Máákuusə 7
7
Yěsô pwɛ pɛ́ Farízya méʼénsó ndúŋú núŋu
(Mat 15:1-20)
1Pɛ Farízya pwɛ pɔ́ŋndíí ghaŋákeʼekaŋ twɔ́ Yerʉ́salɛm, ntɛ́rɛ́ pfúŋɔ́ Yěsô. 2Pɔ́b zhʉ́ ŋgâ pecyó ŋgíŋgye pé zɔ́ mɔ́b, pé ne mbwó síŋme. Ŋkyé ŋgâ pɔ́b kɛ tsé mbé gbaa nse njʉ́ kaŋ Mǔsê psirɛ́ nɛ́ pó. 3A kɛ ghɛmbɛ néré, pɛ Farízya, njʉ́ ŋkɔŋɔ pɛ Yúda náá, pé zɔ́ mɔ́b kii ntsʉyi gbaa nse njʉ́ núŋu tɛd tɛd pɔ́b ntsɔ́ nɛ́ pó. 4Ŋkhoʼyɛ́ pɔ́b khú táŋ nɛ́, pɔ́b pe zó yɔ́b kii gbǎ nse pó. Pecyó núŋu zááme yóʼó yɛ́ pɔ́b ghuʼɔ nɛ́: yɔ́b mbziʼe sǒ ndɔ́ŋ, sǒ ŋkəŋ pwɛ pɛ́rɛ́ káŋ nɛ́. 5A zhyɛ́ yéré pɛ Farízya pwɛ ghaŋákeʼekaŋ tsɔ́ pwó Yěsô ŋgâ: «A zhyɛ́ kɔ́ ŋgíŋgyé pó pe zhyɛ́ njʉ́ núŋu tɛd tɛd piŋi ntsɔ́ nɛ́ pɔɔ? Pɔ́b zɔ́ mɔ́b kii gbaa nse ŋkyé kɔ́?» 6Yěsô pɔ́rɔ́ ne pɔ́b ŋgâ: «Ezaya, ŋgaŋatsɔ́kpaŋató Mboʼmvé, kɛ ntsʉyi nsó no yɛ́ a kɛ ghɛ́ mbɛ́ nɛ́ ŋkyé wúŋ. Puŋ pɛ pépwɔmíí, ŋkyé ŋgâ a ŋweʼéme ŋgâ:
“Pɔŋ pɔŋ ghúʼú ya pe ne kɔbɔ ntswee.
Tsʉ́ʼmbé ndzɔʼ yɔ́b pɛ́ɛ́ ywoʼ ndúŋ!
7Faʼ yɛ́ pɔ́b faʼa ne ŋgúʼune ya nuŋ nɛ́, pɛ́ɛ́ ndzəndzoʼ.
Ŋkyé ŋgâ ntʉ́ʉ́ yɔ́b yɛ́ pɔ́b fɛ́ nɛ́ pɛ́ɛ́ ndaʼ kaŋ pumésɔŋ.”
8Puŋ sǔʼɔ kaŋ Mboʼmvé fɛ́ ndzəb, ké ŋkərɔndzíʼ pe ndúŋú núŋu pumésɔŋ.» 9A pó ntsɔ́ ne pɔ́b ŋgâ: «Kpaʼ sísíŋ! Puŋ tee kaŋ Mboʼmvé ké ntíí kpee pe ndúŋú núŋu yuŋ! 10Ntsʉʼŋgɛ́ mbɛ, kaŋ Mǔsê tsɔ ŋgâ: “Ghuʼɔ tɛd wo pú mɛ́ wo.” Ké mbó ntsɔ́ ŋkʉ́rʉ́ ŋgâ: “Ŋɔŋ wɛ́ a tó tɛd ye kii mɛ́ ye nɛ́, pe nɔ́ʼɔ́ wé.” 11Ŋgɛmbɛ ne puŋ, pǔŋ tsɔ̌ ŋgâ: “Mbéyɛ́ ŋɔŋ tsɔ́ pwó tɛd ye kii mɛ́ ye ŋgâ yɔ́b yɛ́ a ghɛ́ɛ́ mə ŋgɛ́ ŋgebɛ́ wo núŋ nɛ́ pe nɔŋ mbɛ́ɛ́ Kɔ́ɔ́baŋ”, kéʼé tsi ye pe ŋgâ: “Yɔ́b shʉ́ ye Mboʼmvé.” 12Puŋ psyɛ́ ne pɔ́b ŋgâ pɔ́b ndɛ mbó ŋgyɛ́ cyó yɔ́b mbəb tɛd wɔ́b kii mɛ́ wɔ́b. 13Puŋ sebɛ Nsó Mboʼmvé ne núŋu yuŋ yɛ́ puŋ zhíbɛ pwó pɔŋ nɛ́. Pecyó meno zááme yóʼó kɛ́ʼɛ́ njʉ́ puŋ ké ŋgyɛ́ nɛ́.»
Yɔ́b yɛ́ a síŋ ŋɔŋ nɛ́
14Ndzáʼnéré, Yěsô pó fú pɔŋ ntsɔ́ ne pɔ́b ŋgâ: «Ŋkɔŋɔ wuŋ náá, puŋ psyé təŋé múŋ ndzóʼ. 15Tɛɛmbɛ cyó yɔ́b pe twɔ́ mvé ŋkuŋɔ mbəb ŋɔŋ siŋɛ́ wé pó. Tsʉ́ʼmbé, a yɔ́b yɛ́ a twɔ́ ndzó ndzɔʼ ŋɔŋ nɛ́, siŋɛ́ wé. [ 16A pɛ́ɛ́ yɛ́ ŋɔŋ ntséʼé ntəŋé zoʼo no nɛ́ a zóʼ.]» 17Yěsô ŋáá ndzɔ́ʼɔ́ pɔŋ ŋkuŋɔ ndáb. Ŋgíŋgye pe psirɛ́ wé ne kəʼɛnsó wɛ́ a ŋáá tsɔ tsɔ́ nɛ́. 18Yěsô pɔ́rɔ́ ne pɔ́b ŋgâ: «Mbɛ Puŋ? Puŋ ké mbé tséʼé zé pɔɔ? Puŋ zé ŋgâ tɛɛmbɛ cyó yɔ́b pe twɔ́ mvé ŋkuŋɔ tswee ŋɔŋ, siŋɛ́ wé pó! 19ŋkyé ŋgâ yéré tsé mbó ŋkuŋɔ ndzó ndzɔʼ ye pó, ntsʉʼmbé a ghúú pfɔ̂ ye. Ndzáʼá yóʼó ŋgú ndzó píí.» A kɛ tsɔ́ kɛ́ʼɛ́, ntsɔ̌ ŋgâ a mwɔ̌zó siŋɛ́ ŋɔŋ pó. 20Yěsô pó nsó ŋgâ: «A yɔ́b yɛ́ a twɔ́ ndzó ndzɔʼ ŋɔŋ nɛ́ síŋ wé! 21Ŋgɛmbɛ néré ŋkɔŋɔ mbziʼe kəpɔŋ náá twɔ́ pfɔ̂ pɔŋ pwɛ zyé ndzɔʼ yɔ́b. Mbɛ pɛ́ fɛ̌ŋgab, pɛ ghaŋ, nɔ̌ʼne pɔŋ, 22pɛ saŋa ndáá, ŋgááne, meno ghoʼotó, ŋgɔ́b, sakhə, ndzye mɔ́b mvé, pɛ ntó, mɔ́ɔ́ záŋ, meno fáátó. 23Ŋkɔŋɔ meno kəpɔŋ pɔŋ náá twɔ́ ndzó ndzɔʼ ŋɔŋ, siŋɛ́ wé.»
Taʼ məŋgʉ́yé shʉyɛ̂ psyɛ́ Yěsô
(Mat 15:21-28)
24Yěsô ŋâ ndzó ywoʼ yéré ŋgú ndzó mbɛ́lʉ́ŋ Tii. Ŋkuŋɔ ndzó taʼ ndáb tsé mbé zɔŋɔ ŋgâ pe zé ŋgâ a yóʼó pó. Ntsʉʼmbé, pe ké ndzé zé. 25Fǐme nɛ́, taʼ məŋgʉ́yé wɛ́ zhʉye kəpɔŋ kɛ pɛ mbəb Mɔ́ŋ ye wé məŋgʉ́yé nɛ́, zoʼ njʉ́ pe ntsɔ́ no Yěsô nɛ́, kʉ́yo mvɔ́ ne kpee mé. 26Məŋgʉyé wéré kɛ pe zɛ Mboʼmvé pó, pe kɛ pfɛ́ wé pe Sirya ndzó pɛ́rɛ́ ŋgɔŋ Fenisya. A póʼmbwó pwó Yěsô ŋgâ a zú zhʉye kəpɔŋ mbəb Mɔ́ŋ ye wé məŋgʉ́yé wéré. 27Yěsô pɔ́rɔ́ pwó ye ŋgâ: «Tee pɛ Mɔ́ŋ zó ndzód ŋkɔŋ! A pú ŋgâ pe yɔ́ɔ́ mɔ́b pɛ mɔ́ŋ máʼá pwó pɔ́ŋmvó khóyáá pó.» 28Məŋgʉyé wéré pɔ́rɔ́ pwó ye ŋgâ: «A sísíŋ kɛ Ntsɛɛpɔŋ! Ntsʉʼmbé pɔ́ŋmvó khóyáá ndɛ nú tsi téépere ndzɔ́ mvúʼ mɔ́b pɛ mɔ́ŋ.» 29Yěsô ntsɔ́ pwó ye ŋgâ: «ŋkyé ndíí nsó ye ké nɛ́, ghú, zhʉye kəpɔŋ twɔ́ mbəb Mɔ́ŋ wo.» 30məŋgʉyé pɔ́rɔ́ ywoʼ ye, zhʉ́ Mɔ́ŋ ye nu kúŋ, mbǒ zhʉye kəpɔŋ kɛ twɔ́ mbəb ye.
Yěsô pɛ́d taʼ moʼ
31Yěsô ŋâ ndzó mbɛ́lʉ́ŋ Tii, ndzaʼ ne Sidɔŋ ne mbǒdne ndzəb. Ŋkʉ́yó pfúŋɔ́ lepaanse Galílya siʼá pɛ́rɛ́ ŋgɔŋ yɛ́ pe kɛ fú ne Vwɔ́ mbɛ́lʉ́ŋ nɛ́. 32Pe kʉ́yó pfúŋɔ́ ye ne taʼ ffɔ̌təŋé, ŋgɛmbɛ a ké mbé ntsɔ́ no pe kékáŋ. Pe póʼmbwó pwó Yěsô ŋgâ a záb pwó ye tó ye ŋgâ a fwó! 33Mbénére, Yěsô yɔ́ɔ́ ŋɔŋ wéré pú ye paʼ. A níŋi ntɔpwó ye ndzó təŋé mé, mbó ntswə́ ntə́ núŋu ntɔpwó ye kébe kpékpáŋ ye núŋ. 34Néré Yěsô púʼú míí mé, ndíŋí pépéé, njʉ́yí ne tʉ̌ŋ nsó ŋgâ: «Efata», kê tsí ye pe ŋgâ: «Ŋáʼá.» 35Kpaʼ ŋkhoʼyéré, təŋé ŋɔŋ wéré ŋáʼ, kʉ́kʉ yé kee, a zyé nsóne no yáŋme. 36Yěsô sú təŋé mɔ́b ŋgâ pɔ́b ndɛ fúʼɔ pwó ŋɔŋ! Ntsʉʼmbé, ŋkɔŋɔ ŋkhoʼyɛ́ a kɛ ntsɔ́ ne pɔ́b ŋgâ pɔ́b ndɛ ntsɔ́ ŋɔŋ nɛ́, pɔ́b mě mê ncʉrɛ. 37No tsɛ́ɛ́ wɔ́b kaʼatɛ pɔ́b nsó ŋgâ: «Ŋkɔŋɔ meno pɛ́ a zhyɛ́ náá nɛ́ sʉ́ʼʉ! A zhyɛ́ pɛ ffɔ̌təŋé zóʼó no, pɛ moʼ pó ntsɔ́.»
ទើបបានជ្រើសរើសហើយ៖
Máákuusə 7: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល