Meelie mé Petúmí 7
7
Insáák yi Ítien
1Ɔkɔ́n u Pɔkɔn pá pafunɔ́fɔn wookoówun wɔ́ ɛ́ɛ́: «púnyɛ kémuémue epue pɔ́ɔ́yɔnɛ́ɛ kááwɔ ó pusíó á?» 2Ítiene woondinyi ɛ́ɛ́: «Paandimán páámɛ ne pesíí páámɛ ɔnumbítɔ́líkɛn: Támbákɛ́ɛ u nukúm maámɛ́n síí ɔkúnɛ́ɛ waasɔ́ Ápilaháamɛ aká umaápa é Mesopotani kisíósíó ɛ́ɛ́ wɔ́ɔ́lɔpɔ́ Alan. 3Támbák kanyi kɛ́ɛ́yɛ́ ɛɛ: Atɔ́k kááwɔ ɔ́ kitɔŋ na kááwɔ é nikúli, apa ɔ́ kitɔŋ ekí yeényíkutíínyeé. 4Ápilahamɛ waatɔk ɔ́ kitɔŋ kí pa Kaleteéŋ wɔɔnyɔɔlɔpɔ́ Álan. É kélém kú niku ni síí wɛɛyɛ́, Támbákɛ́ɛ weetépuki wɔ́ ɔ́ kitɔŋ ekí nunyɛɛ́ á kɛ́ɛ nínúan. 5Támbák timeeki wɔ tɛ muɔ́nɔ́ɔ́nɔ́n u nulɔp u kutála nipana. Maná waakaákɛn wɔ́ indan ɛ́ɛ́ weényééki wɔ́ kitɔŋ kikáánɛ́ kuám á nindaanda níɛ́yɛ́ tɛ aná umaápá umanyi utipiá muɔ́nɔ́. 6Támbák kanyi kɛ́ɛ́yɛ́ ɛ́ɛ́: nindaanda níáwɔ áányípá peenyí ɔ́ kitɔŋ kí pulukú péényééyí pɔ́ piɔ́lí, péényíséésenyi pɔ́ tuɔŋ imbak íni. 7Maná niŋúɛ Támbákɛ́ɛ yoónyísóósosi kitɔŋ ekí pámaápá piɔ́lí á kɛ́ɛ. É kélém akáánɛ́ páányaám péésiŋúmésí ɔ́ kɔɔ́mɔ akɛ.#7.7 É piénsi 6 kuama 7 Ítíen maakálíti kiemie ɔ́puɔ́li Esípit. Genèse 15.13,14; Ɛkɛsót 3.12.»
8Támbákɛ́ɛ waalata nikál na Apalaham é pulinsí pú puansá kákáánɛ́ Ápalaham mɛɛ́lɛ́ upíéne Isáakɛ waakans wɔ é kélém kú metuk manamanɛ́, piluŋ pímoómí isáakɛ waakans Yakɔpɛ. Wɔ Yakɔpɛ waakans paan peem páát na páandɛ́ pɛ́nyɛɛ́ pesíí pɔkunɛ́ɛ páásɔ. 9«Pesíí pɔkúnɛ́ɛ páásɔ́ páákɛn andimán wɔɔpɔ́ Yusipɛ yaák, péétúú wɔ́ ɛ́ɛ́ wɛ́ɛ́yɛ́ kiɔ́lí ɔ́ kitɔŋ kí Esípit maná Támbák mapá nɛɛyɛ́. 10Támbákɛ́ɛ wɔɔkɔɔk wɔ́ é muyu múɛ́yɛ́ kitikit weekeeki Yusipɛ tutátɔ́ woond wééyi wɔ́ atámb ké eŋis yá Falawɔŋ efuŋ u esípit. Wɛɛ́tɛ efuŋ wɛɛtɛ́k yusipɛ ɔŋgɔmunɛ u kitɔŋ kí Esípit kitikit káá na nuya núɛ́yɛ́. 11Ɔndumɔ́ wáakua é kúúsí kú esípit nɔ kitɔŋ kí kanáan. Muyú mapá puólíkóoli, pesíí pɔkúnɛ́ɛ páásɔ́ timand kuɛ́nɛn tɛ puandá pú kunya. 12kisikɛl Yakɔp mɔɔpɔ ɛ́ɛ́ múkunyá nyɛ esípit waatɔ́m pesíí pɔkúnɛ́ɛ páásɔ́ kɔk é kitúm kíkutúan. 