Máákuusə 6
6
Pe kiri nsó Yěsô a Nǎzarɛd
(Mat 13:54-58; Lúk 4:16, 22, 24)
1Yěsô ŋáá ndzó ywoʼ yɛ́ a kɛ pe nɛ́, ŋgú ndzó ywoʼ yɛ́ a kɛ ghóʼ nɛ́. Ŋgíŋgye pé zɔŋɔ wé. 2Zhyéze yɔ́b, a ŋkuŋɔ ndántéré pɛ Yúda ntsé fɛ́ ntʉ́ʉ́. Mbziʼe yɛ́ a kɛ fɛ́ nɛ́ tsɛ́ɛ́ pɔŋ pɛ pɔ́b kɛ zóʼó wé nɛ́. Pɔ́b psirɛ́ ŋgâ: «Yɔŋ no twɔ́ pɛ̂ pwó ye? A fɛ́ wɔ́ fɛ́ yɔŋ zé pwó ye tɛ a zhyɛ́ ŋkɔŋɔ meno shʉyédme pɔŋ náá? 3Ŋgâ yoŋ ŋkwɔ́ mɔ́b, Mɔ́ŋ Malya! Zhakə, Yosɛsə, Zhʉʉde ne Símo pɔ́ŋmɛ́ pé pe mbziŋi pó? Pɔ́ŋmɛ pé pe pěŋgyé pó mbé pɛ tsetsɛrɛ piŋi pɔɔ?» A kɛ pe néré tsetsɛrɛ pɔ́b, pɔ́b pe psyɛ́ ndzóʼó no yɛ́ a kɛ tsɔ́ nɛ́ pó. 4Mbénére, Yěsô tsɔ́ ne pɔ́b ŋgâ: «Pe ndɛ ké mbáŋa ŋgaŋatsɔ́kpaŋató Mboʼmvé pe yáʼ pɔ́b, tsetsɛrɛ tɛd pe, pwɛ ye ndǎ ndáb.» 5A kɛ ghɛ́ɛ́ tɛ a pe zhyɛ́ cyó no shʉyédme yóʼó fáá nzábne mbwó mbəb pɔ́ŋndíí ghaŋághɔŋ, pɔ́b fwó pó. 6No tsɛ́ɛ́ wé ŋkyé ŋgâ pɔ́b kɛ zɛ̌zɛ̂. Yěsô kɛ́rɛ́ ndzó pɛ yáʼ pɛ a kɛ tsyɛ́ ywoʼ yéré nɛ́, fɛ́ ntʉ́ʉ́.
Yěsô twɔ́ ntsɔ̌b ŋgíŋgyé yípáá
(Mat 9:35; 10:1, 5-14; Lúk 9:1-6)
7A fú ntsɔ̌b ŋgíŋgyé yípáá fɛ́ tʉ̌ŋ sáʼne mbó ndzú pɛ zhʉye kəpɔŋ ne pɔ́b, twɔ́ wɔ́b pɛ pépáá. 8Ntsɔ́ ne pɔ́b ŋgâ kii pɔ́b ndɛ ntsuŋu pab nsěnyi, ndaʼ ŋkəmbaŋ yɛ́ pɔ́b kɛ ghɛ́ ndɔ́ɔ́ nɛ́. Kii puŋ yɔ́ɔ́ cyó yɔ́b njʉ́ mbré, njʉ́ pab nɛ́, kii pó ntséʼé mbób ndzó ŋkɔb yúŋ. 9Puŋ gbéé ndaʼ lámpáʼ, kii pó ndɔ́ɔ́ ndzwé yípáá. 10Yěsô pó ntsɔ́ ne pɔ́b ŋgâ: «Ŋkhoʼyɛ́ pe psyɛ́ wúŋ ndzó taʼ ndáb nɛ́, puŋ cʉ́ʼɔ́ ndzǒ kaʼatɛ mbáŋ ŋkhoʼyɛ́ puŋ ŋáá nɛ́. 11Mbéyɛ́ pɔŋ yɔ́ɔ́ wúŋ sʉ́ʼʉ nɛ́ pó, mbé zóʼ nsó wúŋ nɛ́ pó, puŋ ghɛ́ ŋǎ yóʼó ntséd pfɔ́bɔ́ ndúŋú kpee múŋ. A pe taʼ kiŋi ne pɔ́b.» 12Pɔ́b ghú, ncʉri ŋgâ: «Puŋ séd mbziʼe yúŋ!» 13Pɔ́b kɛ zú pɛ zhʉye kəpɔŋ zááme, núʼɔ ghaŋághɔŋ zááme ne vód, pɔ́b fwó.
No Erodə pú Yěsô
(Mat 14:1-2; Lúk 9:7-9)
14Fɔŋ Erodə zóʼ meno pɛ́ pe kɛ tsɔ́ ŋkyé Yěsô nɛ́, ŋkyɛ́ ŋgâ a ké ghɛ́ mbɛ́ tíí yé ké tsʉ́ʼ ye kəkwéʼe. Pe ntsɔ́ ŋgâ: «Zhâŋ, ŋgaŋafɛ́ kpênse zhʉyɛ́ ne vó! A zhyɛ́ yéré a tséʼé tʉ̌ŋ ŋgyɛ́ meno shʉyédme pe ké nɛ́.» 15Pecyó pɔŋ kɛ ntsɔ́ ŋgâ: «A Elya.» Pecyó gháá «A taʼ ŋgaŋatsɔ́kpaŋató Mboʼmvé wɛ́ a fwɛ́ɛ́ taʼ ŋgaŋatsɔ́kpaŋató Mboʼmvé wíŋi nɛ́.» 16Fɔŋ Erodə zóʼ néré, nsó ŋgâ: «Zhâŋ yɔ́ɔ́! A kɛ zhyɛ́ kpaʼ mo wɔŋ pe tséé tó ye! A zhʉyɛ́ ne vó!»
No yɛ́ Erodə kɛ ŋgyɛ́ mbəb Zhâŋ nɛ́
(Mat 14:3-12; Lúk 3:19-20)
17A kɛ ghɛ́mbɛ, fɔŋ Erodə zhyɛ́ pe gbáá Zhâŋ, ŋkurɔ́ wé ne tsáŋ máʼá ndátsáŋ ŋkyé Erodyadə, ŋgʉyé mɔ́ŋmɛ́ ye Filipo wɛ́ a kɛ yɔ̌ nɛ́. 18Ŋkyé ŋgâ Zhâŋ kɛ níŋi ntswee ye ndúŋú, ntsɔ́ pwó fɔŋ Erodə ŋgâ: «A tsyɛ́ ŋgâ wo yɔ́ɔ́ ŋgʉyé mɔ́ŋmɛ́ wo pó!» 19Kəpəŋe yɛ́ Erodyadə wéré kɛ ntséʼé ŋkyé Zhâŋ nɛ́, kɛ gháʼmbwó kaʼatɛ a táʼá ne nɔ̌ʼne wé. Ntsʉʼmbé njʉ́ mɛndɔ́b pó. 20Ŋkyé ŋgâ fɔŋ Erodə kɛ tsé mbɔ́ɔ́ Zhâŋ. A kɛ kubɔ wé ŋkyé ŋgâ a kɛ zé ŋgâ Zhâŋ ŋɔŋ ŋgerɛ́ŋged mbó mbé yáŋme. Ŋkhoʼyɛ́ fɔŋ Erodə kɛ zóʼó nsó Zhâŋ nɛ́, a sáʼá wé tsʉʼ mbó ŋkʉ́ye ne ndzóʼne wé. 21Tsʉ́ʼmbé zhyémvé yéré kuʼu, fɔŋ Erodə tsé ŋgyɛ́ taʼ ndebéne ne zhyé yɛ́ pe kɛ pfɛ́ wé nɛ́, kaʼ pɛ mɛ́tó, pɛ ntsɛ́ssó ŋkaŋtó pwɛ ghəkód pɛ́rɛ́ ŋgɔŋ Galílya. 22Mɔ́ŋ Erodyadə wéré wé məŋgʉ́yé ŋkuŋɔ ndáb ŋʉyí ndzúʼ, no núŋu pú fɔŋ Erodə pwɛ pɛ ghəŋ kaʼatɛ, fɔŋ ntsɔ́ pwó Mɔ́ŋ məŋgʉ́yé wéré ŋgâ: «Psírí yɔ́b yɛ́ wo zɔŋɔ nɛ́, mə fɛ́ pwó wo.» 23Mbó səb ŋgâ: «Ŋkɔŋɔ yɔ́b yɛ́ wo mvírɛ ne mo náá nɛ́, mə fɛ́ pwó wo. Mbɛ a pɛ́ɛ́ ŋgǒbne ŋgɔŋ ya tsetsɛrɛ fɛ́ pwó wo.» 24Mɔ́ŋ məŋgʉ́yé wéré twɔ́ ntsɔ̌ mɛ́ ye ŋgâ: «Tɛ mə mvírɛ kɔ́?» Mɛ́ ye pɔ́rɔ́ pwó ye ŋgâ: «Psírí tó Zhâŋ.» 25A tsáʼ ndéé ŋgú mbɛ́rɛ́ fɔŋ, ntsɔ́ pwó ye ŋgâ: «Mə ntáʼá ŋgâ wo fɛ́ tó Zhâŋ ŋgaŋafɛ́ kpênse kpaʼ ŋkhoʼyɔŋ ndzó taʼ káŋ ne mo.» 26Fɔŋ ntsuŋi. Tsʉ́ʼmbé njʉ́ a kɛ ghɛ́ mbɛ a sə́bɔ́ pwó ye síŋ pɛ ghəŋ nɛ́, a pe zɔŋɔ kirɛ pó. 27Kpaʼ ŋkhoʼyéré, fɔŋ twɔ́ taʼ mânaŋ ŋgâ a ghú ŋkʉ́yó ne tó Zhâŋ. A ghú ndátsáŋ, ntséé tó Zhâŋ, 28ŋkʉ́yó núŋ ndzó taʼ káŋ, fɛ́ pwó Mɔ́ŋ məŋgʉ́yé, a fɛ́ pwó mɛ́ ye. 29Ŋkhoʼyɛ́ ŋgíŋgye Zhâŋ kɛ zoʼ nɛ́, pɔ́b ghú ndɔ́ɔ́ pfɔ́ ye tsʉ́.
Yěsô zhʉyí pɔŋ
(Mat 14:13-21; Lúk 9:10-17; Zhâ 6:1-15)
30Ghaŋántɔ́b Yěsô tɛ́rɛ pfuŋ ye. Sɔ́ŋɔ́ wé ne ŋkɔŋɔ meno pɛ́, pɔ́b kɛ zhyɛ́ pwɛ ŋkɔŋɔ ntʉ́ʉ́ pɛ́ pɔ́b kɛ fɛ́ náá nɛ́. 31Yěsô ntsɔ́ ne pɔ́b ŋgâ: «Puŋ pekenɛ́! Piŋi paʼ, puŋ naʼ fúrú.» ŋkyé ŋgâ pɔŋ zááme kɛ ŋkʉ́yó mbó ŋgú, kaʼatɛ pɔ́b pé pe tséʼé mɔ́ŋ saŋ ne ndzône mɔ́b pó. 32Pɔ́b kɔ́ʼɔ́ ndzó taʼ páŋ ŋgú ne mbaʼá. 33Pɔŋ zhʉ́ njʉ́ pɔ́b ghú nɛ́, pɔŋ zááme zí wé. Twɔ́ ndzó ŋkɔŋɔ pɛ mbɛ́lʉ́ŋ náá ndɔ́ɔ́ ndéé, ntsód wɔ́b. 34Yěsô ghɛ́ shíí ndzó páŋ zhʉ́ pɔŋ zááme. Ghəghəŋ yɔ́b gbáá wé, ŋkyé ŋgâ pɔ́b kɛ pɛ́ɛ́ njʉ́ mvó pɛ pɔ́b ntséʼé mvyéb wɔ́b nɛ́ pó. Mbénére, a fɛ́ pɛ ntʉ́ʉ́ ndúŋú meno zááme ne pɔ́b. 35Njʉ́ zaʼmvé kɛ tse ŋgyɛ́ nɛ́, ŋgíŋgye pe suʼú mbəb yɔ́b mbɛ́rɛ́ wé, ntsɔ́ pwó ye ŋgâ: «Piŋi pɛ́ɛ́ ghúŋkwéʼé, zaʼmvé pó ntsé ŋgyɛ́. 36Nuʼɔ wɔ́b, pɔ́b ghú ndzó pɛ yáʼ pwɛ pɛ ndáb pɛ ne gháá mé nɛ́, ndzúŋ mwɔ̌zó, nzó.» 37Ntsʉʼmbé, Yěsô pɔ́rɔ́ ne pɔ́b ŋgâ: «Tómbəb yúŋ, puŋ fɛ́ mwɔ̌zó ne pɔ́b!» Pɔ́b ntsɔ́ pwó ye ŋgâ: «Tɛɛmbɛ psi zúŋ mbré ne kpǐ mbób yípáá njʉ́yí ndɔŋɔ pɔŋ pɔŋ núŋ?» 38Yěsô psirɛ́ wɔ́b ŋgâ: «Puŋ ntséʼé ntʉʼ mbré yíkɔ́? Puŋ ghú ndiŋi!» Pɔ́b ntíŋí, ntsɔ́ pwó ye ŋgâ: «Ntʉʼ yítaŋ ne ndíí ssó yípáá.» 39Mbénére, Yěsô ntsɔ́ pwó ŋgíŋgyé pe ŋgâ pɔ́b nyaŋa pɔŋ ghód mvuʼɔ pé ndúŋú gháŋ fwó. 40Pɔ́b ghɔ́rɔ́ ne ŋkaŋ. Cyó ŋkaŋ pe mkpǐ, ye cyó pe ghúbmetáŋ. 41Yěsô yɔ́ɔ́ ntʉʼ mbré yítaŋ pwɛ ndíí ssó yípáá yɛ́. Mbúʼú míí mé ndíŋí pépéé, níŋi mbúru ndúŋú. Mbóʼ fɛ́ pwó ŋgíŋgye pe ŋgâ pɔ́b ghobɔ́ pwó pɔŋ. Yěsô ké mbó ŋgób ndíí ssó yípáá ŋkʉ́rʉ́ pwó ŋkɔŋɔ pɔŋ náá. 42Ŋkɔŋɔ wɔ́b náá pfód ndzód. 43Tiʼe pe ntsʉ́ʼ ndúŋɔ ndzó ntsɔ̌b kékáʼá yípáá pwɛ pfuʼɔ ssó yɛ́ a kɛ ntsʉ́ʼ nɛ́. 44Pɔŋ pɛ́ pɔ́b kɛ pfód mbré nɛ́ kɛ pe ŋkáb mbziŋi petáŋ.
