Málúkus 9
9
1Yésuse andá kɔ́ɔ́p ɛ́ɛ́: «Kémuémue, yɔ́nuɔ́yɔn ɛ́ɛ́ ɛ́ pɛɛnd pɛ́nyɛɛ́ akɛ, pómotí tíékú kati ɛ́ɛ́ pɛ́mɛ́ɛ́n Pufuŋ pú Támbák mépítíínyi na pukaaka.»
Yésus ménúki
(Mat 17.1-9; Lúk 9.28-36; 2Pi 1.17-18)
2Metúk mátíndatɔ́ mɛɛl mátápukan, Yésuse wɔɔkɔ́l nɛ Píɛl na Sáak ni Isáaŋ, pɔ́ɔ pééŋényí, waayɔɔk nɔɔpɔ́ kɔ́ ɔkɛ́l ómotí úmaápá manyáŋ kányaŋ. Pɛ́nyɛɛsɛɛ́ŋɛ́lɛ́t kɔ́ɔk; weenúkinyi pɔ́ɔ ké eŋis. 3Indífunɔ́ síɛ́yɛ́ síond ɛ́ kumuɛnyɛ na pukaaka, sífúúma tɛɛ. Mɔɔnd tipá e kúúsí ukufúúmi indífɔnɔ́ nɔ. 4Popíónyí peem pátát mɛɛl pɛ́ɛ́ninɛ waa! Ne Eli no Moyíis máámɛn pɔ́ɔ, pakála ne Yésus. 5Píɛlɛ wɔɔkɔ́l nukal, wɔ́ é Yésus ɛ́ɛ́: «Oŋónyóonyi, púnyɛ peseé ɛ́ɛ́ tupá akɛ; ɛ́nyɛɛ́ túwáák muansɛ mútát: yááwɔ ímóómí, í Moyíis ímoómí, í Eli ímoómí.» 6Utimemenyen epú wɔ́ɔ́yitɛ́ɛ, á kiákí ɛ́ɛ́ puwaá mapá puɛtíkɛ́n wɔ́ nɔ pɔsɔ́k popíónyée. 7Kilɔndɔ́ kíélindik pɔ́ɔ. Ekelú ú Támbák wóólin ɔ́ kilɔndɔ́, wɔ́ɔyɔ ɛ́ɛ́: «Índɛ́ muɔ́nɔ́ áámɛ u ɔtɛ́m ewe. Ɔ́nuɔ́pínɔ́n wɔ!» 8Nɔ niɔ́kɔ́tɔ́n popíónyí óómbin eŋise, tɛ ɛ́ɛ́ páand kuɛ́n mɔɔnd, ɛsiɛ́ Yésuse ne Yésuse wééŋényí nɔɔpɔ́. 9Pɛ́mɛɛ́l pákanyɛɛ́ eselen ɔkɛ́l, Yésuse kɔ́ɔ́p ɛ́ɛ́ pɔ́tiɔyítɛ́n mɔɔnd epú pɛ́mɛ́nyɛɛ́n, kuám aká Muɔ́nɔ́ u mɔɔnd ɛ́nyɛ́ɛ́nyukɛnɛ́ á pilɔ́ŋ. 10Pɛ́ɛ́nɛk kikotí kikáánɛ́, pópíówon kɔk pɔ́ɔ nɔ pɔ́ɔ: «Kiákí waambanɛ́ kuɔyɛt ó pusíó pú kuɛnyɔk á pilɔ́ŋ?»
Maayɔ́ móóyoosoné Elie
(Mat 17.10-13)
11Popíónyí póówun Yésuse ɛ́ɛ́: «Kiákɛ́ pemenyípikotí ɛ́ɛ́lɛnɛ́ɛ ɛ́ɛ́ Elie útúánɛɛ́ kuol?» 12Wɔ́ kɔ́ɔ́p ɛ́ɛ́: «púnyɛ nɔ, Elie utuánanɛ́ kuol, é kuténikenyi mandá meem. Kiákɛ́ kɔ́ɔk Mekélíe má Támbák ɛ́ɛ́lɛnɛ́ɛ ɛ́ɛ́ Muɔ́nɔ́ u mɔɔnd ɛ́ɛ́kɛɛsikɛnɛn kuɛ́n iŋɛ́n, póond pɛ́yɛɛnɛ wɔ? 13Iŋúɛ yɛɛ́pí káánɔ́ é kémuémue ɛ́ɛ́ Eli mamaná kuol, pɛ́ɛl nɛɛyɛ́ aná itɛ́m síɔ́p mɔɔ́yɔ, yá aná púnyɛɛ́ puɔ́ŋɔ́n é Mekélíe má Támbák kɛ́ɛ́yɛ́ ó pusíó.»
