Meelie mé Petúmí 3
3
Piɛ́l méŋuki kinsɛ́kɛlinɛ
1Piɛ́lɛ ni Insáaŋ mamákátán á kitamb kí Támbák á pikulɛ pítátɔ́ é kélém kú ɔtɛ́m ú puɔ́s kí imbísókólí. 2Mekuye ne niítí ní kitamb pámaápílán ɛ́ɛ́ opótí u niítí, pɛ́ɛ́mɛɛ́sítɛ́k siki puɔ́síɛ mɔɔnd omoti umaápá kinsɛ́kɛlinɛ ní puúpayúɛ wɛɛyɛ́ ɛ́ɛ́ wɔɔsiɔŋɔ́n pipíɔ́kɛ́n é péépé pémeépíkén á kitamb kí Támbák. 3Umɛɛlɛ́ wɛɛ́nɛn Piɛlɛ ni Isáaŋ pépiken á kitamb kí Támbák, wɔɔkɔɔŋɛn pɔ́ pipíɔ́kɛ́n 4Piɛlɛ ni Isáaŋ pétémbi wɔ́ eŋis soóŋ Piɛlɛ kɛ́ɛ́yɛ́ ɛ́ɛ́: «túyoosin!» 5Mɔɔnd weetémbi pɔ́ eŋis upitááka ɛ́ɛ́ ukáánɛ́ aputɔ puandá. 6Piɛlɛ kanyi kɛ́ɛ́yɛ́ ɛ́ɛ́: «tɛ kóol, tɛ pikɔŋ indipa imbian epú imbianɛ iŋufa: ɛ́ɛ́ kisiɛ́n kí Yésus Kilíis u nasalɛt atúkɛn ɛ́ɛndɛ!» 7Piɛlɛ wɛɛtikɛn wɔ kɔ ɔmbɔk wɔɔnɛm weetukeni wɔ: kɔ́ɔk nɔ kɔ́ɔk pikɔnd na piluŋɛ́n pi mɔɔnd ukáánɛ́ píapílúndɛn. 8Kakat, waatukan woond ɛ́ kuɛndɛ weepíkin nɛ Piɛl ni Isáaŋ á kitamb kí Támbák upémen, wɛɛndɛ ukúmesi tambakɛ́ɛ. 9Embúl u pɛɛnd ɛ́ɛ́nɛn wɔ́ wɛɛndɛ ukúmesi Támbákɛ́ɛ. 10Embúl ú pɛɛnd menyen ɛ́ɛ́ wɔ́ wáányípá kó opótí u niítí ní kitamb uyɛpɛ wɔɔŋɔn, pɛɛnd póond é kusimile, pumbíla púɛtikɛn pɔ́ é púúpú púmaámɛ́n kinsɛ́kɛlinɛ kikáánɛ́.
Tukál tú Piɛlɛ á kitamb
11Mɔɔnd úmaápá kínsɛ́kɛlinɛ timaand apílátuna Piɛlɛ nɛɛyɛ́ ni Isáaŋ: Embúl ú pɛɛnd ɛ́ɛ́nɛn anakáánɛ́, péésímile péélúlukin pɔ kí itɛn pámaápílán ɛ́ɛ́ itɛn sí salumun. 12Piɛlɛ ɛ́ɛ́nɛn anakáánɛ́: wɔɔkɔ́l nukal wɔ kɔ́ɔ́p ɛ́ɛ́: «Punya isiyaɛl epe, kiákɛ nusímilenée é púúpú púmányaám ó pusíó pú kinsɛ́kɛlinɛ ekie. Kiákí nutúyoosonée anakáánɛ́ ɛlɛɛ́ púnyɛ káásɔ́ á pukaaka, kúnyaánɛ káásɔ́ á nulátát na Támbák túmɛ́nyɛɛlɛ́ ɛ́ɛ́ mɔɔnd ewe ɛ́ɛndɛt a?» 13«Támbákɛ́ɛ u Ápilaháam, wu Isaak, Támbákɛ́ɛ u yákɔp, Támbákɛ́ɛ u pesíí páásɔ́ mékúmí eŋelípuólí wɛɛyɛ́ Yésuse ewu numɛɛ́sɛ́m wɔ́ ku ɔŋgɔ́mɔn, ewu numaápísáŋɔ́n wɔ ke eŋis yá Pilatus umaásɔ́mb ɛ́ɛ́ úyap wɔ. 14Numasáŋɔ́n ukati kipalalɛ́ɛ u indɛ́ndɛ́nɛ, nuokoówun ɛ́ɛ́ páyap oŋónónín. 15Yá anakáánɛ́ panɔ́ numɔɔ́n Ɔkɔ́n u kusɔ́t, maná Támbákɛ́ɛ weenyi wɔ́ ɛ́ kikɛtɛ́kɛtɛ́ɛ kí pikú tunyɛ imbóŋ. 16Púnyɛ ó pipíóndínyí ɔtɛ́m epí tupianɛ́ɛ ɛ́ɛ́ kisiɛ́n kí Yésuse, pukaaka pú kisiɛ́n kikáánɛ́ ményeéŋúkí mɔɔnd ewe nuɛ́nɛnɛ́ɛ nuond numenyen. Pipíóndínyí ɔtɛ́m é Yésus méékí mɔɔnd ewe pukilikile káásɔ́ ké eŋis.» 17«Paandimán páámɛ yeémenyen, púnyɛ é kuleeme numɛɛ́lɛ́ anakáánɛ́ ɛlɛɛ́ pɔkɔ́n páánɔ́. 18Akáánɛ́ Támbák mówóónyí epú umaákálɛ́t ké eŋít yé peemímekélíe mɛ́ɛ́yɛ́ ɛ́ɛ́ Kilíis ɛ́ɛ́nyɛɛ́n muyu, púúpú púmónyipíwóónyi. 19Ánupíkúŋúná kɔk, nupínɔtikɛn Támbákɛ́ɛ ɔ́ mɔɔyɔ́, ɛ́ɛ́ únúyapɛn á pifal píánɔ́. 20Akáánɛ́ Ɔkɔ́n áányínúfáánɛ́ɛ pisikɛl pí kupíɔyɛt epí umaánúátápɛ́n aká waányítúmanɛ́ɛ Kilíise ewú umaáyɔ́ɔ́n kisíósíó káánɔ́ ó pusíó, Yésuse. 21Maná é kííkie kipénéŋ, Yésus ɛ́ɛ́kɛɛsikɛnɛn kulɔp mɛnɛ́mɛnɛ́ɛ kuám puɔ́s Támbák ɛ́ɛ́nyɛ́ɛ́lɛnɛ́ɛ ɛ́ɛ́ puandá kitikit óond puukɔ́sikɔ́siɛ púú pukáánɛ́ umɔɔ́yɛ́t ké eŋít yé peémímekélíe ma Támbák pí insúá epé umaáyɔ́ɔ́n. 22Moyíis mɔɔyɛ́t kɔk ɛ́ɛ́ Ɔkɔ́n Támbákɛ́ɛ waanɔ́ áányíyɔ́ɔn eŋémímekélíe ma Támbák ɛlɛɛ́ niŋúɛ ɛ́ kikɛtɛ́kɛtɛ́ɛ kí paandimán páánɔ́. Nuɔ́nyɔ́ɔ́pinɔn wu á puandá kitikit epú wɔɔ́nyínúɔ́yɔnɛ́ɛ. 23Mɔɔnd ewú wɛɛ́nyɛ́ɛ́lɛ útiɔ́pɛ́n eŋémímekélíe má Támbák ukáánɛ́, áányípá epíndén é nikúli ní Támbák póond pɔ́ɔ́n wɔ. 24Peémímekélíe má Támbák peem kuetúm á Samuɛl, ne epé pémeésíén pɔ́ɔ́ŋɔ́n kɛ́ɛ́yɛ́ é kélém makálá siki mɔɔndɛ ɛ́ kíɛ́yɛ́ kitum é púúpú pútápukanɛ́ɛ é metúk eme. 25Panɔ́ nunyɛɛ́ paán pé peémímekélíe má Támbák, na paán pá nikál ení Támbák maálatá ne pesíí páánɔ́, aká umɔɔ́yítɛ́n Ápilaháamɛ ɛ́ɛ́: Á nipuundɛ níáwɔ ekúli yé kúúsí áányípáanɛ́ɛ yepínúúné. 26Púnyɛ káánɔ́ ó pusíó Támbák mɔɔ́sɔmɔ́n eŋelípuólí wɛɛyɛ́ woond waatɔ́m wɔ́ ɛ́ɛ́, únúpínúúne wóond wɛ́ɛlɛ ɛ́ɛ́ núpíkúŋuna ɔ́ pilɔk píánɔ́ pí meelínyée.»
ទើបបានជ្រើសរើសហើយ៖
Meelie mé Petúmí 3: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
