Isáaŋ 17
17
Yésus ópísókolonyi ó pusíó pú popíónyí pɛ́ɛ́yɛ́
1Umɛɛlɛ́ umanan akála anakáánɛ́, Yésuse wɛɛmɛlimɛt uyooson mɛnɛ́mɛnɛ́ɛ, wɔ́ ɛ́ɛ́: Taat, kisikɛl mánimikan, fá muɔ́nɔ́ ááwɔ nuúmu, ɛ́ɛ́ muɔ́nɔ́ ááwɔ kufá nuúmu, 2na pukaaka emeékí wɔ́ á kupian punya pɛɛnduɛ peem, ɛ́ɛ́ wéekenyinyi kusɔ́t kú kati nimanínɛ́ɛ ɔ́ pɔsɔ́k peem emeékí wɔ́. 3Kusɔ́t kú kati nimanínɛ́ɛ kɔk nyɛ ɛ́ɛ́ pékumenyen, aŋúɛ, ɛnyɛɛ́ aŋúéŋényéŋenye Támbákɛ́ɛ u kémuémue, póond pémenyen ewú amaátɔ́m, Yésus Kilíise. 4Yaákufá nuúmu e kúúsí; yaáyákɔ́n pusɔ́m amiíndɔ́m ɛ́ɛ́ yɛ́ɛsiɛlɛ́. 5Nínúan kɔk Taat, imfa nuúmu kááwɔ ɔ́ mɔkɔsɛ́, pilɔŋ pí nuúmu imaápián kááwɔ ɔ́ mɔkɔsɛ́ kɔ́ɔk amanyi atipundɔ́ mɛnɛ́mɛnɛ́ɛ ne kúúsí.
6«Yɛɛ́l ɛ́ɛ́ pɛɛnd amaáyɔ́ɔ́n ekue e kúúsí ekiiŋeki menyi kisiɛ́n kíáwɔ. Pɔ́mɔkuɔ́pínɔn, akimfá pɔ́, pɔ́ɔŋ kááwɔ é mekélíe. 7Nínúan, pémenyen ɛ́ɛ́ epú kitikit amiímfá, okoólinon kuawɔ. 8Tɛ tukál yáányíkálá kɔ́ɔ́p, túnyɛ etú éényíŋekí ɛ́ɛ́ índían pɔ́. Páákaátap túú, péémenyí peseékése ɛ́ɛ́ yoólín kuawɔ, póond páákaátap ɛ́ɛ́ aŋúɛ áányííndɔ́m. 9Yoókupísókolonyi kɔ́ɔ́p ó pusíó, indipá imbísókolonyi ó pusíó pú pɛɛnd pé kúúsí, yoókupísókolonyi yá ó pusíó pú péépé amiímfá, pɔ́ɔ́kuɔ́pɔnɛn. 10Epé kitikit píŋɔ́pɔninɛ́, nyɛ pááwɔ, yá aná epé kitikit pɔ́kuɔ́pɔninɛ́, nyɛɛ́ páámɛ: pɛɛnd amiímfá kanyɛɛ́ etíínyenyi nuúmu núámɛ. 11Kutúm nínúan, indikápá e kúúsí; pɔ́ péményisíén e kúúsí, niŋúɛ yoólon kuawɔ. Taat, anyɛ asukúná, kííká pɔ́ á pukaaka pú kisiɛ́n kíáwɔ, kisiɛ́n ekí amiínlukɔ́ ɛ́ɛ́ pápá ɔtɛ́m ómoómí, yá aná naamɛ naawɔ tunyɛɛ́ ɔtɛ́m ómoómí. 12Aká yáányípá nɔɔpɔ́, yaápá iŋííká pɔ́ na pukaaka pú kisiɛ́n kíáwɔ ekí amiímfá; yaákííká pɔ́, tɛ omoómí utiényim, ɛsiɛ́ ewú wɛɛsikɛɛnɛnɛ́ ne punyím, ɛ́ɛ́ Ɔmfíɔ́ŋ píwóónyi. 13Kisikɛl kíámɛ kí kuosiondó kuawɔ ekie nínúan, yaákála anɛ imanyi e kúúsí ɛ́ɛ́ pówóon kuwóon ni ipali í anyamɔ́ wáámɛ wuum. 14Yeétúúné pɔ́ ne mekélíe mááwɔ, pɛɛnd pé kúúsí póond ɔ́ kupíkɔpɔn pɔ́, á kiákí ɛ́ɛ́ pátipá pɔ́ɔ́pɔnɛn kúúsí ekue, niaŋ níámɛ. 15Indipá iŋupísókolonyi ɛ́ɛ́ ééŋi pɔ́ e kúúsí, yoókupísókolonyi ɛ́ɛ́ ákííka pɔ́ ɔ́ kilɔk kí mɔɔnd. 16Pátipá pɔ́ɔ́pɔnɛn kúúsí, yá aná indiányípá yɔɔ́pɔnɛn kúúsí. 17Ɛ́ɛl ɛ́ɛ́ á kinɔn kí kémuémue, pɔ́kuɔ́pɔnɛn aŋúɛ na aŋúɛ: mekélíe mááwɔ nyɛ kémuémue. 18Yá aná amiíndɔ́m e kúúsí, imátɔm pɔ́ kɔ́ ɔtɛ́m ú pɛɛnd pé kúúsí. 19Imépíekí kitikite waamɛ kááwɔ, kɔ́ɔ́p ó pusíó, ɛ́ɛ́ pɔ́ kɔ́kɔ́ɔp pápá kémuémue pááwɔ. 20Pátipá pɔ́ pééŋényí imbísókolonyée kɔ́ɔ́p ó pusíó, yaákand opísókolonyi ó pusíó pú péépé páányíŋátapanɛ́ɛ ó pusíó pú mekélíe mɔ́ɔ́p. 21Yoópísókolonyi ɛ́ɛ́ peem pá ɔtɛ́m ómoómí, yá aná ɛnyɛɛ́ káámɛ, niŋúɛ kááwɔ, pápá káásɔ́ pɔ́ kɔ́kɔ́ɔ́p, ɛ́ɛ́ punya pɛɛnduɛ menyi ɛ́ɛ́ amiindɔ́m. 22Yeékí pɔ́ nuúmu emiíŋekí ɛ́ɛ́ pápá ɔtɛ́m ómoómí, yá aná naamɛ naawɔ tunyɛɛ́ ɔtɛ́m ómoómí, 23niŋúɛ kɔ́ɔ́p niaŋ níáwɔ káámɛ, ɛ́ɛ́ pááminɛn ɛ́ kitɛ́fɛk kí nilat, akáánɛ́ punya pɛɛnduɛ ényímenyée ɛ́ɛ́ aŋúɛ amiíndɔ́m oókond ɔɔyɔ pɔ́ aná iŋɔɔyɔnɛ́ɛ. 24Taat, yɔɔ́kɔyɔ ɛ́ɛ́ kɔɔ́mɔ inyɛɛ́, epé emiíŋeki pá kɔ́kɔ́ɔ́p naamɛ, póond páyíkina nuúmu amiímfá, á kiákí ɛ́ɛ́ ɔmiŋɔyɛ́t amanyi atipundɔ́ mɛnɛ́mɛnɛ́ɛ ne kúúsí. 25Taat, anyɛ indɛ́ndɛ́nɛ, punya pɛɛnduɛ tíékumenyí, niŋúɛ yeékumenyen, epe emiíŋekí émenyen ɛ́ɛ́ aŋúɛ amiíndɔ́m. 26Yɛɛ́l ɛ́ɛ́ pékumenyi iŋoond ínsuŋuna no kuónyonyi pɔ́ ɛ́ɛ́ páand ekumenyi peseéképese, ɛ́ɛ́ aná iŋɔɔyɔnɛ́, iŋɔyɔ ikáánɛ́ pá kɔ́ɔ́p kí itɛ́m, yóond ímbá kɔ́ɔ́p kí itɛ́m.»
ទើបបានជ្រើសរើសហើយ៖
Isáaŋ 17: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
