Meelie mé Petúmí 9
9
Ɔkɔ́n Yésus mápílíkɛ́n Sóole
1A kisikɛl kikáánɛ́ Sóol timaándan pisáas pí kuɔ́nɔ popiónyí pɔ́ Ɔkɔ́n, wɛɛnyɛɛ́n ɔkɔ́n u pɔkɔ́n pá pafunɔ́fɔn 2Woówun wɔ́ ɔmbɔp wéékenyée wɔ́ pukaaka é kupíkin á kiansi kí imbísókólí kí Pɛyúútɛn kínyɛ́ Tamas ɛ́ índɛ usokóóki pɛɛnd tɛ pɛɛnúmɛndɔ́ tɛ paakáandɔ́, pɔ́ɔŋɔŋɛ́ kí iŋilí i Yésus, wɛɛtikɛn pɔ́, úkúta pɔ́, wóondo nɔɔpɔ́ Yelúsalɛm 3Umɛɛlɛ́ úkanyi kí iŋilí i Tamas kuámán á pálɛ́k, nɔ niɔ́kɔ́tɔ́n kisie kíólin mɛnɛ́mɛnɛ́ɛ kíɔpɔŋ wɔ 4Sóole waakua e kúúsí woond wɔɔkɔɔ́p ekelú úmɔɔ́yɔ́n wɔ́ ɛ́ɛ́: «Sóol, Sóol kiákí inséésenyé!» 5Sóole woówun ɛ́; «aŋúɛ ɛnyɛ́ wɔ́ Ɔkɔ́n.» Ekelú wóondinyi wɔ́ ɛ́ɛ́: «inyɛ Yésuse eséésenyée. 6Maná télimít, píkíni á pálɛ́k, kɔ́ɔk pákaná akutían epú ɛɛsikɛnɛnɛ́ɛ kuɛl.» 7Pɔ́kúɔ́p pɛ́ ɛŋɛnd péétélimit tɛɛ́ puandá pú kuɔyɛt; pɔ́mɔɔ́pɔ́n ekelú, maná pɛ́tiɛ́n mɔɔnd umaákála 8Sóole waatukɛn weefun eŋis, maná utiɛ́nɛ́n tɛ puandá pɔ́ɔ́kɔ́l wɔ kɔ́ ɔmbɔk ɛ́ɛ́ pépíkin nɛɛyɛ́ Tamas 9É metúk mátátɔ́ utiɛ́nɛn woond wɔɔlɔp tɛ kunya tɛ kupuwáa 10Opíónyí mapá Tamas kisiɛ́n ɛ́ɛ́ Ananíasɛ Ɔkɔ́n weepítíínyi wɔ kí iŋɛ́nínɛ, wu kɛ́ɛ́yɛ́ ɛ́ɛ́: «Ananías!» Woondinyi ɛ́ɛ́ «niŋuɛ ewe Ɔkɔ́n» 11Ɔkɔ́n kanyi kɛ́ɛ́yɛ́ ɛ́ɛ́: «Akaná ayɔɔk kí iŋilí pápílanɛ́ɛ yi indɛ́ndɛ́nɛ, épíkin á kiansi kí Yutas óówun mɔɔnd u Talas kisiɛ́n ɛ́ɛ́ sóole woopísókolonyi é kipénéŋ ekie 12Usɛɛkuɛ́n aŋúɛ Ananíasɛ kí iŋɛ́ninɛ, esepíkin kɔɔ́mɔ unyɛɛ́ omóóndó amátál wɔ imbɔk ɛ́ɛ́ wáand kuɛ́nɛ́n» 13Ananíasɛ woondinyi: «Ɔkɔ́n pɛɛnd táasɛ ɛ́ɛ́pitɛtɛ mɔɔnd ukáánɛ́, póónd pindían kilɔk wɛɛlɛnɛ́ɛ peétépí pááwɔ Yelúsalɛm 14Woól akɛ na pukaaka pafunɔ́fɔn pɔɔkɔ́n éényéékí wɔ ɛ́ɛ́ wɛ́ɛ́tikɛn epi kitikit pɛ́ɛtɛɛtɛnɛ́ kisiɛ́n kíáwɔ» 15Maná Ɔkɔ́n kanyi kɛ́ɛ́yɛ́ ɛ́ɛ́: «apá á kiákí ɛ́ɛ́ yáyɔ́ɔn mɔɔnd ewé ɛ́ɛ́ úpá eŋelípuólí waamɛ, wɔ́ ukɛɛ́nyɛ́lɛ ɛ́ɛ́ pitɔŋ pi melukú, pefuŋ pɔ́ɔ́p nɔ kitɔŋ kí Isalaɛl menyi kisiɛ́n kíámɛ. 16Iŋetíínyi wɔ niŋú muɛt iŋɛ́n ukɛɛ́nyɛ́ɛ́n ó pusíó pú kisiɛ́n kíámɛ» 17Kɔ́ɔkɔ́ ananías maáyɔɔ́k. Weepíkin á kiansi kí Yutas, waatal sóole imbɔk woond waatían wu ɛ́ɛ́: «Andimán áámɛ Sóol, Ɔkɔ́n Yésuse wáányíkuámɛ́n kí iŋilí ɛ́ɛ́nyɛ́ɛ́ndɛ́, mindɔ́m ɛ́ɛ́ átál á kuand kuɛ́nɛn, óond ápá owóónón ne efúnukufúúmɛ.» 18Nɔ niɔ́kɔ́tɔ́n maándá máakua kɛ́ɛ́yɛ́ ké eŋis ɛlɛɛ́ pipansá wand kuond ɛ́ɛ́ kuɛ́nɛn; waatukɛn waatáŋap kɔk induén. 19É kélém akáánɛ́ waanya, waapia pukaaka.
