Meelie mé Petúmí 17
17
Muyú mú Póol na Sílas
1Póole nɛɛyɛ́ na Sílas matápúkáníni á pálíkɛ u Afipolí na pálɛ́k u Apoloní, pányámá á pálíkɛ u Tesaloníki aká kiansi kí imbísókólí kí Pɛyúútɛn maápá. 2Póole, aná umaápiána kinɛ́mɛ kí kuyukana siki sáápatɛ á kiansi kí imbísókólí, Umondítónyí anakáaní pa sáápata pátátú nɔɔpú, upekenyipekeni nɛ pɛɛnd kí imfiɔ́ŋɔ́ sí Támbák. 3Usɛkunɛnɛ pɔ́ woond utínyenyi pɔ́ ɛ́ɛ́: Kí imfiɔ́ŋɔ́ sikáaní etúkúnu mɛsíkɛ́nɛ́nɛ kuɛ́nɛ muyu, ukú wɛnyuku ɛ́ kikɛtɛ́kɛtɛ́ɛ kí piku. Etúkúnú ukáánɛ́ wɔ́ unyi ɛ́ɛ́ Yésuse. 4Tukála tukáaní túepítísi Pɛyúútɛn pómotí pɔ́ɔkɔŋɔ ó Póol na Sílas. Pɛ́ kɛlɛk kuteke epí pámaátápána Támbákɛ́ɛ páápílata Póole na Sílas ni imfamfá si pakandu kuteke sí pálɛ́k ukáánɛ́. 5Maná Pɛyúútɛn pakaákin pɔ yaák, páápúluŋundu, pákaáma á kipala páákúsikana pa nánánɛ péwémbené á pipala, pélikiti pɔ́ á kuáka kipueŋitenye á pálɛ́k. Páapáluku pányámá á kiansi kí Sasɔn ókuólo kuambá Póole nɛɛyɛ́ na Sílas. Pámambá kutényikenyi pɔ́ ké eŋis yɔ́ kitɔŋ. 6Aná pɛ́mɛ́ɛlɛ pétikéékí pɔ́, pátátaliti Yásɔnɛ ne peétépí pólotí pényekí pɔ́ é pesúmbí pisɛn pí pálɛ́k. Pɛyúútɛn pakáaní póondo á kuánsa pɔ́ɔyɔ ɛ́ɛ́: «pɛɛnd epe no póol pépuéŋényí kúúsí kitikit, ninuán pákanyi akɛ. 7Yásɔn wokóli pɔ́ peem. Pɛɛnd pakáaní kitikit tipá pɔ́ɔŋɔnɔ ó pikotí pí efuŋ wɔkúnú. Pɔ́kɔyɔ ɛ́ɛ́ efuŋu olotí nyɛ kɔ́ɔk unyi ɛ́ Yésuse.» 8Tukála tukááni tuákaáka embulú ú pɛɛnd ne pesúmbí púɛ púɛ. 9Pokoyunu Yásɔnɛ ne peétépí pólotí ɛ́ɛ́ pánama pikúŋu kutek kisíósíó ɛ́ɛ́ páyapa pɔ.
Póole na Sílas Pelé
10Putúku mɛɛlɛ́ pukuana, pekilísitɛn pɔ́kɔl Póole na Sílas péyuki pɔ pelé. Pɛ́mɛɛ́lɛ páamána á pálɛk ukáánɛ́, páyuku á kiansi kí imbísókólí kí Pɛyúútɛn. 11Pɛyúútɛn pe pele mɔ́ɔ́p peseé na nukál nú Támbák kutapuku pe tesalonik. Papakunu nukal nú Támbáka na kitaka kí kilɔŋɛk: Siki puɔsiɛ palaŋa ɔmbɔpɔ u Támbáka á kufialɛt indɛ epú Pol mapa wɔyɔ nyɛ kémuémue. 12Kuteke kɔ́ɔ́p ke embulu pɛ́ɛ́yɛ́ peétépí na pakaandɔ pɛ kɛlɛk pámaápá pimfuŋafuŋa nɛ pɛɛnúmɛndɔ́ kusol. 13Pɛyúútɛn pe tesalonik mɛlɛ pɔpɔn ɛɛ Pol ekeme nukál nú Támbák andíkɛ́k pele, pasiama kɔk ákuand kuesilikesi pɛɛnd é kipueŋitenyé. 14Tɛ ɛ́ɛ́ panda eneŋeliti é, pekilísitɛn peyuki Póole kiáyí kí mááŋ: Maná Timoté na Sílas pɔ́lɔpɔ pelé. 15Epe pemetilikene Póole, pányáma nɛɛyɛ́ Atɛ́ɛn. Akáánɛ́ póókoond pelé ni isúmu i Póol ɛ́ɛ́ Timoté na Sílas ɔwɔku wɔ́ pɛkɛtpɛkɛt.
Póole ne pemenyí pá Atɛ́ne
16Póol mɛɛlɛ umeépétenyi Timoté na Sílas Atɛ́ɛn, wɛkɛɛ́nɛ ɛ́ɛ́ pálɛ́k ukáánɛ́ nyɛ owónónó na pa Támbákɛ́ɛ pɛ́ pifɛ́lɛfɛ́lɛ kutek. Tɛ ɔ́ɔ́pɔn ɛ́ɛ́ umapiánan insíkíli kɛ́ɛ́yɛ́ kɔ́ ɔtɛ́m. 17Umapá upekenyipekenyia kiansi kí imbísókólí na Pɛyúútɛn nɔ pɔsɔ́ku pámaátapá Támbákɛ́ɛ nepepi umapa ukekenyi kelumen yɛ pɛɛnd siki puɔsiɛ. 18Pémenyí epé pámaápá kɔ́ ɔlɔŋ ú pemenyí pápílanɛ́ ɛ́ɛ́ epekulien na sitosiɛn mapa pe pekenyikenyi nɛɛyɛ́ pómotí ɔyɔ ɛ́ɛ́: «Oŋótootu ukáánɛ́ akamba kuɔyitɛ kiákí?» Poloti ɔyɔ ɛ́ɛ́: «unyɛlɛ wekeme pa Támbákɛ́ɛ pe meluku.» Póol mekeme insɔ́m yi indámb i Yésus nɛ kuɛnyɔk é piku. 19Pɔ́kɔl wɔ payukɔ nɛɛyɛ́ é niluméné niikɔn ní pemenyi papalɛk, pokowunu wu ɛ́ɛ́: Tunyi pekumenyi iŋonitonyi yikɔsikɔsiɛ eyi onyonyia? 20Atusana itu siki kisikilɛ na maándá ma kuleeme, tuakamba kumenyi epú puɔyɔnɛ. 21Pɛɛnd pá atɛ́ɛn ne penyi pɔmɔlɔpɔnɔ kɔku metepukesi kisikɛl kiɔpu ɔkupitɔlikɔn kúnyáánɛ ekupekenikeni maayɔ́ mɔkɔsi á palɛk. 22Pole etelimete énilumen niikúnu ní pemenyiní palɛk ukáánɛ́ ukanyi ɛ́ɛ́: «Punya atɛ́ɛn epe, imɛnɛ ɛ́ɛ́ nunyɛ pepiekenyi táásɛ á maándá ma kuátap. 23Kisikɛl eki yɛndɛnɛ káánɔ́ á pipala, yɛkɛnɛn pifɛlɛfɛlɛ yondo yɛnɛ niwukini pifunɔ pianɔ puɔŋɔn kɔku ɛ́ɛ́: “Opusió pú Támbákɛ́ɛ ewú pátiányípá pemenyen.” Ewú nukumesie kati kumenyie wu yoniolo akuasinutian. 24Támbákɛ́ɛ ewu umaáluŋa kúúsí kitikit ne epú punyɛ kɔku nɛkɛtɛ́ɛ, nyɛ Ɔkɔ́n mɛnɛ́mɛnɛ́ɛ ne kúúsí, utipa upitimana á pitamb epi imbɔku si pɛɛnd wakanɛ. 25Utipa ni insana ɛ́ɛ́ imbɔku si pɛɛnd kɛnekɛne nɛɛyɛ́ asi wápiana insaná na puandá á kiákí ɛ́ɛ́ wu wekenye puandá kitikit kusɔ́tɔ, ne emfúnu na mandá kitikit mesienene. 26Kutumini á mɔɔnd ómoómí, waluŋ piɛnɛnɛ kitikit, woond wɔpɔk pi e kúúsí kitikit. Wɔpɔku pipeneŋ pi ɔni ni imɛŋ, wondowakini pendu insal ɔ pitɔŋ epi pɔmɔlɔpɔn api. 27Támbákɛ́ɛ mɛɛlɛ́ anakaní ɛ́ɛ́ pɛɛnd amba wu tɛkúpá ɛ́ɛ́ pókoól pápuatan panyi kuɛnɛ wu. Ekémuémue Támbák tipá kayɛ na siki mɔɔndɛ. 28Á kiákí kɛ́ɛ́yɛ́ tupianɛ kusɔ́t, tupieyen na kupa kuasu. Yana potoŋi isaka panɔ́ mɔyiti, tunyi paana pɛ́ɛ́yɛ́. 29Ana tunyɛ é nisipi ni Támbák, tutipá tuanda kuɛsikɛnɛnɛ ɛ́ɛ́ tupitakiti ɛ́ɛ́ Támbák nyɛ infuenye no kóol tɛ kikɔŋ tɛ á nitányi tɛ á puandá pu tuanan kí imbitakitin i mɔɔnd. 30Ninuana Támbák tipá ukɔlɔn ɔ niɔlɔ́ kisikɛl pɛɛnd mɛlɛ petimenyene wɔ. Wokowono pɛɛnd kitikit ɔ pitɔŋ kitikit ɛ́ɛ́ papikuŋɔn, pesendi kusɔ́t. 31Támbák mɛtɛkɛ puɔ́si epú wonisososie piɛnɛn kitikit kí indɛ́ndɛ́nɛ á kinun kí mɔɔnd ewu umayɔn. Umeki pulinsí á mɔɔnd kitikit á kisikɛl umenyi wu ɛ́ kikɛtɛ́kɛtɛ́ɛ kí piku.» 32Pɛmɛlɛ pɔpɔnɔ pipuku pi kuɛnyɔk é piku, pómotí póond á kusikana wɔ, pómotí ɔyɔnɔ wɔ ɛ́ɛ́ tu kambala ɔpitɔlikini puawɔ pukana puɔ́si púlotí. 33É kélém akáánɛ́ Pole watukana nɔɔpɔ́. 34Tɛnɔ kɔku pɔsɔkɔ pólotí pɔkɔŋ ó Pol póond pakatapan: Kɔpɔ ke embulu mɔɔnd oloti kisiɛ́n ɛ́ɛ́ Tenise maatap, umapa kɔ́ ɔlɔŋ ú pemenyí ú pálɛ́k ukane, na akáandɔ́ omoti kisiɛ́n ɛ́ɛ́ Tamalis nɔ pɔsɔkɔ pólotí pakatap.
ទើបបានជ្រើសរើសហើយ៖
Meelie mé Petúmí 17: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
