Málúkus 10
10
Epú púyoosoné nuɔ́ndɔ́n
(Mat 19.1-9; Lúk 16.18)
1Yésuse waatɔk akáánɛ waayɔɔk ɔ́ kitɔŋ kí Yúta, waasaapɛn nakúnɛ u Sulutɛ́ŋ. Pɛɛnd páand apíkúsikan, pekéŋeliti wɔ; woond ó kuónyonyi pɔ tuɛyítuɛyɛ́ɛ. 2Pafalisiɛ́ŋ pómotí péépísíítin wɔ, póókoówun wɔ́, ɔ́ kutɔ́lɛk wɔ, índɛ mɔɔnd nyɛ pákuátukan na akány. 3wɔ́ kɔ́ɔ́p ɛ́ɛ́: «Ó pikotí epí Moyíis meénúéki, umɛɛl káánɔ́ ɛ́ɛ́ kiákí?» 4Pɔ́ɔ ɛ́ɛ́: «Moyíis meekí pukaaka ɛ́ɛ́ mɔɔnd ɔ́ɔ́ŋ ɔmbɔp ú kiátukana maná weémi akány.» 5wɔ́ kɔ́ɔ́p ɛ́ɛ́: «Moyíis mɔnuɔ́ŋɛ́n kikotí kikáánɛ́ káánɔ́ kí itɛ́m kulal. 6É kutum, aká Támbák maáluŋá kúúsí, Mekélíe ɔ́ɔ́kɔɔyɔ ɛ́ɛ́: Támbákɛ́ɛ walɔŋ nɛ ɛnúmɛndɔ́ na akáandɔ́; 7púupú ɛnúmɛndɔ́ ányáátukanɛ́ á kiansi kí sí no yóótí, upílat akány, 8peem páandɛ́ ɛ́ɛ́yi kiluŋaluŋa táŋ kímoómí. Anakáánɛ́ kunyɛɛ́ pátikápá piluŋaluŋa píandɛ́, pákanyi kiluŋaluŋa táŋ kímoómí. 9Mɔɔnd tiátɔ́n kɔk epú Támbák maálata.» 10Pɛ́mɛɛl pákany á nuya, popíónyí páákand kuond ɛ́ puɛ́tɛ puónyi, póówon Yésuse iŋówúnín. 11wɔ́ kɔ́ɔ́p ɛ́ɛ́: «Índɛ mɔɔnd siémi akány, woond upítikɛn olotí, isɔm ikáánɛ́; 12índɛ akáandɔ́ siapíátɔn ɔnɛ́m, woond uyɔɔk ɔ́ nuɔ́ndɔ́n ku mɔɔnd olotí, unyi kí isɔm.»
Yésus épínúúne paápayɔ́
(Mat 19.13-15; Lúk 18.15-17)
13Pɛɛnd poólin Yésuse na tuúpayúpayɔ́ ɛ́ɛ́ útála túu imbɔk. Popíónyí tiambá nɔ, pápíkása pɔ. 14Wɛɛ́nɛn nɔ́ɔ, Yésuse weeliŋin popíónyí, wɔ́ kɔ́ɔ́p ɛ́ɛ́: «Ánuyapá tuúpayúpayɔ́ óólon kuamɛ, nutiandá akány nɔɔpɔ́, á kiákí ɛ́ɛ́ Pufuŋ pú Támbák ɔ́ɔ́kɔɔ́pɔnɛn pɛɛnd pɛ́nyɛɛ́ ɛlɛɛ́ pɔ. 15Yɔɔ́núɔ́yɔn kémuémue ɛ́ɛ́ ewú wɛɛ́nyɛ́ɛlɛɛ́ utiátap pufuŋ pú Támbák nɔ ɔtɛ́m ú yiípáyúpáyɔ́, tiényipíkín á pɔ.» 16Úmáman akálan popíónyí, Yésuse woond ɛ́ kusɛmbɛn tuúpáyúpáyɔ́, utála túú imbɔk woond upinúúne tɔ́ɔ.