Sóol éékéme isɔ́m yi indámb Tamas
20Sóole wɔɔlɔp paán pé metúk no popíónyí pámaápá Tamas. Woond é kukéme á piansi pi imbísókólí ɛ́ɛ́ Yésus nyɛ muɔ́nɔ́ u Támbák. 21Epé pɔ́mɔɔ́pɔ́n wɔ mesímíle póond pópíówon: «Utipa mɔɔnd ewe umányipá uséésenyi Yelúsalɛm épé kitikit pɛ́tɛɛtɛnɛ́ɛ kisiɛ́n kí Ɔkɔ́n! Utiól akɛ ɛ́ɛ́ wɛɛsiɛtíkɛ́n pɔ́ woond nɔɔpɔ́ ku pafunɔ́fɔn pɔɔkɔ́n?» 22Maná sóol kálan pɔ́ tɛ pumbíla: Pɛyúútɛn pɔ́mɔɔ́sɔ́tɔn Tamas timand emenyen pú kuondinyi wɔ́ aká umeétíínyényi pɔ́ ɛ́ɛ́ Yésus nyɛ Osótí 23É kélém kú kinɔ́k kí kisikɛl, Pɛyúútɛn pámaápá Tamas páásɔ́mb ɛ́ɛ́ pɔ́ɔ́n sóole, 24maná péékésitényi Sóole kí ikɔn pámaányɛn wɔ: Pámakííka eŋít ya pálɛ́k puɔ́s ɛlɛɛ́ putuk ɛ́ɛ́ pɛ́ɛ́tikɛn wɔ pɔ́ɔ́n wɔ. 25Maná putúk púmotí popíónyí pɛ́ɛ́yɛ́ póombin wɔ́ kí isááŋ pééseli wɔ taapukɛ u ɔmindɛ́ no tuolí.
Sóol móóndó Yelúsalɛm
26Waámán Yelúsalɛm Sóole waapímak kuɔŋ ó popíónyí; Maná peem pian puwaá nɛɛyɛ́, á kiákí ɛ́ɛ́ patimaátapan ɛ́ɛ́ ukanyi kémuémue opíónyí u Yésus. 27Palanápasɛ wɔɔkɔ́l wɔ waayɔɔk nɛɛyɛ́ ku petúmí wɔɔyɔn pɔ́ aná Sóole mɛɛ́n Ɔkɔ́n kí iŋilí, na aná Ɔkɔ́n maákálán wɔ. Waatían pɔ́ kɛ́ɛ́kɛ́ aná Sóole meékémé kisiɛ́n kí Yésus Tamas tɛ pumbíla. 28Kutúm á kisikɛl kikáánɛ́, Sóole waalat ɔlɔn nɔɔpɔ́, umákat utúnuk Yelúsalɛm ukémé kisiɛ́n kí Yésus tɛ pumbíla. 29Umandá kuɔyɔn Pɛyúútɛn pámaákálá nukál nú pɛkɛlɛk upekenyipekenyai nɔɔpɔ́, maná pɔ páamba ɛ́ɛ́ pɔ́ɔ́n wɔ. 30Aká peétépí meémenyí anakáánɛ́, pááyɔɔk nɛɛyɛ́ é Sesale, kɔ́ɔ́kɔ pééyuuki wɔ á pálɛ́k u Tálas. 31Peétépí mapa ekiyeéwe é Yute kitikit, á kalilé na Samali; pamapiakan malunda póond pétííne Ɔkɔ́n, embul wɔ́ɔ́p ɔ́ɔmbɔ na pukaaka pu Emfúnukufúúmɛ.
Piɛ́l mééŋúkí Ené
32Piɛl, mɛɛndɛ́ kitɔŋ kitikit: epue puɔ́s waayɔɔk ku peétépí pɔ́mɔɔ́sɔ́tɔ́n Lita. 33Weekeeki mɔɔnd kisiɛ́n ɛ́ɛ́ Ené umapá apítímán á nuambálɛ́n, umapá umámaná kuɛl tuɔŋ túnamanɛ́ á kiákí ɛ́ɛ́ umapá akandá. 34Piɛl kanyi kɛ́ɛ́yɛ́ ɛ́ɛ́: «Ené, Yésus Kilíis méékuéŋuki! Atúkɛn óond ɛ́ɛ́yɛn nuambalɛn nuawɔ.» Nɔ niɔ́kɔ́tɔ́n Ene waakaatukɛn. 35Pɛɛnd peem pe lita na pɛ́ kisɛkɛ kí Salone pɛ́ɛ́n nɔ, páápíkúŋɔn ku Ɔkɔ́n.
Piɛl méényí Tɔlɔkasɛ
36Á pálɛ́k kisiɛ́n ɛ́ɛ́ Yope akáandɔ́ mapá kɔ́ɔk kisiɛ́n ɛ́ɛ́ Tapitɛ wɔ eŋétepí. Kisiɛn kí Tapíta ɔ́ɔ́kɔyɔ nɛ nuu kɛlɛ́kɛ ɛ́ɛ́ «Tɔlɔkasɛ» kísɛɛ́kúnɛ́nɛ́ɛ «isundɛ́». Umetépúkésí kisikɛl kitikit ɛ́ kuɛlɛ peseé woond wɔɔkɔnɔkɔn pɔsukɔsukɔ 37É metúk makáánɛ́ waakua kunuma woond weeku. É kélém kú kuman etumbe kiku kíɛ́yɛ́ páákaák kɛ́ɛ kí insúmbiɛ í nɛmuɛnɛ́ í kiansi. 38Popíónyí pó sópe mɔɔ́p ɛ́ɛ́ Piɛl nyɛ Lita, utiányípá kaáyɛ́ɛ no sope. Páátɔ́m pɛɛnd páandɛ́ á kuatían wɔ ɛ́ɛ́: «tuókupísókolonyi óló kuasɔ́ pɛkɛtɛpɛkɛt.» 39Piɛlɛ waayɔɔk nɔɔpɔ́ nɔ niɔ́kɔ́tɔ́n. Umɛɛlɛ́ waáman, pááyɔɔk nɛɛyɛ́ kí insúmbiɛ imaápá nɛmuɛnɛ́ u kiansi. Pisík pí paakáandɔ́ kitikit píépísíítin wu no oŋónyí; péétíínyi wɔ pisɔnɔ́ na pinyuŋa tapíta mɛɛ́lɛ́ aká umaápá ɔ́ kusɔ́t. 40Piɛlɛ weémi mɔɔnd kitikit, weesuk tunúú woond woopísókoliti. Wɛɛpíkɛkɛlɛt kɔk kiku ukanyɛɛ́: «tapita, telimit!» Tapitɛ weefuun eŋis. Umɛɛlɛ́ nɛ kuɛ́n Piɛlɛ, waakaatukɛn, wɔɔnyɔ́mbɛt. 41Piɛlɛ wɔɔkɔ́l wɔ ɔmbɔk weetukenyi wɔ. Waapílikɛn kɔk peétépí ne pisík pí paakáandɔ́ weetíínyi pɔ wɔ́ ɔkɔ́si. 42Péémenyi pɔ á pálɛ́k u sope kitikit, táásɛ kɔk páátap Ɔkɔ́n. 43Piɛlɛ kɔk wɔɔlɔp Sope kinɔ́k kí kisikɛl ku mɔɔnd u mambíkán piyɔ pí inyam kisiɛ́n ɛ́ɛ́ simune.
ទើបបានជ្រើសរើសហើយ៖
Meelie mé Petúmí 9: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
