Málúkus 6
6
Yésus nyɛ Násalɛt
(Mat 13.54-58; Lúk 4.16,22,24)
1Yésuse waatɔk ɔ́ kɔɔ́mɔ akáánɛ waayɔɔk ɔ́ kitɔŋ pemeélépé wɔ: Násalɛt; popíónyí pɛ́ɛ́yɛ́ pɔɔkɔŋ kɛ́ɛ́yɛ́. 2Puɔ́sí pú Sápat, woond ó kuónyonyi á kiansi kí imbísókóli. Pɛɛnd kutek pítɔ́likɔn wɔ́, pesímile, popíówon ɛ́ɛ́: «Naání eméné maandá wɔɔyɔɔnɛ́ɛ ólinoné wɔ? Ɛ́nyɛ́ wéényéékí wɔ otúnó tutátɔ́ na pukaaka pú kuɛlɛ epiné pisey? 3Utipá wɔ́ unyɛɛ́ kápíndɛ, muɔ́nɔ́ u Malía á? Pátipá paandimán pɛ́ɛ́yɛ́ pɛɛnúmɛndɔ́ pɛ́nyɛɛ́ na Sáaka, no Yósɛsɛ, ne Yúte ne Símun á? Paakáandɔ́ tipá akɛ naasɔ́ á?» Púakány nɔɔpɔ́ ɛ́ɛ́ popíóndi ɔtɛ́m nɛɛyɛ́. 4Yésus ɛ́ɛ́nɛn anakáánɛ́, ukanyi kɔ́ɔ́p ɛ́ɛ́: «Pɔɔ́kɔ́lɔn eŋémímekélíe má Támbák ɔ́ niɔlɔ́ kɔɔ́mɔ kitikit, ɛsiɛ́ kɛ́ɛ́yɛ́ á nuyá, kɛ́ɛyɛ́ é nikúli nɛ kɛ́ɛ́yɛ́ ɔ́ kitɔŋ.» 5Aná pámaápá na pilúndak pí itɛ́m, tɛ niɛlín kisey kɔ́ɔk; tɛ nɔ, yá kitáám kí pɛɛnd pámaánúmá umaátál kí imbɔ́k kímeéŋúk. 6Usímile aná pɛɛnd pɔ́ kitɔŋ kíɛ́yɛ́ maápá katɛ pipíóndínyí ɔtɛ́m.
Pusɔ́m pú Pápáátánapáandɛ
(Mat 9.35; 10.1,5-14; Lúk 9.1-6)
Yésus áap úpɔŋɔ́ pitɔŋ, wɔɔp wónyónyi. 7Waapílikɛn Pápáátánapáandɛ́, woond á kutúman pɔ́ páandɛ́ páandíɛ; ufáan pɔ́ pukaaka pú kupíányinan pilɔk pí piliínditíe, 8ukanyi kɔ́ɔ́p ɛ́ɛ́: «Mɔɔnd tipíyuúkɛ́n púkunya, tɛ imbaláa, tɛ yenyí á kiamaám, nusume ne nusume kɔ́ɔ́m. 9Ɔ́ pipɔ́kɔ́t, yá pipalɔ́. Mɔɔnd tiyɔɔ́k ni indífɔnɔ́ íyáandɛ́.» 10wɔ́ andíkɛ́k kɔ́ɔ́p ɛ́ɛ́: «Índɛ nusianyaám kɔɔ́mɔ, kiansi nusíépíkin, ɔ́nulɔpɔ́ á kíi kuám á kuatɔ́k ɔ́ kɔɔ́mɔ kakáánɛ́ɛ. 11Nuám kɔɔ́mɔ, índɛ pɔ́timɔ́ɔ́núkɔ́l peseé, pɔ́tinúpítɔ́líkɛn, nutiyɔɔ́k katiɛ́ numékitít etuúte ú pikɔ́nd píánɔ́: é kutíínyi ɛ́ɛ́ pɛ́ɛ́kɛɛlɛ kilɔk.» 12Popíónyí pááyɔɔk ó kuól kuɔ́yɔn pɛɛnd ɛ́ɛ́ pɛ́ɛ́kɛɛsikɛnɛn kuséndi kusɔ́t. 13Pakúúŋa pilɔk pí piliínditíe kutek ɔ́ tuɔ́l tú pɛɛnd; kutek pámaánúmá, péwéénen pɔ́ kisɛŋ, pééŋuken.
Nikú ní Isáaŋ etuúsí
(Mat 14.1-2; Lúk 9.7-9)
14Elóot mapá efuŋ Kalilée; kisiɛ́n kí Yésus kianyaámɛ́n wɔ, á kiákí ɛ́ɛ́ nukúm nú Yésus mapá nukanyi kɔɔ́mɔ kitikit. Pɛɛnd ɔ́ɔ́yɔ ɛ́ɛ́: «Isáaŋ Etuúsí ɛ́ɛ́nyɔ́k á pilɔ́ŋ; kúúkɔ́ upianɛ pukaaka pú kuɛlɛ pisey.» 15Pólotí ɔ́ɔ́yɔ ɛ́ɛ́: «Elie wɔ.» Pómotí ɔ́ɔ́yɔ ɛ́ɛ́: «Unyi eŋémímekélíe má Támbák ɛlɛɛ́ womoómíe é peémí mekélíe má Támbák páásɔ pí insuá.» 16Elóot ɔ́ɔ́pɔn anakáánɛ́, wɔ́ ɛ́ɛ́: «Isáaŋɛ ewú yɛ́ɛ́nyɛɛ́lɛ́ ɛ́ɛ́ pétéŋun wɔ́ ɛtɔ, wɔ́ wɛ́ɛ́nyɛ́nyɔ́k á pilɔ́ŋ.»
17-18Eloot maápítíkɛ́n akáandɔ́ pámaápílán ɛ́ɛ́ Elotiátɛ, akány andimán wɛɛyɛ́ Filip. Isáaŋ mapá katɛ́katɛ́ wɔɔyitɛn Elóote ɛ́ɛ́: «Atipá ɛɛsikɛnɛn kupítikɛn akány andimán ááwɔ.» Púúpɔ́ Elóote meeki pukaaka ɛ́ɛ́ pɛ́ɛtikɛn Isáaŋɛ. Páátɔ́ɔt wɔ́ á kiansi kí imbíne, póond pákúta wɔ́ na pikáskás. 19Elotiát fɛmɛ Isáaŋɛ á pɔ, waamba ɛ́ɛ́ pɔ́ɔ́nɛn wú wɔ́. Nuketi núɛ́yɛ́ tɛ ɛ́ɛ́ nuáminɛn, 20á kiákí ɛ́ɛ́ Elóot metííné Isáaŋɛ, umenyen ɛ́ɛ́ unyi indɛ́ndɛ́nɛ i mɔɔnd yɛ́ɛ, eŋelípuólí u Támbák; usuken wɔ́ ipɛnɛ́. Umapá, aká upítɔ́likɔnɛ́ Isáaŋɛ, kiyeéwe tiandá apá kɛ́ɛ́yɛ́ kɔ́ ɔtɛ́m; tɛ nɔ́ɔ waamba kuamba ɛ́ɛ́ insí umɔ́pítɔ́líkɔ́n wɔ́. 21Puɔ́sí puutámb puámɛn Elotiátɛ ɛ́ɛ́ wɛ́ɛl epú ɔtɛ́m wɛ́ɛ́yɛ́ maámba: puɔ́s Elóot mɔɔ́tɔyɔ́ putɔ́mbí pú nupién núɛ́yɛ́. Waapílan pimfúŋámfuŋa pí kitɔŋ, pɔkɔ́n pé pisimb nɔ pɔkɔ́n pɔ́ kitɔŋ kí Kalilée. 22Muɔ́nɔ́ u Elotiát waakáandɔ́ weepíkin á kitaŋá, aká pɛ́mɛɛ́lɛ́ putɔ́mbí; wɛpíyɛ́kɛt nɔ punɔ́k, Elóote nɛ pɛɛnd umaápilán ɔ́ putɔ́mbí pɔ́ɔ́pɛn wɔ́ peseé. Elóot ɛpí á muúŋayɔ́ akáandɔ́ ɛ́ɛ́: «Ówún epú ɔtɛ́m wááwɔ lɔ́ŋɔnɛ́, iŋufa pɔ.» 23Woond wapília, wɔ́ á muúŋayɔ́ akáandɔ́ ɛ́ɛ́: «Puum akaná kuówonée, iŋaná ekueki, tɛ kúpá ɛ́ɛ́ túápitan kitɔŋ inyɛɛ́ efuŋ á kɛ́ɛ ɛ́ kikɛtɛ́kɛtɛ́ɛ.» 24Muúŋayɔ́ akáandɔ́ waakaam, wɔ́ ó yóótí ɛ́ɛ́: «Kiákí yóówunée?» Yóótíe kɛ́ɛ́yɛ́ ɛ́ɛ́: «Ɛtɔ́ ú Isáaŋ, Etuúsí.» 25Woond nɔ ɔtɛ́t kɔɔ́mɔ efuŋ maápá, wɔ́ kɛ́ɛ́yɛ́ ɛ́ɛ́: «Yaákaamba ɛ́ɛ́ ímfá nɔ niɔ́kɔ́tɔ́n ɛtɔ́ ú Isáaŋ Etuúsí á pásínsɛ.» 26Púɛ́kɛl efuŋ muyu; tɛ nɔ́ɔ waátap ó pusíó ɛ́ɛ́ umapiliá ke eŋis yɛ́ pɛɛnd peem umaápílán ɔ́ putɔ́mbí. 27Waatɔ́m kisimb nɔ niɔ́kɔ́tɔ́n, ni iŋutɛ i kuólin wɔ́ nɛ ɛtɔ́ ú Isáaŋ Etuúsí. Kisimb kienyetéŋún Isáaŋɛ ɛtɔ́ á kiansi kí imbíne, 28kíól na wɔ́ á pásínsɛ, weeki muúŋayɔ́ akáandɔ́, muúŋayɔ́ akáandɔ́ weenyekí yóótíe. 29Niɔy mɛɛl niámínán popíónyí pí Isáaŋ, pɔ́ɔsikɔ́l kimbuŋbuŋ kíɛ́yɛ́ ó kuonyóó.
Petúmí móósíóndó. Yésus móóyí pɛɛnd ɔ́ kiɔsɔ́kɔliɔ
(Mat 14.13-21; Lúk 9.10-17; Isŋ 6.1-15)
30Petúmí epé Yésus maátɔm, páandɛ́ páandíɛ, póósiondó, páápíkúsíkan nɛ́ɛ́yɛ́, póond ɔ́ kuɔyɔn wɔ́ meem pɛ́mɛɛ́lɛ ne emé pómoónyónyi. 31Pɛɛnd kutek mapá ɛ́ kɛɛ́tɛ kɔ́ɔm, epe óólon pólotí yuukan; Yésuse ne petúmí pɛ́ɛ́yɛ́ timand apian tɛ kisikɛl kí kupíyak. Yésus ɛ́ɛ́nɛn anakáánɛ́, wɛɛ́pí kɔ́ɔ́p ɛ́ɛ́: «Ónuól túyɔɔk ɔ́ kiɔ́sɔ́kɔlíɔ, núpíɔ́yɛt pukéti.» 32Páámákat ó kitóóŋ, pááyɔɔk kɔ́ɔm pɛɛnd mɛɛ́lɛ́ pɛ́tiɛlɛ́. 33Pɛɛnd kutek pɛ́ɛ́kɛɛ́n pɔ páyuukan, péemenyi pɔ nɔ kɔɔ́mɔ pámaáyuukan. Pɛɛnd áminan á papalɛ́k peem, pɛ́ɛndɛ pɛ́sɛɛpɛn á kuyɔɔk kɔɔ́mɔ Yésuse ne petúmí maáyuukan; pɛɛnd páátúan kuám kɔ́ɔ́p. 34Úsel ó kitóóŋe, Yésuse wɛɛ́n kiandákáand kí kitɔɔt kí pɛɛnd. Póond ɛ́ kuɛlɛ wɔ́ ɔsɔk, á kiákí ɛ́ɛ́ pámapá ɛlɛ́ɛ ɔlɔŋ ú pitúúmbɛ́ɛ pí katɛ ekííkée. Woond ó kuónyonyi pɔ́ maandá kutek. 35Aná kisikɛl maápá kimámaná atápɔk, petúmí pɛ́ɛ́yɛ́ péépísíítin wɔ, pɔ́ɔ kɛ́ɛ́yɛ́ ɛ́ɛ́: «Kɔɔ́m akɛ nyɛ kááyɛ na tuya, kisikɛl mámaná atápɔk. 36Kúúkí pɛɛnd epe, páyɔɔk ɛ́ mɛtíɛ́púlɛ́ na tuya akɛ ɔ́ mɔkɔsɛ́ pɔ́ɔ́ndɔ́ múkunya.» 37Woondinyi pɔ́ ɛ́ɛ́: «Ánutááŋ pɔ panɔ́ muɛt.» Pɛɛ́pi kɛ́ɛ́yɛ́ ɛ́ɛ́: «Pikɔŋ imbak íyáandɛ́ nyɛ kuɔ́nd pilɛ́ɛt pí kuoyi kitáám kí pɛɛnd ekie á?» 38Yésuse kɔ́ɔ́p ɛ́ɛ́: «Pilɛ́ɛt pínɛ́k nunyɛɛ́ na pɛ́ɛ? Ánuupɔ́ kuoyoosin!» Pónyoyoosin, pɛ́ɛ́pí kɛ́ɛ́yɛ́ ɛ́ɛ́: «Pitáan, nɔ muɔpɔ́ múandɛ́.» 39Waatían pɔ́ ɛ́ɛ́ pónyómbiti pɛɛnd peem é kúusí é pikuti, ɔ́ piɔ́pɔ ɔ́ piɔ́pɛ. 40Pɔ́ɔ́nyɔ́mbitɔn ɔ́ piɔ́p; piɔ́p pí ambak ne pí etín áandɛ́ na páát. 41Yésuse wɔɔkɔ́l pilɛ́ɛt piɛ́tɛ piim pitáan nɛ muɛ́tɛ muɔpɔ́ múandɛ́, wɛɛmɛlimɛt, weelémbi Támbákɛ́ɛ. Wɛɛ́nsɛ pilɛ́ɛt, weeki petúmí pɛ́ɛ́yɛ́ ɛ́ɛ́ páapan pɛɛnd. Wɔkɔ́l muɔpɔ́ kaká mɔ, waapan pɔ peem. 42Pɛɛnd peem páánya, póókooy. 43Petúmí páákúsa piénsi pí pilɛ́ɛt nɔ pí muɔpɔ́ pímeésíén, píówóon musááŋ múát na múandɛ́. 44Ɛ́ Pɛɛnd pámaányá, pɛnúmɛndɔ́ pééŋényí mapá tukɔ́n tutáan.
Yésus ɛ́ɛ́kɛndɛ ó moomb mɛnɛ́mɛnɛ́ɛ
(Mat 14.22-33; Isŋ 6.16-21)
45É kélém akáánɛ́, Yésuse wofooki petúmí pɛ́ɛ́yɛ́ ó kitóóŋ asaá nakɔn kiáyí kí pálɛ́k unyɛɛ́ kisiɛ́n ɛ́ɛ́ Pɛtisayíta, woond é kukúúkesi embul. 46Umɛɛl ne kukúúki pɔ, waamákat kɔ́ ɔkɛ́l ó kuopísókólónyi. 47Ne putúk, Yésuse wééŋényí ekúúsi, kitóóŋ kɔ́ ɔtɛ́m ú asaá. 48Wɛɛ́n ɛ́ɛ́ petúmí pɛ́ɛ́yɛ́ áánuanan ne emfún é kufélesi kitóóŋ kíɔ́p, á kiákí ɛ́ɛ́ úmapá úfúke, wóólinon pɔ́ ó pusíó. Ne emfúnpálɛ, wɔɔkɔɔŋ kɔ́ɔ́p nɔ pikɔ́nd, wɛɛndɛ ó moomb mɛnɛ́mɛnɛ́ɛ, wɛɛl úfal pɔ. 49Petúmí ɛ́ɛ́nɛn wɔ́ wɛɛndɛ ó moomb mɛnɛ́mɛnɛ́ɛ, pɔ́ ɛ́ɛ́ inyɔli yɛ́ɛ, póond ó kupóko. 50Á kiákí ɛ́ɛ́ peem mɛɛ́nɛn wɔ, puwaá púɛtíkɛn pɔ. Yésuse waámbɔn níít nɔ niɔ́kɔtɔ́n, wɔ kɔ́ɔ́p ɛ́ɛ́: «Nutipiá puwaá, Iŋuɛ́ wɔ.» 51Weepíkin kɔ́ɔ́p ó kitóóŋ, emfún wɔ́ɔ́yɔt. Petúmí símile táásɛ; 52á kiákí ɛ́ɛ́ pɔ́timɔɔ́p kisíme kí pilɛ́ɛt; meéne mɔɔ́pɔ mapá mefuúkén.
Yésus máyɔɔ́k Senesalɛ́t
(Mat 14.34-36)
53Yésuse ne petúmí pɛ́ɛ́yɛ́ mɛɛl pásaapan asaá, pányaám ɔ́ kitɔŋ pámaápílán ɛ́ɛ́ Senesalɛ́t; péésuk kitóóŋ á kiŋɛndɛŋɛnd kí moomb. 54Péselen ó kitóóŋo, kɔ́ɔk nɔ kɔ́ɔk pɛɛnd péémenyi Yésuse. 55Pɔ́ɔ́pɔŋ kitɔŋ kitikit nɔ ɔtɛ́t, póond ó kuólinon Yésuse ne epé pánúmanɛ́, kɔ́ɔm kitikit pɔ́siɔ́kɔɔp ɛ́ɛ́ unyɛ kɔ́ɔk; pɛ́ɛsɛmbɛn pɔ́ á tuámbálɛn. 56Kɔ́ɔm kitikit waámanɛ́, á palɛ́k tɛ wɔɔkɔ́n tɛ weekéti, á tuyá túnyɛɛ́ kɛ́ ɛɛm, pɛɛnd óólon ne epé pánúmanɛ́ ɔ́ siɔ́nd sí oŋonyí, pópísókolonyi wɔ́ ɛ́ɛ́ wéekenyi pɔ́ pukaaka ɛ́ɛ́ pɔ́píkɔ́ɔ́tɔn indífɔnɔ́ ni ndífunɔ́ yɛ́ɛ́yɛ́; peem pɔ́mɔɔ́píkɔ́tɔ́n yɛ́ɛ pééŋuk.
ទើបបានជ្រើសរើសហើយ៖
Málúkus 6: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL