Málúkus 7
7
Ne Yésus na Pafalisiɛ́ŋ
(Mat 15.1-20)
1Na Pafalisiɛ́ŋ na kitáám kí pemenyípikotí pómoólin Yelúsalɛm páasipíkúsíkán kɔɔ́mɔ Yésus maápá. 2Pɛ́ɛ́kɛɛ́n popíónyí pɛ́ɛ́yɛ́ pómotí nyáan imbɔ́k ne pinyik, anakáánɛ́ kunyɛɛ́ katɛ kusukitɛ sɛ́ɛ é nupesíe. 3Á kiákí ɛ́ɛ́ Pafalisiɛ́ŋ nɔ pɔsɔ́k Pɛyútɛnɛ peem ɔ́kɔɔŋɔn é nupesíe. Wɛɛ́tɛ tipá nakunyá kati kupísukɛt imbɔ́k peseékepese é nupesie. 4Wɔɔtɔ́l ó nionyí, utipá pákunyá puandá katɛ kupísukɛt. Páákaand kuɔŋɔn é melínyé kutek mé pesíí asɛ kusukɛt mupeŋé, na pipáŋ, na pásínsɛ. 5Na Pafalisiɛ́ŋ ne pemenyípikotí poówun Yésuse ɛ́ɛ́: «Ó pusíó pú kiákɛ́ popíónyí pááwɔ tiányípá pɔ́ɔŋɔn á nupatáátɛ́, pányáánɛ́ ni imbɔk katɛ kusukitɛ?» 6wɔ́ kɔ́ɔ́p ɛ́ɛ́: «panɔ́ pepínembí epe! Isayíe, eŋémimekelie má Támbák, mɔɔyɛ́t púnyɛɛ́ kémuémue kaánɔ ó pusíó kɛ́ɛ́yɛ́ kɔ́ ɔmbɔp ɛ́ɛ́: Pulukú epue óókiŋómokosi yá ɔ́ piɔ́lɔ́l pí níít, itɛ́m siɔ́p síí muɛ́t nyɛ kaáyɛ́ naamɛ; 7kiómoko píŋekenyé nyɛ sɛ́kisɛ́k káámɛ ké eŋis, á kiákí ɛ́ɛ́ iŋónyítónyí póónyonyé nyɛ pikotí pɛ́mɛɛ́tɛ́kɛ́ pɔ́ muɛ́t. 8Nuéféne pikotí pí Támbák, nuɔŋɔn yá ɔ́ pí pɔtiɔ.» 9Wɔ́ andá kɔ́ɔ́p ɛ́ɛ́: «Nuɔ́kɔɔŋɔn ɔ́ nupɔtíɛ, nutúme pikotí pí Támbák kélém. 10Moyíis mɔɔyɛ́t ɛ́ɛ́: Ekenyí pepíényí pááwɔ nukany, wɔ́ andá ɛ́ɛ́: Ewú usikanɛ́ epiényí, ɛ́ɛ́kɛɛsikɛnɛn ɛ́ɛ́ pɔ́ɔ́n wɔ. 11panɔ́ nuosiónyónyí ɛ́ɛ́ índɛ mɔɔnd siɛl ké epíényí wɛɛyɛ́ ɛ́ɛ́: pipíɔ́kɛ́n písíɛ́sikɛnɛnɛ́ kukuólin káámɛ nyɛ kɔlɔpáŋ (anakáánɛ́ kunyɛɛ́: kimám tunɛkinɛnɛ́ Támbákɛ́ɛ), 12nuélikesi mɔɔnd ukáánɛ́ ɛ́ɛ́ utiandá kuɛlɛn epíényi puandá. 13Anakáánɛ́ kunyɛɛ́ nuátaapa kutaapa Mekélíe má Támbák nɔ nupɔtíɛ. Nuand kuɛlɛ maandá kutek asɛ makáánɛ́».
Maandá máátunanɛ mɔɔnd na Támbák
14Waapíkúŋɔn kiáyí kí kitɔɔt, wɔ́ ɛ́ɛ́: «panɔ́ peem, ánutámb itu númbítɔ́likɛn: 15puandá mɔɔnd nyáanɛ tipá puátuna wɔ́ na Támbák; epú puáminanɛ́ kɛ́ɛ́yɛ́ kɔ́ ɔtɛ́m nɛkɛtɛ́ɛ púu púátunanɛ́ wɔ́ na Támbák.» [ 16] #7.16 Tipá e piensi pi imbɔp pɔmɔɔŋɔ ni imbɔk. 17Umɛɛlɛ́ waátukanan nɔ kitɔɔt, weepíkin á kiansi; popíónyí pɛ́ɛ́yɛ́ póówun insap umeétúmín embul. 18Wɔ́ kɔ́ɔ́p ɛ́ɛ́: «panɔ́ kákáánɔ numanyi nutiɔ́p á? Nuéleme ɛ́ɛ́ puandá kitikit mɔɔnd nyáanɛ́ɛ tipá púátuna wɔ́ na Támbák á? 19Á kiákí ɛ́ɛ́ ikámbí áákuanɛn é nipundí katɛ kɔ́ ɔtɛ́m, yóond yáakɔɔ́n ó kindoóndó.» Á nukál nukáánɛ́ Yésuse weetíínyi pɔ́ ɛ́ɛ́ Támbák tipá nɔ kitɔ́k á múkunya. 20Wɔ́ ɛ́ɛ́: «Epú púáminanɛ́ á mɔɔnd púu púátunanɛ́ wɔ́ na Támbák. 21Á kiákí ɛ́ɛ́ kɔ́ ɔtɛ́m nɛkɛtɛ́ɛ pilɔk pí imbítáákítɛ́n óólinonée, pilɔŋ kilɔk, puépi, nuɔ́nɔnɔ, 22musɔm, ɔtɛ́m ú muenyí, ifil, yɛɛ́nd, ɔsúl, imbísémie, muala, puɛtɛmɛ, tuélél. 23Pilɔk pí maandá pikáánɛ́ kitikit ákaáminan kɔ́ ɔtɛ́m ú mɔɔnd, píátuna wɔ́ na Támbák.»
Pipíóndínyí ɔtɛ́m pí eŋenyí waakáandɔ́
(Mat 15.21-28)
24Yésuse waatɔk akáánɛ́ waayɔɔk é kiénsi kí kúúsí kí Tíil. Weepíkin á kiansi kímotí. Utimaamba ɛ́ɛ́ mɔɔnd menyi ɛ́ɛ́ unyi kɔ́ɔk; nipínɛmbɛ́n tɛ níɛ. 25Kipál timaná, akáandɔ́ omotí ɔmbɔ́l wɛɛyɛ́ maápá nɔ kilɔk kí kiliínditíe, wɔɔ́p pɛ́tɛɛtɛn wɔ. Waasikɔɔ́n wɔ́ ɔ́ pikɔ́nd. 26Akáandɔ́ wɛɛ́tɛ timapá u Pɛyúútɛn, umapá imbíénepíéne i Fenisí é kiénsi kí kúúsí kí Sili. Woówun Yésuse ɛ́ɛ́ ukúúŋɛt kilɔk kí kiliínditíe kínyɛɛ́ kɔ ɔmbɔ́l wɛɛyɛ́. 27Yésuse kɛ́ɛ́yɛ́ ɛ́ɛ́: «Síáyapá paápayɔ́ póoy; pútipá peseé ɛ́ɛ́ pɔ́kɔ́l múkunyá mú paápayɔ́ pátúútɛn imbua.» 28Akáandɔ́ kɛ́ɛ́yɛ́ ɛ́ɛ́: «púnyɛ nɔ, Taat; maná kɔk imbua áányáan imfumfí sí múkunyá mú paápayɔ́ síkuanɛ́ɛ iŋúsíkúsíe u tépéle.» 29Yésuse kɛ́ɛ́yɛ́ ɛ́ɛ́: «Kááwɔ á nukal, apá, kilɔk kí kiliínditíe kínyɛɛ́ ɔ́ nuɔ́l nú muɔ́nɔ́ ááwɔ máám.» 30Umɛɛl wondon kuɛyɛ́, wokoóki muɔ́nɔ́ apítímán ɔ́ kikɔkɔ́, kilɔk kí kiliínditíe kiámán.
Yésus mééŋúkí kindikélítíe
31Yésuse waatɔk Tíil ó kuond kiáyí kí asaá ú Kalilée. Wɛɛndin á palɛ́k kisiɛ́n ɛ́ɛ́ Sitɔ́ŋ, woond á kusaapan kúúsí kú Tekapóol. 32Póólin wɔ́ ne kindikélítíe, póópísókoliti wɔ́ ɛ́ɛ́ úpíkíik kíí ni imbɔk. 33Yésuse wɔɔkɔ́l kɛ́ɛ, waapínyáŋɛt kitɔɔt. Wɔɔsɔkɛt kíí itu, weetúun pitelu weetísit wɔ́ pɛ́ɛ é kilémbi. 34Wɛɛmɛlimɛt, weélumit mɔkɔ́n, wɔ́ é kindikélitíe ɛ́ɛ́: «Efata», anakáánɛ́ kunyɛɛ́: «Ómbuk.» 35Kɔ́ɔk nɔ kɔ́ɔk Itú síómbuk, kilémbi kíóluk, woond á kukála peseé. 36Yésuse wɔɔsɔkɛt pɔ́ itú ɛ́ɛ́ pátitíán mɔɔnd; maná kɔk, pékíte iŋíndí, iŋíndí filimina. 37Pɛɛnd símile táásɛ maandá Yésus mɛɛ́lɛ, pɔɔ́yɔ ɛ́ɛ́: «Púkupíányɛn wɔ́ tipá! Wɔɔ́kɔɔlunɔ itú sí patɔ́kɔ́ltɔkɔl, ukélesi pimélée.»
ទើបបានជ្រើសរើសហើយ៖
Málúkus 7: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL