Isáaŋ 20
20
Popíónyí máyɔɔ́k á kipɛ́l
(Mat 28.1-10; Mál 16.1-8; Lúk 24.1-12)
1Puɔ́si púkutúan pú sɔ́ɔ́ndiɛ, ne emfúnupálɛ, kuɔ́m manyi kutiɛ́ndɔ́k, Malíɛ u Makatala waayɔɔk ó monyoó, wɛɛ́n ɛ́ɛ́ nitányí pémeéfuuk kipɛ́l na nɛ tikápá. 2Weetíínit ɔ́ kuɔwɔɔ́k Símun Píɛ́lɛ no opíónyí ewe Yésus mɔɔ́sɔ́l kuɔyɔ, wɔ́ kɔ́ɔ́p ɛ́ɛ́: «Pésiéŋi Ɔkɔ́n á kipɛ́l, tutipá tumenyen kɔɔ́mɔ pásiákaák wɔ́.» 3Píɛ́lɛ wáam, no opíónyí umaápá nɛɛyɛ́, páayɔɔk á kipɛ́l. 4Pétííne pɔ́ peem ɔlɔŋ, opíónyí ukáánɛ́ tííne kutápɔk Píɛ́lɛ, waatúan kuám á kipɛ́l. 5Weekutumit, wɛɛ́n piénsi pí insunú akáánɛ́ pitálán. Tɛ ɛ́ɛ́ úpíkínée. 6Símun Píɛ́lɛ umɔɔ́ŋɔ́n kɛ́ɛ́yɛ́ waasiám, weepíkin á kipɛ́l, wooyoosin piénsi pí insunú pímaápá akáánɛ́ pitálán. 7Wooyoosin imbɔ́ɔ́ŋ pomoókíkón Yésuse kɛ́ ɛtɔ́ yaákálá, inyáŋíkán ɛ́ kɛ́ɛ́yɛ́ kɔɔ́mɔ, piénsi pí insunú ɛ́ kɛ́ɛ́yɛ́ kɔɔ́mɔ. 8Káakáánɛ́ opíónyí umaátúán kuasiám, meésípíkín kɛ́kɛ́ɛ́yɛ́ á kipɛ́l, wɛɛ́n, woopíóndi ɔtɛ́m. 9Púnyɛ ɛ́ɛ́ pámapá pámanyi pɔ́tiɔ́p mekélíe mɔ́ ɔmfíɔ́ŋ wɔ́ɔyɔnɛ́ ɛ́ɛ́ Yésus ɛ́ɛ́kɛɛsikɛnɛn kuɛnyɔk á pilɔ́ŋ. 10É kélém akáánɛ́, popíónyí póond kuɔpɔ́.
Malíɛ u Makatala mɛ́ɛ́n Ɔkɔ́n
(Mál 16.9-11)
11Malíɛ mɔlɔpɔ́ kɔ́ ɔɔ́nd, mekúye na kipɛ́l, upaŋa. Andilɛ́ ké eŋís weekutumit ɛ́ kufɛ́ɛ́fɛt kipɛ́l, 12wɛɛ́n Peéŋele páandɛ́ ni indífɔnɔ́ si imfúmfúɛ́, pɔnyɔ́l kɔɔ́mɔ pémeépítíkényí nuɔ́l nú Yésus, ewe kɛ́ ɛtɔ́, ewe ɔ́ pikɔ́nd.
13Pákanyi kɛ́ɛ́yɛ́ ɛ́ɛ́: «Íya, kiákí apaŋanɛ́ɛ?» Wɔ́ kɔ́ɔ́p ɛ́ɛ́: «Pésiéŋi Ɔkɔ́n waamɛ, indipá imenyen kɔɔ́mɔ pásiákaák wɔ́.» 14Umɛɛlɛ́ umaákála, wɛɛpíkɛkɛlɛt, wɛɛ́n Yésuse etényí akáánɛ́. Utimenyí ɛ́ɛ́ wúú wɔ́. 15Yésuse kɛ́ɛ́yɛ́ ɛ́ɛ́: «akáandɔ́, kiákí apaŋanɛ́ɛ? Ɛ́nyɛ́ aambanɛ́ɛ?» Malía pítááka ɛ́ɛ́ ekííkí kisíén wɔ́, wɔ́ kɛ́ɛ́yɛ́ ɛ́ɛ́: «Ɔkúnɔ́kɔn, índɛ aŋúɛ esiékeéŋi wɔ́, síkoli índíán kɔɔ́mɔ asiákaák wɔ́, yɔ́ɔkɔ́l Wɔ́.» 16Yésuse kɛ́ɛ́yɛ́ ɛ́ɛ́: «Malía.» Wɛɛpíkɛkɛlɛt wɔ́, waapílikɛn wɔ́ na nuyúútɛnɛ: «Lapuni» anakáánɛ́ kunyɛɛ́ ɛ́ɛ́: Oŋónyóonyi. 17Yésuse kɛ́ɛ́yɛ́ ɛ́ɛ́: «Etiŋelinyi! Imanyi indimákát ku Taatá. Á kíáwɔ kiáyí, apá kɔwɔɔ́k paandimán páámɛ, tíán pɔ́ ɛ́ɛ́ yaámákatan ku Taatá unyɛɛ́ Síí waanɔ́, ku Támbákɛ́ɛ waamɛ unyɛɛ́ Támbákɛ́ɛ waanɔ́.» 18Malíɛ́ u Makatala wɔɔsiɔyítɛ́n popíónyí ɛ́ɛ́: «Imɛ́ɛ́n Ɔkɔ́n, yá anakáánɛ́ usiákála.»
Popíónyí mɛ́ɛ́n Ɔkɔ́n
(Mat 28.16-20; Mál 16.14-18; Lúk 24.36-49)
19Nɛ kisɛ́ndɛ kí puɛ́tɛ puɔ́s pumaápá puɔ́s púkutúan pú sɔ́ɔ́ndiɛ, eŋíít yá kiansi popíónyí maápá á kɛ́ɛ efuúkén, ɛfɛlɛ́n ni ŋgoŋ, á kiákí ɛ́ɛ́ pémetííné Pɛyúútɛn. Yésuse wasisáyímɛ́t kɔ́ɔ́p ɛ́ kikɛtɛ́kɛtɛ́ɛ, wɔ́ kɔ́ɔ́p ɛ́ɛ́: «Kiyeéwe pá naanɔ́.» 20Ukála kɔ́ɔ́p, utíínyenyi pɔ́ imbɔ́k síɛ́yɛ́ na tuundɔ́ túɛ́yɛ́. Nɛ kuɛ́n Ɔkɔ́n, ipali yóówóon kɔ́ɔ́p kí itɛ́m táásɛ. 21Kákáánɛ́ Yésus maándá apíkakɔn, wɔ́ kɔ́ɔ́p ɛ́ɛ́: «Kiyeéwe pá naanɔ́. Aná Taatá miíndɔ́m, niŋúɛ kákáámɛ imánútɔ́m.» 22Wɔɔyɔ nɔ́ɔ, wokoónit pɔ́ emfún, wɔ́ kɔ́ɔ́p ɛ́ɛ́: «Ɔ́nukɔ́ɔ́ Emfúnukufúúmɛ. 23Epé nukaányíyapin pɔ́ pifal, Támbák yapin pɔ́. Epé nukɛɛ́nyɛ́ɛl nutiyapín pɔ́, Támbákɛ́ɛ kɛ́kɛ́ɛ́yɛ́ tiáyapín pɔ́.»
Yésus mépítíínyí á Túmas
24Naánɛ́ kɔk ɛ́ɛ́ Túmasɛ, omoómí á Pápáátánapáandɛ́, papílanɛ́ wɔ́ ɛ́ɛ́ ɛpɛ́sɛpɛsɛ, timapá aká Yésus moól. 25Pɔsɔ́k popíónyí ɛ́ɛ́pí kɛ́ɛ́yɛ́ kɔk ɛ́ɛ́: «Tumɛ́ɛ́n Ɔkɔ́n!» Woondinyi pɔ́ ɛ́ɛ́: «Niŋúɛ kati kuɛ́n pitúlie pí iŋúɛ́nyí kí imbɔ́k síɛ́yɛ́ yoond yaák inɛɛ́ yáámɛ kɔ́ɔk, índɛ insiɛl indipíkínyí ɔmbɔ́k wáámɛ á nuundɔ́ indiákaátáp!» 26É kélém kú metúk mánamanɛ́, popíónyí pé Yésus papíkúsá á kiansi kifúúkén, kifɛlɛ́n ni iŋgoŋ, Túmasɛ kɔ́ɔk nɔ pɔ́kúɔ́p. Yésuse waand kuasisáyímɛ́t kɔ́ɔ́p ɛ́ kikɛtɛ́kɛtɛ́ɛ, wɔ́ kɔ́ɔ́p ɛ́ɛ́: «Kiyeéwe pá naanɔ́.» 27Ukanyi á Túmas ɛ́ɛ́: «Kaánɔ́n inɛɛ́ yááwɔ akɛ óond óóyoosin imbɔ́k síámɛ. Kaánɔ́n ɔmbɔ́k wááwɔ épíkinyi wɔ́ káámɛ á nuundɔ́, yapá imfɛ́lɔ́, ɛ́ɛ́yí mɔɔnd wáátapanɛ́ɛ.» 28Túmasɛ kɛ́ɛ́yɛ́ ɛ́ɛ́: «Nɔ Ɔkɔ́n waamɛ na Támbákɛ́ɛ waamɛ!» 29Yésuse kɛ́ɛ́yɛ́ ɛ́ɛ́: «Amáátáp, á kiákí ɛ́ɛ́ ɛmíŋɛ́n. Peseé ne epé páátapanɛ́ kati kuɛ́nɛ.»
30Yésus mɛɛlɛ́ melinsí mólotí kutek ké eŋís yó popíónyí pɛ́ɛ́yɛ́ mátiányípá mɔɔ́ŋɔ́ á kálatɛ ewe. 31Eme melinsí nyɛ mɔɔ́ŋɔ́ ɛ́ɛ́ núátapan ɛ́ɛ́ Yésus nyɛ Kilíise, Muɔ́nɔ́ u Támbák, andíkɛ́k ɛ́ɛ́, ewu kitikit waátapanɛ́ɛ, úpia kusɔ́t kɛ́ɛ́yɛ́ ɛ́ kisiɛ́n.
ទើបបានជ្រើសរើសហើយ៖
Isáaŋ 20: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
