Meelie mé Petúmí 10
10
Éŋele u Támbák máamín Kɔlɔnɛ́yɛ
1Mɔɔnd omotí mapá Sesalé, kisiɛ́n ɛ́ɛ́ Kɔlɔnɛ́yɛ. Umapá saŋtuliɔ́ŋ Lóma, pamaápílan ɛ́ɛ́ ɔlɔŋ ú Itɛ́liɛn. 2Mɔɔnd ukáání mapá upiékenyi á kuátap kúɛ́yɛ́, utííne Támbákɛ́ɛ na kiansi kíɛ́yɛ́ kí pɛɛnd kitikit; wɔɔkɔnɔkɔn pɔsúkɔsukɔ pɔ́ kitɔŋ kí Pɛyúútɛn táásɛ́, woond upísókolonyi kisikɛl kitikit. 3Epué puɔ́s, pikulɛ́ pítátɔ́ pí kélém kú ɔ́tɛ́m puɔ́sí kanyɛ mekúye, Éŋele u Támbák waámɛn wɔ, Kɔlɔnɛ́yɛ wɛɛ́n wɔ́ peseénepeseé upíken kuɛyɛ́; Éŋele waapílikɛn wɔ́ kɛ́ɛ́yɛ́ ɛ́ kisiɛ́n: «Kɔlɔnɛ́ɛy!» 4Kɔlɔnɛ́yɛ waatámb wɔ́ eŋis; na puwaá kɔ́ ɔtɛ́m, wɔ́ kɛ́ɛ́yɛ́ ɛ́ɛ́: «Ɔkɔ́n, kiákí kɛ́ɛ?» Éŋele woondinyi wɔ́ ɛ́ɛ́: «Támbák ɔ́p imbísókóli siáwɔ woond wɛɛ́n nupoo núáwɔ ɔ́ pɔsúkɔsukɔ. Utipá ukupíélitenyi. 5Nínúan kɔk, tɔ́m pɛɛnd Sopé, paápílíkɛ́n Símune paandɛɛ́ apílan ɛ́ɛ́ Píɛlɛ. 6Unyɛ ku Símune olotí ukútesié piyɔ pí inyam; kiansi kíɛ́yɛ́ nyɛ á kiŋɛndŋɛnd kí asaá.» 7Éŋele umaákálá kɛ́ɛ́yɛ́ mɛɛlɛ́ na kusákɛn, Kɔlɔnɛ́yɛ waapílikɛn pɛɛnd páandɛ́ pá kiansi kíɛ́yɛ ne kisimb kíɛ́yɛ kímotí kimaápá kimámaná apáápɛt nɛɛyɛ́ kiond kípíékenyi táásɛ á kuátap. 8Waaman apítíánɛn pɔ́ puandá kitikit woond waatɔ́m pɔ Sopé.
Píɛl mɛ́ɛ́n puandá ɛlɛɛ́ kí ilimí
9Pɛɛnd pakáánɛ pátátɔ́ pááyɔɔk. Kuépéli, pɛ́mɛɛlɛ́ pásuŋuna nɛ ɛŋɛnd, pákanyi mekúye no Sopé, Píɛlɛ, wɔ́, waamákat kí insɛkɛ́ i kiansi ó kuopísókolonyi; ɔtɛm puɔ́s mapá úkanyɛ mekúye. 10Insaná yɛɛkɛɛtikɛn wɔ, waamba ɛ́ɛ́ insí umányá. Pɛ́mɛɛlɛ́ pámaánámban wɔ púkunya, weesién ɛlɛɛ́ weélimenen. 11Wɛɛ́n mɛnɛ́mɛnɛ́ɛ wɛɛ́: puandá óólonin kɔ́ɔk, púselen; púmapá ɛlɛɛ́ kiandá kí insunú kinaándúnán, pɛɛtíkɛ́n kɛ́ɛ kí itú síɛ́yɛ́ siim íni. 12Manyam kitikit mámaláŋ méni ne emé mápípápalanɛ́ɛ, nomononí kitikit mapá kí insunú ikáánɛ́. 13Ekelú waákálɛt kɛ́ɛ́yɛ́, wɔ́ ɛ́ɛ́: «Píɛl, atukɛn, ɔ́ɔ́n, ánya!» 14Píɛlɛ woondinyi ɛ́ɛ́: «Aákóo, Ɔkɔ́n! Á kiákí ɛ́ɛ́ pímbíénée imapásɛ indipítúm é níít pú kitɔ́k.» 15Ekelú waand ɛtɛ́tɛlɛt, wɔ́ kɛ́ɛ́yɛ́ ɛ́ɛ́: «Epú Támbák manisukɔn, ɔtikɔ́l pú asɛ kitɔ́k.» 16Púɛpíɛl nɔ kátátɔ; é kélém kúɛ́yɛ́, nɔ niɔ́kɔ́tɔ́n, póokondi puandá pukáánɛ mɛnɛ́mɛnɛ́ɛ.
17Píɛl piówon, waamba ɛ́ɛ́ insí umémenyi epú iŋɛ́nín tiínyenyée. Ɛ́ kiɛ́tɛ kisikɛl, pɛɛnd Kɔlɔnɛ́ɛy maátɔ́m mámaná kuól poówon kɔɔ́mɔ kiansi kí Símun nyɛ́, pákanyɛ petényi é nipíkínín ní ɔmindɛ́ ú kiansi. 18Póond ó kupókokonyonyi, poówon índɛ káakɛ mɔɔnd unyɛ́ kisiɛ́n ɛ́ɛ́ Símune, páandɛ́ apílan ɛ́ɛ́ Píɛlɛ, nyɔ́mbitɔnɛ́ɛ. 19Píɛl mɛɛlɛ́ umaákaanuna puándá umɛɛ́n, Emfúnukufúúmɛ ɛ́ɛ́pí kɛ́ɛ́yɛ́ ɛ́ɛ́: «Pɛɛnd pátátɔ́ ákuamba. 20Selé kuɛ́kɛt, ɔ́ɔ́ŋ kɔ́ɔ́p, etitíín á kiákí ɛ́ɛ́ iŋúɛ imányitɔ́m pɔ.» 21Píɛlɛ wesel, waanyaámɛ́n pɛɛnd pakáánɛ. wɔ́ kɔ́ɔ́p ɛ́ɛ́: «Iŋúɛ inyɛ́ Símune ewú nuambanɛ́ɛ. Kiákɛ́ nuŋambanɛ́ á kɛ́ɛ?» 22Poondinyi ɛ́ɛ́: «saŋtuliɔ́ŋɛ, kisiɛ́n ɛ́ɛ́ Kɔlɔnɛ́yɛ, úmányitútɔ́m kuawɔ. Unyɛ mɔɔnd unyɛ́ indɛ́ndɛ́nɛ woond utííne Támbákɛ́ɛ; Pɛyúútɛn peem ápísamba wɔ. Éŋele u Támbák aamin wɔ, wɔ́ kɛ́ɛ́yɛ́ ɛ́ɛ́ útɔ́m mɔɔnd wáásikupílíkɛn, áap kuɛyɛ́ úpítɔ́likɛn epú akaná kuɔyɔnɛ́ɛ wɔ.» 23Píɛlɛ weepíkinyi pɔ́, wɔɔkɔ́l pɔ́ peseé, weepítikenyi pɔ. Kuépéli, Píɛlɛ woond nɔɔpɔ́; nikál ní peétépí pó Sopé níenyetílíkín wɔ́. 24Kúand epéli, waanyaám Sesalé, Kɔlɔnɛ́ɛy péétenyi pɔ́ kuɛyɛ́ ɔlɔŋ ne nikúli níɛ́yɛ́ namunámb múɛ́yɛ umaápílan. 25Píɛl mɛɛlɛ́ waámán ku Kɔlɔnɛ́ɛy, Kɔlɔnɛ́yɛ wɔɔpínɔtikin ó kukóli wɔ; waakɔɔn wɔ́ iŋɔlɔpɛ é kueki wɔ́ nukany. 26Píɛlɛ wɛɛtikɛn wɔ́ kɔ́ ɔmbɔk, weetukenyi wɔ, wɔ́ kɛ́ɛ́yɛ́ ɛ́ɛ́: «Atukɛn, á kiákí ɛ́ɛ́ iŋúɛ kákáámɛ inyɛ kɔ́ɔ́m mɔɔnd niaŋ níáwɔ.» 27Páásuŋɔn nɔ kuɔyɔ maayɔ́, péépíkin á kians, Píɛlɛ weekítikenyi pɛɛnd táásɛ, papíkúsá á kiansi. 28wɔ́ kɔ́ɔ́p ɛ́ɛ́: «Nuémenyen ɛ́ɛ́ púnyɛ kikotí ɛ́ɛ́ mɔnɔ́ Yúútɛn ɛ́ɛndɛ ne eŋenyí u mɔɔnd púnyáánɛ úpíkin kɛ́ɛ́yɛ́ á kiansi. Maná, Támbák míindínyí ɛ́ɛ́ indipá yɛɛsikɛnɛn ɛ́ɛ́ íŋɔ́l tɛ mɔɔnd omoómí asɛ puandá pú kitɔ́k púnyáanɛ indíin kuɛndɛt kuɛyɛ́. 29púúpɔ́ ímɛ́nyɛɛlɛ́ yɔɔ́pɔn ɔmbílíkínɛ́n wááwɔ, imóól tɛ ɛ́ɛ́ kutímbe. Nínúan kɔk, ánundían epú numbílánɛ́ á púɔ.» 30Kɔlɔnɛ́yɛ woondinyi ɛ́ɛ́: «Ínanɔ metúk mátátɔ́, á kisikɛl ekie tunyɛ́ á kɛ́ɛ, á pikulɛ́ pítátɔ́ pí kélém ku ɔ́tɛ́m puɔ́s, ímapá imbísókolonyi kuam; yɛ́ɛ́l yɛ́ɛ́ninɛ waa! Mɔɔnd míŋámɛ́n, etényí káámɛ ó pusío, indífɔnɔ́ siɛ́yɛ́ muɛnyɛ. 31wɔ́ kámɛ ɛ́ɛ́: “Kɔlɔnɛ́ɛy, Támbák mɔ́ɔp imbísókóli yaawɔ; andíkɛ́k utipá upiélitenyi nupoo núáwɔ ɔ́ pɔsúkɔsukɔ. 32Tɔ́m kɔk mɔɔnd Yopé wáákupílíkínɛ́n Símune, papílanɛ́ wɔ́ ɛ́ɛ́ Píɛlɛ, wól akɛ; unyɛ ku Símun ewú ukútesíé piyɔ pí inyam, kiansi kíɛ́yɛ nyɛ ákiŋɛndŋɛnd kí mááŋ.” 33Yatɔ́m pɛɛnd nɔ niɔ́kɔ́tɔ́n ɛ́ɛ́ páásikupilikɛn; ɛmɛ́ɛ́l peseé aná ómónyoól. Nínúan kɔk, pasɔ́ epe peem ó pusíó pú Támbák ɔ́ kupítɔ́likɔn epú kitikit Ɔkɔ́n mɛ́nyɛɛlɛ́ kááwɔ ɛ́ɛ́ áátútían.»
Píɛl mɔ́kɔ́l nukál
34Píɛlɛ wɔɔkɔ́l nukál, wɔ́ ɛ́ɛ́: «Nínuán, imɔ́ɔ́p kémuémue ɛ́ɛ́ Támbák tipá weeye pɛɛnd, 35ɔ́ kitɔŋ kitikit, mɔɔnd na mɔɔnd ewú utíínené wɔ́, woond wɛɛlɛ epú púnyɛ́ indɛ́ndɛ́nɛ kɛ́ɛ́yɛ́ ké eŋis, wɔ́ Támbák áátapanɛ́ɛ. 36Támbákɛ́ɛ weetúmenyi punya Ísilaɛ́l insɔ́m: Insɔ́m Yi indámb i kiyeéwe kiólinoné pɔ́ é Yésus Kilíis; wɔ́ unyɛ́ Ɔkɔ́n u pɛɛnd kitikit.
37«Nuémenyen epú púmɛɛ́piɛ́l Yuté kitikit. Puétúmin Kalilée aká Isáaŋ mɛɛ́lɛ́ úmáaman apílan pɛɛnd kí induén. 38Nuémenyen aná Támbák moówóónyi Yésuse u Násalɛt na pukaaka pú Emfúnukufúúmɛ; nuémenyen andíkíkɛ aná Yésus mányipá wóól úpɔŋɔ́ pitɔŋ, wɛɛlɛ pɛɛnd peseé, wééŋukesi pɛɛnd kitikit okóyikoyi maápá unyókolonyi pɔ, á kiákí ɛ́ɛ́ Támbák mapá nɛɛyɛ́.
39«Pasɔ́ pólotí tunyɛ epé pɛmɛ́nyɛɛ́nɛ́n maandá kitikit úmɛ́nyɛɛlɛ́ɛ Yelúsalɛm nɔ́ kitɔŋ kí Pɛyúútɛn kitikit. Pɔ́ɔ́tɔɔ́ndɛn wɔ́ ó kolóse, pɔ́ɔ́kɔɔ́n wɔ́. 40Maná, kátátúɛ́ wɛɛyɛ́, Támbákɛ́ɛ weekeenyi wɔ́ á pilɔ́ŋ, weekeeki wɔ́ pukaaka púkupítíínyi ɛ́ pɛɛnd, 41pútipá kitɔŋ kitikit, yá káásɔ, pasɔ́ epé Támbák maátúán kutúyɔ́ɔ́n, ɛ́ɛ́ tupá petétúnyi. Tuápíyaka tuond tuápúwáan nɛɛyɛ́ Támbák mɛɛlɛ́ úméenyi wɔ́ á pilɔ́ŋ. 42Waatúfá pusɔ́m pú kuól kukémé kitɔŋ kitikit, tuond tutétunyenyi ɛ́ɛ́, wɔ́ Yésuse, Támbák ɛ́ɛ́nyítɛ́k wɔ ó kusóósosi nɔ pɔɔkɔ́si ne peekúén 43Peémímekélíe má Támbák pí insúá peem mɛtɛɛ́tɛ́n wɔ, pɔ́ɔyɔ ɛ́ɛ́ ewú ne ewú upióndonyée ɔ́tɛ́m nɛɛyɛ́, pukaaka púnyɛɛ́ ɛ́ kisiɛ́n kí Yésus ááyapinan wɔ́ á pifal píɛ́yɛ́.»
Pákati Yúútɛnɛ mátáŋáp Emfúnukufúúmɛ
44Píɛl mɛɛlɛ́ umaákála, Emfúnukufúúmɛ wéeselin pɛɛnd kitikit pɔmɔɔ́pítɔ́líkɔn Mekélíe má Támbák. 45Peétépi pɛ́ Pɛyúútɛn pomoól ɔlɔŋ nɛ Píɛl péesímile táásɛ aná pɛ́mɛɛ́n ɛ́ɛ́ Támbák méekí Emfúnukufúúmɛ é péepé pátiányípá Pɛyúútɛn. 46Púnyɛ ɛ́ɛ́ peétépí pɛ́ Pɛyúútɛn mɔɔ́pɔ́n pɔ́ pékúmesi Támbákɛ́ɛ aná unyɛ́ kiandákáand na tukál pɛ́mɛɛlɛ́ pétimenyen. Píɛlɛ waand ɔkɔ́l nukál, wɔ́ ɛ́ɛ́: 47«Nínúan kɔk, mɔɔnd unín unyɛ́ kukány ɛ́ɛ́ pétituú pɛɛnd epe induén i moomb, pɔ epé pamányipiá Emfúnukufúúmɛ niaŋ níásɔ́?» 48Weeki pukaaka ɛ́ɛ́ pétuu pɔ́ ɛ́ kisiɛ́n kí Yésus Kilíis. Kɔlɔnɛ́yɛ nɛ pɛɛnd pɛ́ɛ́yɛ́ póópísókoliti Píɛlɛ ɛ́ɛ́ waand kuɛl paán pémetúk nɔɔpɔ́.
ទើបបានជ្រើសរើសហើយ៖
Meelie mé Petúmí 10: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
