbanyinli ne mɔ a. 3Na Dwɔn kpɔsale vile azule Dwɔdan ne foa ko nee ye foa ko hanle edwɛkpa ne zele kɛ, ɔwɔ kɛ menli nyia anlubɛnwo na bɛsɔne bɛ amaa Nyamenle ava bɛ ɛtane ahyɛ bɛ.
4Ɛhye le edwɛkɛ mɔɔ kapezonli Ayezaya hanle dole ɛkɛ ne dɛbadɛba kɛ, “Ɛnelɛ bie ɛlɛtea nu wɔ fiemgbole ne azo kɛ, ‘Bɛziezie Awulae adenle ne anu bɛmaa ɔva zo! Bɛbukebuke ndenle ne mɔ mɔɔ deda ɔ nyunlu la anu! 5Bɛha awoka ne mɔ aze! Bɛduodua ahuma ne mɔ! Bɛdenrɛdenrɛ ɛleka mɔɔ ɛhyeɛhyea la! Na bɛbobo zo bɛmaa ɔyɛ sɛlɛsɛlɛ! 6Amaa ewiade amra anwu Ngoanedievolɛ ne mɔɔ Nana Nyamenle ɛzoa ye la.’ ”
7Edwɛkɛ ne mɔɔ Dwɔn hanle hilele menli ekpunli ekpunli ne mɔɔ rale kɛ bɛba bɛamaa yeazɔne bɛ la bie ɛne: “Bɛmɛ nwɔlɛ mralɛ! Bɛlɛbɔ mɔdenle kɛ bɛnriandi bɛavi abɔnsam senle ne anu wɔ mekɛ mɔɔ nɔhalɛ nu, bɛtɛdiele Nyamenle bɛtɛdile la! Ɛhye ati a bɛkulo kɛ bɛsɔne bɛ a! 8Bɛlumua bɛzia bɛhɔbɔ ɛbɛla mɔɔ kile kɛ amgba bɛnlu bɛ nwo la. Bɛmmadwenle kɛ Ebileham abo zo amra a le bɛ la ati, ɛnee ɔdaye ne ala ɛne. Nana Nyamenle kola kakyi ɛsɛlɛ ye azo awolɛ bɔbɔ maa bɛyɛ Ebileham abo zo amra! 9Yezi ye ndɛnebualɛ akuma ne noko yedo bɛ bo ngoko ngoko, na yeboa ɔ nwo kɛ ɔpepɛ bɛ yeagua bɛ aze. Ɔti baka biala mɔɔ anzo ma kpalɛ la ɔbapɛ ye yeado ye senle nu yeayela ye.”
10Menli dodo ne bizale ye kɛ, “Duzu a ɛkpondɛ kɛ yɛyɛ a?”
11Ɔbuale bɛ kɛ, “Saa ɛlɛ anwuma adɛladeɛ nwiɔ a, fa ko maa koahweabane mɔɔ ɛnlɛ bie la. Yɛɛ saa ɛlɛ aleɛ dɔɔnwo noko a, fa bie maa menli mɔɔ ɛhɔne ku bɛ la.”
12Adwuledievolɛma noko mɔɔ ndoloboalielɛ ɛnzea bɛ adenle la bɔbɔ rale ɛkɛ ne bie kɛ bɛbazɔne. Na bɛdabɛ noko bɛbizale ye kɛ, “Kilehilevolɛ, na kɛ ɔkɛzi ɔkɛyɛ na wɔanwu kɛ amgba yɛgyakyi ɛtaneyɛlɛ ɛ?”
13Ɔbuale bɛ ɔzele kɛ, “Bɛ nɔhalɛlilɛ ne a bahile a. Bɛmmadie adwule mɔɔ bo mɔɔ Wulomu Arane ne ɛpɛ ɛdo ɛkɛ kɛ bɛlie la azo.”
14Azogya bie mɔ noko rabizale ye kɛ, “Na yɛmɛ noko ɛ?”
Dwɔn buale bɛ zele kɛ, “Bɛmmabɔ awie mɔ apo na bɛfa kitikitiyɛlɛ bɛdie bɛ ezukoa amile nu; eza noko bɛmmapɛ ɛzonle bɛto awie abo wɔ mekɛ mɔɔ ahenle ne ɛtɛyɛle ɛtane biala la; na bɛmaa bɛ kunlu ɛdwo bɛ ahatualɛ ne anwo!”
15Ɛnee awie biala anye la kɛ ɔnrɛhyɛ biala na Kelaese ne ara. Ɛhye ati menli dɔɔnwo ne ala dwenlenle kɛ Dwɔn a le Kelaese ne a. Ɛhye yɛle huhuhuhu edwɛkɛ wɔ maanle ne anu ɛleka biala.
16Na Dwɔn hanle ye wienyi hilele bɛ kɛ, “Mame nzule mgbane ala a melɛfa meazɔne bɛ a; na awie bie li me nzi ɛlɛba mɔɔ ɔlɛ tumi kpole ɔtɛla me a; na memfɛta kɛ menwɔyɛ ye akɛlɛ bɔbɔ, yɛɛ memfɛta noko kɛ menwɔzanyi ye mgbɔlaboa nyɛma mgbane ne bɔbɔ. Na yemɔ yɛɛ ɔbava senle nee Sunsum Nwuanzanwuanza ne yeazɔne bɛ a. 17Yemɔ yɛɛ ɔbaye abɛlɛ abonle ne yeavi abɛlɛ ne anwo, na yeayela abɛlɛ abonle ne wɔ sendɔlɛra ne mɔɔ ɔnlɛ awieleɛ la anu, na yeava abɛlɛ ma ne yeazie a.” 18Akee ɔvale zɛhae ndonwo dɔɔnwo ne ala a ɔhanle Edwɛkpa ne ɔhilele menli ne a. 19-20Nzinlii mɔɔ Dwɔn dendɛle bagua nu tiale Hɛlɔdo, mɔɔ nea Galeli maanzinli ne azo, wɔ ɔ diema aye Hɛlɔdease mɔɔ ɛnee yeva ye la ati, nee ɛtane gyɛne gyɛne dɔɔnwo mɔɔ yeyɛ la noko anwo la, Hɛlɔdo hyele Dwɔn dole efiade. Ɛhye maanle Hɛlɔdo ɛtane ne akee yɛle molozo. 21Na kenle ko bie mɔɔ bɛzɔnenle menli dɔɔnwo ne ala bɛwiele la, Gyisɛse noko rale maanle bɛzɔnenle ye. Bɛzɔnenle ye bɛwiele mɔɔ ɔsɛlɛ la, anwuma maanle ne bukele wienyi, 22na Sunsum Nwuanzanwuanza ne dule hyii kɛ abubule la radwule ɔ nwo zo, na ɛnelɛ bie vi anwuma maanle ne anu zele kɛ, “Wɔmɔ a ɛle me ɛhulolɛ Ralɛ ne mɔɔ ɛsɔ me nye a.”
Gyisɛse abusua eku ne
23Mɔɔ Gyisɛse bɔle ye bagua nu gyima ne abo la, ɛnee yeli ɛvolɛ kɛyɛ abulasa.
Ɛnee awie biala ze ye kɛ ɔ ze a le Dwosefi. Dwosefi ɛhye, yemɔ ɔ ze a le Helae;
24Helae ɔ ze a le Matate; Matate ɔ ze a le Livae; Livae ɔ ze a le Mɛlekae; Mɛlekae ɔ ze a le Gyanae; Gyanae ɔ ze a le Dwosefi;
25Dwosefi ɔ ze a le Matatayase; Matatayase ɔ ze a le Emɔso; Emɔso ɔ ze a le Neehum; Neehum ɔ ze a le Ɛselae; Ɛselae ɔ ze a le Nagae;
26Nagae ɔ ze a le Meeyate; Meeyate ɔ ze a le Matatayase; Matatayase ɔ ze a le Semɛyɔn; Semɛyɔn ɔ ze a le Dwosɛke; Dwosɛke ɔ ze a le Dwoda;
27Dwoda ɔ ze a le Dwowanan; Dwowanan ɔ ze a le Rilisa; Rilisa ɔ ze a le Zɛlubabɛle; Zɛlubabɛle ɔ ze a le Hyealeteɛle; Hyealeteɛle ɔ ze a le Nilae;
28Nilae ɔ ze a le Mɛlekae; Mɛlekae ɔ ze a le Asa; Asa ɔ ze a le Kosam; Kosam ɔ ze a le Ɛlemadam; Ɛlemadam ɔ ze a le Ɛɛ;
29Ɛɛ ɔ ze a le Dwɔhyua; Dwɔhyua ɔ ze a le Ɛleyizɛ; Ɛleyizɛ ɔ ze a le Dwolem; Dwolem ɔ ze a le Matate; Matate ɔ ze a le Livae;
30Livae ɔ ze a le Semɛyɔn; Semɛyɔn ɔ ze a le Dwuda; Dwuda ɔ ze a le Dwosefi; Dwosefi ɔ ze a le Dwonam; Dwonam ɔ ze a le Yilayakem;
31Yilayakem ɔ ze a le Mɛlɛya; Mɛlɛya ɔ ze a le Mina; Mina ɔ ze a le Matata; Matata ɔ ze a le Neetan; Neetan ɔ ze a le Devidi;
32Devidi ɔ ze a le Gyɛsi; Gyɛsi ɔ ze a le Obɛde; Obɛde ɔ ze a le Bowaze; Bowaze ɔ ze a le Salemɔn; Salemɔn ɔ ze a le Nahyɔn;
33Nahyɔn ɔ ze a le Amenadabe; Amenadabe ɔ ze a le Ademen; Ademen ɔ ze a le Aanae; Aanae ɔ ze a le Hɛzelɔn; Hɛzelɔn ɔ ze a le Pɛlɛze; Pɛlɛze ɔ ze a le Dwuda;
34Dwuda ɔ ze a le Gyekɔbo; Gyekɔbo ɔ ze a le Ayezeke; Ayezeke ɔ ze a le Ebileham; Ebileham ɔ ze a le Tɛla; Tɛla ɔ ze a le Neehɔ;
35Neehɔ ɔ ze a le Sɛlɛge; Sɛlɛge ɔ ze a le Riliyu; Riliyu ɔ ze a le Pɛlɛge; Pɛlɛge ɔ ze a le Yibɛ; Yibɛ ɔ ze a le Hyɛla;
36Hyɛla ɔ ze a le Keenan; Keenan ɔ ze a le Aafazade; Aafazade ɔ ze a le Hyɛm; Hyɛm ɔ ze a le Nowa; Nowa ɔ ze a le Leemɛke;
37Leemɛke ɔ ze a le Matusɛla; Matusɛla ɔ ze a le Yinɔko; Yinɔko ɔ ze a le Gyɛlɛde; Gyɛlɛde ɔ ze a le Mahalɛli; Mahalɛli ɔ ze a le Kinan;
38Kinan ɔ ze a le Yinɔhye; Yinɔhye ɔ ze a le Sɛte; Sɛte ɔ ze a le Adam; Yɛɛ Adam ɔdaye ɔ ze a le Nana Nyamenle.
ទើបបានជ្រើសរើសហើយ៖
Luku 3: ONEN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Nzema Word of Life Gospels and Psalms™
Copyright © 1984 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