13É kitúm kíkáandíɛ, Yusipɛ wɛɛkɛl ɛ́ɛ́ paandimán menyi wɔ, kákáánɛ́ Falawɔŋ meésímenyí nikúli ení Yusipɛ maápá á nɛ́ɛ. 14Akáánɛ́ Yusipɛ waatɔ́m pɛɛnd ɛ́ɛ́ pɔ́ɔ́kɔ́l síí wɔɔpɔ́ Yakɔpɛ ne nikúli níɛ́yɛ́. Nímaápá nikányɛ pɛɛnd etin átátɔ́ nɔ punyo. 15Yakɔpɛ wooyoóndó Esípitɛn, kákáánɛ́ umeékúún ne pesíí pɔkúnɛ́ɛ páásɔ́. 16Pɔ́ɔ́kɔ́lɔn pikú piɔ́p pónyonyoó pɛ́ɛ sisɛm á kipɛ́l ekí Ápilaháam mɔɔ́nd na pikɔ́ŋ á paán pá Amɔl é kúúsí kú sisɛm.»
17«Kisikɛl kí indán eyí Támbák maákɛ́n Ápilaháamɛ mɛɛlɛ́ kíkanyɛɛ́ epísííten nikúli níásɔ́ níond é kuteke é kúúsí kú Esípitɛn. 18Kuám á kisikɛl efuŋ oloti umɛɛ́lɛ́ utimenyén Yúsipɛ mɔɔ́kɔ́l ninyɔ́lí. 19Efuŋ ukáánɛ́ mapá ufɛmɛ pesíí páásɔ́ uséésenyi pɔ́ ɛ́ɛ́ páyapan piendine píɔ́p ɛ́ɛ́ píkúén. 20Púnyɛ é kipénéŋ kikáánɛ́ pémeépién Moyíise umaápá opótí u kiendine, pómoóyósí wɔ́ kí iŋɔsikɔ siólí ítátɔ á kiansi kí síí wɛɛyɛ́. 21Ninɛmbɛ́n súkene pɛ́ɛ́nyɛyɛkɛ́ Moyíise#7.21 Punyi kɔ ɔmbɔp u kuam ɔ puɔl., ɔmbúl u efuŋ u Esípitɛn waapát wɔ́ weelepe wɔ́ ɛlɛɛ́ muɔ́nɔ́ wɛɛyɛ́. 22Akáánɛ́ Moyíis mapiá inŋónyítónyí i kumenyi kú punya Esípitɛn kitikit. Wɛɛkɛɛsiɛ́yɛ́ mɔɔnd á kupá tɛ á tukál tɛ é melínyélínyée mɛ́ɛ́yɛ́.» 23«Moyíis mɛɛlɛ́ upian tuɔŋ etin áandɛ́ waapísúmbɛn kɛ́ɛ́yɛ́ kɔ́ ɔtɛ́m ɛ́ɛ́ wɔɔp kuɛ́n paandimán pɛ́ɛ́yɛ́ punya Ísilayɛ́l. 24Kɔ́ɔk wɛɛkɛɛ́n mɔnɔ́ Esípitɛn séésenyi mɔnɔ́ Ísilayɛ́l wopísosi é kitul wɔɔkɔɔ́n mɔnɔ́ Esípitɛn ukáánɛ́. 25Umapítááká ɛ́ɛ́ paandimán pɛ́ɛ́yɛ́ punya Ísilayɛ́l kaná kuɔ́p ɛ́ɛ́ Támbák ááyɔ́ɔ́n wɔ́ ɛ́ɛ́ wéétúkún pɔ́, maná púnya Ísilayɛ́l timɔɔ́p anakáánɛ́. 26Kúpálɛ weekééki paán pí Ísilayɛ́l páandɛ́ nuanan wɛɛl úsaaŋɔn pɔ́. wɔ kɔ́ɔ́p ɛ́ɛ́: pekúl páámɛ nunyɛ paandimán, kiákí nunuananɛ́ɛ? 27Maná ewú umaápá upíányinan wɔɔkúɔ́p kanyɛ ó Moyíis ɛ́ɛ́ ɛ́nyɛ́ wɛ́ɛ́nyikutɛ́k efuŋ kúnyaánɛ esúmbí pisɛn ɛ́ kikɛtɛ́kɛtɛ́ɛ kíásɔ́ é? 28Aákaamba kuŋɔ́n aná ɔ́ɔ́nyɔ́ɔ́n mɔnɔ́ Esípitɛn púúyó á? 29Moyíis mɛɛlɛ́ wɔɔ́pɔn tukál tukáánɛ́ wɔɔpínɔ woond ɔ́ kuɔsɔ́tɔ́n ɔ́ kitɔŋ kí Mátian, kɔ́ɔk weepíen pinɔ́k píandɛ.»
30«É kélém kú tuɔŋ etin áandɛ é kúúsí kú kiándɔ́l mekúyekúye nɔ ɔkɛ́l ú Sinayí, Éŋele u Támbák weepítíínyi Moyíise é pilémbi pí yiik nɛkɛtɛ́ɛ á nuaŋanyɛ́ númaápika. 31Moyíis mɛɛlɛ́ wɛɛ́nɛn anakáánɛ́ woond é kusímile. Wɛɛl úpísíit mekúyekúye ɛ́ɛ́ úyoosin, wɔɔ́p ekelú ú Ɔkɔ́n ɔ́ɔ́yɔn wɔ́ ɛ́ɛ́: 32“Inyi Támbákɛ́ɛ u pesíí pɔkúnɛ́ɛ pááwɔ, Támbákɛ́ɛ u Ápilaháam Támbákɛ́ɛ u Ísaak, Támbákɛ́ɛ u Yákɔp. Nusakimina nú pumbíla núɛtikɛn wɔ, Moyíis timand eketi kuyoosin. 33Ɔkɔ́n kanyɛ kɛ́ɛ́yɛ́ ɛ́ɛ́: Élí pipɔ́kɔ́tɔ́ píáwɔ, á kiákí kɔɔ́mɔ akɛ nyɛ kitɔ́k. 34Ɛ́ɛ́ɛ imɛ́ɛ́n ɔsɔ́k ú nikúli níámɛ ɔ́ kitɔŋ kí esipit, imɔ́ɔ́p ɛmbíyɛ́kɛ́l wɔ́ɔ́p imóol á kuasiáŋɔ́n pɔ. Nínúan imáakutɔ́m é kúúsí kú Esípitɛn.” 35Moyíise ewú paán pí Ísilayɛ́l maápisɛ́t wɔ́ pɔ́ ɛ́ɛ́: Ɛ́nyɛ́ wɛ́ɛ́nyikutɛ́k efuŋ kúnyaánɛ esúmbí pisɛn káásɔ́ ɛ́ kikɛtɛ́kɛtɛ́ɛ? wɔ́ Támbák mányitɔ́m wɔ́ ɛlɛɛ́ efuŋ no Osótí ɛ́ɛ́ wááŋɔn paán pí Ísilayɛ́l, waakálan wɔ́ ké Éŋele umaámɛ́n wɔ́ á nuaŋanyɛ́. 36Moyíise wɛɛ́tɛ umeémí paán pí ísilayɛ́l ɔ́ kitɔn kí Esipit, ne melinsí má kuáyakuáya ne pisey pí kusímile ɔ́ kitɔŋ kí Esípit na mááŋ manyuán, ne kúúsí kú kiándɔ́l é kélém kú tuɔŋ etíni áandɛ́. 37wɔ́ wɛɛ́tɛ Moyíise umaátián paán pí ísilayɛ́l ɛ́ɛ́: Támbák áányínútúmɛn eŋémímekélíe wɛɛyɛ́ ɛlɛɛ́ niŋúɛ káánɔ́ é nikúli. 38Wɛɛ́tɛ Moyíise, é kiluméné kímaápá é kúúsí kú kiándɔ́l umapá etélimét ɛ́ kikɛtɛ́kɛtɛ́ɛ, pesíí páásɔ́ kiáyɛ́, Éŋele kiáyɛ́, umaákálán Moyíise kɔ́ ɔkɛ́l ú Sinayí, kɔ́ɔkɔ́ Mɔyíise maápákɔ́n tukál tú kusɔ́t é kutútépuki. 39Maná pesíí páásɔ́ timɔɔ́pɛn wɔ, páapisɛt wɔ, páapítáákɛt kuond Esípitɛn. 40Paán pí Ísilayɛ́l, pɔ́ɔ́kɔɔyitɛn Álɔ́nɛ ɛ́ɛ́: Túluŋɛ́n pa Támbákɛ́ɛ pólotí pékeényítuéndesi. Á kiákí ɛ́ɛ́ tutipá tumenyen epú púɛ́nyɛ́lɛ Moyíise wéényí tuémí ɔ́ kitɔŋ kí Esípit. 41Ɔ́ Mɔɔ́sí makáánɛ́, péétúúnu kiluŋaluŋa kí inyak, pɔ́ɔ́nɔn kí melúk póond páyayapa ó puólí púɔ́p pú imbɔ́k pámaáluŋá kɛ́ɛ pɔ́ muɛ́tiɛ́muɛ́tiɛ 42É kuesúkín Támbákɛ́ɛ weetúm pɔ́ kélém. Waayap pɔ́ ɛ́ɛ́ pékúmesi muótiótio mú mɛnɛ́mɛnɛ́ɛ: Anɛ púnyɛ́ puɔ́ŋɔ́n kí imfiɔ́ŋ sí peémímekélíe má Támbák ɛ́ɛ́: Nikúli ní Ísilayɛ́l, púnyi akí numiiŋɔ́nɔ́n melúk nuokond numfáan mandá mólotí ɔ́ tuɔŋ etín áandɛ́ é kúúsí kú kiándɔ́l á? 43Aákóo, maná numápítúúkɛ́n isúŋ í Támbákɛ́ɛ waanɔ́ kisiɛ́n ɛ́ɛ́ Mɔlɔkɔ nɔ yotiotio yɛ́ɛ́yɛ́ Támbákɛ́ɛ wáánɔ́ u Léfan, pifɛ́lɛfɛ́lɛ numaáluŋá éékukúmesi. Tɛ ɔɔ́pɔn ɛ́ɛ́ yeényínúémi kaáyɛ́ kutápɔk Pápilɔn.»
44«É kúúsí kú kiandɔ́l pesíí pɔkúnɛ́ɛ páásɔ́ mapián isuŋ imeétíínyényí ɛ́ɛ́ Támbák nyɛ nɔɔpɔ́. Támbákɛ́ɛ umaákálá nɔ Moyíis meetíínyí wɔ́ ɛ́ɛ́ úwááka yɛ́ɛ yá aná umɛɛ́n. 45É kélém kú Moyíis, pesíí pɔkúnɛ́ɛ páásɔ́ páápákɔn yɛ́ɛ ɔ́ kíɔ́p kitum, pɔ́ɔ́ŋɔn ó Yosue,#7.45 Akú Moyíis meékú Yosué u mɔɔ́kɔ́l ninyɔ́lí níɛ́yɛ́. ɔ́ kitɔŋ Támbák maákúŋɛt piɛ́nɛɛ́n. Isúŋ ikáánɛ́ yɔɔ́lɔp kɔ́ɔk kuám á kisikɛl kí tafíit. 46Tafíite waapia nupoo nú Támbák. Wokoówun wɔ́ pukaaka p kuwáákɛn Támbákɛ́ɛ u Yakɔp kiansi. 47Maná salumunɛ umaáwákɛ́n Támbákɛ́ɛ kiansi kikáánɛ́. 48Maná Támbákɛ́ɛ u insáánupúlɛ́ɛ tipá upítiman á piansi pínyɛɛ́ piwááka ní imbɔk sí pɛɛnd. Ya ana eŋémímekélíe ma Támbák mɔɔ́yɛ́t. 49Ɔkɔ́n kanyi ɛ́ɛ́: mɛnɛ́mɛnɛ́ɛ nyɛ ninyɔ́l ni pufuŋ puamɛ, kúúsí nyɛ nitálɛ́n pikɔ́nd. Kayɛ́ núnamɛ́ɛ nú kiansi nunyɛɛ́ kuŋwákɛn? Kɔɔ́mɔ kɔk kénín inyɛɛ́ kupɔkimɛt? 50Sítipa imbɔk síámɛ símaáluŋá maándá makáánɛ́ kitikit a?» 51«Ítiene kanyi andíkɛ́k kɔ́ɔ́p ke etúl ɛ́ɛ́: Nunyɛ pɛɛnd pi itúɛ kulal itɛ́m síánɔ́ nyɛ kulal itú síánɔ́ nyɛ sifuúkén kɔ́ ɔmbílíkínɛ́n Támbák. Nuálúndanɛn Emfúnukufúúmɛ! Nunyɛ ɛlɛɛ́ pesíí pɔkúnɛ́ɛ páánɔ́. 52Peémímekélíe ma Támbák pénín pesíí pɔkúnɛ́ɛ páánɔ́ mɛɛ́lɛ́ pétiséésitényi? Pɔ́mɔɔ́n pólotí epé pémeékémé kuól kú wu indɛ́ndɛ́nɛ́ɛ, ewu panɔ́ muɛt numɛɛ́sɛ́m wɔ nuond nuɔkɔɔ́n wɔ. 53Numatáŋáp kikotí kí Támbák á kinɔn kí pe Éŋele pá Támbák tɛɛ nuɔŋ kíɛ.»
Nikú ní Ítiene
54Kisikɛl pɛɛnd peem pé etúl ú sanetelɛŋ mɛɛ́lɛ́ pɔ́ɔ́pɔn tukál tú Ítiene, páápuluŋɔnd póond á kupípanda eŋiŋ. 55Maná Itiene owóónón ne Emfúnukufúúmɛ wɛɛmɛlimɛt wooyoosin mɛnɛ́mɛnɛ́ɛ: Wɛɛkɛn nuúmu nú Támbák, Yésuse etélímét kiáyɛ́ kí ɔmbɔk wɔɔnɛm ú Támbák. 56«Ukanyi ɛ́ɛ́ indɛ, yaáyíkina mɛnɛ́mɛnɛ́ɛ efuúnén, muɔ́nɔ́ u mɔɔnd éétélimet kiáyɛ́ kí ɔmbɔk wɔɔnɛm ú Támbák.» 57Akáánɛ́ kɔk pɔ́ɔ́pɔn tukál tukáánɛ́, péépífuuk itu, póondo á kuákan punsáy péépísukun wu kisikɛl kímoómí. 58Péétútule wɔ nakúnɛ u pálɛ́k póond á kulaŋan wɔ́ atányí. Epé pámaápá imbɔ́ŋ pɔ́ɔ́kɔ́l pisɔnɔ́ píɔ́p pámaápítálínan páanyapítíkɛ́n ó pusíó pú muúŋayɔ́ kinɔ́k kisiɛ́n ɛ́ɛ́ Sóole. 59Pɛ́mɛɛlɛ́ pámaálaŋan wɔ atányí Ítiene woond ókupísókolonyi, wɔ́ ɛ́ɛ́: «Ɔkɔ́n Yésus pákɔ́n kiliínditie kíámɛ.» 60Kaátakáánɛ Ítiene weesuk tunuu e kúúsí wɔɔ́mbɔlɛt mɔkɔ́n: «Ɔkɔ́n atitúúkɛn pɔ́ kifal kikáánɛ́,» é kélem kú tukál tukáánɛ́ weeku.
ទើបបានជ្រើសរើសហើយ៖
Meelie mé Petúmí 7: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
