Meelie mé Petúmí 4
4
Nɛ Piɛlɛ ni Isáaŋ ké etúl wɔɔkɔ́n ú Pɛyúútɛn
1Piɛlɛ ni Isáaŋ mɛɛlɛ́ pámaákála ké embúl ú pɛɛnd, pafunɔ́fɔn nɔ ɔkɔ́n u pekííkí kitamb kí Támbák na pa satuseyeŋ#4.1 Málákus. 12.18 páasiámɛ́n pɔ. 2Pólópókó táásɛ ɛ́ kuɛlɛɛ́ Piɛlɛ nɛɛyɛ́ ni Isáaŋ óókoónyonyi embul ú pɛɛnd. Á kiákí ɛ́ɛ́ petúmí epe éékéme ɛ́ɛ́: «aná Yésus mɛɛ́nyɔ́k á pilɔ́ŋ, Pikú káká pɛ́ɛ ɛ́ɛ́nyɛ́ɛ́nyukɛn.» 3Pɛ́ɛ́tikɛn Piɛlɛ nɛɛyɛ́ ni Isáaŋ, páátɔ́ɔt pɔ́ á kiansi kí imbíne iŋgime i putúk, á kiákí ɛ́ɛ́ kuɔ́mɔ mapá kúmámaná ɛsɛnd. 4Kutek kú epé pɔ́mɔɔ́pɔ́n nukál nú Támbák pɛ́ɛ́yɛ peétépí. Embul peétépí wáanyaám pɛɛnd kutápɔk tukn tútáán. 5Kuɔ́mɔ pálan a, pɔkɔ́n pɛ́ Pɛyúútɛn, posíósíó, ne pemenyí pikotí páápíkúsíkan Yelúsalɛm. 6Pámapá Anɛ ɔkɔ́n u pafunɔ́fɔn pɔɔkɔ́n, Kayifɛ, Isáaŋɛ, Alɛkɛsándɛlɛ nɛ epé kitikit pɛ́nyɛɛ́ é nikúli ni pafunɔ́fɔn pɔɔkɔ́n. 7Póówun ɛ́ɛ́ póólín pɔ́ nɛ Piɛl nɛɛyɛ́ ni Isáaŋ, póond ó kuosóósósí pɔ: «Pákanyi kɔ́ɔ́p ɛ́ɛ́: Á pukaaka púányɛ́ nɛ kisiɛ́n kíányɛ́ núményeéŋúkí kinsɛ́kɛlinɛ ekie?» 8Akáánɛ́ kɔk, Piɛlɛ owóónón ne emfúnukufúúmɛ, ukanyɛ kɔ́ɔ́p ɛ́ɛ́: 9«Panɔ́ pɔkɔ́n pɔ kitɔŋ panɔ́ posíósíó, nuótúówon nínúan á kiákí ɛ́ɛ́ tuɛ́lɛ́ kikondi ekie peseé, á nunamá nunín mɔɔnd ewe kanyɛɛ́ osótósí. 10Panɔ́ peem ne nikúli ni isayɛl kitikit, nuɛ́kɛɛsikɛnɛn kumenyi puandá púmoómí: Púnyɛɛ́ ɛ́ kisiɛ́n kí Yésus Kilíis u nasalɛt mɔɔnd ewe káánɔ́ ó pusíó nyɛ kilikil. Yésus Kilíise ukáánɛ́ numɔɔ́tɔɔ́ndɔ́n ó kolóse, maná Támbákɛ́ɛ weekeenyi wɔ́ ɛ́ kikɛtɛ́kɛtɛ́ɛ kí piku. 11Yésuse nitányí panɔ́ pewéékí núónyómbó, nɛ́ɛ níɛ́nyɛ́ɛ́síɛ́yɛ́ ɛtɛn#4.11 Ɔmbɔp u pilɛl. 118.22.» 12«Wɔ́ wééŋényí unyɛɛ́ kutúsóti. Ɛ́ kuɛn, é kúúsí kitikit, Támbák timeeki mɔɔnd olotí ó kutúsóti.» 13Pesúmbímoónyi nyɛ ké etúl wɔɔkɔ́n ú Pɛyúútɛn pésímile táásɛ. Á kiákí ɛ́ɛ́ Piɛlɛ ni Isáaŋ áákála ɔtɛ́m owoókón. Pememenyen ɛ́ɛ́ pɛ́timɛɛlɛ sekúle. Peem péémenyi ɛ́ɛ́ pɛɛnd páandɛ́ epe mapá embúl ne Yésus. 14Ana pɛ́mɛɛ́nɛ́n mɔɔnd ewe kilikil, á masia mé petumí peem páandɛ́, pesumbi maayɔ́ timaand apian pú kuondinyi. 15Póókoówun pɔ́ ɛ́ɛ́ páám á kiansi kí etúl, péésíén é kupekenyipekenyi pɔ́ɔ nɔ pɔ́ɔ. 16Pákanyi ɛ́ɛ́: «kiákí tunyɛɛ́ kuɛl nɛ pɛɛnd epe? Pɛ́mɛ́ɛ́lɛ́ kisey, púnyɛ sɛ́ɛ́ny, Yelúsalɛm kitikit éémenyen nɔ, tutipá kusáŋɔn. 17Ɛ́nyɛɛlɛ́ tuɛl ɛ́ɛ́ niɔy nikáánɛ́ tisálámánd kitɔŋ kitikit. Túond tukányi nɔɔpɔ́ na piansi ɛ́ɛ́ pátiandá ɛtɛɛtɛn kisiɛ́n kí Yésus tɛ kɔɔ́mɔ.» 18Páand apílikɛn Piɛlɛ nɛɛyɛ́ ni Isáaŋ. Pákanyi kɔ́ɔ́p ɛ́ɛ́: Tutiandá ɔnúɔ́p nutɛɛtɛn tɛ kuónyitonyi kisiɛ́n kí Yésus tɛ kɔɔ́mɔ. 19Maná petúmí peem páandɛ́ póókondinyi ɛ́ɛ́: «Kiákí kínyɛɛ́ indɛ́ndɛ́nɛ ké eŋis yá Támbák: Kunúɔ́pin ééyí, kuɔpɛn Támbákɛ́ɛ? Ánusɔ́mb panú muɛt! 20Káásɔ́ kɔk tutipá kufuuk niít é púúpú tumɛɛ́n tuond tuɔkɔɔ́p.» 21Na piansi andíkɛ́k, pesúmbi maayɔ́ páayap petúmí peem páandɛ́. Ɛ́ kuɛlɛɛ́ pátimapia ipán í kuséésitenyi pɔ. Na andíkɛ́k ɛ́ɛ́ Kitɔŋ kitikit mekúmésí Támbákɛ́ɛ é púúpú kitikit púmaápítápɔ́k. 22Mɔɔnd ewe umóól kilikili matápúkán tuɔŋ etin áandɛ́.
Imbísókólí Í peétépí
23Pɛ́mɛɛlɛ́ páyapan Piɛlɛ ni Isáaŋ peem páandɛ́ pɔnyɔɔwɔɔ́kɛ́n pɔ́kúɔ́p póond ɔ́ kuɔyɔn pɔ́ epú kitikit pa pafunɔ́fɔn pɔɔkɔ́n no posíósíó mɔɔ́yɛ́t. 24Pɔ́ɔ́pítɔ́likɛn pɔ́ póond ó kupísókolonyi Támbákɛ́ɛ pɔ́ peem ɔtɛ́m ómoómí pɔ́ɔ́yɔ ɛ́ɛ́: «oŋónyóonyi aŋúɛ amaáluŋá mɛnɛ́mɛnɛ́ɛ ne kúúsí na asaá na maándá kitikit mɛnyɛɛ́ kɔ́ɔk. 25Aŋúɛ ewu ɛmɛɛ́lɛ́ Tafíite eŋelípuólí waawɔ, síí ɔkúnɛ waasɔ́ ɔ́ɔ́yɛt á pukaaka pú efúnukufúúmɛ ɛɛ: Kiákí pitɔŋ pituŋulenyée ne tuketi túɔ́p tú sɛ́kísɛ́k? 26Pefuŋ pé kúúsí epe ɛ́ɛ́píɛŋɛlɛ kitul. Epe pɛ́nyɛɛ́ á kipia mápílatá é kunuenesi Ɔkɔ́n ne Kilíise ewu ɛmɛɛ́tɛ́k#4.26 Ɔmɔp u pilɛl. 2.1, 2.» 27«Púnyɛ nɔ kémuémue, Elote Atipas nɔ Pɔns Pilat mapílatá á pálɛ́k ukáánɛ́, ne peenyi ne esipi yi Isayɛl. Púmapá é kunuenesi Yésuse, eŋelípuólí waawɔ u kati kipalalɛ́ɛ amaáyɔ́ɔ́n. 28Á nunamá nukáánɛ́ pɛ́mɛ́ɛ́lɛ́ epú kitikit amatúan kusɔmb, ne epú kitikit ɔmɔɔ́pilɔŋɛt na pukaaka. 29Nínúan kɔk, Ɔkɔn, yoósín aná pátúsáásanɛ́ɛ, ekí peelímoólí pááwɔ pukaaka pú kupéke nukál núáwɔ no pipíóndínyí ɔtɛ́m. 30Tíínyí pukaaka púáwɔ, ɛ́ɛlɛ ɛ́ kisiɛ́n kí Yésuse eŋelípuóli waawɔ u kati kipalalɛ́ɛ, pisey, ne melinsí ne piéŋukie píɛ́lɛ.» 31Pɛ́mɛɛlɛ́ pámááman imbísókólí, kɔɔ́mɔ pámaápá kóond é kupíeyen. Peem powóónón ne Emfúnukufúúmɛ póond é kukéme mekélíe má Támbák no pipíóndínyí ɔtɛ́m.
Púmoómíe u peétépí
32Embul ú péépé pɛ́mɛɛ́yɛ́ peétépí mapá ɔtɛ́m ómoómí, imbítáákitɛ́n imoómí. Tɛ woomoómí kɔ́ɔ́p ké embul timɔɔyɔ ɛ́ɛ́: epue nyɛ púámɛ! Maná epú pámaápiánan mɔɔ́pínɔ́n pɔ peem. 33Petúmí mekémé na pukaaka kitikit ɛ́ɛ́ Ɔkɔ́n Yésus mɛ́ɛ́nyɔ́k é piku, Támbák pookosi pɔ́ peem. 34Ɔ́ pɔ́ peem tɛ mɔɔnd utimesúken tɛ puandá. Ɛ́ kuɛ́n, epé pámaápian pisíén kúnyaánɛ piansi túénen, póólon ne muenyí pámányipɔ́t, 35péékenyi petúmí, é kélem akáánɛ́ petúmí áápa muenyí mukáánɛ́ é siki mɔɔndɛ kɛ́ɛ́yɛ́ kɔ́ ɔsɔk. 36Mɔɔnd omoti mapá kɔ́ɔk, mɔnɔ lefi, pepíénén wɔ́ sipilɛ, kisiɛ́n ɛ́ɛ́ Yusipɛ. Petúmí malukɔ́ wɔ́ ɛ́ɛ́ Palanápasɛ, anakáánɛ́ kúnyɛɛ́ ɛ́ɛ́ mɔɔnd waákinanɛ́ɛ malúndɛ. 37Umapian kisíén kíɛ́yɛ́ weetúú kɛ́ɛ, weesiekí petúmí muenyí mukáánɛ́.
ទើបបានជ្រើសរើសហើយ៖
Meelie mé Petúmí 4: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
