Meelie mé Petúmí 2
2
Kuól kú enfúnkufúumɛ
1Aká puɔ́s pú putɔ́mbí pú pantekote#2.1 Pumapa putɔm pupeyutɛn é kélém ku metúk etinandɛnamat á pasika. maásiám, peétépí mapá embúl kɔɔ́mɔ kómoómí: 2Nɔ niɔ́kɔ́tɔ́n ekundú ólinon mɛnɛ́mɛnɛ́ɛ, ɛlɛɛ́ emfún wɔɔkɔ́n úfúkenée, wóond wóówón á kiansi pámaápá pɔnyɔ́mbítɔ́n: 3pɛ́ɛ́kɛɛ́n kɔk pilémbí pímanan pilémbí pí yiik; píápíátɔn píond píápítála é siki mɔɔndɛ 4Pɔ́ peem póówon ne emfúnukufúúmɛ póókond á kukála tukál túmotí, yá aná emfúnukufúumɛ maápá wéékenyi pɔ́ ɛ́ɛ́ pákála. 5Pɛyúútɛn pémeétiiné Támbákɛ́ɛ pɔ́ pitɔŋ kitikit pí kúúsí mapá papíkúsá Yelúsalɛm. 6Pɛ́mɛɛlɛ pɔ́ɔ́pɔn ekundú, imbúl sí pɛɛnd síapíkúsikan símapá é kipelétényí, á kiákí pɔ́mɔɔ́pɔ́n peétépí kála á nukál nú siki mɔɔndɛ umɔɔ́pitɔlikɔn. 7Péésímile póond páyíkina, pɔ́ɔyɔ ɛ́ɛ́: «Pɛɛnd epe pákálanɛ́ɛ, peem tipá Pakaliliɛ́ŋ á! 8Kiákí kɔk kíɛlɛnɛ́ɛ ɛ́ɛ́ siki mɔɔndɛ wɔ́ɔ́pɔn pɔ́ pákála nukál núɛ́yɛ́! 9Káásɔ́ ɛ́ kikɛtɛ́kɛtɛ́ɛ, pólotí óókoólinon ɔ́ kitɔŋ kí Palatɛs na kí Metí na kí Elamí, pɛ́nyɛɛ́ ɔ́ kitɔŋ kí Mesopotaní nyɛ kɔ́ɔk, pé Yúté na Kapatós, pɔ́ Pɔ́ŋ ne pe kiénsi kí Así, 10Pé Filisí na Paŋfilí, pé Esípit nɛ pé kúúsí ku Lipi kiáyí kí silɛn; Pólotí siólinon Lóma, 11Keletoa na Aláap, Ké embúl wáásɔ́ pólotí nyɛ imbíéne imbíéne sí Pɛyúútɛn, pólotí éépíkén á kuátap kú Pɛyúútɛn tuɔ́kɔɔ́pɔn pa kilileŋ pakáánɛ́ɛ ɔ́ɔ́yɔ kɔk na tukál tuásɔ́ meelíe maatámb má Támbák!» 12Pámapá pésímile pétimenyí epú púnyɛɛ́ pápítáákɛt; pɔ́ɔyinɔn pɔ́ɔ nɔ pɔ́ɔ: «kiákí epue áámbanɛ́ɛ kuɔyɛt?» 13Maná pólotí ɔ́ɔnɔ peétépí pɔ́ɔ́yɔ ɛ́ɛ́: «pányɛ poótúkón!»
Piɛ́l ákálan embul
14Piɛ́lɛ weetélimit kɔk ne petúmí páát no omoómí; wookond á kukálan embúl ekelú mɛnɛ́mɛnɛ́ɛ: «panɔ́ Pɛyúútɛn nusiókoólon, na panɔ́ peem nusɔ́tɔnɛ́ɛ akɛ Yelúsalɛm, ɔ́nupítɔ́líkɛ́n tukál túamɛ peseé nuɔ́p epú púpítápukanɛ́ɛ. 15Pɛɛnd epe tipá poótúkón aná nupítáákanɛ́ɛ, á kiákí pikulɛ́ pínamanɛ́ neémue pí kiɛmɛ́m epie. 16Nínuán kɔk epú eŋémímekélie má Támbák Suwɛl mɔɔ́yɛt mópíwóónyi.
17Támbák kanyɛ ɛ́ɛ́: “É metúk mékusúkin
yoónyíwóónyi emfun wáámɛ á mɔɔnd kitikit,
pinɔ́k píánɔ́ nɔ pɔpúl páánɔ́ ɛ́nyɛ́yɛn peémímekélíe má Támbák,
yaányíkálan piɔmfɔ́ píánɔ́ kí íŋɛ́ninɛ,
pilunú píánɔ́ ne mulimí
18ɛ́ɛ́, yoónyíwóónyi emfúnukufúumɛ wáámɛ káámɛ é pelímasɔ́m paakáand nɛ pɛɛnúmɛndɔ́
é metúk makáánɛ́ɛ pɛ́ɛ́nyɛ́ɛ́yɛ peémímekélíe máámɛ
19Yɛɛ́nyɛ́ɛlɛ mandá má kuyíkina nɛ muɛnɛ́ okúnóo mɛnɛ́mɛnɛ́ɛ,
melinsí mé pisey nimbát ekue e kúúsí:
manɔ́ŋ kapá, ne yiik ne pifíkit pí inyóki,
20ɔɔ́nyí éényéénep oólí áányínyua ɛlɛɛ́ manɔ́ŋ! Puum pukáánɛ́ áányípítápɔk
kisíósíó ɛ́ɛ́ puɔ́s pú Ɔkɔ́n ásiám, kiandákáand kí puɔ́s kíwóónón ne nuúmu
21Kɔ́ɔk akáánɛ́ ewú ne ewú waányípílanɛ́ɛ Ɔkɔ́n ɔ́ɔ́nyísɔt.”
22«Panɔ́ pɛɛnd pí Isilayɛl, ɔ́nupitɔlikɛn epú iŋaná ɔnuɔ́yɔnɛ́: Yésuse u Násalɛt mapá mɔɔnd Támbák meétíínyí ɛ́ɛ́ unyi nɛɛyɛ́ é pisey ne melinsí ne meme mátapukanɛ́ɛ káánɔ́ ɛ́ kikɛtɛ́kɛtɛ́ɛ emé Támbák mɛɛ́lɛ́ kɛ́ɛ́yɛ́, aná numenyenée panɔ́ muɛt. 23Mɔɔnd ukáánɛ́ yá aná Támbák mɛɛ́tikɛ́n kisíósíó kɛ́ɛ́yɛ́ ó pusíó, nuɛsɛm wɔ́, núɔ́n wɔ́ kí imbɔ́k sí piindiátápɛ́ɛ pámatɔ́ŋ wɔ́ ó kolóse. 24Maná Támbákɛ́ɛ weekenyi wɔ́ á pilɔ́ŋ, weetúkun wɔ́ é muyú mú nikú á kiákí ɛ́ɛ́ nikú timapian pukaaka púkuɛtikɛn wɔ́ 25Tafíit makálá ó pusíó pú Yésuse kɔk ɛ́ɛ́:
“Yaápa yɛɛ́nɛn Ɔkɔ́n kisikɛl kitikit káamɛ ó pusíó
unyɛ káamɛ á masiá ɛ́ɛ́ indiɔ́p puwaá
26kúúkɔ́ ɔtɛ́m waámɛ nyɛ́ owóónón ni ipali, tukál tuámanɛ́ káamɛ é niít nyɛ tukál tú anyamɔ́,
niŋú muɛ́t yɔɔ́nyípíɔ́yitɔn no pipióndínyí ɔtɛ́m.
27Ákiák Ɔkɔ́n, atíákiyapá ɔ kitɔŋ kí piku,
atíákaátáp ɛ́ɛ́ iŋuɛ inyɛɛ́ waawɔ íyika á kipɛl
28Índínyí iŋilí i kusɔ́t,
oónyíwóónyí ni ipali á kiákí aányípá naamɛ.”
