Meelie mé Petúmí 24
24
Pɔ́mɔ́sɔ́mɛn Póole ku ɔŋgɔmɔn
1É kélém kú metúkú mátáanɔ, ɔkúnɔ u pafunúfun pɔɔkún Ananíasɛ waniámá Sesalé no posíósio pómotí, na akaminɛ kisiɛnɛ ɛ́ɛ́ Tɛlɛtiluse. Pɔ́sɔ́minɛ Póole ku ɔŋgɔ́munɛ kisiɛ́nɛ́ ɛ́ɛ́ Felíkise. 2Páapílikinɛ Póole. Tilítuse wɔɔkɔ́l nukál ukanyi ɛ́ɛ́: «ɔkúnɔ́ ɔkɔ́n, kitɔŋ kiásɔ́ ɔ́sɔ́tɔn é kiyeéwe káwɔ ó pusíó ne kuendesi kuáwɔ kú mandá na tutát. 3Tuékekenyi ilémbie é púpu tutáŋapanɛ́ kisikɛl kitikit tɛ naáni 4Maná indiékutépúkésí kisikɛl táasɛ. kúúkɔ́ yókupísókolonyi ɛ́ɛ́ átamb etú peseé ɔ́túpítɔ́likinɛ mɔnɔ́ kisikɛl. 5Tuɛ́nɛ́ɛ mɔɔnd ewe nyɛ kipínanɔ. Wuépíkenyi kipueŋitenye ku Pɛyúútɛn pé kúúsí kitikit, wɔ́ umaápá ɔkɔ́n u ɔlɔŋ pápilanɛ́ ɛ́ɛ́ Nasaleyɛŋ. 6Waásikan kitamb kí Támbák kúkɔ́ tuɛtikɛnɛ́ wɔ.#24.6 Pakálatɛ pólotí ɔ́kɔyɔ ɛ́ɛ́; tuɛ́l túsósiti wɔ́ aná pikotí piásɔ ɔ́yɔnɛ, maná ɔkɔ́n u melúse Lesiásɛ wepisumi, wafánunɔ wu káásɔ́ kí imbɔ́kɔ ni imbekí táasi, akáani wɔkɔyitini epé pɔ́ mɔɔ́sɔ́míni wu ɛ́ɛ́ póólo nɛɛyɛ́ kuawu. [7] 8Aŋú muɛ́tí kélésí wɔ, akáánɛ́ kuátap ɛ́ɛ́ epú kitikit tusɔ́minɔnɛ́ wɔ́ apú nyɛ kémuémue.» 9Pe Yúútɛn pɔ́yikɔnini enyítí ɛ́ɛ́ epú akaminɛ ɔ́ɔ́yɔɔnɛ́ɛ nyɛ kémuémue.
Póol épísekesi
10Ɔŋgɔ́munɛ wɛkɛl Póole pulinsí ɛ́ úkálɛt, Póol kanyi ɛ́ɛ́ yeémenyene ɛ́ɛ́ aásúmba mónyi é nikúli níásɔ́ kí indɛ́ndɛ́nɛ púkanyi tuɔŋɔ kutek, púnyɛ kɔk nɔ́ ɔtɛ́m owoókonó imbísékesié káwɔ ké eŋis. 11Anyɛ kufialɛt epú yɔyɔnɛ́: púmanyi pútiáma metúkú máát na mandɛ inyɛ́ áŋasiámán Yelúsalɛm é kuekúmésí Támbákɛ́ɛ. 12Tɛ á kitamb kí Támbák tɛ á piansi pí imbísókólí pí Pɛyúútɛn, tɛ ɔ́ kɔɔ́mɔ kómotí á pálɛ́k, pámanyi pétiŋítíkényí imbekenyipekenyi na mɔɔnd, kúnyaánɛ ilikesi kitɔŋ é kipueŋitenye. 13Pɛɛnd epe tipá kutíinyi epú yɛnyɛ́lɛ́ pú kilɔk písɔ́minɔnɛ́ ápú nínuan. 14Epu imenyené púnyɛ́ ɛ́ɛ́: yɔɔ́kɔtɔn Támbákɛ́ɛ u pesíí pásɔ kí iŋilí eyí Pɛyúútɛn ɔ́ɔ́yɔɔnɛ́ɛ ɛ́ɛ́ inyɛ kilɔk. Yaátapan epú punyɛ́ puɔ́ŋɔ́n ó pikotí ne peémímekélíe ma Támbák; 15Yaápiana pipióndínyí ɔtɛ́m pikánɛ á Támbák niaŋ niɔ́p ɛ́ɛ́ wényenyesi pí indɛ́ndɛnɛ na pákati indɛ́ndɛ́nɛ é piku. 16puátakáánɛ́ puandá imbíkányikanɛ́, naami kákámi, ɛ́ kuɛndɛ ɔtɛ́m owoókon ké iŋísi yá Támbák ne eŋís yɛ́ pɛɛnd. 17É kélém kú tuɔŋɔ́ kuteke indiápá Yelúsalem, imoondó á kuatalíní nikúli niámi ɔmbɔ́kɔ ne kueki Támbákɛ́ɛ nupoo. 18Kákani péniíŋítíkényí á kitamb kí Támbák iyákuna kisukɛn kíámɛ: tɛ embúlu ú pɛɛnd útimapá kɔ́ɔk, tɛ kipuenyitenye. 19Maná, Pɛyúútɛn pólotí pɔ́ kitɔŋ kí Así pámaápá kɔ́ɔk pɔ́ pásiápánɛ́ kutélimiti akɛ káwu ké eŋis ɔ́ kunsɔ́mini, pɛ́siɛ́kɛ́nɛ puandá pú kilɔk. 20Kuyi anɛ ɛlu pɛɛnd epe ɔ́ɔ́yɛt puandá pú kilɔk epú imɛɛ́lɛ́ aká pɔ́ miísɔ́míni á sanetelɛ́ŋ 21Ɛlɛ ó pusíó pú nukála enú imaákálíti ɛ́kitɛ́kɛtɛ́ kiɔ́pɔ́ ne ekelú mɛnɛ́mɛn ɛ́ɛ́: «yaápiana pipióndínyí ɔtɛ́m ɛ́ kuɛnyɔk kú piku á pilɔŋ; kúkú pínsósosié ínanu kánú ké eŋis.» 22Felíkise menyene peseé ne peseé epú pú yosoné iŋilí yi Ɔkɔ́n, wokondi isɔ́ɔ́sɔ puósí púlotí. Ukanyi é Pɛyúútɛn ɛ́ɛ́: «Iŋɔsɔ́sɔ puónyi pukáánɛ́ aká ɔkɔ́n u pa saŋtuliɔ́ŋ Lísiyas koónyólo akɛ.» 23Weekeeki pukaaka á saŋtulión ɛ́ úkííka Póole á kiansi kí imbíne ne etényi ú weéŋelí, utikányí ne pekul pɛ́ɛ́yɛ́ ɛ́ pɛ́tiɛsíkɛnɛ́kɛnɛ nɛɛyɛ́.
Póole á kiansi kí imbíne
24É kélém kú paán pé metúk, Felíkise wakasiáma ɔlɔŋ na akányí wɛ́ɛ́yɛ́ Talusíl, umaápá u Pɛyúútɛn. Felíkise wokoówun ɛ́ pólini wu no póol. Wookoond ɔ́ kupítɔ́likɔnɔ wɔ. Póol kála ó pusíó pú pipióndínyí ɔtɛ́m é Yésus kilíis. 25Á kisikɛl Póol moóndó á kukála nunamá nú kusɔ́tɔnɔ kí indɛ́ndɛ́nɛ, ne kupíɛtikinɛn ɔtɛ́m, ni isɔ́ɔ́sɔ yóloné, puwaá puɛ́kɛtikini Felíkise ukanyi ɛ́ɛ́: «Anyi ukuyukɔ ninuan, iŋɛlɛ́ ímaapia kisikɛl, iŋanda akupílíkɛn; 26Umapiána pipióndínyí ɔtɛ́m ɛ́ Póol nyɛ kueki wɔ́ muenyi; puátakáánɛ́ puandá umaápá kaáti kaati upílikini wu ɛ́ wɔ́siɔyɔ́ maayɔ nɛɛyɛ́. 27É kélém kú tuɔŋ tuándɛ, Pɔlikius Fɛ́sɛ́tuse weesumu ɔ́ ninyɔ́lí ní Felíkis. Aná Felíkis mɔɔ́pílɔ́ŋɔ́ ɛ́ upá indɛ́ndɛ́nɛ ké eŋis yɛ́ Pɛyúútɛn, wayapá Póole á kiansi kí imbíne.»
ទើបបានជ្រើសរើសហើយ៖
Meelie mé Petúmí 24: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
