Meelie mé Petúmí 25
25
Póol ápaŋinan efuŋ wɔɔkɔ́n
1Fɛ́sɛ́tuse mɛɛlɛ́ úmɔ́ɔkɔ́l ninyɔ́l niɛ́yɛ Sesalé, ká átátúɛ́ wɛɛyɛ́, waayɔɔk Yelúsalɛm. 2Kɔ́ɔk Yelúsalɛm, pá pafunɔ́fɔn pɔɔkɔ́n no posiósió pé Pɛyúútɛn pɔniɔsɔ́min Póole kɛ́ɛ́yɛ́. Pétutinyenyi wɔ́ no kuówon wɔ́ ɛ́ɛ́ 3insí umóondí Póole Yelúsalɛm; nuɔpɛ́ mapá ɛ́ɛ́ panukɛn Póole ikɔ́n, pápítámb wɔ́ kí iŋilí pɔɔ́n wɔ. 4Maná, Fɛ́sɛ́tuse woondinyi pɔ́ ɛ́ɛ́ Póol nyɛ á kiansi kí imbíne Sesalé, andíkɛ́k ɛ́ɛ́ wú muɛ́t ukɛɛ́kɛt wóóndó Sesalé. 5Wasuŋɔn, wɔ́ kɔ́ɔ́p ɛ́ɛ́: «Ɛniɛ́ pɔkɔ́n pánɔ ɔ́ɔŋ káamɛ pɔɔsisɔ́mɛn mɔɔnd ukááni indɛ wɛ́lɛ kilɔk kí puandá.» 6Fɛ́sɛ́tuse wɛɛl Yelúsalɛm metúk anɛ mánamanɛ́ kuám máát kɔ́ɔ́m; é kélém akáánɛ́ woond Sesalé. Kuépéli, waayɔɔk ánisúmbɔ pisɛn, wɔnyɔ́mbɛt ákusúmba pisɛn; wɔ́ ɛ́ɛ́ póólin wɔ́ no Póol. 7Póol mɛɛlɛ́ wasiáman, Pɛyúútɛn pomoólin Yelúsalɛm pekéŋeliti wɔ, póond ɔ́kusɔ́mɔnɔn Póole á pikaakalak pímaandá kutek. Maná, patimapian kipán kí kutíínyi ɛ́ɛ́ epú pɔɔyɔnɛ́ nyɛ kémuémue. 8Póole woond é kupiséékesi, wɔ́ ɛ́ɛ́: «Indiákua kikotí kí Pɛyúútɛn, indiɛ́l puandá pú kilɔk puyoosoné kitamb kí Támbák punyáanɛ efuŋ wɔɔkɔ́n unyɛ́ Lóma.» 9Aná kɔk Fɛ́sɛ́tuse maámbá ɛ́ɛ́ Pɛyúútɛn ɔ́pɛn wɔ́ peseé, woówun Póole ɛ́ɛ́: «Aákátapan ɛ́ɛ́ ayɔɔk Yelúsalɛm pokusósósí kɔ́ɔk kámɛ ké eŋis á?» 10Póole woondinyi wɔ́ ɛ́ɛ́: «Inyɛ akɛ etényí á nisúmbu pisɛn níɔ́pinɔnɛ́ efuŋ wɔɔkɔ́n Sesáal; kɔ́ɔkɔ́ pɛɛsikɛnɛnɛ́ kusɔ́mb puónyi púámɛ. Tɛ puandá indiɛ́l Pɛyúútɛn, aŋúmuɛ́t eémenyen anakááni. 11Insiákápá na kikua, insiɛ́kɛ́ɛ́l puandá púɛsikɛnɛnɛ́ ne niku, indisién kuku. Maná, indi pɛɛnd pakáánɛ mímbɔ́ŋɛn, mɔɔnd tipá wɛɛsikɛnɛn ɛ́ɛ́ wúúnsɛm kɔ́ɔ́p. Ɛniɛ́ efuŋ wɔɔkɔ́n wɔ́ muɛ́t úsɔ́mb puónyi puámɛ.» 12Fɛ́sɛ́tuse mɛɛlɛ́ úmáaman insumbú nepesúŋí pɛ́yɛ, wɔ́ ó Póol ɛ́ɛ́: «Ɛɛ́pí ɛ́ɛ́ efuŋ wɔɔkɔ́n úsúmbanɛ́ puónyi puáwɔ, ekenietélímítín wɔ́ kɔk ó pusío.»
Efuŋ Akilípɛ nɛɛyɛ́ ne Peleníis ɔ́ɔ́pítɔ́likɔn Póole
13Paán pé metúk paatápɔk, efuŋ Akilipɛ na andimán wɛɛyɛ́ wakáandɔ́ Peleníise paasiám Sesalé, ákuasipítá Fɛ́sɛ́tuse. 14Aná pumaápá ɛ́ɛ́ petépukesi kɔ́ɔk metúk kusol, Fɛ́sɛ́tuse woond ɔ́kuɔyɔn efuŋ Akilípɛ puónyi pú Póol; wɔ́ kɛ́ɛ́yɛ́ ɛ́ɛ́: «Felíkis áyapá mɔɔnd akɛ á kiansi kímbíne. 15Aká imaáyɔɔk Yelúsalɛm, pá pafunɔ́fɔn pɔɔkɔ́n no posiósió pé Pɛyúútɛn pɔ́ɔsisɔ́mín wɔ́ kámɛ, ɛ́ ímbɛn wɔ. 16Yoondinyi pɔ ɛ́ɛ́ kuasɔ́ Lóma tutipá nɛkinɛ́m kinyɛ́ ɛ́ɛ́ tupɛn mɔɔnd kati ɛ́ɛ́ tuméténikenyi wɔ nɔsɔ́k úmɔ́nisɔ́mɛ́n wɔ ɛ́ɛ́ tuɔ́p yɛɛyɛ́ ŋál. 17Imɛɛlɛ́ imóondó Sesalé, pɔɔkɔŋ kámɛ. Kuépéli, tɛ ɛ́ɛ́ yand enéŋeliti, yayɔɔk ánisúmbɔ pisɛn yɔnyɔ́mbɛt, yɛɛ́pí ɛ́ɛ́ píŋolin nɛ wɛɛ́tɛ mɔɔnd. 18Pɛɛnd pɔ́mɔɔ́sɔ́mɛn wɔ paasiám; pɔɔkɔ́l nukál, imbítááka ɛ́ɛ́ iŋaná kuɔ́p pikaaka pípipínanɔ́ wɛ́niɛ́lɛ́, tɛ ɛ́ɛ́ yɔ́pɛ. 19Pamapá pepekenyipekenyi nɛɛyɛ́ yá ámaandá móóyoosoné kuátap kúɔp, na mɔɔnd omotí, kisiɛ́n ɛ́ɛ́ Yésuse, umeékú, Póole wɔ́ wɛlɛ ɛ́ɛ́ mɔɔnd ukáánɛ nyɛ ɔ́ kusɔ́t. 20Tɛ ɛ́ɛ́ ímeny aná ínsúmbanɛ́ nukáánɛ́ nunamá nú puónyi; iŋúɛ kɔk kuówun Póole indɛ waákaátapan ɛ́ɛ́ úyɔɔk Yelúsalɛm ɛ́ɛ́ paásúmb puónyi epue kɔ́ɔk. 21Póole wasáŋɔn, wɔ́ ɛ́ɛ́ peseé nyɛ́ɛ efuŋ wɔɔkɔ́n súmbu puónyi puɛ́yɛ. kúúkɔ́ imɛɛ́l ɛ́ɛ́ pondi wɔ́ á kiansi kí imbíne kuám aká yánitúmanɛ́ wɔ́ ku efuŋ wɔɔkɔ́n unyɛ́ Lóma.» 22Akilipa ɛ́ɛ́pí ɛ́ Fɛ́sɛ́tus ɛ́ɛ́: «Yaákaamba ɛ́ɛ́ insí iŋú muɛ́t imɔ́pitɔ́líkɛ́n mɔɔnd ukáánɛ peseé.» Fɛ́sɛ́tuse woondinyi wɔ́ ɛ́ɛ́: «Ɔkɔpítɔ́likin wɔ́ nakinyám.»
23Kuépéli, Akilipɛ ne Peleníis paasiám nɔlɔŋ úpɛɛndɔ, páátááman pɔ imbɔk pond paakinan pɔ tupékpék. Péépíkin á kitaŋá pɔ́mɔɔ́sɔ́sɔ́ moónyi akɛ nɔ pɔkɔ́n pépisimb, na patambtámb pá pálɛ́k. Fɛ́sɛ́tuse weeki pukaaka pɔɔniɔkɔ́l Póole. 24Fɛ́sɛ́tuse wɔɔkɔ́l nukal, wɔ́ ɛ́ɛ́: «Efuŋ Akilipa, nanú kitikit nunyɛ́ akɛ naasɔ́, ónuyooson mɔɔnd ewe. Embúl kitikit ú Pɛyúútɛn ɔ́sisɔ́mɛn wɔ kámɛ Yelúsalɛm, naakɛ; pepéke ɛ́ɛ́ utipá wɛɛsikɛnɛn nɔ kusɔ́t. 25Iŋú yɛ́kɛɛ́nɛn ɛ́ɛ́ utiɛl puandá puɛsikɛnɛnɛ́ ne niku. Aná wúpuɛ́t wóniówun ɛ́ɛ́ efuŋ wɔɔkɔ́n unyɛ́ Lóma úsúmbɛ́ puónyi puɛ́yí, yaasɔ́mb ɛ́ɛ́ yaátúman wɔ́ kuɛyí. 26Aná indiányípá na puandá pú sɛ́ɛ́ny púyoosoné mɔɔnd ewe ɔ́ kuɔ́ŋin efuŋ kilɔ́mbɔ, púúpɔ́ iméniémi wɔ kánɔ ó pusío, solsol kááwu ó pusíó, efuŋ Akilipa, ɛ́ɛ́, ɛ́l ámáaman epite wɔ, ímbia puandá púkuɔ́ŋ. 27Indipá yɛ́nɛn pú indɛ́ndɛ́nɛ ɛ́ɛ́ indɔmu kimbɔk Lóma kati ɛ́ɛ́ imɛ́sɛɛ́kun epú pɔsɔ́mɔnɔnɛ́ wɔ́ á puɔ.»
ទើបបានជ្រើសរើសហើយ៖
Meelie mé Petúmí 25: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