29«Paandimán inyɛ kunútían no pipíódínyí ɔtɛ́m ó pusíó pú ɛŋɛ́mɛɛm tafíit: umeékú, póónyo wɔ kipɛl kíɛ́yɛ́ manyɛ piínanuɛ kúásɔ́. 30Maná umapa eŋémímoónyi ma Támbák woond umenyen ɛ́ɛ́ Támbák meeki wɔ indan, woond waapilɛn Tafite ɛ́ɛ: muɔ́nɔ́ kɛ́ɛ́yɛ́ á nipundɛ ɔ́ɔ́nyínyɔ́mbɛt kɛ́ɛ́yɛ́ kí indáŋa ye efuŋ. 31Tafite mɛɛ́n insúá kuám á pilɔ́ŋ#2.31 Tafit mapa Si ɔkunɛ u Yésus. kú Kilíis púúpɔ umɔɔ́yɛ́t ɛ́ɛ́: Pátimayap wɔ́ ɔ́ kitɔŋ kí piku, nuɔ́l núɛ́yɛ́ timayɛk á kipɛl. 32Yésuse ukáánɛ́ Támbák meenyí wɔ á pilɔŋ pasɔ́ peem tunyɛ petétúnyí ɛ́ɛ́ yá aná púnyɛɛ́ nɔ. 33Támbákɛ́ɛ Síí weeméketi wɔ kɛ́ɛ́yɛ́ kɔ́ ɔmbɔk wɔɔnɛm woond weeki wɔ emfúnukufúúmɛ́ úmaák indan; úmatúfá wɔ púúpɔ́ nuɛ́nɛnɛ́ɛ nuond nuɔ́pɔn nínuan. 34Á kiákí Tafíit timamákat wú muɛt mɛnɛ́mɛnɛ́ɛ maná ukanyɛɛ́:
“Ɔkɔ́n matían Ɔkɔ́n waamɛ ɛ́ɛ́:
nyɔ́mbɛ́t káámɛ kɔ́ ɔmbɔk wɔɔnɛm,
35kuám aká iŋaányáak pokóyikoy pááwɔ
kááwɔ kí imbanábánɛ́ɛ.”
36«Kitɔŋ kí isiyaɛl mɛ́ɛ́síkɛ́nɛ́n kumenyi kémuémue: wɔ́ Yésuse ewú numɔɔ́tɔɔ́ndɔn, wɔ́ Támbák éényééyí Ɔkɔ́n ne Kilíise.»
Pɛɛnd pa kutúan pámányipikúŋɔ́n
37Pɛɛnd mɛɛlɛ́ pɔ́ɔ́pɔn tukál tukáánɛ́, túakaál pɔ: póówun Piɛlɛ ne petúmí pólotí: «paandimán kiákí túɛlɛɛ́ kɔk!» 38Piɛlɛ woondinyi pɔ ɛ́ɛ́: «ánupíkúŋúna: siki mɔɔndɛ útuupen ɛ́ɛ́ kisiɛ́n kí Yésus Kilíis ɛ́ɛ́ Támbák núyapɛn á pifal píánɔ́ wóond únúfá emfúnukufúúmɛ 39Á kiákí indán i Támbák nyɛ káánɔ́ ó pusíó na paán páánɔ́ ne epé pɛ́nyɛɛ́ kaáyɛ́ɛ, ne peem epi Ɔkɔ́n Támbákɛ́ɛ waasɔ́ áányípílanɛ́ɛ» 40Piɛlɛ waand akála kɔ́ɔ́p táásɛ ɛ́ɛ́ páátap woond waákan pɔ́ malúnda, wɔɔyɔ́n pɔ́ ɛ́ɛ́: «ánuátáp kisótio ɛ́ɛ́ nutikɔ́l niap ne pepi pɛ́nyɛɛ́ penyímén!» 41Pɛɛnd páatap tukál tú Piɛl, péétuupen puɔ́s pukáánɛ́ɛ. Pámapá kuáman tukɔ́n tútátɔ́, Pɔ́ɔ́píɔ́yikɛn ɔ́ kiɔ́p kí peétépí.
Ɔlɔŋ ú peétépí ukutúan
42Peétépí peem timesémenen kí iŋónyítónyí si petúmí, pɔ́sɔ́tɔn kí iyayɔ́, pányánan poond pópísókolonyi kɔɔ́mɔ kómoómí 43Pɛɛnd peem mapian puwaá, á kiákí ɛ́ɛ́ petúmí mɛɛlɛ́ pisey na maándá me kusímile ɛ́ɛ́ kisiɛ́n kí Támbák 44Peétépí peem mapa ɔŋɔndɔ́ ómoómí poond páapa pɔ́ɔ nɔ pɔ́ɔ epú kitikit pámaápian 45Pémetúénén insi síɔ́p na maándá pámaápian póond páapa pikɔ́ŋ pikáánɛ́, é siki mɔɔndɛ epú unyɛɛ́ insaná na puɔ 46Siki puɔ́síɛ ekelú ómoómí, pámapíkúsá á kitamb, pápíyaka ɔlɔŋ kɔ́ɔ́p á piansi na anyamɔ́, ɔtɛ́m eselési 47Pémekúmésí Támbákɛ́ɛ, kitɔŋ ɔ́ɔ́yɔ pɔ: Ɔkɔ́n ɔ́ɔ́yikɔn siki puɔ́siɛ kɔ́ɔ́p ɔ kiɔ́p epi pámaátápán kisótio.
ទើបបានជ្រើសរើសហើយ៖
Meelie mé Petúmí 2: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