Yésus mééŋúkí muúŋayɔ́
(Mat 17.14-21; Lúk 9.37-43)
14Ne Yésus no popíónyí epe pátátɔ́ mɛ́ɛl páásiámán mekúye no popíónyí pólotí, pɛ́ɛ́n kitɔɔt kí pɛɛnd kikéŋélényí pɔ́ɔ, pemenyípikotí pekenyipekenyi nɔɔpɔ́. 15Pɛɛnd mɛɛlɛ́ pɛ́ɛ́nɛn Yésuse, peem símile Pɔ́pínɔtikɔn Yésuse é kuepíkélíkélí wɔ. 16Ukanyi ó popíónyí pakáánɛ́ ɛ́ɛ́: «Kiákɛ́ nupekenyipekenyé á kɛ́ɛ nɔɔpɔ́?» 17Mɔɔnd omotí ké embúl woondinyi wɔ́ ɛ́ɛ́: «Oŋónyóonyi, insiokuólin nɔ kinɔ́k kíámɛ: unyi ne kiliínditíe kí pumélée. 18Kíɛ́kɛɛtikɛn wɔ́ tɛ náánɛ́ tɛ náánɛ́, kítíá wɔ, imbús ááman wɔ́ é niít, upípanda eŋiŋ, ulɔnd. Yɛɛ́pi ó popíónyí pááwɔ ɛ́ɛ́ pákúúŋɛt kɛ́ɛ, tɛ ɛ́ɛ́ pɔ́ɔ́tɛ.» 19Yésuse kɔ́ɔ́p ɛ́ɛ́: «panɔ́ pɛɛnd pí ínanɔ nunyɛ katɛ pipíóndínyí ɔtɛ́m, iŋenuésepenyi kuám níík? Ímbá naanɔ́ kuám níík? Ónuŋólín nɛɛyɛ́.» 20Póólin wɔ́ nɛɛyɛ́. Kiliínditíe mɛɛlɛ́ kíɛ́nɛn Yésuse, kíond á kusata muúŋayɔ́, kíátíá wɔ́ e kúúsí, upíŋile, imbús ááman wɔ́ é niít. 21Woówun sí muúŋayɔ́ ɛ́ɛ́: «Púmetúúm wɔ́ níík?» Wɔ́ kɛ́ɛ́yɛ́ ɛ́ɛ́: «Ni puúpayúɛ. 22Kiliínditíe nyɛ kátíkátɛ́ kitíá wɔ́ é yiik púnyaánɛ ó moomb ɔ́ kuɔ́n wɔ. Índɛ anyi ukuɛl puandá, túɛ́n ɔsɔk, túɔ́kɔ́.» 23Yésuse kɛ́ɛ́yɛ́ ɛ́ɛ́: «Kiákɛ́ ɔɔyɔnɛ́ ɛ́ɛ́ índɛ anyi ukuɛl? Eéleme ɛ́ɛ́ puandá púkumɛl tipá índɛ pipíóndínyí ɔtɛ́m nyɛ kɔ́ɔk á?» 24Nɔ niɔ́kɔ́tɔ́n sí muúŋayɔ́ woopókit, wɔ́ ɛ́ɛ́: «Yoópíóndonyi ɔ́tɛ́m! íŋɔkɔ́ káámɛ kí imfɛ́lɔ!» 25Yésus mɛɛlɛ́ wɛɛ́nɛn ɛ́ɛ́ embúl úmeépikeŋelenyí pɔ́ ɔ́ɔ́kɔmbɔ, waánsitɛn kilɔk kí kiliínditíe. Wɔ́ á kí ɛ́ɛ́: «Aŋúɛ kiliínditíé kí pumélée, yɛɛ́pi kááwɔ ɛ́ɛ́ ám ɔ́ nuɔ́l nú muúŋayɔ́ ewe, tɛ puɔ́s atiand kuond!» 26Kilɔk kí kiliínditíé kíɔ́mbɔlɛt, kíáyúkɛt muúŋayɔ́ na pukaaka, kiond kiám. Muúŋayɔ́ wasambimɛt ɛlɛɛ́ kiku. Pɛɛnd póond ɔ́ kuɔyɔ ɛ́ɛ́: «Umékú.» 27Yésuse wɛɛtikɛn wɔ́ kɔ́ ɔmbɔk, weetukenyi wɔ. Muúŋayɔ́ tené. 28Yésus mɛɛlɛ́ upíken á kiansi, ɛsɛɛ́ŋɛ́lítɛ́n no popíónyí pɛ́ɛ́yɛ́, póówun wɔ́ ɛ́ɛ́: «Kiákɛ́ pasɔ́ túmɛ́nyɛɛ́lɛ́ tutiɔ́t kukúúŋɛt kiliínditíe ekínée?» 29Wɔ kɔ́ɔ́p ɛ́ɛ́: «Imbísókólí yééŋényí ikúúŋanɛ́ kiliínditíé asɛ kikáánɛ́.»
Yésus météékí kúkáandíɛ́ nikú níɛ́yɛ́ nɛ kuɛnyɔk kúɛ́yɛ́ á pilɔ́ŋ
(Mat 17.22-23; Lúk 9.43-45)
30Ne Yésus no popíónyí pɛ́ɛ́yɛ́ páátɔk akáánɛ́. Pɛ́mɛɛlɛ́ pámaásaapan kitɔŋ kí Kalilée, Yésus tiambá ɛ́ɛ́ pɛɛnd meny; 31á kiákí ɛ́ɛ́ umapá woónyonyi popíónyí pɛ́ɛ́yɛ́, wɔɔyɔn pɔ́ ɛ́ɛ́: «Pákanukɛn Muɔ́nɔ́ u mɔɔnd ikɔ́n; pɛ́ɛ́tikɛn wɔ́, pééki wɔ́ kí imbɔk sí pɛɛnd, pɔ́ɔ́n wɔ. Ká átátúɛ wɛɛyɛ́, wɛ́ɛ́nyɔk á pilɔ́ŋ.» 32Nukál nukáánɛ́ kɔk popíónyí timɔ́ɔ́pɔn nɔ, petííne kuówun wɔ.
Opíónyí unín utápukanɛ́ pɔsɔ́k
(Mat 18.1-5; Lúk 9.46-48)
33Ne Yésus no popíónyí pɛ́ɛ́yɛ́ pááyɔɔk á pálɛ́k pápílanɛ́ ɛ́ɛ́ Kafalnawúum. Páámán á nuya, Yésuse woówun pɔ́ ɛ́ɛ́: «Kiákɛ́ nuólé núpekenyipekenyi kí iŋilí?» 34Pééluŋ, pɔ́ɔ́n wɔ́ insú, á kiákí ɛ́ɛ́ kí iŋilí pómoól pépekenyipekenyí é kumeny kɔ́ɔ́p ɔ́ kiɔ́p ewú utápukanɛ́ pɔsɔ́k. 35Yésuse wɔɔnyɔ́mbɛt, waapílikɛn Pápáátanapáandíɛ. Wɔ́ kɔ́ɔ́p ɛ́ɛ́: «Índɛ mɔɔnd áákamba ɛ́ɛ́ upá ɔkɔ́n waanɔ́, wɛɛ́kɛɛsikɛnɛn kupíkɔ́l asɛ kinsúkinye ne eŋelípuólí u pɔ́kúɔ́p peem.» 36Wɔɔkɔ́l yiípáyúpáyɔ́, weetényikenyi yíi kɔ́ɔ́p ó pusíó; umɛɛlɛ́ úmɔ́ɔ́kɔ́l wɔ́ kisas, wɔ́ kɔ́ɔ́p ɛ́ɛ́: 37«Mɔɔnd kitikit ukɔ́lɔnɛ́ muúŋayɔ́ asɛ ewe na anyamɔ́ káámɛ ó pusíó, úmenyi ɛ́ɛ́ niŋúɛ úmɔ́nyiŋɔ́l peseé; ewú úmɔ́nyiŋɔ́l ne peseé úmenyi ɛ́ɛ́ pútipá iŋúɛ úmɔ́nyikɔ́l peseé, umɔ́kɔ́l muɛ́t umiíndɔ́m ne peseé.»
Mɔɔndɔ utiányípá utúnuenesi nyɛ káásɔ́ á kiáyí
(Lúk 9.49-50)
38Isáaŋ ɛ́ɛ́pi é Yésus ɛ́ɛ́: «Oŋónyóonyi, tusiɛ́n mɔɔnd kúúŋa pilɔk pí piliínditíe ɛ́ kisiɛ́n kíáwɔ, tumápímák kukány ɛ́ɛ́ utiandá kuɛl anakáánɛ́ á kiákí ɛ́ɛ́ utipá káásɔ́ ké embul.» 39Wɔ́ kɔ́ɔ́p ɛ́ɛ́: «Nutikákány kɛ́ɛ́yɛ́, á kiákí ɛ́ɛ́ mɔɔnd tipá ukuɛl kisey ɛ́ kisiɛ́n kíámɛ woond kɔ́ɔk nɔ kɔ́ɔk á kuŋgálan kilɔk. 40Mɔɔnd utiányípá utúnuenesi nyɛ káásɔ á kiáyí. 41Ewú ne ewú ukaányínúfá kiláas kí moomb má kupúwa ɛ́ɛ́ nunyɛ pɛɛnd pé Kilíis, yɔɔ́núɔ́yɔn kémuémue ɛ́ɛ́ utíákaáyɛ́n pinamá.»
Yésus ékeekenyi kumenyi
(Mat 18.6-11; Lúk 17.1-2)
42«Mɔɔnd uményineeni yiípáyúpayɔ́ táŋ ímoómí é peépé popíóndonyé itɛ́m náámɛ ɛ́ɛ́ ítiŋɔ́pɛ́n, mɔɔnd ukáánɛ́ ányípia inséésítényí itápukanɛ́ eyí inyɛ́ ɛ́ɛ́ pátɔŋ wɔ́ kinɔ́m kí nitányí á kimɛn póombin wɔ́ ká asaá. 43Índɛ ɔmbɔk wááwɔ úkukusenyé kikotí, sɔ́mb wɔ. Peseé ɛ́ɛ́ épíkin nɔ ɔmbɔ́k ómoómí ɔ́ kusɔ́t kú teeníík, kutápɔk ɛ́ɛ́ áyɔɔk é yiik í tenííkée, ítiányípá iwéen, ni imbɔ́k síáwɔ siim íyáandɛ́. [ 44#9.44 Tipá e piénsi pɔmɔɔŋɔ ni imbɔk.] 45Índɛ kikɔ́nd kíáwɔ kíkukusenyé kikotí, sɔ́mb kɛ́ɛ. Peseé ɛ́ɛ́ épíkin nɔ kikɔ́nd kímoómí ɔ́ kusɔ́t kú teeníík, kutápɔk ɛ́ɛ́ pákutɔ́ɔt é yiik í tenííkée nɔ pikɔ́nd píáwɔ piim píandɛ́. [46#9.46 Tipá e piénsi pɔmɔɔŋɔ ni imbɔk.] 47Índɛ nííns níáwɔ níkukusenyé kikotí, sɔ́k nɛ́ɛ. Peseé ɛ́ɛ́ épíkin é Pufuŋ pú Támbák ne nííns nímoómí, kutápɔk ɛ́ɛ́ pákutɔ́ɔt é yiik í tenííkée ne eŋís yááwɔ yeem áandɛ́, 48kɔ́ɔm piind tiányípá píkúen, yiik tiwéen. 49Siki mɔɔndɛ áátápukanɛn é yiik í yɔɔ́pitɛn é kélém ɛ́ úpá asukúná. 50Índɛ Masɔk sasɔl, tiɛkiɛ́ ɛnyɛɛ́ pɛ́kuɛl á kuanda kuondi etuu wɛ́ɛ́yɛ́? Ánupá peseé ɛlɛɛ́ masɔk, núond núsɔ́tɔn é kiyééwe panɔ́ na panuɛ́.»
ទើបបានជ្រើសរើសហើយ៖
Málúkus 9: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL