Zhâŋ 21
21
Yěsô nyóʼ mbəb yé pwó ŋgíŋgye pé ne gháá nse
1Njʉ́ yéré no kɛ záʼ nɛ́, Yěsô ké mbó nyóʼó mbəb yé pwó ŋgíŋgye pé, ne gháá lepaanse Tiberyadə. Yɔ̌ŋ njʉ́ a kɛ nyǒʼ mbəb yé nɛ́. 2Símo Pětro, Tomâsə wɛ́ pe kɛ fú ne Didimə nɛ́, Natanayɛlə, ŋɔŋ Kana ndzó pɛ́rɛ́ ŋgɔŋ Galílya, pɔŋ Zebede ne pecyó ŋgíŋgye pépáá kpaʼ náá mbɛ́ ndzó taʼ ywoʼ. 3Símo Pětro tsɔ́ ne pɔ́b ŋgâ: «Mə ŋgú gbáá ssó.» Pɔ́b pɔ́rɔ́ pwó yé ŋgâ: «Piŋi ŋgú.» Pɔ́b twɔ́ ŋkɔ́ʼɔ́ ndzó páŋ. Ntsʉʼmbé, netsúʼ wéré, pɔ́b pé gbáá yɔ́b pó. 4Ŋkhoʼyɛ́ mvé kɛ kě nɛ́, Yěsô tsɛ́ ne gháá nse. Ntsʉʼmbé, ŋgíŋgye pé pe zé ŋgâ a yé pó. 5Yěsô tsɔ́ ne pɔ́b ŋgâ: «Éee! pɛ Mɔ́ŋ! Puŋ tséʼé Mɔ́ŋ ndii ssó ghɛ́ pɔɔ?» Pɔ́b pód ŋgâ: «tsé ŋgáŋ!» 6A tsɔ́ ne pɔ́b ŋgâ: «Puŋ mǎʼ mbúndzáá ne ndzaʼ pwó páŋ yé maʼ, pǔŋ njʉ́ yɔ́b nɛ́.» Pɔ́b maʼ gbâ ssó kaʼatɛ mbó mbé kúʼɔ́ ne ntúbúne mbúndzáá nse pó. 7Meŋkho wɛ́ Yěsô kɛ kʉ́yé wé kaʼatɛ nɛ́, tsɔ́ pwó pětro ŋgâ: «A Ntsɛɛpɔŋ!» Ŋkhoʼyɛ́ Símo Pětro kɛ ke zóʼ ŋgâ a Ntsɛɛpɔŋ nɛ́, a yɔ̂ ndzwé yɛ́ a ghɛmbɛ a sɔ́d nɛ́, maʼ, ŋkuŋɔ́ nse. 8Pecyó ŋgíŋgye kʉ́yó ne páŋ, sú mbúndzáá yɛ́ ssó kɛ yúŋɔ́ ndzóó nɛ́. A kɛ ghɛmbɛ taŋa yɔ́b sáá ne gháánse, ne ywɔ́ kpii metaa kɛ́ʼɛ́. 9Pɔ́b kɛ ke ŋgɛ́ shʉyí syé, njʉ́ ŋgóʼomɔ́ɔ́ pe nə̌bme ne ssó ndúŋú pú mbré. 10Yěsô tsɔ́ ne pɔ́b ŋgâ: «Puŋ kʉ́yó ne ssó yɛ́ puŋ ke kɛ gbâ gbǎ nɛ́.» 11Símo Pětro pó kɔʼɔ ndzó páŋ ŋkʉ́rʉ́, ne sǔne mbúndzáá fɛ́ mvé, mbúndzáá yɛ́ mɛ́mɛ́ ssó kɛ yúŋɔ́ ndzó, kpíí ne ghúbmetáŋ ne yíkyéd nɛ́. Mbɛ njʉ́ ssó kɛ yuŋ néré ndzóó nɛ́, mbúndzáá ké mbó mbé sɛ́ɛ́ pó. 12Yěsô tsɔ́ ne pɔ́b ŋgâ: «Puŋ kʉ́yó mbáʼ ntswee wúŋ.» Ndíí ŋɔŋ ndzɔ́ʼɔ́ ŋgíŋgye pe mwɔ́ ne mbzirine wé ŋgâ: «Wo wɔ́?» pó, ŋkyé ŋgâ pɔ́b kɛ zé ŋgâ a Ntsɛɛpɔŋ. 13Néré, Yěsô kʉ́yó, ndɔ́ɔ́ mbré, fɛ́ ne pɔ́b, ké mbó ndɔ́ɔ́ ssó, fɛ́ ne pɔ́b. 14A kɛ pé zhʉbɛ́ kɛɛ yíkyéd njʉ́ Yěsô kɛ nyóʼó mbəb yé pwó ŋgíŋgye pe féré njʉ́ a kɛ zhʉyɛ́ ne vó nɛ́.
Yěsô pú Pětro
15Ŋkhoʼyɛ́ pɔ́b kɛ mě zɔ̂ mɔ́b nɛ́, Yěsô ntsɔ́ pwó Símo Pětro ŋgâ: «Símo Mɔ́ŋ Zhâŋ, wo ŋkʉ́yé ya tɛ ntsɛ́ɛ́ njʉ́ pɔŋ pɔ́ŋ ŋkʉ́yé ya nɛ́?» A pód ŋgâ: «Ɔ́ŋɔ́ kɛ Ntsɛɛpɔŋ, wo zé ŋgâ mə ŋkʉ́yé wo.» Yěsô tsɔ́ pwó yé ŋgâ: «Zhyɛ́ mvə́ páá zó mɔ́b!» 16Yěsô ke mbó njʉbí, ntsɔ́ pwó yé ŋgâ: «Símo, Mɔ́ŋ Zhâŋ, wo ŋkʉ́yé ya mɔ́?» A pód ŋgâ: «Ɔ́ŋɔ́ kɛ Ntsɛɛpɔŋ, wo zé ŋgâ mə ŋkʉ́yé wo.» Yěsô nsó ŋgâ: «Tsyaŋa mvə́ páá.» 17A zhʉbí kɛ́ɛ́ yíkyéd mbzirɛ́ wé ŋgâ: «Símo, Mɔ́ŋ Zhâŋ, wo ŋkʉ́yé ya yɔɔ?» Ŋgyé Pětro zúʼú njʉ́ a kɛ nsó kɛ́ɛ́ yíkyéd ŋgâ: «Wo ŋkʉ́yé ya mɔ́?» nɛ́. Pětro pó nsó ŋgâ: «Ntsɛɛpɔŋ, wo wɛ́ wo zé ŋkɔŋɔ no náá nɛ́, wo cʉ̌yi ndzé ŋgâ mə ŋkʉ́yé wo.» Yěsô ntsɔ́ pwó yé ŋgâ: «Zhyɛ́ mvó páá zó mɔ́b. 18Kpaʼ sísíŋ, mə sɔ́ŋɔ́ wo, ŋkhoʼyɛ́ wo kɛ pe Mɔ́ŋ meŋkhó nɛ́, wo gbéé ŋkadáá wo, ŋgú ndzó ywoʼ yɛ́ wo kʉyě nɛ́. Ŋkhoʼyɛ́ wo ndzúŋɔ́ nɛ́, wo ŋkʉ́rɔ mbwó mo, cyó ŋɔŋ gbéé ŋkadáá wo mbó tyáŋa wo ndzó ywoʼ yɛ́ wo ŋkʉ́yé nɛ́ pó.» 19Yěsô kɛ́ tsɔ́ kɛ́ʼɛ́, pe ne nyǒʼne zhí vó wɛ́ Pětro kɛ ghɛ́ pfɔ́, tíí Mboʼmvé pe ghúʼúme nɛ́. Néré Yěsô tsɔ́ pwó yé ŋgâ: «Cʉ́ʼɔ́ ndzəb mo.»
Yěsô pú meŋkhó yé wɛ́ a ŋkʉ́yé kaʼatɛ nɛ́
20Pětro ghɛ́ sɛ́rɛ́ mbəb yé, njʉ́ meŋkho wɛ́ Yěsô kɛ kʉyě kaʼatɛ nɛ́ ndzəb yé, wɛ́ pɔ́b kɛ ghɛ́ ndzɔ́ mɔ́b a máʼ tó yé pfúŋɔ́ ndzɔʼ yé mbziri ŋgâ: «Ntsɛɛpɔŋ, a fi wɔ́ fi wo?» 21Ŋkhoʼyɛ́ Pětro kɛ zhʉ́ wé nɛ́, a tsɔ́ pwó Yěsô ŋgâ: «Mbɛ ne yé kɛ Ntsɛɛpɔŋ, a ŋgyɛ́ kɔ́ ŋgyɛ́ wé?» 22Yěsô pɔ́rɔ́ pwó yé ŋgâ: «Mbéyɛ́ mə ndzɔŋɔ ŋgâ a tsʉ́ʼ kaʼatɛ mə ŋkʉ́yó nɛ́, mbǒ a zhʉ́ wo pe ne kɔ́? Wo, cʉ́ʼɔ́ ndzəb mo.» 23A kɛ yǎ ne ndíí nsó wɔŋ, pe ntsɔ́ tsetsɛrɛ pɔ́ŋmɛ́ ŋgâ meŋkho wéré ŋkʉ́yó pfɔ̂ pó. Kpaʼ sísíŋ, Yěsô kɛ pe tsɔ́ pwó yé ŋgâ a náʼá pfɔ̂ pó pó, ntsʉʼmbé, a kɛ́ ntsɔ́ɔ́ ŋgâ: «Mbéyɛ́ mə ndzɔŋɔ ŋgâ a tsʉ́ʼ kaʼatɛ mə ŋkʉ́yó nɛ́, yéré zhʉ́ wo pe ne kɔ́.»
24A meŋkho wéré mbé mkpê ntáŋ meno péré, mbó mbé ŋɔŋ wɛ́ a ŋwéʼe nɛ́. Psi pó ndzé ŋgâ nsó wéré sísíŋ.
25Yěsô kɛ pó ŋgyɛ́ pecyó pɛ shʉrɛ́meno zááme, kaʼatɛ pe ŋwéʼɛ́ ŋwéʼɛ́, mbǒ mvé yɔŋ ŋkhóó pwó pɛ mbóʼŋweʼe ndúŋú.
ទើបបានជ្រើសរើសហើយ៖
Zhâŋ 21: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
