Isáaŋ 19
19
1Pílatɛ kɔk weeki pukaaka ɛ́ɛ́ póól ne Yésus péésúpit wɔ́ no tusoó. 2Pisimb píanɔk indanyáa ni insɛ́ndí ɛlɛɛ́ nulandany, píɔsɔnɛk wɔ́ yɛ́ɛ kɛ́ ɛtɔ́, póond páak wɔ́ kinyuŋa kí pefuŋ kinyuán poóo. 3Pépísíítenin wɔ́, pɔ́ɔyɔ kɛ́ɛ́yɛ́ ɛ́ɛ́: «Tuméekupíkélítí efuŋ u Pɛyúútɛn!» Póond á kusápa wɔ́ imbɛ́l. 4Pílatɛ waand kuám kɔ́ ɔɔ́nd ukanyi ɛ́ Pɛyúútɛn ɛ́ɛ́: «Índɛ́, yoónúólinon nɛɛyɛ́ akɛ kɔ́ ɔɔ́nd, énumenyí ɛ́ɛ́ iŋúɛ indipá yɛɛ́nɛn kikua kɛ́ɛ́yɛ́.» 5Yésuse waám kɔ́ ɔɔ́nd, indanyáa yi insɛ́ndí kɛ́ ɛtɔ, na kinyuŋa kí pefuŋ ɔ́ nuɔ́l kinyuán poolótot. Pílatɛ kɔ́ɔ́p ɛ́ɛ́: «Índɛ́, mɔɔnd ewe!» 6Pɔkɔ́n pá pafunɔ́fɔn ne pekííkí mɛɛlɛ́ nɛ kuɛ́n Yésuse póond é kupéke, pɔ́ɔyɔ ɛ́ɛ́: «Tɔɔ́ndɛ́n wɔ́ ó kolóse, tɔɔ́ndɛ́n wɔ́ ó kolóse!» Pílatɛ kɔ́ɔ́p ɛ́ɛ́: «Ɔ́nukɔ́l wɔ́ panú muɛt, nútɔɔndɔn wɔ́ ó kolóse; káámɛ, indipá yɛɛ́nɛn kikua kɛ́ɛ́yɛ́ ó pusíó.»
7Pɛyúútɛn póondinyi wɔ́ ɛ́ɛ́: «Tunyɛ no kikotí kíɛtikɛnɛ́ wɔ́; wɛɛ́kɛɛsikɛnɛn ne nikú á kiákí ɛ́ɛ́ wɛɛ́kɛɛlɛɛ́ unyɛ Muɔ́nɔ́ u Támbák!» 8Pílat mɛɛlɛ́ wɔɔ́pɔn nɔ́, puwaá púɛ́yɛ́ púɔyɔkɔn. 9Weepíkin kɛ́ɛ́yɛ́ á kiansi, ukanyi é Yésus ɛ́ɛ́: «Aŋúɛ oókólinon naánɛ́?» Yésus timapíákɔn. 10Pílatɛ kɛ́ɛ́yɛ́ kɔk ɛ́ɛ́: «Niŋúɛ iŋɔ́nɔnɛ́ insú! Eéleeme ɛ́ɛ́ inyɛ na pukaaka pú kukuyap, tɛ pukaaka pú kukutɔɔndɛn ó kolóse á?» 11Yésuse kɛ́ɛ́yɛ́ ɛ́ɛ́: «Atipá nɛ niŋɛlín puandá índɛ pukaaka siɛl pútikuólín muɛnɛ́; Púúpɔ́ sɔ́k úmɛ́nyinsɛmɛ́ kááwɔ mɛ́nyisɛmbɛ́ kiandá kí kifal kukukányɛn.» 12Kutúm kisikɛl kikáánɛ́, Pílatɛ woond á kuamba kipán kí kutúkun Yésuse; Pɛyúútɛn póond á kuáya mɔkɔ́n ɛ́ɛ́: «Áyap wɔ́, ɛsiɛ́ atipá ekúl u efuŋ wɔɔkɔ́n, Sesáalɛ! Á kiákí ɛ́ɛ́ ewú ne ewú upítɛɛtɛnɛ́ ɛ́ɛ́ unyɛ efuŋ, mɛ́ɛ́yɛ́ okóyikoyi u Sesáal!»
13Pílat ɔ́ɔ́pɔn nɔ́, weémi Yésuse kɔ́ ɔɔ́nd; wɔnyɔ́mbɛt kɔɔ́mɔ pápílanɛ́ kɔ́ ɛ́ɛ́ «Kapata» nɛ nuyúútɛnɛ, á nisɔ́mb moonyi. 14Púmapá nɔ ɔtɛ́m ú puɔ́s, kɔ́ɔk ɛ́ɛ́ putɔ́mbí pú Pásíka kapá nakinyámɔ́; Pílat kanyi ɛ́ Pɛyúútɛn ɛ́ɛ́: «Índɛ́, efuŋ waanɔ́ ewe!» 15Póond á kuáya, pɔ́nɔtɔ ɛ́ɛ́: «Ɔ́n wɔ́! Ɔ́n wɔ́! Tɔɔ́ndɛ́n wɔ́ ó kolóse!» Pílatɛ kɔ́ɔ́p ɛ́ɛ́: «Nuákamba ɛ́ɛ́ índɔɔndɛn efuŋ waanɔ́ ó kolóse á?» Pɔkɔ́n pá pafunɔ́fɔn póondinyi wɔ́ ɛ́ɛ́: «Tutipá ne efuŋ olotí ɛsiɛ́ Sesáalɛ.» 16Pílatɛ waayapɛn pɔ́ Yésuse ɛ́ɛ́ pɔ́ɔ́tɔɔ́ndɛ́n wɔ́ ó kolóse.
Pɔ́mɔ́tɔɔ́ndɛ́n Yésuse ó kolóse
(Mat 27.32-44; Mál 15.21-32; Lúk 23.26-43)
Páayɔɔk ne Yésus. 17Yésuse wɔ́ muɛ́t wɛɛsɛmb kolóse wɛɛyɛ́ kuatɔk á pálɛ́k kuám kɔɔ́mɔ pápílanɛ́ ɛ́ɛ́ Kiɛ́ŋɛ́lɛ́ŋ kí ɛtɔ́, nɛ nuyúútɛnɛ Kolokóta. 18Káakáánɛ́ pɔ́mɔɔ́tɔɔ́ndɛ́n wɔ́ ó kolóse. Póond pɔ́ɔtɔɔndɛn pɛɛnd páandɛ́ kɔ́kɔ́ɔ́p, siki mɔɔndɛ nɛ wɛɛyɛ́ kolóse; ewe kiáyí ewe kiáyí, Yésuse ɛ́ kikɛtɛ́kɛtɛ́ɛ kíɔ́p. 19Pílatɛ wɔɛtɔɔndɛn kiénsi kí pupáám ó kolóse muɛnɛ́, wɔɔkɔɔ́ŋ á kɛ́ɛ ɛ́ɛ́: «Yésuse u Násalɛt, efuŋ u Pɛyúútɛn.» 20Pɛyúútɛn puólíkóoli páaláaŋ ɔmfíɔ́ŋ ukáánɛ́, aná kɔɔ́mɔ pɔ́mɔɔ́tɔɔ́ndɛ́n Yésuse ó kolóse maápá mɔkɔsɛ́ na pálɛ́k, mɔɔ́ŋɔ́ nɛ nuyúútɛnɛ, na nulatɛ́ŋɛ, nɛ nukilɛ́kɛ. 21Pɔkɔ́n pá pafunɔ́fɔn kanyi á Pílat ɛ́ɛ́: «Ɔtiɔ́ŋ ɛ́ɛ́ “efuŋ u Pɛyúútɛn”, ɛlɛ́ ɛ́ɛ́ “mɔɔnd ewe ɔ́ɔ́kɔɔyɔ ɛ́ɛ́ unyɛ efuŋ u Pɛyúútɛn.”» 22Pílatɛ kɔ́ɔ́p ɛ́ɛ́: «Insiɔ́ŋ puandá, insiaman.» 23Pisimb mɛɛlɛ́ na kuman ɔtɔɔndɔn Yésuse ó kolóse píapitan insunú síɛ́yɛ́ aŋap éni, nɔ muɔ́nɛ́ na niap. Oóndolóse wɛɛsɛŋɛlɛt; umapá anuká kati kilatínɛ́ɛ, kuetúm á kimɛn kuatɛ́n ɔ́ pikɔ́nd. 24Pisimb kanyi pí na pɛ́ ɛ́ɛ́: «Tutilafá oóndolóse wɛɛyɛ́, tuák wɔ́ kɔ́ ɔtɔ». Yá anakáánɛ́ pisimb moówóónyí Ɔmfíɔ́ŋ ú mekélíe má Támbák wɔ́ɔ́yɔnɛ́ɛ ɛ́ɛ́: «Pámáapítán insunú síámɛ, pááyaana oóndolóse waamɛ kɔ́ ɔtɔ». Puandá pukáánɛ́ pisimb mɛɛ́l kɔk.
25Yóótí Yésus mapá etényí mekúye no kolóse u Yésus, na andimán yóótí, na Malía akány Kolópas, na Malía u Makatala. 26Yésus mɛɛlɛ́ wɛɛ́nɛn yóótíe masíá no opíónyí umoósól kuɔyɔ, wɔ́ ó yóótí ɛ́ɛ́: «Ɔɔ́ndɔkɔn, índɛ́ muɔ́nɔ́ ááwɔ ewe.» 27Wɔ́ kó opíónyí ɛ́ɛ́: «Índɛ́, nikóótíe ewe.» Kutúm puɛ́tɛ puɔ́s, opíónyí wɔɔkɔ́l yóótí Yésus kuɛyɛ́.
(Mat 27.45-56; Mál 15.33-41; Lúk 23.44-49)
28É kélém kúɛ́yɛ́, aná umeémenyen ɛ́ɛ́, umáyákɔn puandá kitikit ɛ́ɛ́ mekélíe má Támbák píwóónyi kuám á nukamá, Yésus kanyi ɛ́ɛ́: «Niíta ɛ́ɛ́kiŋɛlɛ.» 29Kipááŋ mapá akáánɛ́ kiwóónón ne pilimbenyí, péeyúpi kiyukú é pilimbenyí, páafakɛk kɛ́ á kikas kí putɛ́ kisiɛ́n ɛ́ɛ́ isóop; póótólikonyi wɔ́ kɛ́ɛ é niít. 30Yésus mɛɛlɛ́ nɔ kusɔ́ɔ́nsɛt pilimbenyí pikáánɛ́, wɔ́ ɛ́ɛ́: «Súke», wɔlɔŋɛk ɛtɔ́, waakásɛk.
Na manɔ́ŋ no moomb
31Aná púmaápá kipíandina kí puɔ́s pú sápat, petííne ɛ́ɛ́ kilɔ́ŋ tiyɛ́ɛ́n ó kolóse puɔ́s pukáánɛ́, puɛ́tɛ puɔ́s pú sápat pukáánɛ́ mapá kiandá kí puɔ́s pú tópótópó, Pɛyúútɛn póokoówun Pílatɛ ɛ́ɛ́ pééŋinyi pɔ́ pilɔ́ŋ epie kɔ́ɔk pámámaná akanda pɔ́ pikɔ́nd. 32Pisimb píoniól, píakand pikɔ́nd pí mɔɔnd ukutúan, na mɔɔnd ukáándíɛ pámaápá masíá ne Yésus. 33Páámán é Yésus, pɛ́ɛ́n ɛ́ɛ́ usiaman akásɛk, tɛ ɛ́ɛ́ pákand wɔ́ pikɔ́nd. 34Tɛ nɔ, kisimb kímotí kɔ́ ɔlɔŋ kíetúm wɔ́ niɔŋɔ́ á tuundɔ́; yá akáánɛ́, nɔ niɔ́kɔ́tɔn, moomb na manɔ́ŋ máakáam. 35Mɔɔnd wɔɔyɔɔnɛ́ɛ moónyi eme, mɛɛ́nɛ́n mɔ́ aká mɛ́mɛɛ́píɛ́lɛ, epú kitikit wɔɔyɔɔnɛ́ɛ nyɛ kémuémue; wɔ́ weémenyen epú wɔɔyɔɔnɛ́ɛ nyɛ kémuémue ɛ́ɛ́ panɔ́ káákáánɔ́ núátap. 36Maandá makáánɛ́ mɛɛndɛ́ yá ó kuwóónyi ɔmfíɔ́ŋ wɔ́ɔ́yɔnɛ́ ɛ́ɛ́: Kikóókó kíɛ́yɛ́ tɛ kíkímoómí tiányikandɛ́k; 37ɔmfíɔ́ŋ ólotí ɔ́ɔ́yɔ ɛ́ɛ́: Pɛ́ɛ́nyɛ́ɛ́n sɔ́k ewú pémeékúsé wɔ́.
Pámáák Yésuse á kipɛ́l
(Mat 27.57-61; Mál 15.42-47; Lúk 23.50-56)
38É kélém kúɛ́yɛ́, Yúsɛpɛ u Alimaté, umaápá opíónyí u Yésus kí iŋɔsikɔ á kiákí ɛ́ɛ́ umapián puwaá nɛ Pɛyúútɛn, woonyoówún Pílatɛ pukaaka pú kuéŋi kilɔ́ŋ kí Yésus. Pílatɛ waátap, Yúsɛpɛ weenyeéŋí kilɔ́ŋ. 39Nikotɛ́mɛ, umɛɛ́p kuɛ́n Yésuse é putúk púmotí, woól kɛ́kɛ́ɛ́yɛ́ nɛ kisɛŋ kí túputia kiɔsɔ́ ne elepínde ú míil na alówɛs kíkuám pokílo niitín na páát. 40Pɔ́ɔkɔ́l kilɔ́ŋ kí Yésus páakúta kɛ́ɛ na papándásiɛ nɛ kisɛŋ kí niaŋɔ́, á nunamá núɔ́p nú Pɛyúútɛn nú kunyo kilɔ́ŋ. 41Kisíén mapá kɔɔ́mɔ pɔ́mɔɔ́tɔɔ́ndɛ́n Yésuse ó kolóse. É kisíén kikáánɛ́, kipɛ́l kiikɔ́s kɔ́ɔk, pámapá pámanyi pótinyoó mɔɔnd á kɛ́ɛ. 42Aná púmaápá puɔ́s pú kipíándina kí putɔ́mbí pú Pɛyúútɛn, kipɛ́l akáánɛ́ mekúye, póonyo Yésuse akáánɛ́.
ទើបបានជ្រើសរើសហើយ៖
Isáaŋ 19: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
