Meelie mé Petúmí 8
8
1Sóole kɛ́kɛ́ɛ́yɛ́ mapá kiáyɛ́ kí pɔsɔ́k pámaápa ekelú nɔ nuɔ́nɔnɔ nú Ítien.
Pémetúm é kuséésényí peétépí
Puɛ́tɛ puɔ́s inséésítényí meéliŋí kuliŋ ó pusíó pu peétépí pe Yelúsalɛm. Pɔ peem páamanasálamandan ɔ́ pitɔŋ pi Yuté na Samalí. Petúmí pɔ́ɔ nɔ pɔ́ɔ pémeésién Yelúsalɛm.
Sóol ééséésenyi peétépí
2Pɛɛnd pámaápián nulátát na Támbák póónyo Itiene, pápaŋa táásɛ kɛ́ɛ́yɛ́ é niku. 3Sóole, wɔ, unuenesi peétépí upiken á piansi, wɛɛtikɛn peétépí pɛɛnúmɛndɔ́ na paakáandɔ́, waákan pɔ́ á kiansi kí imbíne. 4Peétépí páamaásálámandan payuukan ɔ́ pɔkɔɔ́mɛ ɔ́ pɔkɔɔ́mɛ, páap pékémé insɔ́m yi indámb.
Filipi éékéme nukál nú Támbák sámalí
5Yá anakáánɛ́ kɔk Filipe, umaáyɔɔ́k á pálɛ́k u samali omotí wuup úkémé Kilíise. 6Kitɔŋ ekelú ómoómí maátápán tukál tú Filipe, á kiákí ɛ́ɛ́ pɛɛnd mɔɔ́pɔ́n pisey umɛɛ́lɛ póond pɛ́ɛnɛn. 7Ɛ́ kuɛn kɔk, umɛɛlɛ́ ɛ́ɛ́ pilɔk pí piliínditíe ááman ɛ́ pɛɛnd kutek píí píákanɛ́ tukokóo tuukɔ́n, pinsɛ́kɛlinɛ kutek nɔ pikondi péékeéŋuken. 8Kiandákáand kí anyamɔ́ mapá á pálɛ́k ukáánɛ́. 9Á pálɛ́k u samali ukáánɛ́, mɔɔnd omoti mapa kɔk kisiɛ́n ɛ́ɛ́ Simune, umaápá eŋelímaanyɛ́. Pɛɛnd símile maándá umɛɛ́lɛ. Umapitááká ɛ́ɛ́ unyɛ mɔɔnd unyɛɛ́ súkínikɛ́ɛ́yɛ́, 10pɛɛnd peem mɔpítɔ́líkɔ́n wɔ peseé kutál á paápayɔ́ kuák é pilunú. Pɔ́ɔ́yɔ ɛ́ɛ́: Mɔɔnd ewe nyɛ na pukaaka pú Támbák, pápílanɛ́ɛ ɛ́ɛ́ pukaaka puukɔ́n! 11Índɛ kɔ́ɔk pɛɛnd mɔɔ́pítɔ́líkɔ́n wɔ, púmapá ɛ́ɛ́ tɔɔm umapá wɛɛlɛ maanyɛ́ ɔ́ kitɔŋ kikáánɛ́ pɛɛnd símile. 12Maná pɛ́mɛɛlɛ́ páátapan insɔ́m yi indámb eyí Filip meékéme ó pusíó pú pufuŋ pu Támbák nɛ kisiɛ́n kí Yésus Kilíis, nɛ pɛɛnúmɛndɔ́ na paakáandɔ́ páapia induén. 13Simune wú muɛt wɛɛkɛɛ́yɛ eŋétépí péétuu wɔ. Utimand apíátɔn Filipe. Wɛɛ́nɛn pinúmɔ pí melinsí ne pisey Filip mɛɛ́lɛ, usímile.
14Pɔɔ́pɔn ɛ́ɛ́ pɛɛnd pa samali máátáp nukál nú Támbák, petúmí pámaápá Yelúsalɛm páátúmɛn wɔ Piɛlɛ nɛɛyɛ́ ní Isáaŋ. 15Páámána Piɛlɛ ní Isáaŋ pópísókóliti ó pusíó pú pasamalitɛŋ ɛ́ɛ́ pátáŋap. Emfúnukufúúmɛ. 16Ɛ́ kuɛ́n, Emfúnukufúúmɛ mapá úmanyi útiselín tɛ woomoómí kɔ́ɔ́p ɛ́ kikɛtɛ́kɛtɛ́ɛ. Pámápia ya induén ɛ́ɛ́ kisiɛ́nɛ kí Ɔkɔ́n Yésus. 17Piɛlɛ nɛɛyɛ́ ní Isáaŋ páátála pɔ́ imbɔk kí ituɛ, pasamalitɛŋ páátáŋap Emfúnukufúúmɛ. 18Maná Simunu ɛ́ɛ́nɛn peétépí mátáŋáp Emfúnukufúúmɛ aká petúmí mányitál pɔ ímbɔk, weepíkétinyi Piɛlɛ nɛɛyɛ́ ní Isáaŋ ɛ́ɛ́ wééki pɔ pikɔŋ. 19Ukanyi kɔ́ɔ́p ɛ́ɛ́ «Ánumfá kákáámɛ pukaaka pukáánɛ́ ɛ́ɛ́ epi iŋaányítála pɔ́ ímbɔk táŋap Emfúnukufúúmɛ.» 20Maná Piɛlɛ woondinyi wɔ: «Punɛm púáwɔ sɛ́lɔk embul naawɔ. Aná apítáákanɛ́ɛ ɛ́ɛ́ anyɛ kuɔ́nd nupoo nú Támbák na pikɔŋ. 21Atipá apian niap púúmé púúme é púúpú pútápukanɛ́ɛ akɛ. Á kiákí ɛ́ɛ́ ɔtɛ́m wuawɔ tipá indɛ́ndɛ́nɛ ke eŋis ya Támbákɛ́ɛ. 22Píkúŋɔ́n kááwɔ kí ifil, óond ópísókólonyi ɔkɔ́n: ɛ́ɛlɛɛ́ úkuyapɛn kilɔk kí ímbitáákitɛ́n kíónyíkuól kɔ́ ɔtɛ́m. 23Yɛɛ́kɛɛ́nɛn ɛ́ɛ́ anyɛ ɔtɛ́m owóónón na nulíkalíka andíkɛ́k ɛ́ɛ́ anyɛ kiɔ́lí kí kifal.» 24Simune woondinyi Piɛlɛ nɛɛyɛ́ ni Isáaŋ ɛ́ɛ́: «ónupísókolonyi Ɔkɔ́n panu muɛt káámɛ ó pusíó ɛ́ɛ́, epú númɔ́nyɔyɛ́t tiŋámɛ́n.» 25Piɛlɛ ní Isáaŋ mɔɔyɔ́ máandá emé pɔ́mɔɔ́pɔn póond pɛ́ɛ́kɛɛ́nɛn áká pémeékémé mekélíe mɔ́ Ɔkɔ́n póondon Yelúsalɛm, kí iŋílí póolo Pɔ́ɔ́yɔ insɔ́m yi indámb ɔ́ pitɔŋ pí samali.
Filipe na kiandá kí mɔɔnd kí itiopi
26Éŋele u Ɔkɔ́n waatían Filipe ɛ́ɛ́: «túnúk imbátɛ u kitɔŋ kí iŋilí yoólinonée Yelúsalɛm, itúnuken Ká asaá. Pɛɛnd tipá pósol kuɛndɛ á yɛ́ɛ.» 27Filipe waayɔɔk nɔ niɔ́kɔ́tɔ́n. Kí iŋilí wɛɛkɛɛ́n mɔɔnd u kitɔŋ kí Itiopíi. Mɔɔnd ukáánɛ́ umápa weendesi punɛ́m kitikit pú Kandase, efuŋ waakáandɔ́ u Itiopíi wu andíkɛ́k ɔŋgɔmunɛ u pikɔŋ píɛ́yɛ́. Umapa woosiondón kí imbísókólí Yelúsalɛm, 28woondon kuɛyɛ́, ɔnyɔ́mbítɔ́n á kikálɛ́t kikapilɛ́ mɔ́ɔ́kɔ́ɔ́kɔ. Waanuna ɔmbɔp ú Eŋémímekélíe má Támbák Isayi. 29Emfúnukúúfúmɛ kanyi é Filip ɛ́ɛ́: «Suáŋálɛ́t kaalát á kikálɛ́t.» 30Filipe waanyámitɛn waalát kɛ́ɛ́yɛ́. Wɔɔkɔɔ́p wɔ́ waanuna ɔmbɔp ú eŋémímekélíe má Támbák Isayi. Ukanyi kɛ́ɛ́yɛ́ ɛ́ɛ́: «Ɔɔ́kɔɔ́pɔn kémuémue epú aanunanɛ́ɛ á?» 31Mɔɔnd woondinyi ɛ́ɛ́: «Tiɛkiɛ inyɛ kuɔ́p índɛ indipá na mɔɔnd unyɛɛ́ kunsɛɛkunɛn?» Waatían Filipe ɛ́ɛ́ úmákat kɛ́ɛ́yɛ́ é kipíŋil únyɔ́mbɛt masíá nɛɛyɛ́. 32Índɛ kiénsi ekie umaánúna mɔɔyɔ́ ɛ́ɛ́: ɛlɛɛ́ muɔ́nɔ́ u imbúnyi payuukanɛ́ na wɔ́ é kuesikít, ɛlɛɛ́ muɔ́nɔ́ ú kitúúmbɛ́ɛ unyɛɛ́ kindikélítíe aká pámuananɛ́ɛ wɔ, ya anakáánɛ́ utiányípá waáluna niít. 33kɛ́ɛ́yɛ́ é kupíseli, tɛɛ́ pásɔ́mb puónyi púɛ́yɛ́ kí indɛ́ndɛ́nɛ. Utiányipiá nindaanda, á kiákí ɛ́ɛ́ Pámasɔ́mb kusɔ́t kúɛ́yɛ́ e kúúsí. 34Kiandá kí mɔɔnd ekie kíówun Filipe, kíkanyi kɛ́ɛ́yɛ́ ɛ́ɛ́: «Yoókupísókolonyi índian, eŋémímekélíe ma Támbák áákála puónyi púányí é? Wu muɛt ée kúnyáánɛ sɔkɔ olotí?» 35Filipe wɔɔkɔ́l nukál, é kiénsi kikáánɛ́ woond ɛ́ kusɛɛkunɛn wɔ insɔ́m yi indámb í Yésus. 36Páásuŋɔn ni iŋilí yɔ́ɔ́pɔ́, páányaám á kiilɔ kí moomb. Mɔɔnd ewe kanyɛ é Filipe ɛ́ɛ́: «Índɛ́ moomb eme. Kiákí kíkányanɛɛ́ íinduu?» [37]#8.37 Kiensi kikaáni tipá kí imbɔp sínyɛ́ siɔ́ŋɔ́ nɛ nú Kɛlɛ́kɛ. 38Weekeeki pukaaka ɛ́ɛ́ pétényikenyi kikálɛ́t. Filipe na kiandá kí mɔɔnd péésel, péétúnuk ó moomb. Filipe weetuu wɔ. 39Pɛ́mɛɛlɛ́ pááman ó moomb, Emfúnukufúúmɛ ú Ɔkɔ́n wéélélun Filipe, mɔɔnd ukáánɛ́ timand kúɛn wɔ, maná waasuŋɔn ni iŋilí yɛɛyɛ́ wuup wɔ́ɔ́pɔ́n anyamɔ́. 40Wɔ́ Filipe wɛɛnyɛpíɛ́n Asotós, woond ó kuól kukémé insɔ́m yi indámb ɔ́ pitɔŋ umaátápúkán á píɛ kuám aná umaányaám Sesalé.
ទើបបានជ្រើសរើសហើយ៖
Meelie mé Petúmí 8: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
