Meelie mé Petúmí 23
23
1Póole wetémbi pesúmbí pisɛn pá sanetɛlɛ́ŋ eŋís wɔ́ kɔ́ɔ́p ɛ́ɛ́: «paandimán yɔɔ́kɔtɔn Támbákɛ́ɛ kuasiám ekue ɔtɛ́m owoókón.» 2Ananíasɛ, ɔkɔ́n u pɔɔkɔ́n pafunúfɔn weekeeki pukaaka é péekiki pó Póol áatan wɔ́ mandá é niít; 3Póol kanyi kɛ́ɛ́yɛ́ kɔk ɛ́ɛ́: «aŋúɛ Támbák enyikitene, kipílɛ kiwénéné emfɛ́m ekie! Anyi ɔnyɔ́mbítɔ́n akaání ókunsósosi aná kikotí ɔ́ɔ́yɔɔnɛ́ɛ, ondo ekenyi pukaaka ɛ́ piŋite, kikótí tipá kíɔyɔ anakáanɛ!» 4Epé pámaápá masiá no Póol kanyi kɛ́ɛ́yɛ́ ɛ́ɛ́: «ɔkɔ́n u pafunɔ́fɔn pɔɔkɔn u Támbák asikanɛ́ anakáánɛ́ á?» 5Póole wokondinyi ɛ́ɛ́: «Indimémenyen, paandimán, ɛ́ unyi ɔkɔ́n u pafunúfɔn pɔɔkɔn. Á kiákí ɔmfiɔ́ŋ ɔ́kɔyɔ ɛ́ɛ́: “atiányikálɛt kilɔk kɔ́ ɔkɔ́n u kitɔŋ kíáwɔ.”» 6Pól memenyén ɛ́ɛ́ pesúmbí maayɔ́ mé etúlú wɔ́kɔ́n mapá pa Satuseyɛ́ŋ pólotí pa Falisiɛŋ, Póol kanyi ekelú mɛnɛ́mɛnɛ́ɛ ɛ́ɛ́: «paandimán inyɛ mɔnɔ́ Falisiɛ́ŋ, muɔ́nɔ́ u Pafalisiɛ́ŋ; ɛ́ kuɛlɛɛ́ yaápian pipíóndínyí ɔtɛ́m ɛ́ kuɛnyɔk á pilɔ́ŋ pínsósosié apuɔ.» 7Umɛɛlɛ́ úmáman akála, pafalisiɛ́ŋ na pa Satuseyɛŋ pókondu é kupekenyipekenyi, embúlu wápíátɔn. 8Pa Satuseyɛ́ŋ ɔ́kɔyɔ ɛ́ɛ́ kuɛnyɔk á pilɔ́ŋ tipá, tɛ Pe Éŋele, tɛ piliínditíe, maná pa Falisiɛ́ŋ ákaátapan ɛ́ɛ́ mandá makánɛ kitikit nyɛ kémuémue. 9Pókondo á kuánsa ikelú mɛnɛ́mɛnɛ́ɛ. Pémenyí pikotí pólotí kɔ́ ɔlɔŋ ú pa Falisiɛ́ŋ pétélimit pɔ́ɔ́yɔ na pukaaka ɛ́ɛ́: «Tumanyi tutiɛ́n puandá pú kilɔk mɔɔnd ewe mɛ́niɛlɛ́. Indi kiliínditié ákálítíni wɔ? Kúnyánɛ Éŋele?» 10Aná kupekenyipekenyi mɔɔ́yɔ́kúnɔ́, ɔkɔ́n u pa saŋtuliɔ́ŋ waapia puwaá ɛ́ɛ́ pákaná alafuna kulafuna Póole, weekeeki pisimbi píɛ́yɛ́ pukaaka ɛ́ɛ́ pétúnuk pɔ́ɔkɔ́l Póole ɛ́ kikɛtɛ́kɛtɛ́ɛ kí pɛɛnd póond nɛɛyɛ́ kí ikak. 11Ɔkɔ́n wakaámini Póole putúkú púmɔɔ́ŋɔŋ, wɔ́ kɛ́ɛ́yɛ́ ɛ́ɛ́: «Piá malúnda! Ɛmɛ́kɛ́t etétunyenyi káámɛ ó pusíó Yelúsalɛm ɛ́ɛ́kɛɛsikɛnɛn ɛ́ɛ́ anda etétunyenyi puandá pumoómí Lóma.»
Pe Yúútɛn mányínɛ Póole ikɔ́n
12Kuɔ́m pálana, Pɛyúútɛn pányá ikɔ́n póókoond pásúmbɔ kiansí ɛ́ɛ́ pátinyá tɛ kupúwá kati ɛ́ɛ́ pámámaná kuɔ́n Póole. 13Pɛɛnd pámaásúmbɔ kiansí makányínan etíni áandɛ. 14Páyukɔ ku pafunɔ́fɔn pɔɔkɔ́n no posiósió pá kitamb kí Támbák, pɔ́ kɔ́ɔ́p ɛ́ɛ́: «Tuápilia tuond tuasúmb kiansí ɛ́ɛ́ pasɔ́ kati kuɔ́n Póole, tutinya tutipuwa. 15Panɔ́ kɔk ánuamíníni ekelú na sanetɛlɛ́ŋ nuówunu ɔkɔ́n u pasaŋtuliɔ́ŋ ɛ́ɛ́ pónúólini no Póol ɛlɛɛ́ nuákamba kuanunɔ puónyi púɛ́yí peseékése; pasɔ́, tusiaman ɛpíɛyɛn ɛ́ɛ́ túɔ́n wɔ kɔ́ɔk umanyi utiasiam akɛ.» 16Maná, embíene ú Póol kinɔ́k kí andimán wɛɛyɛ́ waakáandɔ́ wemenyi ikún yɔ́ɔp; wayuukɔ kí ikak ékuekésítényí sííkényé. 17Póol pilana saŋtuliɔ́ŋ wɔ́ kɛ́ɛ́yɛ́ ɛ́ɛ́: «Yuúkɔ na muúŋayɔ́ ewe ku ɔkɔ́n waawɔ wápiana puandá pu kutían wɔ.» 18Ɔkɔ́n u pa saŋtuliɔ́ŋ wɔɔkɔ́l wɔ́ wayuukɔ nɛɛyɛ́ ku ɔkɔ́n u pasaŋtuliɔ́ŋ ukanyi kɛ́ɛ́yɛ́ ɛ́ɛ́: «Póole unyɛɛ́ á kiansi kí imbíne mímbílíkɛn wɛɛ́pí káámɛ ɛ́ɛ́ ínuólin na muúŋayɔ ewe; wápiana puónyi pú kukutian.» 19Ɔkɔ́n u pɔkɔ́n pé pisimbi wɔɔkɔ́l wɔ kɔ́ ɔmbɔk wepísíit nɛɛyɛ́ á masia, wokówun ɛ́ɛ́: «kiákí ambanɛ́ ɛ́ɛ́ índían?» 20Muúŋayɔ́ wokondinyi ɛ́ɛ́: «Pe Yúútɛn ámíníní ekelú póokuówun ɛ́ɛ́ ólini pɔ́ no Póol nakinyám á sanetelɛ́ŋ, pásáak iŋál ɛ́ɛ́ páákamba ɛ́ɛ́ páanɔn puónyi puɛ́yí peseékese. 21Maná atiátáp pɔpátápukan etíni áandɛ pákaánitámbinɛ wɔ́ emfɛl; páapíliá na piansí ɛ́ɛ́ pátinyá, pátipuwá kuám aná pɔ kɔɔ́nyɔ́n wɔ; paámaná ɔpɔ́kɔ puandá kitikit, pépepétényi kɔ́m ɛ́ɛ́ áátap nínuán.» 22Ɔkɔ́n u pa saŋtuliɔ́ŋ weekeeki muúŋayɔ kikotí ɛ́ɛ́ utitián mɔɔnd tɛ puandá, wekúuki wɔ.
Pémeéyuúkí Póol Sesalé
23Ɔkɔ́n u pa saŋtuliɔ́ŋ wapilikini pa Saŋtuliyoŋ páandɛ wɔ́ kɔ́p ɛ́ɛ́: «Ɛ́nupíɛ́yɛ́n ákupɔ Sesalé, á pikulɛ pínamanɛ neémue pi putúk ne pisimbi imbaka íyandɛ, neepí pinyɛ́ á pikálɛt etíni áátátɔ na páát nɛ pɛɛnd imbaka íyandɛ ɔŋoŋ nɔ ɔŋɔŋɔ́. 24Núkɔ́lɔ píkapilɛ́ písɛmbɛ Póole píám nɛɛyɛ́ Sesalé ku ɔŋgɔ́mun Felíkis;» 25Woond wɔ́ŋini ɔŋgɔ́munɛ kálatɛ ewe: 26Ukanyi kɛ́ɛ́yɛ́ ɛ́ɛ́: «Ɔkɔ́n ɔkɔ́n Felíkis, niŋúɛ Kolótius Lísiasɛ imékupikeliti! 27Pe Yúútɛn ɛ́tíkíni mɔɔnd ewe ímányikutúmɛn, pɛ́ɛkɛl pɔ́ɔ́n wɔ́. Aná yɔ́nyɔ́pɛ́ ɛ́ɛ́ unyi mɔnɔ́ pó Lóma, kúkɔ yényítúkúnú wɔ́ ne pisimbi píámi kɔ́ɔpɔ́ kí imbɔk. 28Ana yányiámbá ɛ́ɛ́ ímenyi epú pɛ́nyípɛnɛ́ wɔ́ apúɔ, yayuukɔ nɛɛyɛ́ kɔ́p á sanetelɛ́ŋ. 29Yɛkɛɛ́nɛ́ ɛ́ɛ́ pépekenyipekenyi ó pikotí piɔ́p, tɛ puandá pú kilɔk puákanɛ́ wɔ́ á kiansi kí imbíne indiɛ́nɛ́ kúnyánɛ púnimikananɛ́ ɛ́ɛ́ pɔ́ɔn wɔ. 30Pékiŋésitenyi ɛ́ɛ́ Pɛyúútɛn ányíní wɔ ikɔ́n ɛ́ɛ́ pɔ́ɔn wɔ́, imákutumini wɔ, imóndó imátián epí pɛ́pɛnɛnɛ́ wɔ ɛ́ɛ́ pɔ́sisɔ́mín wɔ́ kuawɔ.» 31Pisimbi píowónyi epú ɔkɔ́n wɔɔpɔ́ maátián pɔ, páayuukɔ no Póol ne putúk á palíkɛ kisiɛ́n ɛ́ɛ́ Antipatilíis. 32Kuɔ́m mɛɛlɛ́ kúpálan, páyap pisimbi pí pikapilí ɛ́ɛ́ písuŋɔn nɛɛyɛ́, epí pímɛɛ́ndɛ́ nɔ́ pikɔndɔ píókond kí ikak. 33Pámán Sesalé, pisimbi pí pikápilɛ piékeki ɔŋgɔ́munɛ kálatɛ póond pétíínyi wɔ́ Póole. 34Ɔŋgɔ́munɛ waláaŋ kálatɛ, wokoówun ɛ́ɛ́: Póol ókólinoné naníe. Umɛɛlɛ́ umɔɔ́p ɛ́ɛ́ unyi u kitɔŋ kí Silisí. 35Ukanyi kɔk ó Póol ɛ́ɛ́: «Iŋɔkúpítɔ́likɛn puɔ́s pulotí akí epí pɔ́kusɔ́mɔnɔnɛ́ kaányasiám.» Weekeeki pukaaka ɛ́ɛ́ pɛ́nɛk wɔ́ á kiansi kiikɔn efuŋ Elót maáwák.
ទើបបានជ្រើសរើសហើយ៖
Meelie mé Petúmí 23: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
