Meelie mé Petúmí 27
27
Póol mámákát é sitíme úyɔɔk Lóma
1Pɛmɛlɛ́ nakusɔ́mb ɛ́ɛ́ tuámákát é sitíme, túyɔɔk Italí, paatál Póole na pimbɔk pilotí kímbɔ́k sí mɔnɔ́ pó Lóma, kisiɛ́n ɛ́ɛ́ Sulíyuse; umapá saŋtuliɔ́ŋ, ɔkɔ́n u pisimbi umɔɔ́kɔtɔ́n efuŋ wɔɔkɔ́n u Lóma. 2Tuamákat é sitíme umɔɔ́pínɔ́n pálɛ́k kisiɛ́n ɛ́ɛ́ Atalamíit, umɛɛ́sikɛ́nɛ́n kuyɔk kiáyí kí kúúsí kú Asíi; tuapálɔk, tumapá ɔlɔŋ na Alisitálak, mɔnɔ́ pá Tesaloníik, ɔ́ kitɔŋ kí Masetuáan. 3Kuépéli, tuanyaám á pálɛ́k kisiɛ́n ɛ́ɛ́ Sitɔ́ɔŋ, tuetélimit. Sulíyus mapá ɔtɛ́m peseé no Póol, weeki wɔ́ pukaaka ɛ́ɛ́ wɛ́ɛ́n pekúl pɛ́ɛ́yɛ́ ɛ́ɛ́ peeki wɔ́ epú unyɛ́ insaná na puɔ. 4Tuand kuond é sitíme tuayɔɔk; tuɛndɛn imbátɛ u ilua, kisiɛ́n ɛ́ɛ́ Sípele, ékupílindik emfún, á kiákí ɛ́ɛ́ úmapá úfúken sitíme ó pusío. 5Tuɛsɛ́l asaá mekúye ne Silisí na Pamafilí; tuaniám á pálɛ́k kisiɛ́n ɛ́ɛ́ Mila ɔ́ kitɔŋ kí Lisí, tuesel. 6Kɔ́ɔk, Sulíyuse, saŋtuliɔ́ŋ, wɛɛ́n sitíme u pálɛ́k kisiɛ́n ɛ́ɛ́ Alɛkɛsandilíi, umaáyuukan Italí; weetúméketi á wɔ. 7Tuapáápit metúkú kutek é sitíme, á kiákí ɛ́ɛ́ umapá wɛɛndɛ ɛlɛɛ́ iŋún. Tuapia muyú táásɛ ɛ́ɛ́ tuám mekúye na pálɛ́k papílanɛ́ ɛ́ɛ́ Kiníit. Aná emfún maákány ɛ́ɛ́ tusuŋɔn ɛŋɛnd kí iŋilí tumaápá ayɛ, tuatápukɛn kiáyí kí Salamoné ɛ́ɛ́ tuékíl kiáyí kíilua kisiɛ́n ɛ́ɛ́ Kɛlɛ́t é kupílindik. 8Tuasuŋɔn nɛ ɛŋɛnd, tuól tuɔ́ŋɔ́n á kiŋɛndɛŋɛnd ne muyú táásɛ, tuanyaám kɔɔ́mɔ papílanɛ́ ɛ́ɛ́ Ɔkɔ́l sitímé Yaatámb, mekúye na pálɛ́k kisiɛ́n ɛ́ɛ́ Lasé.
9Tuetépuki kisikɛl táásɛ, puɛkɛɛ́nɛk ɛ́ɛ́ púkilɔk nyɛ púkutuámɛn indɛ tusiasuŋɔn nɛ ɛŋɛnd, á kiákí ɛ́ɛ́ kisikɛl Pɛyúútɛn pikotosié múkunya mapá kímámaná atápɔk kisikɛl kikáaní ɛŋɛnd ú moomb mapá muyu ó pusíó ɛ́ɛ́ emfúnu mapá pukaaka. púúpɔ́ Póol meékí pɛɛnd pemeéndésí sitíme kumeny, 10wɔ́ kɔ́ɔ́p ɛ́ɛ́: «Pekúl páámɛ, yɛɛ́kɛɛ́nɛn asi puandá púkilɔk kaná atuámin kɛ́ŋɛnd ewe: sitíme na pimbɛk kaná ɔpílɔk táásɛ, tɛ pasú muɛ́t tunyɛ pékukú.» 11Maná, mɔnɔ́ pó Lóma, umaápá saŋtuliɔ́ŋ, wɔ́ wátapan yá epú muɛ́t sitíme nɔ ɔkɔ́n u pɛɛnd pemeéndésí sitíme mɔɔ́yɔ; tɛ ɛ́ɛ́ úpítɔ́likɛn Póole. 12Aná nipiɔ́yɛt ní pe sitíme nikááni mɛɛ́l nitiɛl peseé ɛ́ɛ́ tutépuki kisikɛl kí imɛŋu kɔ́ɔk, pɛɛnd pé sitíme epé pamaámbá ɛ́ɛ́ túsuŋɔn nɛ ɛŋɛnd paanyɛ́ɛn; nuɔpɛ́ mapá ɛ́ɛ́, indi púnyi kupiɛ́l, tuékíl ɔ́nipiɔ́yit ní pe sitíme ní Kɛlɛ́ɛt papílanɛ́ ɛ́ɛ́ Feníis, é kutépuki kisikɛl kí imɛŋu kɔ́ɔk; nimapá nipɔkimɔ́t kiáyí kitikit kí ilua kímoóyóósón nisɛ́ndɛ́n.
Emfún wɔɔkɔ́n méfúfí sitíme
13Ɛmfɛɛfinɛ wóólin imbát, woond ékufúke; páapítáákɛt ɛ́ɛ́ nuketi nuɔ́p nyɛ pákuáminɛn. Péméketi kipóŋól kí nuɛy kíténikenyenyé sitíme, paapálɔk; peendesi sitíme masiɛ́ masia má kiŋɛndɛŋɛnd kí ilua í Kɛlɛ́ɛt. 14Kipál timaná, kikaaka kí emfún kiólin kí ikɛ́l sí ilua, kíókoond é kufúke, pápílan wɔ́ ɛ́ɛ́ elakílɔnɛ; 15sitíme waafɔ́ɔf, kipán kíkuɛtikín wɔ́ ɛ́ɛ́ tusuŋɔn timaand apa, tuayap ɛ́ɛ́ ufɔ́ɔf naasɔ́. 16Tuatápukin imbátɛ́ u muɔ́nɔ́ wu ilua kisiɛ́n ɛ́ɛ́ Kóta, weetulindik ké emfún; tuaáminin kɔk, ne muyú táásɛ é kuémi kitóŋ kíikéti ó moomb. 17Pɛɛnd pemeéndesi sitíme peeméketi kí. Pekéŋeliti sitíme ni iŋolí ɛ́ utikalakas. Aná pemeétine ɛ́ɛ́ sitíme tiipɛ́ kuakákán kánsísáya unyɛ́ ká asaá, á masiá má kiŋɛndɛŋɛnd kiáyí kí Lipi, paayap kipóŋól kínɛ́ŋɛ ó moomb; páápiyapɛn kɔk emfun. 18Emfún wasuŋɔn na kutúnyuŋan napukaaka kuám aná kuɔ́m mɛɛ́lɛ kupálan, póond ákutúútan pimbɛk ká asaá ɛ́ kitóŋ pá kuwa; 19puɔ́s púmɔɔ́ŋɔn, pɔ́ muɛ́t pɔ́ɔkɔ́l maandá pemeéndesi sitíme na mɔ nimbɔ́k siɔ́p, paatɔ́ɔt á maáŋ. 20Metúk kutek tɛ ɛ́ɛ́ tumɛ́ɛ́n ɔɔ́nyi, punyáanɛ muótiótio; emfun tɛ ɛ́ɛ́ úyɔtɛ. Tutimaand ópióndonyi ɔtɛ́m ɛ́ɛ́ panyi kutúɔk. 21Pumapá púkanyi metúk kutek pɛɛnd pé sitíme meésúkín kunya. Kúúkɔ́ Póol meétélímít kɔ́ɔ́p ó pusíó, wɔ́ kɔ́ɔ́p ɛ́ɛ́: «Pekúl páámɛ, nuɛ́síkɛ́nɛ́n kuŋɔ́pɛn, nutisíátɔ́k Kɛlɛ́ɛt; tutisíényímí maandá eme kitikit tumánimaná enyími ni iŋɛ́n eye túmányimaná kuɛ́n. 22Ninúan kɔk, yɛ́pi kánɔ́ ɛ́ɛ́ ánupiák malúnda, á kiákɛ ɛ́ɛ́ tɛ mɔɔnd utíekú; sitíme wééŋényí tukaná kuáyinɛ́. 23Punyi ɛ́ɛ́, é putúk pú inanɔ, Támbákɛ́ɛ inyɛ́ eŋelípuólí wɛɛyɛ́ yond yɔ́pɔnin wɔ, míindúmin Éŋele wɛɛyɛ́; 24wɔ́ káami ɛ́ɛ́: “Póol, etitín! púɛ́kɛɛsikɛnɛn ɛ́ɛ́ étélímítín efuŋ wɔkɔn unyɛ́ Lóma ó pusío, úsɔ́mb puónyi púáwɔ; andíkɛ́k ɛ́ɛ́, kɛ́ɛ́yɛ́ kɔ́ ɔtɛ́m peseé káwɔ ó pusío, Támbák mósótí kɔ́kɔɔ́p pɛɛnd kitikit pɛ́nyɛɛ́ naawɔ é sitíme”. 25Kúúkɔ́, pekúl páámɛ, inúɔyɔnɛ́ ɛ́ɛ́: ánupiák malúnda, á kiákí ɛ́ɛ́ yoópíóndonyi ɔ́tɛm na Támbák: epú usiákindían, pú pukaní ɛpiɛ́lɛɛ́. 26Tuɛ́kɛsikɛnɛn kuɔkɔmitíni á kiŋɛndɛŋɛnd kí ilua ímotí.»
Támbák mɔ́ɔ́kɔ́ pɛɛnd pé sitíme ó moomb
27Pumapá pukanyɛ putúk pú káátá ne kénie emfún maápá úfúke, sitíme fúúfan naasɔ́ á mááŋ pápílanɛ́ ɛ́ɛ́ Metitelané. Ɔtɛ́m putúk mɛɛlɛ́ ukanyɛ mekúye, pɛɛnd pemeéndesi sitíme pɔɔ́p ɛlɛɛ́ tuépisíítenin kúúsí. 28Pookombin pufɛkɛ́n ɛ́ kufɛk kuyuum kú moomb, pɛkɛɛ́n ɛ́ɛ́ kúnyi pamítɛ nitín no punyo na páandɛ; sitíme wepísíít muɔ́nɔ́ ukaáyɛ́, paand afialɛt kuyuum kú moomb, pɛkɛɛ́n ɛ́ɛ́ kúnyi pamítɛ nitín na pánamanɛ́. 29Peetíin ɛ́ɛ́ sitíme nyɛ kuɔtɔɔ́ndɛ́n atányí; pɔ́ kutɔ́ɔt ómoomb pipóŋól píni iŋélémé píɛtikɛnɛ́ sitíme; póond ékupéétenyi, itɛ́m kundukund ɛ́ɛ́ kuɔ́m pál kuɛ́kɛt. 30Pɛɛnd pemeéndesi sitíme peeseli kitóŋ kíikéti ó moomb; peepúlit, pɔ́ ɛ́ɛ́: «Tuómbín pipóŋól pí tuɛy pípusió púsitíme ó moomb.» Nuɔpɛ́ mapá ɛ́ɛ́ peseli kitóŋ kiikétí, pɔ́ɔ́pínɔ á kɛ́ɛ. 31Póol ɛ́ɛ́pí á saŋtuliɔ́ŋ ne pisimb ɛ́ɛ́: «Pɛɛnd epe éen kulɔp é sitíme, panɔ́ nutiɔ́sɔ́t.» 32Pisimb ɔ́ɔ́pɔn anakáání, píasɔ́mb iŋolí simeételesi kitóŋ kíikéti, kíakua ó moomb, páayap kí kíafɔɔf.
33Pɛ́mɛl pemeépéétenyi ɛ́ɛ́ kuɔ́m pal, Póole waapílikin mɔɔnd kitikit á kupíyak, wɔ́ kɔ́ɔ́p ɛ́ɛ́: «Metúk mááta ne méni eme nupéétenyé ni indúmútén kí itɛ́m, tɛ ɛ́ɛ́ numányá ɛ́ɛ́. 34kúúkɔ́ yaambanɛ́ ɛ́ɛ́ mɔɔnd kitikit nya, á kiákí nuápian insaná ɛ́ɛ́ nusɔt; tɛ mɔɔnd omoómí káánɔ́ kɔ́ ɔlɔŋ tiékú.» 35Umáaman akála, Póole wɔɔkɔ́l kilɛ́ɛt, welémbi Támbákɛ́ɛ ké eŋís yé peem, wɛkɛɛ́nsi kí woond á kunyáan. 36Ilúndɛ yóókoólin peem, páanyá kɔ́kɔ́ɔp. 37Tumapá é sitíme pɛɛnd imbak íyáandɛ́ ne etíni átátɔ́ no punyo no ómoómí. 38Aká mɔɔnd kitikit mɛɛ́lɛ́ úmánya wóoy, paatɔɔt pimbɛk pí pelé á mááŋ ɛ́ɛ́ sitíme pá kuwa.
39Kuɔ́m mɛɛlɛ́ kúpálan, pɛɛnd pemeéndési sitíme pɛkɛɛ́n kaáyɛ muɔ́nɔ́ u kɔɔ́mɔ mááŋ maápá ɛlɛɛ́ weépíken kúúsi, maná pɔ́ɔ tɛ ɛ́ɛ́ pemeny kɔɔ́mɔ pamaápá; pɛ́nɛn ansínsáya á kiŋɛndɛŋɛnd. Pɔ́ ɛ́ɛ́ pɔ́kɔmítini sitíme kɔ́ɔk indi púnyi kupíɛl. 40Pookolun pipóŋól pítuɛy, paayapin mááŋ; pookolun ɛ́ kiɛ́tɛ kisikɛl kímoómí iŋolí símɛɛ́tikɛn maandá pamaápá panúŋunan sitíme kɔ́ɔk. É kélém kuɛ́yɛ, paatɔ́ŋ kiandákáand kí insunú, kínuáka, ó pusíó púsitíme ɛ́ɛ́ emfún títiken wɔ; panúŋuna wɔ ɛ́ɛ́ uyuukan kiáyí kiŋɛndɛŋɛnd ansínsáya maápá. 41Maná, pámany pá tipí kuám á kiŋindiŋindɛ, peepíkíik ansínsáya; sitíme wafakan, tɛ ɛ́ɛ́ wand epiéyitin; pusíó puɛ́yɛ puepíken ká ansínsáya, kélém kú sitíme, moomb má mááŋ mémeépieyen na pukaaka, máatukan másápa kú, máaman akata kú wɔ́ɔs. 42Pisimb maambá kuɔ́n pimbɔk ɛ́ɛ́ tɛ kímoómi kítikɔ́l ɛnɛ́ɛŋ kípínɔ. 43Maná, saŋtuliɔ́ŋ umaámbá kusóti Póole waakány nɔɔpɔ́; weeki pukaaka ɛ́ɛ́ epé pemenyené ɛnɛ́ɛŋ, túan kupíombin ó moomb, pɛ́ɛ́nɛ́ɛŋɛ kuám á kiŋɛndɛŋɛnd. 44Pɔsɔ́k pólotí mɛɛsikɛnɛn kuɔŋ, pɛpiɛ́tikɛnɛn ámapáám punyáanɛ é piénsi pí sitíme. Yá anakáánɛ́ kɔk, peem páányaám é kúúsi pɔkɔ́si, tɛ kipɛ́lítɛ́n.
ទើបបានជ្រើសរើសហើយ៖
Meelie mé Petúmí 27: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