Yěsô nyi ndúŋú nse
(Mat 14:22-33; Zhâ 6:16-21)
45Njʉ́ yéré no kɛ ké ndzaʼ néré nɛ́, Yěsô ghɛ́ nuʼɔ pɔŋ, ndzíʼɛ́ ŋgíŋgye pé ŋgâ pɔ́b kɔ́ʼɔ́ ndzó páŋ kpɛ́ɛ́ ssó ndzwəʼɛ́ wé ne yiŋ gháá nse, póʼ mbɛ́lʉ́ŋ Betsayida. 46Ŋkhoʼyɛ́ a kɛ núʼɔ́ wɔ́b nɛ́, a kɔ́ʼɔ́ ndúŋú ŋkə́ŋ ne ntséʼéne Mboʼmvé. 47Ŋkhoʼfwɔ̌nab, njʉ́ páŋ kɛ páŋa tsetsɛrɛ lepaanse nɛ́, Yěsô kɛ kɛ́rɛ́ ndúŋú tsetsáʼ ne ndúŋ yé. 48Njʉ́ ntsʉ́yene páŋ kɛ tsé ntsɛ́ɛ́ wɔ́b ŋkyé fəfod yɛ́ a kɛ kʉ́yó síŋ pɔ́b nɛ́, ŋkhoʼ keemvé, Yěsô ŋkʉ́yó pfúŋɔ́ pɔ́b nyi ndúŋú kɔbɔnse. A kɛ zɔŋɔ ndzáʼá wɔ́b. 49Ŋkhoʼyɛ́ ŋgíŋgyé pe kɛ zhʉ́ njʉ́ ŋɔŋ nyí ndúŋú kɔbɔnse nɛ́, pɔ́b kpaŋ ŋgâ a pfósyé. Mbóʼ wɛ́d. 50Ŋkyé ŋgâ ŋkɔŋɔ wɔ́b náá kɛ zhʉ́ wé, tó yɔ́b vaʼ. Néré, Yěsô tsɔ́ ne pɔ́b ŋgâ: «kiʼi ndzɔʼ yuŋ ndɛ nteŋe! A mo! Puŋ ndɛ mbɔ́ɔ́!» 51A ŋkɔ́ʼɔ́ ndzó páŋ pfúŋɔ́ pɔ́b. Fəfod tsébé. No ntsɛ́ɛ́ wɔ́b kaʼatɛ. 52Pɔ́b kɛ zyé mbé zoʼ cyó yɔ́b ndúŋú no mbré yɛ́ a kɛ záʼ nɛ́ pó, ŋkyé ŋgâ ndzɔʼ yɔ́b kɛ ké tʉ̌ŋ tʉ́ŋ.
Yěsô pɛ́d taʼ ŋgaŋaghɔŋ Zhenesarɛd
(Mat 14:34-36)
53Njʉ́ pɔ́b kɛ siʼá nse tɛ mbáŋa ne yiŋ nzáʼá, a Zhenezarɛd nɛ́, pɔ́b tsyɛ́ paŋ. 54Ŋkhoʼyɛ́ pɔ́b kɛ shíí ndzó páŋ nɛ́, pɔŋ zí Yěsô. 55Pɔ́b kɛ́rɛ́ ndzó ŋkɔŋɔ ŋgɔŋ yéré náá, ndɔ́ɔ́ pɛ ghaŋághɔŋ, ŋkyɛ́ wɔ́b ndzó kɔʼ ŋkʉ́yó ne wɔ́b ndzó ywoʼ yɛ́, pé kɛ zóʼ ŋgâ Yěsô kɛ pé nɛ́. 56Ŋkɔŋɔ ywoʼ pɛ́ a kɛ záʼ náá nɛ́: Pɛ yáʼ, pɛ mbɛ́lʉ́ŋ pwɛ pɛ ndáb pɛ́, pɔ́b ne gháá mé nɛ́. Pe kɛ yɔ́ɔ́ pɛ ghaŋághɔŋ ŋkʉ́yó ne wɔ́b, mbóʼómbwó pwó ye ŋgâ a ntéé pɔ́b ké kébɛ́ ndaʼ sáŋ ndzwé ye. Ŋkɔŋɔ pɔŋ pɛ́ pɔ́b kɛ kɛbɛ wé náá nɛ́ kɛ ké ndzû néré.
ទើបបានជ្រើសរើសហើយ៖
Máákuusə 6: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល