Málúkus 8
8
Yésus mátáaŋ pɛɛnd tukɔ́n tuni
(Mat 15.32-39; Mál 6.30-44)
1Ɔ́ mɔɔ́sɛ́ makáánɛ́, kiandákáand kí kitɔɔt kí pɛɛnd kíand apíkúsikan. Aná pɛ́mɛɛ́lɛ́ pátipián púkunya, Yésuse waapílikɛn popíónyí pɛ́ɛ́yɛ́, wɔ́ kɔ́ɔ́p ɛ́ɛ́: 2«Embúl ú pɛɛnd ewe ɛ́ɛ́kiŋɛlɛ ɔsɔk, á kiákí ɛ́ɛ́ úkanyɛ naamɛ metúk mátátɔ, nínúan útipá na púkunya. 3Índɛ insiekúúki wɔ́ ni nsaná é nipundí, pákaná akúndan kí iŋilí; á kiákí ɛ́ɛ́ pómotí óólínón kaáyɛ.» 4Popíónyí pɛ́ɛ́yɛ́ póondinyi wɔ́ ɛ́ɛ́: «Akɛ ɔ́ kiɔ́sɔ́kɔ́líɔ túɛ́n naánɛ́ pilɛ́ɛt pí kunyísi pɔ́ ɛ́ɛ́ póoy?» 5Wɔ́ kɔ́ɔ́p ɛ́ɛ́: «Nunyi na píi pínɛk?» Pɔ́ kɛ́ɛ́yɛ́ ɛ́ɛ́: «Pítíndatɔ́ neémue.» 6Wɔɔyitɛn pɛɛnd ɛ́ɛ́ pɔ́nyɔ́mbitɔn e kúúsí. Wɔɔkɔ́l pilɛ́ɛt piim pitíndatɔ́ neémue, weelémbi Támbákɛ́ɛ, wɛɛkɛɛ́ns pilɛ́ɛt piim, weeki popíónyí ɛ́ɛ́ páapan pɛɛnd. Páaman kuapan pɔ́ peem. 7Pámapián andíkɛ́k paán pɔ́ pinsɔpɔ́. Yésuse wɔɔkɔ́l pɔ́ɔ waand elémbi Támbákɛ́ɛ, weeki popíónyí ɛ́ɛ́ páapan pɛɛnd. 8Pɛɛnd páánya, póókooy. Emú mumɛɛ́pɛk, popíónyí póówóónyi musáŋ mutíndatɔ́ neémue. 9Pɛɛnd pámaányan mapá pákuam tukɔ́n tuni. Yésuse weekúúki pɔ. 10Ukúúkesi pɔ́ɔ, waamákat ó kitóóŋ no popíónyí pɛ́ɛ́yɛ́ waayɔɔk ɔ́ kitɔŋ kisiɛ́n ɛ́ɛ́ Talmanúta.
Yésus móóm Pafalisiɛ́ŋ pulinsí
(Mat 12.38-39; 16.1-4; Lúk 11.16-29; 12.54-56)
11Pafalisiɛ́ŋ pásiám, pɔ́ na manyíkínínɛ. Póond é kupekenyipekenyi nɛɛyɛ́. Pɔ́ kɛ́ɛ́yɛ́ ɛ́ɛ́: «Tútíínyí pulinsí ɛ́ɛ́ oókoólinon mɛnɛ́mɛnɛ́ɛ.» 12Weélumit mɔkɔ́n, wɔ́ ɛ́ɛ́: «Ó pusíó pú kiákɛ́ nipakɛ́ enie óówoné pulinsí? Kémuémue yɔɔ́nuɔ́yɔn ɛ́ɛ́ tɛ pulinsí púmoómí nipakɛ́ enie tíápiá.» 13Waapíátɔn pɔ, waand amákat ó kitóóŋ á kuyɔɔk asáá nakɔn.
Pulelé pú popíónyí
(Mat 16.5-12; Lúk 12.1)
14Popíónyí mepíélítí kukɔ́l pilɛ́ɛt, páápíyuukɛn táŋ kímoómí ó kitóóŋ. 15Yésus súŋa pɔ́, wɔɔyɔ kɔ́ɔ́p ɛ́ɛ́: «Yɔɔ́núɔ́yɔn, ánupíkííká kinyútukie kí Pafalisiɛ́ŋ ne Elóot.» 16Póond é kupekenyipekenyi pɔ́ɔ nɔ pɔ́ɔ á kiákí ɛ́ɛ́ pámapítááká ɛ́ɛ́ Yésus áákála nɔ́ ó pusíó ɛ́ɛ́ pátimapíyuukɛn pilɛ́ɛt. 17Yésuse weepílinsikenyi aná pémeépekenyipekenyi. Wɔ́ kɔ́ɔ́p ɛ́ɛ́: «Kiákɛ́ nupekenyipekenyé nupítááka ɛ́ɛ́ imɔ́ɔ́yɛ́t nɔ́ ɛ́ɛ́ nutimáápíyuukɛn pilɛ́ɛt? Numanyɛ nutiɔ́p á? numanyɛ nutipílinsíkenyí á? Meéne máánɔ́ nyɛ mapɛt á? 18Panɔ́ ne eŋis nutiɛ́n á? Panɔ́ ni itú nutiɔ́p á? Nutipá nupítááka 19aná imaátááŋ pɛɛnd tukɔ́n tutáan nɛ pilɛ́ɛt pitáan á? Musáŋ múnɛ́k numoówóónyí ne piénsi pí pilɛ́ɛt pimeésíén?» Pɔ́ɔ kɛ́ɛ́yɛ́ ɛ́ɛ́: «Musáŋ múát na múandɛ́.» 20Wɔ́ andá ɛ́ɛ́: «Aká imɛ́ɛ́ns pilɛ́ɛt pítíndatɔ́ neémue á kutáaŋ pɛɛnd tukɔ́n tuni, musáŋ múnɛ́k numoówóónyí ne piénsi pí pilɛ́ɛt?» Pɔ́ɔ kɛ́ɛ́yɛ́ ɛ́ɛ́: «Mútíndatɔ́ neémue.» 21Wɔ́ kɔ́ɔ́p ɛ́ɛ́: «Tɛ anakáánɛ́ Numanyi nutiɔ́p á?»
Yésus mééŋúkí epútepute
22Ne Yésus no popíónyí pɛ́ɛ́yɛ́ péényekíl Pɛtisayíta. Póólin wɔ́ ne epútepute, póópísokoliti wɔ́ ɛ́ɛ́ úpíkíik wɔ. 23Wɔɔkɔ́l epútepute kɔ́ ɔmbɔk, waakaám nɛɛyɛ́ Pɛtisayíta. Waakaák wɔ́ pitelu ké eŋis woond weekíik wɔ́ ni imbɔk; wɔ́ kɛ́ɛ́yɛ́ ɛ́ɛ́: «Ɛɛ́kɛɛ́nɛn puandá á?» 24Epútepute woómbun eŋis, wɔ́ ɛ́ɛ́: «Yɛɛ́kɛɛ́nɛn pɛɛnd, pányɛ ɛlɛɛ́ matɛ́, maná pɛ́ɛ́kɛndɛ.» 25Yésuse waand ekíik wɔ́ ké eŋis ni imbɔk; epútepute woond ɛ́ kuɛ́nɛn, weéŋuk. Woond ɛ́ kuɛ́nɛn peseékepese. 26Yésuse weekúúki wɔ. Wɔ́ kɛ́ɛ́yɛ́ ɛ́ɛ́: «Etipitíínyí ɛ́ pɛɛnd.»
Píɛl mémenyí ɛ́ɛ́ Yésuse unyɛɛ́ Kilíis, Osóti
(Mat 16.13-20; Lúk 9.18-21)
27Yésuse waayɔɔk ɔlɔŋ no popíónyí pɛ́ɛ́yɛ́ á mukɔnd múkéŋelenyé pálɛ́k pápilanɛ́ ɛ́ɛ́ Sesalé u Fílip. Pɛ́mɛɛlɛ́ pámanyi kí iŋilí, woówun pɔ́ ɛ́ɛ́: «Pɛɛnd ɛ́kɛɛlɛɛ́ iŋúɛ inyɛɛ́ ɛ́nyɛ?» 28Pɔ́ kɛ́ɛ́yɛ́ ɛ́ɛ́: «Epe ɛ́kɛɛlɛɛ́ Isáaŋɛ Etuúsí, pómotí Elie, pólotí eŋémímekélíe má Támbák omotí u insúá.» 29Woówun pɔ́ ɛ́ɛ́: «panɔ́ kɔk nuɛ́kɛɛlɛɛ́ inyɛ ɛ́nyɛ́?» Piɛ́lɛ kɛ́ɛ́yɛ́ ɛ́ɛ́: «Anyi Kilíise, Osótí Támbák maátɔ́m.» 30Yésuse weelúndi ekelú waakány nɔɔpɔ́ ɛ́ɛ́ pɔ́tiɔyítɛ́n mɔɔnd epú unyɛɛ́.
Yésus météékí nikú níɛ́yɛ́ nɛ kuɛnyɔk kúɛ́yɛ́ á pilɔ́ŋ
(Mat 16.21-23; Lúk 9.22)
31Yésuse woond ó kuónyonyi popíónyí pɛ́ɛ́yɛ́ wɔɔyɔn pɔ́ ɛ́ɛ́: «Púɛ́kɛɛsikɛnɛn ɛ́ɛ́ Muɔ́nɔ́ u mɔɔnd ɛ́ɛ́n muyú táásɛ, pɔkɔ́n pɔ́ kitɔŋ na pafunɔ́fɔn pɔɔkɔ́n ne pemenyípikotí písáŋɔn wɔ́ póond pɔ́ɔ́n wɔ; puɔ́s pú kátátuɛ wɛ́ɛ́nyɔk á pilɔ́ŋ». 32Ukálan pɔ́ paásípaás. Píɛ́lɛ wɔɔkɔ́l Yésuse kí insumbú, woond ɛ́ kutɛ́mbɛlɛn wɔ́ kɛ́ɛ́yɛ́ á tukál. 33Yésuse wɛɛpíkɛkɛlɛt, wooyoosin popíónyí pɛ́ɛ́yɛ́, wɔɔpíkɔ́l Píɛlɛ; wɔ́ kɛ́ɛ́yɛ́ ɛ́ɛ́: «Íŋatɔ́k akɛ Sáátan, á kiákí ɛ́ɛ́ imbítáákítɛ́n síáwɔ nyɛ sí mɔɔnd, sítipá sílumenen na sí Támbák.»
Tiɛkiɛ́ pɔ́ɔ́ŋɔnɛ́ é Yésus
(Mat 16.24-28; Lúk 9.23-27)
34Yésuse waapílikɛn popíónyí pɛ́ɛ́yɛ́ ne embul, wɔ́ kɔ́ɔ́p ɛ́ɛ́: «Ewú waambanɛ́ kuɛndɛ káámɛ ká ambaná, ɛ́ɛ́kɛɛsikɛnɛn ɛ́ɛ́ úpísáŋɔn wɔ́ muɛt wóond úpítúúkɛn kolóse wɛɛyɛ́, wɔ́ɔŋ káámɛ. 35Á kiákí ɛ́ɛ́ ewú waambanɛ́ kusóti kusɔ́t kúɛ́yɛ́ ényínyími kɔ; Maná ewú waányááyinɛ́ kusɔ́t kú kúúsí káámɛ ó pusíó, áányítáŋap kusɔ́t kú teeníík. 36Índɛ mɔɔnd siatáŋap punɛ́m pú kúúsí kitikit woond unyími kusɔ́t kúɛ́yɛ́, ɛsiɛ́ umɛ́ɛ́l kiákí? 37Kasí áandɛ́ɛ mɔɔnd nyɛ kueki á kutáŋap kusɔ́t? 38Á kiákí ɛ́ɛ́ mɔɔnd wɔɔ́pɔnɛ́ ɛtɔ́ kunúa naamɛ ne mekélíe máámɛ ké éŋis yɛ pɛɛnd pí ínanɔ péfénené Támbákɛ́ɛ, Muɔ́nɔ́ u mɔɔnd kɛ́kɛ́ɛ́yɛ́ ɔ́nyɔ́ɔ́pɔ ɛtɔ́ kunúa nɛɛyɛ́ aká woónyoóloné é nuúmu nú Síí ɔlɔŋ na pifúúmak pí Peéŋele.»
ទើបបានជ្រើសរើសហើយ៖
Málúkus 8: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL