Isáaŋ 16
16
1Yésus ɛ́ɛ́pí ó popíónyí pɛ́ɛ́yɛ́ ɛ́ɛ́: «Imɔ́núɔ́yɔn anakáánɛ́ ɛ́ɛ́ nutitúm pipíóndínyí ɔ́tɛ́m kélém. 2Páányíkány na piansi pí Pɛyúútɛn pí imbísókólí káánɔ́. Kutápɔk pukáánɛ́, kisikɛl óókoólon ekí mɔɔnd kɛɛ́nyɛ́ɛl ukuɔ́n upítááka ɛ́ɛ́ wɔɔ́kɔtɔn Támbákɛ́ɛ. 3Pɛ́kɛɛlɛ nɔ́ á kiákí ɛ́ɛ́ pétiémenyi tɛ Taatɛ́ɛ tɛ iŋúɛ́. 4Maná, imánútían púú ɛ́ɛ́ aká kisikɛl kiɛ́tɛ pɛkɛɛ́nyɛ́ɛlɛ nɔ kaányáasiám, núpítáákɛt ɛ́ɛ́ imanútían púú insúá. Indimanútían púú é nitúmín á kiákí ɛ́ɛ́ imapá naanɔ́.»
Yésus méékí indán i Emfúnukufúúmɛ
5Yésuse waasuŋɔn na nukal, wɔ́ ɛ́ɛ́: «Nínúan iyɔɔk ku ewú umiíndɔ́m, tɛ mɔɔnd káánɔ́ kɔ́ ɔlɔŋ utipá wuuŋówon ɛ́ɛ́: Naánɛ́ ayuukan ée? 6Maná, insíkíl mówóón káánɔ́ kí itɛ́m ó pusíó ɛ́ɛ́ imákálɛ́t káánɔ́ anakáanɛ́. 7Kémuémue wɔ́ inúɔ́yɔnɛ́ɛ: púnyɛ peseé táásɛ káánɔ́ ó pusíó ɛ́ɛ́ íyɔɔk; púnyɛ́ ɛ́ɛ́ índɛ insiɛl indiyɔɔ́k, ewú wɛɛsikɛɛnɛnɛ́ kunúɔ́kɔnɔkɔn tíókoól. Maná, índɛ insiayɔɔk, iŋanútúmɛn wɔ. 8Wɔ́ kɔk, aká ukoónyóól, uketíínyi peseékepese pɛɛnd pé kúúsí ekue ɛ́ɛ́ páápínanan é púúpú púyoosoné kifal, indɛ́ndɛ́nɛ ni isɔ́ɔ́sɔ í Támbák; 9é púúpú púyoosoné kifal: púnyɛ ɛ́ɛ́ pátipá pópíóndonyi ɔtɛ́m naamɛ; 10é púúpú púyoosoné indɛ́ndɛ́nɛ: púnyɛ́ ɛ́ɛ́ yaáyuukan ku Taatá, nutiákáand kuŋɛn; 11é púúpú púyoosoné isɔ́ɔ́sɔ í Támbák: púnyɛ ɛ́ɛ́ Támbák ámaná ɛpɛn efuŋ u kúúsí. 12Imanyi na maandá kutek mɔ́ kunúɔ́yitɛn, maná, nutipá pɔ́kuɔ́t mɔ́ níinúan. 13Emfúnu ú kémuémue kɛɛl úmóol, úkɛɛl ɛ́ɛ́ númenyi kémuémue kitikit. Utiákálá epú puólinoné kɛ́ɛ́yɛ́, maná ukɔnúɔ́yɔn epú kitikit úmɔ́nyɔɔ́p woond unútíánan epú púólonée. 14Ukiŋgúmesi á kiákí ɛ́ɛ́ ukɔnúɔ́yɔn epú púólinonée káámɛ. 15Puandá kitikit púɔ́pɔninɛ́ Taatɛ́ɛ ɔ́ɔ́kiŋɔ́pɔnɛn kákáámɛ. Púúpɔ́ ímɛ́nyɛɛlɛ́ ɛ́ɛ́ Emfún kapákuna epú púólinonée káámɛ únúfáan.»
Insíkíl kepínúki ká anyamɔ́
16Yésuse waasuŋɔn, wɔ́ ɛ́ɛ́: «Púmésíén mɔnɔ́ kisikɛl, nutíákáand kuŋɛn, mɔnɔ́ kisikɛl andíkɛ́k é kélém kúɛ́yɛ́ núand kuŋɛ́n.» 17Popíónyí pé Yésus pómotí pɔ́ɔpíɔyinɔn kɔk pɔ́ɔ nɔ pɔ́ɔ ɛ́ɛ́: «kiákí waambanɛ́ kutúɔ́yitɛn; aká wɛɛlɛnɛ́ ɛ́ɛ́: Ɔ́ mɔnɔ́ kisikɛl nutiákáand kuŋɛ́n, mɔnɔ́ kisikɛl andíkɛ́k é kélém núand kuŋɛ́n wɛɛ́pí káásɔ́ andíkɛ́k ɛ́ɛ́: Yaáyuukan ku Taatá. 18Ɔ́ muɔ́nɔ́ u kisikɛl, pukáánɛ́ wɔɔyɔɔnɛ́ɛ nyɛ kiákí? Tutipá tuɔ́pɔn epú waambanɛ́ kuɔyɛt.» 19Yésuse weemenyi ɛ́ɛ́ popíónyí pɛ́ɛ́yɛ́ pómotí áákamba kuówun wɔ́ puandá; wɔ́ kɔ́ɔ́p ɛ́ɛ́: «Imɛ́ɛ́l káánɔ́ ɛ́ɛ́ Ɔ́ muɔnɔ́ u kisikɛl nutiákáand kuŋɛ́n, mɔnɔ́ kisikɛl é kélém nuand kuŋɛ́n; mekélíe makáánɛ́ nupíówoné panúɛ na panúɛ á? 20Yɔɔ́núɔ́yɔn kémuémue ɛ́ɛ́: nukapaŋa, nukɛpíyɛ́kɛlɛ, pɛɛnd pé kúúsí pɔ́, pésile; nukapá é muyú, maná muyú múánɔ́ kepínúki múond anyamɔ́. 21Aká muɔ́nɔ́ ményipulú akáandɔ́, insíkíl nyɛ kɛ́ɛ́yɛ́ kɔ́ ɔtɛ́m, á kiákí ɛ́ɛ́ kisikɛl kíɛ́yɛ́ kí muyú máásíám; maná, wɔ́ nekupíen, upíéliti muyú, á kiákí ɛ́ɛ́ anyamɔ́ únyɛɛ́ kɛ́ɛ́yɛ́ ɛ́ɛ́ ukanyi nɔ muɔ́nɔ́ áátápukan. 22Púnyɛ puandá púmoómí naanɔ́; nínúan nunyɛ é muyú, maná iŋáand ɛnúɛ́n; káákáánɔ́ itɛ́m síánɔ́ áányípáanɛ́ ká anyamɔ́; nunamá nú anyamɔ́ nukáánɛ́ mɔɔnd tipá pɔ́kuɔk núú káánɔ́. 23Aká puɔ́s pukáánɛ́ áányáásiámánɛ́ɛ, nutiányaandá kuŋówun iŋówúnín á puandá. Yɔɔ́núɔ́yɔn kémuémue ɛ́ɛ́: Taatá áányínúfá puandá kitikit númɔ́nyɔɔŋɛ́n wɔ́ káámɛ ɛ́ kisiɛ́n. 24Kuasiám nínúan, tɛ puandá numanyi nutiɔŋɛ́n káámɛ ɛ́ kisiɛ́n. Ɔ́nuɔŋɛ́n, núpia ɛ́ɛ́ anyamɔ́ wáánɔ́ pá owóónón.»
Yésus mápíányɛ́n kifal
25Yésuse waasuŋɔn na nukál, wɔ́ ó popíónyí pɛ́ɛ́yɛ́ ɛ́ɛ́: «Imɔnúɔ́yɔ́n maandá makáánɛ́ kitikit é melinsí; maná, kisikɛl óókoólon ekí yɛɛ́nyɛ́ɛlɛ́ indiandá anúkálan nɔ́; kínyɛ kisikɛl ekí yaányínútíananɛ́ epú púyoosoné Taatɛ́ɛ paásí paásí. 26Kisikɛl kikáánɛ́ ɛ́nyɛ́ɛl kíasiáman, nuónyóond ɔ́ kuɔŋɔn Taatɛ́ɛ maandá káámɛ ɛ́ kisiɛ́n; maná, indipá inúɔ́yɔn ɛ́ɛ́ yoónyípísókolonyi wɔ́ káánɔ́ ó pusíó, 27á kiákí ɛ́ɛ́ wɔ́ muɛ́t, Taatɛ́ɛ, wɔɔ́núɔyɔ. Wɔɔ́núɔyɔ ó pusíó ɛ́ɛ́ nuɔ́kiŋɔyɔ nuond nuátapan ɛ́ɛ́ yóólín kuɛyɛ́. 28Yoólín ku Taatá, yaasiám ɛ́ kikɛtɛ́kɛtɛ́ɛ kí pɛɛnd pé kúúsí. Nínúan, yáatɔk e kúúsí, yóond á masiá má Taatá.» 29Popíónyí pɛ́ɛ́yɛ́ ɛ́ɛ́pí kɔk kɛ́ɛ́yɛ́ ɛ́ɛ́: «Ɛhɛ́ɛŋ, nínúan aákála paás paás, atikápá aand akála é melinsí; 30nínúan tuémenyen ɛ́ɛ́ eémenyen puandá kitikit, atipá epétenyi ɛ́ɛ́ mɔɔnd kuówun iŋówúnín. Púúpɔ́ tuátapanɛ́ ɛ́ɛ́ oókoólinon ku Támbák.» 31Yésuse woondinyi pɔ́ ɛ́ɛ́: «Nínúan nuákaátapan á? 32Índɛ́, kisikɛl óókoólon, kíikie tukanyiɛ́ á kɛ́ɛ, nukaányísálamand, siki mɔɔndɛ ukɔ́l yɛɛyɛ́ iŋilí, nuond nuuyap iŋúéŋényí. Maná, indipá iŋúéŋényí, á kiákí ɛ́ɛ́ Taatá nyɛ naamɛ. 33Imánútían maandá makáánɛ́ kitikit ɛ́ɛ́ itɛ́m síánɔ́ páan é kiyeéwe á kiákí ɛ́ɛ́ nunyɛ papílatán káámɛ. É kúúsí ekue, nukapá é muyú; maná, ánupíkányɛk, yaápíányɛ́n pukaaka pú kifal kinyɛɛ́ e kúúsí!»
ទើបបានជ្រើសរើសហើយ៖
Isáaŋ 16: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