Inɛ́m i mɔɔnd
(Mat 19.16-30; Lúk 18.18-30)
17Yésus mɛɛlɛ́ ukɔ́lɔn iŋilí, mɔɔnd omotí waanyaatɔ́k nɔ ɔtɛ́t, weesisukín wɔ́ tunúu. wɔ́ é Yésus ɛ́ɛ́: «Oŋónyóonyi, anyi ɔtɛ́m peseé, kiákɛ́ yɛɛsikɛnɛnɛ́ kuɛl ɛ́ɛ́ índáŋap níámɛ niap ní kusɔ́t kú teeníík?» 18Yésuse kɛ́ɛ́yɛ́ ɛ́ɛ́: «Kiákɛ́ ɔɔyɔnɛ́ ɛ́ɛ́ inyɛ ɔtɛ́m peseé? Támbákɛ́ɛ wééŋényí unyɛɛ́ ɔtɛ́m peseé. 19Eémenyen pikotí pinyɛɛ́ ɛ́ɛ́: Ɔtiɔ́n mɔɔnd, ɛtiɛndɛ́t isɔm, etiép, ɔtipɔ́ŋɛ́n mɔɔnd puónyi, atipát kisupɔ́, ákán tíɔ́ no nikóótí ɔ́ niɔlɔ́.» 20Mɔɔnd ukáánɛ́ kɛ́ɛ́yɛ́ ɛ́ɛ́: «Oŋónyóonyi, ni púúpáyúɛ, yoówoónyosi pikotí pikáánɛ́ piim.» 21Yésuse waatál wɔ́ eŋis, wɔɔyɛt wɔ. wɔ́ kɛ́ɛ́yɛ́ ɛ́ɛ́: «Amany no kifoofo táŋ kímoómí; apá, puandá kitikit ɛnyɛɛ́ na pɔ́ túú, ekí pɔsúkɔsukɔ muenyí mukáánɛ́, kɔ́ɔ́kɔ́ɔ áányípianɛ́ punɛ́m puutámb mɛnɛ́mɛnɛ́ɛ; Óond ɔ́ɔ́ŋ káámɛ.» 22Mɔɔnd wɛɛ́tɛ mɛɛlɛ́ wɔɔ́pɔn anakáánɛ́, weelutit pusíó, waayɔɔk, insíkíl kɔ́ ɔtɛ́m, á kiákí ɛ́ɛ́ umapá inɛ́m yaasɔ́ i kuáyakuáya. 23Yésuse waapípulumɛn popíónyí pɛ́ɛ́yɛ́, wɔ́ kɔ́ɔ́p ɛ́ɛ́: «Nuɛ́kɛɛ́nɛn aná púnyɛɛ́ imfɛ́ɛ́l kí inɛ́m i mɔɔndɛ ípíkin é Pufuŋ pú Támbák!» 24Popíónyí páálíkinɛn ké eŋíít. Yésuse woonditonyi, wɔ́ kɔ́ɔ́p ɛ́ɛ́: «Paán páámɛ, kupíkin é Pufuŋ pú Támbák tipá sɔtusɔt! 25Púnyɛ sɔtusɔt á kiandákáand kí nyam é kupíkin é yeéséésí yí indɔɔndɔ, maná infɛ́lú táásɛ kí inɛ́m i mɔɔnd ɛ́ ípíkin é Pufuŋ pú Támbák.» 26Popíónyí pɔ́ɔ́yɔkɔn kusímile, pópíówon pɔ́ɔ nɔ pɔ́ɔ: «Akɛɛ́, ɛ́nyɛ́ɛ kɔɔk unyɛɛ́ kupia kusɔ́t kú teeníík é?» 27Yésuse weetémbi pɔ́ eŋis, wɔ́ kɔ́ɔ́p ɛ́ɛ́: «Púápíányinan punya pɛɛnduɛ katiɛ́ Támbákɛ́ɛ; á kiáki ɛ́ɛ́ púkupíányɛn Támbákɛ́ɛ tipá.» 28Píɛl kanyi kɛ́ɛ́yɛ́ ɛ́ɛ́: «Akáánɛ kɔk, pasɔ́ túányíyapán maandá máásɔ meem, tuɔkɔŋ kááwɔ.» 29Yésuse woondinyi ɛ́ɛ́: «Yɔɔ́núɔ́yɔn kémuémue ɛ́ɛ́ mɔɔnd na mɔɔnd usiáyap kiansi kíɛ́yɛ́ púnyaánɛ mɛtiɛ́pulɛ́ mɛ́ɛ́yɛ́, paandimán, yóótie, sí na paán káámɛ ó pusíó no ó pusíó pú insɔ́m yi indámb, 30waányípia piansi, mɛtiɛ́pulɛ, paandimán, poyóótíe, pesí na paán kááta kaayɔ́ ɔlɔŋ ni iŋɛ́n yoólinone ó pokóyikoy á kisikɛl ekie tunyɛɛ́ á kɛ́ɛ nínúan; ɛ́ɛ́ wáátáŋáp é metúkú móólonée kusɔ́t kú teeníík. 31Puólikóol pɛ́nyɛɛ́ ó pusíó nínúan óónyóond pékélém, pékélém óond pópusío.»
Yésus máand etééki nikú niɛ́y nɛ kuɛnyɔk kúɛ́yɛ́ á pilɔ́ŋ
(Mat 20.17-19; Lúk 18.31-34)
32Ne Yésus no popióny pɛ́ɛyɛ́ pasuŋɔn á kumákat Yelúsalɛm, Yésuse ó pusíó. Popíónyí túmen, puwaá ɛ́lɛ pɛɛnd pɔmɔɔ́ŋɔn kɔ́ɔ́pɔ. Yésuse wand ɔkɔ́l Papáátánapaandíɛ kí nsumbú, woond ɛ́ɛ́ kusɛkunɛn pɔ emé makaániámɛn wɔ. Wɔ kɔ́ɔ́pɔ ɛ́ɛ́: 33«Akɛ tunyɛ́ petényí, ndɛ́ kumákat ekue Yelúsalɛm, kɔ́ɔkɔ́ pɛkɛnyisɛm, Muɔ́nɔ́ u mɔɔnd, pɛsɛm wu ku pafunɔ́fɔn pɔɔkɔ́n ne pemenyípikotí. Kɔ́ɔkɔ́ pɛɛnd pakáánɛ kaánisɔ́mb ɛ́ɛ́ pɔɔn wɔ, pekite wɔ, pɛɛnd pe kúúsí patiánipá pemenyen Támbákɛ́ɛ. 34Pasikan wɔ, pakasan wu pitelu, pekite wu no tusóó, pond pɔɔn wɔ. Kaátáátuɛ wɛ́ɛyɛ́ yɛ́nyɔk á pilɔ́ŋ.»
Na Sáak ni Isáaŋ ɔ́ɔ́kɔɔŋɔn Yésuse ɔnyɔ́l
(Mat 20.20-28; Lúk 22.25-27)
35Na Sáak ni Isáaŋ, paán pé Sepeté, péépísíítin Yésuse, pɔ́ kɛ́ɛ́yɛ́ ɛ́ɛ́: «Oŋónyóonyi, tuɔ́kuɔŋɔn puandá, tuákaamba ɛ́ɛ́ ɛ́tuɛ́lɛn pɔ.» 36wɔ́ kɔ́ɔ́p ɛ́ɛ́: «Kiákɛ́ nuambanɛ́ɛ ɛ́ɛ́ ínúɛ́lɛn?» 37Pɔ́ kɛ́ɛ́yɛ́ ɛ́ɛ́: «Túátápɛ́n ɛ́ɛ́ túpá pɔnyɔ́l naawɔ é nuúmu nú Pufuŋ púáwɔ; omotí é yíiye inyɛ́ŋ, olotí é yíiye.» 38wɔ́ kɔ́ɔ́p ɛ́ɛ́: «Nutipá numenyen epú nuɔŋɔnɛ́. Púnín nunyɛɛ́ pɔ́kuɔt: kupúwá kí ipeŋé í muyú yaányípúwáanɛ́ á yɛ́ɛ púnyaánɛ kuésepenyi induén yi iŋɛ́n péényíínduené?» 39Póóndinyi wɔ́ ɛ́ɛ́: «Tutiɔ́t tiɛkiɛ.» wɔ́ kɔ́ɔ́p ɛ́ɛ́: «Ipeŋé iŋaányípúwa, púnyi nɔ, nukapúwá yɛ́ɛ, tɛ induén pékeényindu, pékenútuu yɛ́ɛ. 40Maná puónyi púkuɛl ɛ́ɛ́ mɔɔnd nyɔ́mbɛt káámɛ kí inyɛ́ŋ óóyooson Táátɛ, umɛɛ́tɛŋɛ́ ɔnyɔ́l yakáánɛ́ é péépé umaáyɔ́ɔ́n.» 41Pɔsɔ́k popíónyée epe páát mɛɛlɛ́ pɔ́ɔ́pɔn anakáánɛ́, pééliŋin Sáakɛ ni Isáaŋ. 