Zhâŋ 20
20
Ŋgíŋgye Yěsô ghú tswěsyé
(Mat 28:1-10; Máá 16:1-8; Lúk 24:1-12)
1A kɛ pé sɔ́ zhyémve ne ŋgabtáŋ pɛ́ Yuda, ne fʉ́ʉ́wáá ŋgɛmbɛ ndzə́ndzə́b náʼá kɛ pɛ́. Malya wɛ́ pe kɛ fú ne Matali nɛ́, ghú tswée syé njʉ́ ŋgâ pe kɛ suʼú ŋgɔʼ yɛ́ a kɛ naŋ ntswěsye nɛ́. 2A khii ŋgú mbɛ́rɛ́ Símo Pětro pú meŋkho wɛ́ Yěsô kɛ kʉ́yé kaʼatɛ nɛ́, ntsɔ́ ne pɔ́b ŋgâ: «Pe tubu Ntsɛɛpɔŋ ndzó sye. Psi pe zɛ́ ywoʼ yɛ́ pe cʉ́ʼɔ́ wé nɛ́ pó.» 3Mbe kɛ́ʼɛ́ Pětro pú cyó meŋkho twɔ́, ke ŋgú yɔ́b ntswěsye. 4Pɔ́b pépáá yɔ́ɔ́ ndéé. Ntsʉʼmbé kpee cyó zyǎŋa ntsɛ́ɛ́ yé Pětro kaʼatɛ a pê yé mbáŋa ntswěsye. 5A tsúŋú mbəb yé njʉ́ pɛ pɛ́rɛ́ ndzwé pɛ́, nú yóʼó. Mbɛ néré, a pe kúŋɔ́ ndzóó pó. 6Símo Pětro wɛ́ a kɛ cʉ́ʼɔ́ ndzəb yé nɛ́ páŋ yé kɛɛ. Kúŋɔ́ ndzó sye, njʉ́ pɛ pɛ́rɛ́ ndzwé nú yóʼó 7pwɛ ndzwé yɛ́ pe kɛ pwɔ tó yé nuŋ nɛ́. Yéré kɛ pe núú pwɛ pɛ́rɛ́ ndzwé pó. Ntsʉʼmbé, a kɛ núú ndzó yé ywoʼ kyédme. 8A kɛ pénéré, meŋkho wɛ́ a kɛ páŋá ne sɔ́ yé nɛ́, ke ŋkuŋu yé ndzó sye. A zhʉ́ mbó, mbzyɛ́. 9A kɛ ghɛ́ ghɛmbɛ́ pɔ́b pe kɛ zóʼó ywoʼɔ Ŋwéʼe yɛ́ a ntsɔ́ ŋgâ Yěsô kɛ ghɛ́ náʼá njʉyɛ́ ne vó nɛ́ pó. 10Ndzáʼnéré, ŋgíŋgye pé pód yɔ́b ndzəb.
Malya wɛ́ pé kɛ fú ne Matali nɛ́ zhʉ́ Ntsɛɛpɔŋ
(Máá 16:9-11)
11Malya kɛ kʉ́yó, ke ntsɛ́ yé pe mvé pfúŋɔ́ syé, ŋkhɔ̂. A kɛ ŋkhɔ̂ néré, máʼ tó yé ndíŋɛ sye 12njʉ́ aŋgere pépáá ne ndzwé ffə́fó mbəb pɔ́b. Pɔ́b ghɔrɔ́ ndzó kpaʼ ywoʼ yɛ́ pe kɛ núŋú pfɔ̂ Yěsô nɛ́. Cyó ndzó ywoʼ yɛ́ tó yé kɛ nú nɛ́, cyó ndzó ywoʼ yɛ́ kpee mé kɛ nú nɛ́.
13Pɛ aŋgere tsɔ́ pwó yé ŋgâ: «Mɛ́nde, wo ŋkhɔɔ kɔ́?» A pɔ́rɔ́ ne pɔ́b ŋgâ: «Pe túbú pfɔ̂ Ntsɛɛpɔŋ, mə mbé zɛ́ ywoʼ yɛ́ pe tsʉʼɔ́ wé nɛ́ pó.» 14Njʉ́ a kɛ tsé ntsɔ́ néré nɛ́, a ghɛ́ sɛrɛ mbəb yé, njʉ́ Yěsô tsɛ́ pfuŋ yé. Ntsʉʼmbé a pe zé ŋgâ a yé pó. 15Yěsô tsɔ́ pwó yé ŋgâ: «Mɛnde, wo ŋkhɔɔ kɔ́? Wo táʼá wɔ́?» Njʉ́ a kɛ kpaŋa ŋgâ a ŋɔŋ wɛ́ a psyɛbɛ faʼ nɛ́, a tsɔ́ pwó yé ŋgâ: «Ntsɛ́ssó, mbéyɛ́ a túbú wo túbɔ wé nɛ́, wo sə́ŋɛ́ ya ne ywoʼ yɛ́ wo tsʉʼɔ́ wé nɛ́, mə ŋgú ndɔ́ɔ́ wé.» 16Yěsô fú wé ŋgâ: «Malya.» A séd mbəb yé ké mbó fú yé wé, ne nsó Ebərə ŋgâ: «Rabuni» kě tsi pe ŋgâ Kéʼeyáŋ. 17Yěsô tsɔ́ pwó yé ŋgâ: «Ndɛ tsé gbáá ya! ŋkyé ŋgâ mə kɛ kɔ́ʼɔ́ pfúŋɔ́ Tɛd ya pó. Ŋgɛ ŋkú ne wo, ghú njʉ́ pɔ́ŋmɛ́ páá, ntsɔ́ ne pɔ́b ŋgâ mə ŋkɔ́ʼɔ́ pfuŋ Tɛd ya, wɛ́ a Tɛd wúŋ nɛ́, pfúŋɔ́ Mboʼmvé ya wɛ́ a Mboʼmvé wúŋ nɛ́.» 18Malya wɛ́ pé kɛ fú ne Matali nɛ́, ghú cʉ́rɛ pwó ŋgíŋgye pé ŋgâ: «Mə njʉ́ Ntsɛɛpɔŋ, yɔŋ no yɛ́ a tsɔ́ ne mo nɛ́.»
ŋgíŋgye Ntsɛɛpɔŋ zhʉ́ wé
(Mat 28:16-20; Máá 16:14-18; Lúk 24:36-49)
19A kɛ pé ne fwɔ̌nab wéré wɛ́ a kɛ pé sɔ́ zhyémve ne ŋgabtáŋ pɛ Yúda nɛ́, ŋgíŋgye Yěsô tɛ́rɛ ndzó taʼ ndáb, ŋkyé ŋgâ pɔ́b kɛ tsé mbɔ́ɔ́ pɛ ntsɛ́ssó pɛ Yúda. Pɔ́b fûŋ ntswěndáb yɛ́ pɔ́b kɛ pɛ ndzóó nɛ́. Yěsô móó tsetsɛrɛ pɔ́b, ntsɔ́ ne pɔ́b ŋgâ: «A mbúru pɛ ne puŋ.» 20A ghɛ́ ntsɔ́, nyóʼó mbwó mé pú nsěgaŋ yé. Ŋkhoʼyɛ́ pɔ́b kɛ zhʉ́ Ntsɛɛpɔŋ nɛ́, ŋkɔŋɔ ŋgíŋgye pe náá pɛ́ ndzɔ́ʼɔ́ ndebéne. 21Kɛ́ʼɛ́, Yěsô pó ntsɔ́ ne pɔ́b ŋgâ: «A mbúru pɛ ne puŋ. Njʉ́ Tɛd ya twɔ́ nɛ́, mə ke mbó ntwɔ́ ya wúŋ.» 22Njʉ́ a kɛ nsó néré nɛ́, a tú fóó ne ntswee yé mbəb pɔ́b, ntsɔ́ ne pɔ́b ŋgâ: «Puŋ kpê Zhʉye Yáŋme. 23Pɔŋ pɛ́ puŋ náʼá máʼá kəpɔŋ wɔ́b nɛ́, Mboʼmvé naʼá ke máʼá kəpɔŋ wɔ́b. Pɔŋ pɛ́ puŋ náʼ máʼ kəpɔŋ wɔ́b nɛ́ pó, Mboʼmvé naʼ kembé maʼ kəpɔŋ wɔ́b pó.»
Yěsô nyóʼ mbəb yé pwó Tomâsə
24Ŋgɛmbɛ Tomâsə wɛ́ a kɛ pɛ ndzɔ́ʼɔ́ ntsɔ̌b ŋgíŋgye Yěsô yípáá, pe fú wé ne Didimə nɛ́, a kɛ pé pɛ́ yóʼó ŋkhoʼyɛ́ Yěsô kɛ kʉ́yó nɛ́ pó. 25Pecyó ŋgíŋgye tsɔ́ pwó yé ŋgâ: «Psi zhʉ́ Ntsɛɛpɔŋ!» Ntsʉʼmbé, a pɔ́rɔ́ ne pɔ́b ŋgâ: «A pɛ́ɛ́ yɛ́ mə njʉ́ pɛ poʼo ntsó ndzó mbwó mé nɛ́ pó. Ke mbé níŋi tɔpwó ya ndzó pɛ poʼo nsó péré nɛ́ pó, kii pó níŋi pwó ya ndzó nsěgaŋ yé nɛ́ pó, mə mbé psyɛ́ pó!» 26Zhyémve pefuwɔ záʼ, ŋgíŋgye ke mbó ntérɛ́ ndáb ŋkʉ́rʉ́ ne ntéréne fé. Tomâsə pɛ tsetsɛrɛ pɔ́b. Pɛ ntswěndáb ke mbɛ́ɛ́ fǔŋme. Yěsô móó tsetsɛrɛ pɔ́b, ntsɔ́ ne pɔ́b ŋgâ: «A mbúru pɛ́ ne puŋ.» 27Néré, Yěsô tsɔ́ pwó Tomâsə ŋgâ: «Tsyaŋa tɔpwó ghaŋ, mbó ndíŋí mbwó máá. Tsyaŋa pwó, niŋɛ ndzó nsěgaŋ ya. Ndɛ mbó tsé ndzɛɛ. Psyɛ́ ŋgâ a mo.» 28Tomâsə pɔ́rɔ́ pwó yé ŋgâ: «Ntsɛɛpɔŋ ya mbǒ mbé Mboʼmvé ya.» 29Yěsô tsɔ́ pwó yé ŋgâ: «ŋkyé ŋgâ wo zhʉ́ ya nɛ́, wo psyɛ́. Mbéne sʉ́ʼʉ pwó pɔŋ pɛ́ pɔ́b psyɛ́, kii zhʉ́ nɛ́.»
Pe ŋwéʼé yɔŋ poʼŋwéʼe ŋkyé kɔ́?
30Yěsô kɛ zhyɛ́ pecyó kiŋi meno zááme ne míí ŋgíŋgye pé, pɛ́ pe ŋwɛ́ʼɛ́ ndzó póʼŋweʼe yɔŋ nɛ́ pó. 31Ntsʉʼmbé, pe kɛ ŋwéʼe pɔŋ kɛ́ʼɛ́ ŋgâ puŋ zé ŋgâ a Yěsô mbé Kristo, mbé Mɔ́ŋ Mboʼmvé. A pɛ́ɛ́ yɛ́ pǔŋ psyɛ́ nɛ́, mbǒ pǔŋ ndáá ndúŋú tíí yé, tséʼé ndáá tsómvé.
ទើបបានជ្រើសរើសហើយ៖
Zhâŋ 20: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
