Isáaŋ 18
18
Pɛ́mɛ́ɛ́tíkɛ́n Yésuse
(Mat 26.47-56; Mál 14.43-50; Lúk 22.47-53)
1Yésus mɛɛl umanan akála, waayɔɔk no popíónyí pɛ́ɛ́yɛ́ taapukɛ u kiílu kí Sétilɔ́ŋ; kisíén mapá kɔ́ɔk, weepíkin á kí no popíónyí pɛ́ɛ́yɛ́. 2Naánɛ́ kɔk ɛ́ɛ́ Yútasɛ ewú umaányɛ́ɛ́n wɔ́ itɔk menyen kɔɔ́mɔ kakáán, á kiákí ɛ́ɛ́ pisikɛl puóli, Yésus maniápáápá kɔ́ɔk no popíónyí pɛ́ɛ́yɛ́. 3Yútasɛ weetélimit ó pusíó ɔ́ kukɔ́ɔ́kɔ ɔlɔŋ ú pisimb ne pekííkí kitamb kí Támbák pɔkɔ́n pá pafunɔ́fɔn na Pafalisiɛ́ŋ meékí kɛ́ɛ́yɛ́, weenyepíkínyí pɔ́ é kisíén ne pimenyinye na múlámba nɛ mɛlɛŋ mé pitíí. 4Yésus menyen epú kitikit puáminanɛ́ wɔ́, wɔɔpínɔtikɛn pɔ́ ukanyi kɔ́ɔ́p ɛ́ɛ́: «Ɛ́nyɛ́ nuambanɛ́ɛ?» 5Póondinyi wɔ́ ɛ́ɛ́: «Yésuse u Nasalɛ́t.» Yésuse kɔ́ɔ́p ɛ́ɛ́: «Niŋúɛ́ wɔ́.» Yútasɛ umaányɛ́ɛ́n wɔ́ itɔk, etényí akáánɛ́ nɔɔpɔ́ kɔ́ɔ́p ɔ́ kiɔp. 6Yésus mɛɛlɛ́ nɔ kuɔyɛt ɛ́ɛ́: «Niŋúɛ́ wɔ́» páakua e kúúsí ni inúú. 7Yésuse waand kuówun pɔ́ ɛ́ɛ́: «Ɛ́nyɛ́ nuambanɛ́ɛ?» Pɔ́ ɛ́ɛ́: «Yésuse u Nasalɛ́t.» 8Yésus kanyi kɔ́ɔ́p ɛ́ɛ́: «Insiɛl káánɔ́ ɛ́ɛ́ niŋúɛ́ wɔ́. Índɛ kɔk niŋúɛ nuambanɛ́ɛ, ánuyapá epe pɔsɔ́k páyɔɔk.» 9Púnyɛ nɔ́ ó kuwóónyi mekélíe mé Yésus umɔɔ́yɛ́t ɛ́ɛ́: «Indiményímí tɛ woomoómí é péépé amiímfá.» 10Símun Píɛlɛ, ɛpíɛ́tíkɛ́n imfak yɛɛyɛ́ á kipalapatá, wɔɔsɔ́k yɛ́ɛ, waasáp Málákuse, eŋelípuólí u afunúfɔn wɔɔkɔ́n, wɛɛsɛ́l wɔ́ etú wɔɔnɛm. 11Yésus kanyi ɛ́ Píɛl ɛ́ɛ́: «Ondí imfak yaawɔ á kipalapatá! Taat índɛŋɛ́n ipeŋé í muyú, indipíwá yɛ́ɛ á?» 12Ɔlɔŋ ú pisimb nɔ ɔkɔ́n wɔɔpɔ́ ne pekííkí pɔ́ pɔkɔ́n pɛ́ Pɛyúútɛn kuulu é Yésus, páakúta wɔ́ imbɔk.
Á nuyá nú Ɔfunúfɔn Wɔɔkɔ́n
(Mat 26.57-58; Mál 14.53-54; Lúk 22.54)
13Páatúan kuyɔɔk ne Yésus ku Ana, itééné Kayííf, wɛɛ́tɛ Kayíífe umaápá Afunɔ́fɔn Wɔɔkɔ́n yɛɛ́tɛ yɔɔŋ; 14wɛɛ́tɛ Kayíífe umɛɛ́l ɛ́ Pɛyúútɛn ɛ́ɛ́: «Peseé unyɛɛ́ ɛ́ɛ́ mɔɔnd omoómí kú ó pusíó pú pɛɛnd peem pɔ́ kitɔŋ.» 15Símun Píɛ́lɛ no opíónyí u Yésus olotí mɔɔŋɔ́n é Yésus. Opíónyí wɛɛyɛ́ ukáánɛ́ afunúfɔn Wɔɔkɔ́n memenyén wɔ́, puɛ́tɛ puandá umeépíkín kɔ́ ɔɔ́nd ú nuyá nú Ɔfunúfɔn Wɔɔkɔ́n. 16Maná Píɛlɛ wɔɔlɔp kɔ́ ɔɔ́nd, masiá ne niít ní kiansi. Opíónyí ewú afunúfɔn Wɔɔkɔ́n meémenyen waám waakálɛt ká akáandɔ́ umaákííká niít ní kiansi, weepíkinyi Píɛ́lɛ. 17Eŋelípuólí waakándɔ́ umaákííká niít ní kiansi kanyi ɛ́ Píɛl ɛ́ɛ́: «Atipá aŋúɛ kákááwɔ kɔ́ ɔlɔŋ ú popíónyí pá mɔɔnd ewe á?» Píɛ́lɛ kɛ́ɛ́yɛ́ ɛ́ɛ́: «Imbúsíon!» 18Aná puyo maápá pútúútan, peelímoólí ne pekííkí nuyá páákɔm yiik é kupíésepe; Píɛlɛ etényí akáánɛ́ nɔɔpɔ́ upíésepe yiik kɛ́kɛ́ɛ́yɛ́.
(Mat 26.59-66; Mál 14.55-64; Lúk 22.66-71)
19Afunɔ́fɔn Wɔɔkɔ́n weetúm é kupite Yésuse kɛ́ɛ́yɛ́ ó popíónyí ni iŋónyítónyí yɛɛyɛ́. 20Yésuse woondinyi wɔ́ ɛ́ɛ́: «Yaákálán pɛɛnd, yoónyónyí á piansi pí Pɛyúútɛn pí imbísókólí na á kitamb kí Támbák, kɔɔ́mɔ Pɛyúútɛn kitikit píkúsanɛ́ɛ, púmotí no púmotí yáányíkálɛ́t kí insumbú tipá. 21kiákí imbitené? Puandá imɔɔ́yɛ́t, ówún pɔsɔ́k pɔ́miímbítɔ́líkɔ́n; péemenyen peseéképese kiákí imɔɔ́yɔ.» 22Ekííkí omoómí kɔ́ɔ́p kɔ́ ɔlɔŋ umaápá akáánɛ́ ɔ́ɔ́pɔn nɔ́, waapɔm Yésuse ɔmbɛ́l, wɔ́ kɛ́ɛ́yɛ́ ɛ́ɛ́: «Yá anakáánɛ́ ondinyonyé afunúfɔn Wɔɔkɔ́n á?» 23Yésuse kɛ́ɛ́yɛ́ ɛ́ɛ́: «Índɛ imákálɛ́t kilɔk, índíínyi; maná índɛ imákálɛ́t peseé, kiákí kɔk iŋitenée?» 24Kúnyɛ nɔ́ɔ, Ánɛ waatúmɛn Kayíífe, umaápá afunúfɔn Wɔɔkɔ́n, Yésuse imbɔ́k sikútá.
(Mat 26.71-75; Mál 14.69-72; Lúk 22.58-62)
25Símun Píɛ́lɛ akáánɛ́ upíésepe yiik. pákanyi kɛ́ɛ́yɛ́ ɛ́ɛ́: «Tíkɛ aŋúɛ kákááwɔ anyɛ kɔ́ ɔlɔŋ ú popíónyí pé Yésus á?» Píɛ́lɛ waapítáŋɔn, wɔ́ ɛ́ɛ́: «numbúsíon.» 26Eŋelípuólí omotí u Afunɔ́fɔn wɔɔkɔ́n, umaápá nikúli nímoómí nɔ sɔ́k ewú Píɛ́l mɛɛ́sɛ́l etú, ɛ́ɛ́pí kɛ́ɛ́yɛ́ ɛ́ɛ́: «Atipá aŋúɛ insiɛ́kuɛ́n putiɛ́púlɛ́ nɛɛyɛ́ á?» 27Píɛ́lɛ máand apítáŋɔn, umɛɛlɛ́ umaápítáŋuna kitétí kíapília.
Yésus nyɛ etényí ó pusíó pú Pílat
(Mat 27.1-2,11-14; Mál 15.1-5; Lúk 23.1-5)
28Ne emfúnupálɛ páanyaatɔ́k ne Yésus ku Kayííf á kɔ́ɔ́p kí indáŋa i ɔŋgɔmɔn Pílat. Pɛɛnd pámaáyɔɔk nɛɛyɛ́ timepíkin emenyí pákɔɔn ó kikotí kí Pɛyúútɛn kíyoosoné múkunyá mú putɔ́mbí pú Pásíka. 29Pilátɛ waám kɔ́ ɔɔ́nd, wɔ́ kɔ́ɔ́p ɛ́ɛ́: «Kikua kínín númɛ́nyɛɛtikɛ́n mɔɔnd ewe á kɛ́ɛ?» 30Póondinyi wɔ́ ɛ́ɛ́: «Usɔ́tɔ utiɛlɛ́ afal, tusíókuólin nɛɛyɛ́ akɛ á?» 31Pilátɛ kɔ́ɔ́p ɛ́ɛ́: «Ɔ́nukɔ́l wɔ́, núsóósosi wɔ́ aná pikotí píánɔ́ ɔ́ɔ́yɔɔnɛ́ɛ.» Pɛyúútɛn kanyi kɛ́ɛ́yɛ́ ɛ́ɛ́: «Tutipá na pukaaka pú kuɔ́n mɔɔnd.» 32Yá anakáánɛ́ pɛ́mɛɛ́síkɛ́ɛ́nɛ́n kuwóónyi mekélíe Yésus mɔɔ́yɔ pilɔŋ pí nikú wɛɛsikɛɛnɛnɛ́ɛ kukú.
33Pilátɛ waand epíkin á kiansi. Waapílikɛn Yésuse, ukanyi kɛ́ɛ́yɛ́ ɛ́ɛ́: «Anyɛ efuŋ u Pɛyúútɛn á?» 34Yésuse woondinyi wɔ́ ɛ́ɛ́: «Aŋú muɛ́t apítáákanɛ́ nɔ éy pɔsɔ́k pólotí pɔ́ɔ́nyíkuɔyɔ́n nɔ́ káámɛ ó pusíó?» 35Pílatɛ kɛ́ɛ́yɛ́ ɛ́ɛ́: «Iŋúɛ inyɛ Yúútɛn á? Kitɔŋ kíáwɔ nɔ pɔkɔ́n pá pafunɔ́fɔn pɛ́mɛ́nyikusɛmɛ́ kuamɛ; ɛɛ́lɛ́ kiákí?» 36Yésuse woondinyi ɛ́ɛ́: «Pufuŋ púámɛ tipá púólinon ku pɛɛnd pé kúúsí. Pufuŋ púámɛ sɔ́tɔ púólinon ɛ́ pɛɛnd pé kúúsí, peelímoólí páámɛ siánuanan ɛ́ɛ́ indikɔɔ́n kí imbɔ́k sí Pɛyúútɛn. Aákóo, pufuŋ púámɛ tipá púólinon ku pɛɛnd pé kúúsí.» 37Pílat kanyi kɔk kɛ́ɛ́yɛ́ ɛ́ɛ́: «Anyɛ kɔk efuŋ á?» Yésuse woondinyi ɛ́ɛ́: «Aŋúɛ ɔɔyɔnɛ́ ɛ́ɛ́ inyɛ efuŋ. Pémimbíén yoond yoól e kúúsí á kuasipíákɛ́n kémuémue itóy. Mɔɔnd kitikit wɔɔ́pɔninɛ́ kémuémue ɔ́ɔ́pítɔ́likɔn puandá yɔɔyɔnɛ́ɛ.» 38Pílatɛ kɛ́ɛ́yɛ́ ɛ́ɛ́: «kiákí kínyɛ́ kémuémue?»
(Mat 27.15-31; Mál 15.6-20; Lúk 23.13-25)
Wɔɔyɔ nɔ́ɔ, waám ɔ́ kuɔwɔɔ́k Pɛyúútɛn kɔ́ ɔɔ́nd, ukanyi kɔ́ɔ́p ɛ́ɛ́: «Á kíámɛ kiáyí, indipá yɛɛ́nɛn tɛ kikua kímoómí kɛ́ɛ́yɛ́. 39Aná numɛɛ́lín ɛ́ɛ́ ínúyapinan kimbɔk ɔ́ putɔ́mbí pú Pásika kitikit, nuɔ́kɔɔyɔ ɛ́ɛ́ ínúyapɛn efuŋ u Pɛyúútɛn á?» 40Póond é kufeetenyi ikelú pɔ́ɔyɔ ɛ́ɛ́: «Aákóo, kútipá wɔ́, túfíin á Palápas!» Palápasɛ kɔk oŋónónín.
ទើបបានជ្រើសរើសហើយ៖
Isáaŋ 18: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