42Yésuse waapílikɛn popíónyí peem paát na páandɛ́, wɔ́ kɔ́ɔ́p ɛ́ɛ́: «Nuémenyen ɛ́ɛ́ epé pɔ́kɔ́lɔnɛ́ pɔ́ asɛ pɔkɔ́n pɔ́ pitɔŋ pí kúúsí ékeéndesi pí na numíánsina. Pimfuŋáfuŋa nyókolonyi pɔtɔŋtɔ́ŋ. 43Pútiɛl nɔ́ káánɔ́ ɔ́ kiɔ́p. Ewú waambanɛ pukɔ́n káánɔ́ ɔ́ kiɔ́p, ɛ́nyɛɛlɛ́ úpá eŋelípuóli waanɔ́. 44Ewú waambanɛ́ etényí ú pusíó, úpá kiɔ́lí kí peem. 45Niŋúɛ, Muɔ́nɔ́ u mɔɔnd, imoól e kúúsí ekue ɔ́ kuɔsikɔtɔ́n pɛɛnd ne kueki kusɔ́t kúámɛ á kuáŋɔn pɛɛnd kutek. Indimoól ɛ́ɛ́ píŋgɔtɔn.»
Epútepute Paltimé mééŋúk
(Mat 20.29-34; Lúk 18.35-43)
46Ne Yésus no popíónyí pɛ́ɛ́yɛ́ péényekíl á pálɛ́k kisiɛ́n ɛ́ɛ́ Yelíko. Páásuŋɔn ɔlɔŋ ne embúl ú pɛɛnd úmɔɔ́ŋɔn kɔ́ɔ́p. Pɛ́mɛɛlɛ́ pákanyɛɛ́ páámá Yelíko, epútepute omotí, kisiɛ́n ɛ́ɛ́ Paltimé, muɔ́nɔ́ u Timé, ɔnyɔ́l á masíá mí iŋilí, wɔɔŋɔn pɛɛnd pipíɔ́kɛ́n. 47Umɛɛlɛ́ wɔɔ́pɔn ɛ́ɛ́ Yésuse u Násalɛt utápukanɛ́, woond ó kupókokonyonyi: «Yésus oó, muɔ́nɔ́ u Tafíit, iŋɛ́n ɔsuk oo!» 48Pɛɛnd kutek ondonyi wɔ, pɛ́ɛl kɛ́ɛ́yɛ́ ɛ́ɛ́: «Lúŋ akáánɛ́, Lúŋ yééwú!» Wáápílúndɛn kupílúndɛn no kupókokonyonyi: «Muɔ́nɔ́ u Tafíit ewe, iŋɛ́n ɔsuk oo!» 49Yésuse weetélimit, wɔ́ ɛ́ɛ́: «Ánumbílíkinɛ́n wɔ́.» Páápílikɛn Paltimé, pɔ́ kɛ́ɛ́yɛ́ ɛ́ɛ́: «Atúkɛn, píkanyɛk, waákupílan.» 50Woombo kuombo indífɔnɔ́ yɛ́ɛ́yɛ́ i puyo, kakat waatukɛn, waayɔɔk ku Yésus. 51Yésuse woówun wɔ́ ɛ́ɛ́: «Kiákɛ́ aambanɛ́ɛ ɛ́ɛ́ iŋuɛl?» Epútepute woondinyi wɔ́ ɛ́ɛ́: «Oŋónyóonyi, síkoli ɛlɛ́ ɛ́ɛ́ yáand kuɛ́ninɛn!» 52Yésuse kɛ́ɛ́yɛ́ ɛ́ɛ́: «Pipíóndínyí ɔtɛ́m píáwɔ mékuéŋuki, tóótó óó.» Kɔ́ɔk nɔ kɔ́ɔk eŋís wɛɛ́, woond ɛ́ kuɛ́ninɛn, woond é kupílétileti Yésuse.
ទើបបានជ្រើសរើសហើយ៖
Málúkus 10: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL