Zhâŋ 3
3
No yɛ́ Yěsô kɛ tsɔ́ pwó Nikodɛmə nɛ́
1Taʼ ŋɔŋ kɛ pɛ́ ndzɔ́ʼɔ́ pɛ Farízya, tíí yé pe Nikodɛmə. Ŋɔŋ wéré kɛ pe taʼ ŋgəkód pɛ Yúda. 2A ghú pfúŋɔ́ Yěsô taʼ netsúʼ ntsɔ́ pwó yé ŋgâ: «Rábi, psi zé ŋgâ wo taʼ Kéʼeyáŋ wɛ́ Mboʼmvé twɔ́ nɛ́. Ŋkyé ŋgâ tɛɛmbɛ ŋɔŋ pé zhyɛ́ kiŋi shʉrɛ́meno pɔŋ pɛ wo zhyɛ́ nɛ́, kii a pe pú Mboʼmvé pó.» 3Yěsô pɔ́rɔ́ pwó yé ŋgâ: «Kpaʼ sísíŋ, mə sə́ŋɛ́ wo ŋgâ: Mbéyɛ́ pé pfɛ́ ŋɔŋ ne mvéne ffé nɛ́ pó, a náʼá mbé zhʉ́ Nofɔŋ Mboʼmvé pó.» 4Nikodɛmə tsɔ́ pwó yé ŋgâ: «Tɛɛmbɛ pé zhyɛ́ níŋ mvɛ́ zuŋ ŋɔŋ ne mvéne ffé? Tɛɛmbɛ a pó mbé kuŋɔ pfɔ̂ mɛ́ yé ŋkʉ́rʉ́, ŋgâ a pó mvɛ́ wé ne mvěne fé pó!» 5Yěsô pɔ́rɔ́ pwó yé ŋgâ: «Kpaʼ sísíŋ, mə sə́ŋɛ́ wo ŋgâ: Tɛɛmbɛ ŋɔŋ pé kúŋɔ́ ndzó Nofɔŋ Mboʼmvé kii pe fɛ kpênse pwó yé ne nse kii ne Zhʉye yáŋme, kɛ́ʼɛ́ ŋgâ a pfɛ wé ne ffé pó. 6Ŋuməsɔŋ ke mvɛ́ ŋumesɔŋ. Ŋɔŋ wɛ́ Zhʉye yáŋme pfé nɛ́, ké mbó mbɛ̌ njʉ́ Zhʉye yáŋme nɛ́. 7No ndɛ ntsɛ́ɛ́ wo Mbéyɛ́ mə ntsɔ́ pwó wo ŋgâ: “A zɔŋɔ ŋgâ pe pfé wúŋ ne mvéne ffé nɛ́.” 8Fəfod túú ndzó ywoʼ yɛ́ a kʉyě nɛ́. Wo zóʼó yo pe ndaʼ njʉ́ a záʼá nɛ́. Ntsʉʼmbé wo pe zɛ́ ywoʼ yɛ́ a twɔ́ nɛ́ pó, ke mbé zɛ́ ywoʼ yɛ́ a ghú nɛ́ pó. A ke mbé ntsʉ́ŋtsʉ́ŋ nɛ́ njʉ́ ŋɔŋ wɛ́ Zhʉye pfɛ́ wé nɛ́.» 9Nikodɛmə tsɔ́ pwó yé ŋgâ: «Tɛɛmbɛ yéré no záʼá níŋ?» 10Yěsô pɔ́rɔ́ pwó yé ŋgâ: «Wo taʼ Kéʼeyáŋ ŋgɔŋ Issayɛ mbé zé meno pɔŋ pó! 11Kpaʼ sísíŋ, mə sə́ŋɛ wo ŋgâ: psi tsɔ́ɔ́ no yɛ́ psi zé nɛ́. Psi kpê ntáŋ no yɛ́ psi zhʉ́ nɛ́, ntsʉʼmbé puŋ pó mbé tsé mbzyɛ́ nsó ywí pó. 12Mbéyɛ́ puŋ tséʼé psyɛ́ndzɔʼ ŋkhoʼyɛ́ mə ntsɔ́ meno ndúŋú tsetsáʼ nɛ́ pó, mbǒ pǔŋ ŋgyɛ́ níŋ ntsɛ́ʼɛ́ psyɛ́ndzɔʼ ŋkhoʼyɛ́ mə tsɔ́ meno pépéé ne puŋ nɛ́? 13ŋkyé ŋgâ ŋɔŋ kâ kɛ kɔ́ʼɔ́ pépéé fáá ndaʼ Mɔ́ŋ ŋɔŋ wɛ́ a kɛ shʉ́yí pépéé nɛ́ pó. 14Njʉ́ Mǔsê kɛ ŋkʉ́rʉ́ nɔ́ ghúŋkwéʼé nɛ́, a ke mbé nɛ́ njʉ́ a zɔŋɔ ŋgâ pe kʉ́rɔ Mɔ́ŋ ŋɔŋ nɛ́. 15Yânéré ŋgâ ntsyé ŋɔŋ wɛ́ a záʼá ndúŋú tíí yé, tséʼé psyɛ́ndzɔʼ nɛ́, tséʼé tsómvé ŋeŋáŋ. 16Ŋkyé ŋgâ Mboʼmvé kɛ kʉyě pumésɔŋ, fɛ́ kʉ́yé Mɔ́ŋ yé. Yânéré ŋgâ ntsyé ŋɔŋ wɛ́ a psyɛ́ wé nɛ́ ndɛ mbwó, ntsʉʼmbé a tséʼé tsómvé ŋeŋáŋ. 17Ŋkyé ŋgâ Mboʼmvé kɛ pe twɔ́ Mɔ́ŋ yé tsetsɛrɛ pumésɔŋ pe ŋgâ a fiʼ pumésɔŋ fûŋ pó, ntsʉʼmbé a kɛ twɔ́ wé pe ŋgâ pumésɔŋ yǎ mbəb yé tséʼé ndzǔne. 18Ŋɔŋ wɛ́ a tséʼé psyɛ́ndzɔʼ ne tíí yé nɛ́, pe fiʼɛ wé pó. Ŋɔŋ wɛ́ a psyɛ́ wé nɛ́ pó, pe kɛ fiʼɛ wé, ŋkyé ŋgâ a tséʼé psyɛ́ndzɔʼ ne tíí ŋkʉyé Mɔ́ŋ Mboʼmvé pó. 19Sábáfiʼ yéré yɛ́ a fúŋɔ́ wúŋ nɛ́, kiʼi mbé nɔŋ. Ŋkaʼmɔ́ɔ́ kɛ kʉyó tsetsɛrɛ pumésɔŋ, pumésɔŋ pó kʉ́yé ndzə́ndzə́b ne ŋkaʼ mɔ́ɔ́, ŋkyé ntsweefaʼ yɔ́b yé kəpɔŋ. 20Néré, tsyé ŋɔŋ wɛ́ a zhyɛ́ no kəpɔŋ nɛ́, mbáŋá ywoʼɔ́ zhyáŋá pâŋ, mbó mbé psyɛ kʉyó pfúŋɔ́ ŋkaʼmɔ́ɔ́ pó. Mbɔ̂ ŋgâ tsi ntsweefaʼ pé pe kəpɔŋ, ŋkéé. 21Ŋɔŋ wɛ́ a nyí ndúŋú mɛndɔ́b no sísíŋ nɛ́, ke kʉ́yǒ ndzó ywoʼ zhyáŋá, kɛ́ʼɛ́ ŋgâ pé cʉ̌yi njʉ́ faʼ pé pe sʉ́ʼʉ, pɛ́ a zhyɛ́ ne tíí Mboʼmvé nɛ́.»
Zhâŋ ŋgaŋafɛ́ kpênse pú Yěsô
22Njʉ́ Yěsô kɛ nsó néré nɛ́, a ghú pwɛ ŋgíŋgye pe ndzó pɛ́rɛ́ ŋgɔŋ Zhʉdé. Pwɛ pɔ́b po naʼ ntsó yóʼó, a pó fɛ́ kpênse pwó pɔŋ. 23Zhâŋ kɛ pɛ ne yé ndzáʼá, fɛ́ kpênse pwó pɔŋ Ayinɔŋ ŋkyé ŋgâ a ywoʼ yɛ́ nse kɛ záá yóʼó nɛ́. Taŋa ywoʼ yéré kɛ pe sáá ne mbɛ́lʉ́ŋ Salimə pó. Pɔŋ zááme kɛ kʉ́yó yóʼó, mkpênse. 24A kɛ ghɛ́ mbɛ pe pé kɛ máʼá Zhâŋ ndátsáŋ pó. 25Taʼ zhyémve, ŋgíŋgye Zhâŋ pú taʼ ŋɔŋ Yúda tsé mɛʼɛ ntswee ŋkyé sǒne kəpɔŋ pɔŋ njʉ́ kaŋ Mǔsê tsɔ nɛ́. 26Pɔ́b kʉ́yó njʉ́ Zhâŋ, ntsɔ́ pwó yé ŋgâ: «Rábi, ŋɔŋ wɛ́ puŋ yé kɛ pɛ ne yiŋi ndzáʼá Zhuudɛŋ, wo pó mkpê ntáŋ yé nɛ́, a ke mbó mbɛ yé nɔŋ fɛ́ kpênse. Ŋkɔŋɔ pɔŋ náá ghú pfuŋ yé.» 27Zhâŋ pɔ́rɔ́ ne pɔ́b ŋgâ: «Tɛɛmbɛ ŋɔŋ pe tséʼé yɔ́b kii a ke fɛ́ Mboʼmvé pwó yé pó, yé wɛ́ a pépéé nɛ́. 28Tómbəb yuŋ, pǔŋ ghaŋákpêntáŋ páá njʉ́ mə nsó ŋgâ: “Mo, mə Kristo pó, ntsʉʼmbé mə mbɛ́ɛ́ ndaʼ ŋɔŋ wɛ́ pe kɛ pê twɔ́ wé síŋ yé nɛ́.” 29Ŋgâ a tséʼé tsé fɔŋ tséʼé mɔ́ŋndáá. Ŋgɛmbɛ ne sɔ́ŋ yé, a ntsɛ́ yé pe ghiŋ, ndzóʼó ndzəb yé, ndebéne gháʼmbwo mé. A njʉ́ ndebéne máá ghú nɛ́, a pfed nse, ŋgɛmbɛ mbé yúŋúme. 30A zɔŋɔ ŋgâ faʼ Yěsô pfii ŋgú ne ssó, yáá kɔɔ.»
Ŋɔŋ wɛ́ a twɔ́ pépéé nɛ́
31Zhâŋ pó ntsó ŋgâ: «Ŋɔŋ wɛ́ a twɔ́ pépéé nɛ́, ntsɛ́ɛ́ ŋkɔŋɔ yɔ́b náá. Ŋɔŋ wɛ́ a twɔ́ ndúŋú tsetsáʼ nɛ́, ke mbɛ́ɛ́ ŋú tsetsaʼ, mbó ke ntsɔ́ɔ́ njʉ́ pɔŋ ndúŋú tsetsáʼ tsɔ́ nɛ́. Ŋɔŋ wɛ́ a twɔ́ pépéé nɛ́ 32ke kpê ntáŋ yɔ́b yɛ́ a zhʉ́ nɛ́, ne yɛ́ a zóʼ nɛ́, ntsʉʼmbé ŋɔŋ pe psyɛ́ nsó yé pó. 33Ŋɔŋ wɛ́ a psyɛ́ nsó yé nɛ́, psyɛ́ ŋgâ Mboʼmvé ŋɔŋ no sísíŋ. 34Néré kɛ́ʼɛ́, ŋɔŋ wɛ́ Mboʼmvé twɔ́ nɛ́, ke ntsɔ́ɔ́ meno pɛ a twɔ́ pwó Mboʼmvé nɛ́. Ŋkyé ŋgâ Mboʼmvé fɛ́ Zhʉye yáŋme pwó yé kii fuʼ. 35Mboʼmvé, yé wɛ́ a Tɛd nɛ́, kʉyě Mɔ́ŋ mbó ntéé ŋkɔŋɔ yɔ́b náá ndzó pwó yé. 36Ŋɔŋ wɛ́ a tséʼé psyɛ́ndzɔʼ ne tíí Mɔ́ŋ nɛ́, tséʼé tsómvé ŋeŋáŋ. Ŋɔŋ wɛ́ a psyɛ́ Mɔ́ŋ nɛ́ pó, náʼá tséʼé ndáá tsómvé pó. Ntsʉʼmbé pʉ̌ŋgye Mboʼmvé yɛ́ a táʼ nɛ́, ntsʉ́ʼɔ mbəb yé.»
ទើបបានជ្រើសរើសហើយ៖
Zhâŋ 3: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
