Zhâŋ 7
7
Pɔ́ŋmɛ́ Yěsô tséʼé psyɛ́ndzɔʼ mbəb yé pó
1Ŋkhoʼyɛ́ yéré no kɛ záʼ nɛ́, Yěsô pó ndɔ́ɔ́ nsěnyi ŋkʉ́rʉ́ ndzó pɛ́rɛ́ ŋgɔŋ Galílya. Ŋkyé ŋgâ a kɛ tsé mbé zɔŋɔ ŋgú ndzó pɛ́rɛ́ ŋgɔŋ Zhʉde pó, ywoʼ yɛ́ pɛ ntsɛ́ssó pɛ Yúda kɛ táʼá ne ŋgyɛ̌ne pe nɔʼ wé nɛ́. 2A kɛ ghɛmbɛ zhyémve ndebéne pɛ Yúda yɛ́, pe kɛ fú ne yé ntáb nɛ́, tsé ŋkʉ́yó. 3Pɔ́ŋmɛ́ Yěsô tsɔ́ pwó yé ŋgâ: «Ŋǎ ghaŋ, ŋgú Zhʉde. Yânéré ŋgâ ŋgíŋgye pó pɛ́ pɔ́b yóʼó nɛ́ ke njʉ́ yɔ́b faʼ pɛ wo faʼa nɛ́. 4Ŋkhoʼyɛ́ ŋɔŋ zɔŋɔ ŋgâ pe zɛ́ wé nɛ́, a pe zhíbɛ zhíbɛ ŋgyɛ́ no pó. Njʉ́ wo zhyɛ́ pɛ meno kəkwéʼe nɛ́, nyǒʼ mbəb wo pwó mvémvé!» 5A kɛ ghɛ́mbɛ kpaʼ pɔ́ŋmɛ́ Yěsô pe tséʼé psyɛ́ndzɔʼ ŋkyé wé pó. 6Yěsô tsɔ́ ne pɔ́b ŋgâ: «Ya ŋkhoʼ kɛ kúʼɔ́ pó. Ŋgɛ́mbɛ́ ne puŋ, ŋkɔŋɔ yúŋ ŋkhoʼ náá ke mbɛ́ɛ́ yé sʉ́ʼʉ ne puŋ. 7Tɛɛmbɛ mvémvé pé páŋá wúŋ pó, ŋgɛ khú ne mo, pɔ́b mbáŋá ya ŋkyé ŋgâ mə ntsó ŋgâ ntsweefaʼ yɔ́b yé kəpɔŋ. 8Puŋ kɔ́ʼɔ́ ywoʼɔ́ ndebéne yéré. Ŋgɛmbɛ ne mo, mə kɔ́ʼ pó, ŋkyé ŋgâ ya ŋkhoʼ kɛ kúʼɔ́ pó.» 9Njʉ́ a kɛ nsó néré nɛ́, a cʉ́ʼɔ́ yé Galílya. 10Ntsʉʼmbé, ŋkhoʼyɛ́ pɔ́ŋmɛ́ pé kɛ ghú ywoʼɔ́ ndebéne nɛ́, ŋkɔʼɔtómbəb yé ke ndɔ́ɔ́ yé mɛndɔ́b, ŋgú njʉ́ a kɛ nyáʼá nyáʼá nɛ́, kii zhyɛ́ ŋɔŋ zhʉ́ wé.
Yěsô fɛ́ ntʉ́ʉ́ ndáb Mboʼmvé
11Ŋkhoʼyɛ́ pe kɛ pɛ́ ndzɔ́ʼɔ́ ndebéne nɛ́, pɛ ntsɛ́ssó pɛ Yúda tsé ntaʼa wé. Pé kɛ psirɛ́ ŋgâ: «Yěsô wéré kiʼi mbɛ́ pɛ́ɛ́?» 12A kɛ pɛ ndzɔ́ʼɔ́ pɔŋ, pe fú tíí yé zááme. Pecyó pɔŋ kɛ tsɔ́ ŋgâ: «A taʼ ŋɔŋ sʉ́ʼʉ», pecyó pó tsɔ́ yɔ́b pe ŋgâ: «Ŋgáŋ, a shʉyɛ̂ pɔŋ shʉyɛ́.» 13Ntsʉʼmbé ŋɔŋ kɛ pe ntsɔ́ ndzəb yé kɔ́ʼɔ́ nsó pó, Ŋkyé pɔ́ɔ́ yɛ́ pɔ́b kɛ tséʼé ŋkyé pɛ ntsɛ́ssó pɛ Yúda nɛ́.
14Njʉ́ ndebéne kɛ ghú kaʼatɛ mbáŋá tsetsɛrɛ nɛ́, Yěsô kɔ́ʼɔ́ ndámboʼmvé, ndzyě ne fɛ́ne ntʉ́ʉ́ yóʼó. 15No ntsɛ́ɛ́ pɛ ntsɛ́ssó pɛ Yúda, pɔ́b tsɔ́ ŋgâ: «A zhyɛ́ níŋ ndzɛ Nsó Mboʼmvé kaʼa, yé wɛ́ a ndzyě mbé zéʼ no nɛ́ pɔɔ?» 16Yěsô pɔ́rɔ́ ne pɔ́b ŋgâ: «Ntʉ́ʉ́ yɛ́ mə fɛ́ nɛ́, ntwɔ́ɔ́ ne mo pó. Ntsʉʼmbé, a twɔ̌ pwó ŋɔŋ wɛ́ a twɔ́ ya nɛ́. 17Mbéyɛ́ ŋɔŋ zɔŋɔ ŋgyɛ́ no yɛ́ Mboʼmvé kʉ́yé nɛ́, mbǒ a ndzɛ́ Mbéyɛ́ yɔŋ ntʉ́ʉ́ twɔ̌ pwó Mboʼmvé kii Mbéyɛ́ a twɔ̌ pfɔ̂ mo nɛ́. 18Ŋɔŋ wɛ́ a tsɔ́ɔ́ ne yé tíí nɛ́, taʼa kpaʼ wé ghɛ́ɛ́. A ndaʼ ŋɔŋ wɛ́ a táʼá ghɛ́ɛ́ ŋɔŋ wɛ́ a twɔ́ wé nɛ́, mbé ŋɔŋ no sísíŋ. A tséʼé cyó ŋgɔ́b pfɔ̂ yé pó 19Ŋgâ a kɛ fɛ́ Mǔsê fɛ́ kaŋ ne puŋ? Ntsʉ́ʼŋgɛmbɛ, ŋɔŋ pe pɛ ndzɔ́ʼɔ́ puŋ nyí njʉ́ kaŋ tsɔ́ ne pó. A zhyɛ́ kɔ́ puŋ ke ntáʼá ŋgâ pe zhyɛ́ mə pfɔ́?» 20Pɔŋ pɔ́rɔ́ pwó yé ŋgâ: «Zhʉye kəpɔŋ mbəb wo! A táʼá nɔ́ʼɔ́ wɔ́ nɔ́ʼ wo?» 21Yěsô pó ndɔ́ɔ́ nsó, ntsɔ́ ne pɔ́b ŋgâ: «Mə ke ŋgyɛ́ɛ́ ndaʼ taʼ no, tó ŋkɔŋɔ wúŋ náá vaʼ. 22Mǔsê kɛ zéʼé wúŋ ne mbzírine ŋɔŋ. Ntsʉ́ʼŋgɛmbɛ, a pe twɔ̌ pwó yé pó, a kɛ twɔ̌ pwó pɛ tɛd. Puŋ pó psirɛ́ ŋɔŋ zhyéze ŋkyé kɔ́? 23Mbéyɛ́ pe psírɛ ŋɔŋ zhyéze kii vo kaŋ Mǔsê nɛ́, a zhyɛ́ kɔ́ puŋ zuʼɔ ŋgyé mbəb mo ŋkyé ŋgâ mə mbɛ́rɛ́ ŋɔŋ kaʼatɛ a fwó zhyéze? 24Puŋ tee ndíŋíne ŋɔŋ ne mbəb yé fiʼɛ wé, ntsʉʼmbé puŋ fiʼɛ njʉ́ a zɔŋɔ nɛ́, ne ŋgerɛ́ŋged!»
25Mbe ŋgɔŋ Yerʉ́salɛm kɛ tsɔ́ ŋgâ: «Yekénɛ́ ŋɔŋ wɛ́ pɔ́b ntáʼá ne nɔ̌ʼne wé nɛ́ pɔɔ? 26A pe nɔŋ tsɔ́ síŋ ŋkɔŋɔ pɔŋ náá tétáá, ŋɔŋ pe tsɔ́ no pó! A kɛ́ʼɛ́, ntsɛ́ssó piŋi kɛ́ʼɛ́ cʉ̌yi cʉ̂yi ndzé ŋgâ a kpaʼ yé mbé Kristo? 27Ntsʉʼmbé, ŋɔŋ wɔŋ, psi zɛ́ ywoʼ yɛ́ a twɔ́ nɛ́. Ndaʼ ŋgâ, ŋkhoʼyɛ́ Kristo náʼá ŋkʉ́yó nɛ́ ŋɔŋ pe zé ywoʼ yɛ́, a ntwɔ́ nɛ́ pó.» 28Néré, njʉ́ Yěsô kɛ tsé fɛ́ ntʉ́ʉ́ ndámboʼmvé nɛ́, a nsó ŋgâ: «Puŋ zé ya! Puŋ zɛ́ ywoʼ yɛ́ mə ntwɔ́ nɛ́! Tsʉʼ ŋgɛmbɛ mə mbé kʉ́yó ne tómbəb ya pó. Ŋɔŋ wɛ́ a twɔ́ ya nɛ́, a ŋgerɛ́ŋged, yé wɛ́ puŋ zé nɛ́ pó. 29Ŋgɛ́mbɛ́ ne mo, mə ndzɛ wé ŋkyé ŋgâ, mə twɔ̌ pfuŋ yé, a pó ntwɔ́ yé ntwɔ ya.» 30A kɛ pénéré Pɔ́b táʼá ne gbǎne wé, ntsʉʼmbé ŋɔŋ pe kúʼɔ́ ne gbǎne wé pó, ŋkyé ŋgâ a kɛ ghɛ́mbɛ yé ŋkhoʼ pe kɛ kúʼɔ́ pó. 31A kɛ pɛ ndzɔ́ʼɔ́ pɔŋ, pɔŋ zááme psyɛ́ nsó yé. Pɔ́b kɛ tsɔ́ ŋgâ: «Ŋkhoʼyɛ́ Kristo náʼá ŋkʉ́yó nɛ́, a náʼá ŋgyɛ́ pɛ shʉrɛ́meno kaʼatɛ ntsɛ́ɛ́ pɛ ŋɔŋ wɔŋ zhyɛ́ nɛ́?»
32No yɛ́ pɔ́b kɛ kí ntsəb ntsɔ́ ne tíí Yěsô nɛ́, vɔ ndzó ntə́ŋé pɛ Farízya. Ntsɛ́ssó ghaŋáshʉ́ pwɛ pɛ Farízya twɔ́ ghaŋápsíbɛ ndámboʼmvé ŋgâ pɔ́b ghú, gbáá wé. 33Yěsô nsó ŋgâ: «Piŋi mbó ntsó kyáŋá pó. Mə ŋgú pfúŋɔ́ ŋɔŋ wɛ́ a twɔ́ ya nɛ́. 34Puŋ náʼá ntáʼá ya mbé zhʉ́ ya pó. Ŋkyé ŋgâ ywoʼ yɛ́ mə mbɛ nɛ́, tɛɛmbɛ puŋ pe páŋá yóʼó pó.» 35Kɛ́ʼɛ́, pɛ ntsɛ́ssó pɛ Yuda tsɔ́ tsetsɛrɛ pɔ́b ŋgâ: «A zɔŋɔ ŋgú pɛ́ɛ́, kaʼatɛ piŋi pe zhʉ́ wé ŋkʉ́rʉ́ pɔɔ? A ŋgú mbɛ́rɛ́ pɛ Yúda pɛ́ pɔ́b gbáʼá ndzɔ́ʼɔ́ pɛ Gerɛʼ nɛ́? A ŋgú ne ncʉríne Nsó Mboʼmvé pwó pɛ Gerɛʼ? 36Ŋkě tsi nsó wɛ́ a nsó ŋgâ: “Puŋ ntáʼá mbé zhʉ́ ya pó, ywoʼ yɛ́ mə mbɛ nɛ́ puŋ pe kúʼɔ́ ne mbáŋne yóʼó pó”, pɛ́ɛ́ ŋgâ kɔ́?»
Pɔŋ zɔŋɔ gbáá Yěsô
37Njʉ́yi njʉyi zhyémve ndebéne yɛ́ a zhyémve kəkwéʼe nɛ́, Yěsô tsɛ́ nsó, ndzyě ne ncʉríne ŋgâ: «A pɛɛ yɛ́ ywʉ́ ŋɔŋ zwɔ nɛ́, a kʉ́yó ne mo, mbǒ mə fɛ yɔ́b a nɔ́, 38kɛ́ʼɛ́ pwó tsyé ŋɔŋ wɛ́ a tséʼé psyɛ́ndzɔʼ ŋkyé ya nɛ́. Njʉ́ Ŋwéʼe Mboʼmvé nsó ŋgâ: “Nse wɛ́ a fɛ́ tsómvé nɛ́ náʼá twɔ́ mbəb yé, khú” nɛ́» 39A kɛ tsɔ́ kɛ́ʼɛ́ tɛ́bɛ Zhʉye Yáŋme wɛ́ a kɛ ghɛ́ mbɛ pwó pɔŋ pɛ́ pɔ́b kɛ tséʼé psyɛ́ndzɔʼ ŋkyé wé nɛ́. A kɛ ghɛ́mbɛ pé pe kɛ́ tsɛ́ʼɛ́ Zhʉye Yáŋme pó ŋkyé ŋgâ a kɛ ghɛ́mbɛ Mboʼmvé pe kɛ fɛ́ ghɛ́ɛ́ Yěsô pó.
40Pecyó pɔŋ kɛ pɛ ndzɔ́ʼɔ́ pɔŋ pɛ́ pɔ́b kɛ zóʼo nsó Yěsô nɛ́, ntsɔ́ ŋgâ: «Kpaʼ sísíŋ, ŋgaŋatsɔ́kpaŋató Mboʼmvé pe nɔŋ!» 41Pecyó pɔŋ kɛ tsɔ́ ŋgâ: «A yé mbé Kristo.» Ntsʉʼmbé pecyó tsɔ́ ŋgâ: «Tɛɛmbɛ Kristo twɔ́ ndzó pɛ́rɛ́ ŋgɔŋ Galílya? 42Ŋwéʼe Mboʼmvé tsɔ̌ ŋgâ Kristo náʼá twɔ̌ ndúŋú ndǎ ndáb fɔŋ Ndavíd, a Bételɛhɛm, mɔ́ŋtii mbɛ́lʉ́ŋ yɛ́ fɔŋ Ndavíd Mɔ́ŋ syé ŋgɔŋ wéré nɛ́ pɔɔ?» 43A kɛ pe néré kɛ́ʼɛ́, a maʼ sáʼá tsetsɛrɛ pɔ́b, pɔ́b sáŋ twɔ́ mvuʼɔ́ yípáá. 44Pecyó pɔŋ ndzɔ́ʼɔ́ pɔ́b kɛ zɔŋɔ gbáá wé, ntsʉʼmbé ŋɔŋ pe kúʼɔ́ ne gbǎne wé pó.
45Pɛ ghaŋápsíbɛ ndámboʼmvé pɛ pɔ́rɔ́ pfúŋɔ́ pɛ ntsɛ́ssó ghaŋáshʉ́ pwɛ pɛ Farízya. Ŋkhoʼyɛ́ pɔ́b kɛ paŋ nɛ́, pɔ́b psirɛ́ wɔ́b ŋgâ: «A zhyɛ́ kɔ́ puŋ pe gbáá wé, ŋkʉ́yó niŋi pɔɔ?» 46Pɛ ghaŋápsíbɛ ndámboʼmvé pɛ́ pód ŋgâ: «Ŋɔŋ kâ kɛ tsɔ́ no njʉ́ yé nɛ́ pó.» 47Pɛ Farízya tsɔ́ ne pɔ́b ŋgâ: «Tómbəb yúŋ, a fwɛ́ɛ́ puŋ tě mbəb yúŋ a ké mbó shʉyɛ̂ yúŋ ywoʼ nɛ́? 48A ndzɔ́ʼɔ́ pɛ ntsɛ́ssó piŋi kii ndzɔ́ʼɔ́ pɛ Farízya, puŋ njʉ́ mbɛ taʼ ŋɔŋ wɔ́b tséʼé psyɛ́ndzɔʼ ŋkyé wé? 49A ndaʼ mvuʼɔ pɔŋ pekénɛ́ pɛ́, pɔ́b ndzyě mbé zɛ́ kaŋ Mǔsê nɛ́ pó, ndɔŋ tó pɔ́b nɛ́!» 50Ntsʉʼmbé taʼ ŋɔŋ ndzɔ́ʼɔ́ pɛ Farízya, Nikodɛmə wɛ́ a kɛ ghú, njʉ́ Yěsô nɛ́, nsó ŋgâ: 51«Kaŋ miŋi psyɛ́ ŋgâ pe fúŋɔ́ ŋɔŋ kii pê ndzóʼ wé, kii pê ndzé yɔ́b yɛ́ a zhyɛ́ nɛ́?» 52Pɔ́b nsó ŋgâ: «Kɔʼɔtómbəb wo, wo kembɛ́ yo pe ŋɔŋ Galílya? A pɛ́ɛ́ yɛ́ wo cʉ̌yi ntaʼ sʉ́ʼʉ nɛ́, mbǒ wo njʉ́ ŋgâ taʼ ŋgaŋatsɔ́kpaŋató Mboʼmvé kâ kɛ twɔ́ Galílya pó.»
53A kɛ pe néré, mbɛ wɔ̂ pɔ́rɔndzəb ywoʼ yé.
ទើបបានជ្រើសរើសហើយ៖
Zhâŋ 7: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
