Meelie mé Petúmí 26
26
Insáák i Póol ku Akilipa
1Akilipa kanyi ó Póol ɛ́ɛ́: «aápian pukaaka pú kupísáak.» Póole kɔk weketukenyi ɔmbɔ́k wookoond é kupísékesi. 2wɔ́ ɛ́ɛ́: «efuŋ Akilipa, kí ituɛ́ sí moónyi kitikit Pɛyúútɛn indúkanɛ́, inyɛ owóónón ni ipali ɛ́ɛ́ ímbíséeki káwu ké eŋis. 3Á kiáki ɛ́ɛ́ émenyen nuu Pɛyúútɛnɛ na maándá pépekenyipekenyé á mɔ. Yoókupísókolonyi kɔk, kɔ́l kisikɛl ímbítɔ́líkɛn peseékese. 4Pɛyúútɛn kitikit emenyen puúpayɔ́ púámɛ, aná imɔɔ́sɔ́tɔ́nɔ Yelúsalɛm ɛ́ kikɛtɛ́kɛtɛ́ɛ kí nikúli níámɛ. 5Pékimenyen tɔɔm, pányi kutétunyi, indi pɔ́ɔ́kɔɔyɔ, aní imɔɔ́sɔ́tɔ́n ó pikotí piásu pí kuátap kúásɔ́ ku pa Falisiɛ́ŋ. 6Ínanu kɔk, pémíndényikenyi ké etúl, ó pusíó pú pipióndínyi ɔtɛ́m kí indán eyí Támbák maákíní pesíí pású 7ekúli yáásɔ́ yeem átá na áandɛ́ yɔ́ kitɔŋ, ápian pipíóndínyí ɔtɛ́m ɛ́ɛ́ Támbák ónyiwónyi indan eye, pɔ́ɔkɔtɔn Támbákɛ́ɛ ne neputúk nɔ nɔpuɔsí tɛ ɛ́ɛ́ kuyɔt. Efuŋ Akilípa ópíóndínyí ɔtɛ́m píkáaní Pɛyúútɛn ínsɔ́mɔ́nɔnɛ́. 8Ó pusíó pú kiakí panɔ́ Pɛyúútɛn nutiányipá nuamba kuátap ɛ́ɛ́ Támbák ekenyesi piku. 9Niŋúɛ puátí imapítááká ɛ́ɛ́ inyɛ kunuenesi kisiɛ́n kí Yésus u Násalɛt á tunama kitikit. 10púúpɔ́ imaápá yɛlɛ Yelúsalɛm, yaákan peétépí taási á kiansi kí imbíne na pukaaka epú pafunɔ́fɔn pɔɔkɔ́n miímfan, yaátapan imbakɛ iwéwu pɛ́siɛsɛm wɔ́ é niku. 11Imbɔŋɔ piansi pí imbísókólí piim, inséésenyi peétépí ɛ́ɛ́ pápísáŋuna kisiɛ́n kí Yésus, ilópi yáámɛ mapá pukaaka ɔ́kuɔŋɔn kɔ́ɔ́p kuám á pa pálɛ́k pé peenyí.»
Póol ɔ́kɔyɔ kupikúŋɔn kúɛ́yɛ́
12Epué puɔ́s iyukana Tamás owónón na pukaaka pú pafunɔ́fɔn pɔɔkɔ́n ɛ́kuɛtíkɛ́nɛ peétépí. 13Efuŋ imɛlí iŋany kí iŋilí, puandá pú ɔtɛ́m puɔ́s, yɛkɛɛ́n kisie kíólínon mɛnɛ́mɛnɛ́ɛ kí muɛnyɛ kukányini ɔɔ́ny kíɔkimbɔŋ nam ne pekúlikuli páámɛ pɛ́ ɛŋɛnd. 14Tuakua pasɔ́ peem e kúúsí, yokondo yɔkɔɔ́pɔ́ ekelú wúŋgálan na nukál nú Pɛyúútɛn ɛ́ɛ́: Sóol, Sóol, kiákí insésenyé? Eépíkite sɛ́kísɛ́k ɛlɛɛ́ yɔɔpɔ́ ímɔnikɔ́líní kɔ́ ɔnyuŋɔ́!#26.14 Punyi pulinsí pú pulúk púɛ́lɛnɛ́ sí wɛɛyɛ́ etú kulal. 15Yokoówun ɛ́ɛ́: «aŋúɛ ɛ́nyɛ́ wɔ́ Ɔkɔ́n?» Ɔkɔ́n wokondinyi ɛ́ɛ́: «niŋúɛ Yésuse esésenyé. 16Maná atukɛn, imákuámíní ɛ́ɛ́ iŋuéyi eŋelípuólí waamɛ ondó ápá etétúnyí aná ɛ́mɛ́nyiŋɛ́n ínanu. Ónd and ekéme epú iŋaányánd ekutínyenyi. 17Iŋakukíka ɔ́ kitɔŋ kí Pɛyúútɛn nɔ pitɔŋ pí péépé pátianyipá Pɛyúútɛn iŋaányíkutúmu apɛ. 18Eényífuúné pɔ eŋis, émi pɔ kí imbíne á kuyɔɔk é kise, eeŋi pɔ́ á kipia kí Sáatan aák pɔ́ á kipia kí Támbák. Ɛ́ Támbák yaapan pɔ́ á pifal píɔ́p póondo pápia niap é kisé ne péepe pɛ́nyɛɛ́ pá Támbák indi pópíóndonyi ɔtɛ́m naamɛ.»
Póol ɔ́ɔ́kɔyɔ pusɔ́m púɛ́yɛ́
19«Efuŋ Akilipa, Kutúmu akáánɛ, indimetímbit kí iŋɛ́nínɛ ikáánɛ́ imoólínono mɛnɛ́mɛnɛ́ɛ. 20Maná yatúan é kukéme insɔ́m yi indámb ɛ́ pɛɛnd pá Tamás ne pé Yelúsalɛm ne pé Yúte kitikit nɛ pɛɛnd pɔ́ pitɔŋ pílotí; yɔyɔn pɔ́ ɛ́ɛ́ ánupíkúŋúná nuónd nuɔŋɔn á Támbák, nuɛlɛ meelíe maatámb métinyenyé ɛ́ɛ́ nuenuki. 21Tɛ ɔ́kɔ́pɔn ɛ́ɛ́ Pɛyúútɛn iŋɛ́tíkíni á kitamb pɛ́kɛ́l píŋɔn. 22Maná Támbák íŋíká kuasiám nínuán, imaásuŋuna ne kutétunyenyi á panánáanɛ nɔ pɔkúnú; epú peémí mekelié má Támbák no Moyíis mɔɔ́yit ɛ́ɛ́ púányásiám, indipá yɔɔ́yikɔn púloti. 23Pɔ́mɔɔyít ɛ́ɛ́ Kilíis kɛɛ́n muyú wɔ́ kɔk waányípánɛ́ ukutúan ɛ́ɛ́ wáám á pilɔ́ŋ, wóndo úkémé kisié kí ónyísótosié kitɔŋ kíásɔ́ nɛ́ piɛ́nɛ́n pítiányípá Pɛyúútɛn.»
Póol méketí kukúŋɔn Akilípɛ
24Póol mɛɛlɛ umeépisékesi Fɛ́sɛ́tuse waakaansit ekelú mɛnɛ́mɛnɛ́ɛ wɔ́ ɛ́ɛ́: «Póol anyi etiití sekúle wɔɔkɔ́n mékupelí kitii!» 25Maná Póole wondinyi ɛ́ɛ́: «ɔŋgɔ́mun indipa etiití, tukál yeémenyé nyɛ tu indɛ́ndɛ́nɛ na tutat. 26Efuŋ Akilipa ewe iŋálanɛ́ kɛ́ɛ́yɛ́ na kutáam kitikit émenyen mandá yeémenyé, utipa uleme tɛ pu púmoómí. Manda makani tiapitapukan ɔ kiɔsikɔ 27efuŋ Akilipa akatapan epú peémi mekelié ma Támbák mɔɔ́yit a? Yeémenyene aákaátapan.» 28Akilipa waatían kɔk Póole ɛ́ɛ́: «Apitaka kuŋeyi kilísitɛn nɔ niɔ́kɔ́tɔ́n á!» 29Póole woondinyi wu: tɛ nɔ niɔ́kɔ́tɔ́n tɛ púulé, yoópísókolonyi Támbákɛ́ɛ ɛ́ɛ́ putiɛlɛ aŋu eŋeny maná panɔ́ peem numbítɔ́likɔnɛ́ ínanɔ, ɛ́ɛ́ núpá niaŋ niámɛ maná kati mesuŋ eme imbitúkanɛ. 30Efuŋ, ɔŋgɔmunɛ, Pelenise patukin ne pepe pámaápá pɔnyɔl nɔɔpɔ́. 31Pakama ɛkuɛlɛ insumbu: «Pakanyɛ́ ɛ́ɛ́ mɔɔnd ewe tiɛlɛ puandá pu kilɔk puɛ́sikɛnɛnɛ́ na kiansi kí imbíne kúnyáánɛ ne niku.» 32Akilipa kanyi é Fɛ́sɛ́tuse ɛ́ɛ́: «mɔɔnd ewe apa ɛ́ɛ́ tuyap wu usɔ́tɔ utipaŋɛn efuŋ wɔɔkɔ́n.»
ទើបបានជ្រើសរើសហើយ៖
Meelie mé Petúmí 26: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
