Faʼ Ghaŋántɔ́b 9
9
Mbziʼe njʉ́ Yěsô kɛ fú Sɔlə nɛ́
1Njʉ́ kpaŋató Sɔlə kɛ ké mbɛ́ɛ́ ne ndzááne pu Ntsɛɛpɔŋ Kristo ne ŋgəʼo pwɛ ŋgyɛ̌ne pé nɔ́ʼɔ wɔ́b nɛ́, a ghú 2ndɔ́ŋ pɛ ŋweʼe pwó Tɛdshʉ́ kəkwéʼe ne ŋgúne ndzó pɛ ndántéré pɛ Yúda pɛ́ a Damáásə nɛ́. A mbɔŋɔ mbáŋá yóʼó, njʉ́ pɔŋ pɛ́ pɔ́b zɔŋɔ mɛndɔ́b Yěsô nɛ́, kii ŋumbzí kii məŋgʉ́yé, mbǒ a gbáá wɔ́b, ŋkurɔ́ wɔ́b ne tsáŋ, ŋkʉ́yó ne wɔ́b Yerʉ́salɛm.
3Ŋkhoʼyɛ́ Sɔlə kɛ nyí kaʼatɛ tsé mbáŋa Damáásə nɛ́, a ghɛ́ mvuwɛ́ taʼ ndáŋne twɔ́ pépéé ndzyɛ̂ wé. 4A vɔ́ syé, ndzóʼ taʼ ndzəb, psirɛ́ wé ŋgâ: «Sɔlə, Sɔlə, wo twɔ́ ndzəb ya kaʼa ŋkyé kɔ́?» 5A psírí ŋgâ: «Ntsɛɛpɔŋ, wo wɔ̌?» Ndzəb yéré pód ŋgâ: «A mo Yěsô, Ŋɔŋ wɛ́ wo twɔ́ ndzəb yé kɛ́ʼɛ́ nɛ́. 6Ntsʉʼmbé, ŋǎ syé ŋkúŋɔ́ mbɛ́lʉ́ŋ. Taʼ ŋɔŋ yóʼó wɛ́ á ntsɔ́ no yɛ́ wo ŋgyɛ́ nɛ́, pwó wo.» 7Pɛkpee Sɔlə pɛ́ pwɛ pɔ́b kɛ tə́b nsěnyí nɛ́ tsébé, pɔ́ɔ́ moʼ ntswee mɔ́b. Pɔ́b kɛ cʉ̌yi ke ndzóʼó ndaʼ ndzəb ŋɔŋ, ntsʉʼmbé tsé njʉ́ ŋgaŋ yé pó. 8Sɔlə ŋǎ syé, ntsʉʼmbé, mbɛ njʉ́ míí mé kɛ pé ŋáʼme nɛ́, a tsé mbé zhʉ́ ywoʼ ŋkʉ́rʉ́ pó. A syɛ́ gbáá pɛkpee pe gbǎ pwó yé tsyáŋa wé, a kuŋɔ mbɛ́lʉ́ŋ Damáásə. 9A tsó ffǒme yóʼó ne zhyémve pékyéd, kii zó yɔ́b, kii pó nɔ́.
10Taʼ meŋkho yěsô wɛ́ pé kɛ fú wé ne Ananiyasə nɛ́, kɛ pɛ́ Damáásə. A tséʼé taʼ zhʉ́ywoʼ, Ntsɛɛpɔŋ fú wé ŋgâ: «Ananiyasə!» A pód ŋgâ: «Ntsɛɛpɔŋ, mə mbé nɔŋ!» 11Ntsɛɛpɔŋ tsɔ́ pwó yé ŋgâ: «Wo ŋgú nɛ́ ndzó mɛndɔ́b wékénɛ́ pé fú ne mɛndɔ́b Ŋgerɛ́ŋged nɛ́, ŋkúŋɔ́ ndáb Yudasə, mbzírɛ́ ŋɔŋ wɛ́ pé fú ne Sɔlə, a pe ŋɔŋ Taasə nɛ́. A yóʼó nɛ́, ntsɛ́ʼɛ́ Mboʼmvé. 12A ke kɛ zhʉ́ taʼ ŋɔŋ wɛ́ pé fu wé nné Ananiyasə nɛ́ zhʉ́. A kúŋɔ́ ndáb, ndzab mbwó mé mbəb yé, ŋgâ a pó njʉ́ ywoʼ.» 13Ananiyasə pód ŋgâ: «Ntsɛɛpɔŋ, mə ndzóʼ puzááme fú tíí ŋɔŋ wékénɛ́, ntsɔ́ ŋkɔŋɔ meno kəpɔŋ pɛ a ŋgyɛ́ mbəb pupó Yerʉ́salɛm nɛ́ 14Pɛ ntsɛ́ssó ghaŋáshʉ́ fɛ́ tʉ̌ŋ ŋgâ a kʉ́yó ghaŋ, ŋkworɔ́ ŋkɔŋɔ pɔŋ pɛ́ pɔ́b ŋkhɔ fú tíí yo náá nɛ́, ne tsáŋ.» 15Ntsʉʼmbé, Ntsɛɛpɔŋ tsɔ́ pwó Ananiyasə ŋgâ: «Ghú njʉ́ ŋɔŋ wékénɛ́. Ŋkyé ŋgâ a ŋɔŋ wɛ́ nɛ́ mə ntsɔ́ʼ wé, a ghɛ́ mbɛ ŋgaŋafaʼ ya pfúŋɔ́ mvémvé pɛ́ pɔ́b zɛ́ Mboʼmvé pɛ Yúda nɛ́ pó, mbɛ síŋ péfɔŋ, mbɛ pɔ́ŋ Issayɛ. 16Kɔ́ʼɔ́ tómbəb ya, mə ŋkʉ́yó nyóʼó ŋkɔŋɔ ŋgəʼo yɛ́ a ŋkʉ́yó njʉ́ náá ŋkyé tíí ya nɛ́, pwó yé.» 17Ananiyasə ghú, ŋkúŋɔ́ ndáb yéré, ndzab mbwó mé mbəb yé, nsó ŋgâ: «Sɔlə, mɔ́ŋmɛ́ ya, a twɔ́ Ntsɛɛpɔŋ Yěsô ntwɔ́ ya. Yěsô wɛ́ a nyóʼ mbəb yé pwó wo ndúŋú mɛndɔ́b wɛ́ a ghɛmbɛ wo nyí ndúŋú nɛ́. A twɔ́ ya kɛ́ʼɛ́ ŋgâ wo pó njʉ́ ywoʼ, Zhʉye Yáŋme pó ndúŋú wo.» 18Fǐme nɛ́, a ghɛ́ mvwɛ yɔ́b twɔ́ ndzó míí mé mvɔ́ syé njʉ́ pɛ kɔbɔ́ssó nɛ́. A zhʉ́ ywoʼ, ŋǎ syé kpéé nse. 19A pó nzó mɔ́b ŋkhoʼyɔŋ, tʉ̌ŋ mé khú.
Sɔlə cʉrí Nsómboʼmvé Damáásə
Njʉ́ a kɛ pé néré nɛ́, Sɔlə po ndaʼ pɔŋ zhyémve pwɛ pǔkristo Damáásə. 20A ke ndzyě ncʉríne pe néré kii pó tsé ndzwəʼɛ nzwə́ʼɛ́, ndzó pɛ ndántéré pɛ Yúda. A kɛ ncʉ́rɛ ŋgâ: «Yěsô Mɔ́ŋ Mboʼmvé!» 21Tó ŋkɔŋɔ pɔŋ pɛ́ pɔ́b kɛ zóʼó wé náá nɛ́ vaʼ, pɔ́b tsɔ́ ŋgâ: «Yekénɛ́ ŋɔŋ wɛ́ a kɛ pɛ́ Yerʉ́salɛm nzâ pɔŋ pɛ́ pɔ́b ŋguʼɔ tíí yekénɛ́ ne ŋgəʼo nɛ́ pɔɔ? A kɛ pe kʉ́yó ghaŋ pé ne gbǎne pɔŋ ŋkwód ne tsáŋ, tsyáŋa wɔ́b pwó pɛ ntsɛ́ssó ghaŋáshʉ́ pɔɔ?» 22Ntsʉʼmbé, Sɔlə ke fáʼa faʼ yé fǎʼ ŋgú ne ssó, nyóʼó pwó pɛ́ Yúda pɛ́ pɔ́b kɛ tsó Damáásə nɛ́ ŋgâ a sísíŋ ŋgâ a Yěsô mbé Kristo.
23Á náʼ ŋgɛ ŋkyaŋa, pɛ Yúda tséʼé taʼ ntswee ne ŋgyɛ̌ne pe nɔ́ʼɔ́ wé. 24Ntsʉʼmbé, menaŋ méré vɔ́ ndzó nteŋe Sɔlə. Pɔ́b kɛ zhyɛ́ kaʼatɛ ntsǐ pɛ ntswee poʼ mbɛ́lʉ́ŋ tsî, netsúʼ pwɛ ne nwɔ̌nsó, kɛ́ʼɛ́ ne gbǎne wé nɔ́ʼ. 25Ntsʉʼmbé, taʼ netsúʼ, ŋgíŋgye Sɔlə níŋ ɛ wé ndzó taʼ kékáʼá, shʉʼɛ́ wé ne yiŋ ndzáʼa kaŋ mbɛ́lʉ́ŋ.
Sɔlə ghú Yerʉ́salɛm
26Ŋkhoʼyɛ́ Sɔlə kɛ kí kaʼatɛ mbáŋa Yerʉ́salɛm nɛ́, a mwɔ̂ ne ntə̌bne mbəb yé mbəb pǔkristo. Ntsʉʼmbé, ŋkɔŋɔ pɔŋ náá pɔ́ɔ́ wé pɔ́ɔ́. Ŋkyé ŋgâ, ŋɔŋ kɛ pe pɛ́ yóʼó tsé mbzyɛ́ ŋgâ, kpaʼ sísíŋ a kɛ tsʉʼ méŋkho Yěsô pó. 27Néré, Baanabasə yɔ́ɔ́ wé, pú yé ghú pfúŋɔ́ ghaŋántɔ́b. A tɛ́bɛ ne pɔ́b mbziʼe yɛ́ Sɔlə kɛ zhʉ́ Ntsɛɛpɔŋ mɛndɔ́b, a nsó no pwó yé, mbziʼe yɛ́ a kɛ cʉrí Ŋkəŋ Sʉ́ʼʉ Damáásə ne tíí Yěsô pe ne kɔbɔ́ndzɔʼ nɛ́. 28Ndzyěne néré, Sɔlə tsʉ́ʼ ŋkhoʼyɔŋ a kɛrɛ pwɛ ghaŋantɔ́b Yerʉ́salɛm, cʉ́rɛ Ŋkəŋ Sʉ́ʼʉ pe ne kɔbɔ́ndzɔʼ ne tíí Ntsɛɛpɔŋ. 29A suʼú mbəb yé mbɛ́rɛ́ pɛ Yúda pɛ́ pɔ́b kɛ ntsɔ́ nsó Gerɛʼ nɛ́, pwɛ pɔ́b səŋɛ, kaʼatɛ méʼé ntswee. Ntsʉʼmbé, pɔ́b ke taʼa yɔ́b pé né ŋgyɛ̌ne ŋgâ a pfó. 30Ŋkhoʼyɛ́ pǔkristo kɛ zóʼ yéré no nɛ́, pɔ́b tsyaŋa Sɔlə Sezare, a záʼá yóʼó ŋgú Taasə.
31A kɛ pé ŋkhoʼyéré, ŋkɔŋɔ pǔkristo náá tsó ne mbúru ndzó ŋkɔŋɔ pɛ́rɛ́ ŋgɔŋ Zhʉde, ndzó ŋkɔŋɔ pɛ́rɛ́ ŋgɔŋ Galílya pwɛ ŋkɔŋɔ pɛ́rɛ́ ŋgɔŋ Samari náá. Pɔ́b tʉ́ʉ́ mbəb yɔ́b, mbó tsó ndzɔ́ʼɔ́ pɔ́ɔ́ Ntsɛɛpɔŋ. Zhʉye Yáŋme ghɛ́bɛ, ndɔŋɔ wɔ́b pfii.
Pětro pɛ́d ghɔŋ Éné
32A kɛ ghɛmbɛ, Pětro tsé ŋgaŋa pǔkristo ŋkɔŋɔ ŋkhoʼ náá. Zhyémve yéré, a ghú pfúŋɔ́ pǔkristo pɛ́ pɔ́b kɛ tsó Lida nɛ́. 33A páŋ yóʼó, njʉ́ taʼ ŋɔŋ pé fú wé né Éné. A kɛ ghɛmbɛ a kɛ pé ŋgǒʼmvé yífwɔ́ njʉ́ ŋɔŋ wéré nú ndúŋú kúŋ yé, ŋgɛmbɛ mbəb ye pfó náá nɛ́. 34Pětro tsɔ́ pwó ye ŋgâ: «Éné, Yěsô Kristo pɛ́d ghɔŋ wo! Ŋǎ syé, nteŋé kúŋ wo ne tómbəb wo!» Kpaʼ ŋkhoʼyéré a ke ŋaa syé pe néré. 35Ŋkɔŋɔ pɔŋ pɛ́ pɔ́b kɛ tsó Lida pwɛ pɛ́ pɔ́b kɛ tsó ndzó fɛ́ɛ́ Sarɔŋ náá nɛ́, zhʉ́ yéré no, mbzyɛ́ Ntsɛɛpɔŋ.
Pětro zhʉyɛ́ Tapita ne vó
36Taʼ məŋgʉ́yé kɛ pɛ́ Zhópe, mbé ŋukristo, tíí yé pé Tapita, ŋkě tsi pɛ́ɛ́ ŋgâ Ŋgáb. Ye foʼ kɛ pɛɛ ŋgyɛ̌ne meno sʉ́ʼʉ pwɛ ghebe pǔndzɔʼ. 37A kɛ pé néré, ghɔŋ gbáá wé kaʼatɛ a ke pfó pfó. Pe sǒ pfó yé, núŋɔ́ wé ndzó tóndáb yɛ́ a kɛ pɛ́ nsó nɛ́. 38Njʉ́ taŋa Lida kɛ pé sáá pfúŋɔ́ Zhópe nɛ́ pó, pǔkristo zóʼ ŋgâ Pětro yóʼó. Pɔ́b twɔ́ mbzíŋi pépáá ŋgâ pɔ́b ghú ntsɔ́ pwó pětro ŋgâ: «Psi poʼómbwó! Kʉ́yó pfúŋɔ́ psi, kii yɛ́ɛ́!» 39Kpaʼ ŋkhoʼyéré, pwɛ Pětro ke ŋáá syé pé néré, pwɛ pɔ́b ghú. Ŋkhoʼyɛ́ a kɛ páŋ nɛ́, pé zhyɛ́, a kɔ́ʼɔ́ ndzó tóndáb yɛ́ a kɛ pɛ nsó nɛ́. Ŋkɔŋɔ pfʉ́ʉpfʉ́ʉ́ náá suʼú mbəb yɔ́b fɛ́ pfúŋɔ́ yé, ŋkhɔ́, nyóʼó pɛ ndzwé fóó pwɛ ndzwé zyé yɛ́ Dɔɔkasə#9:39 Dɔɔkasə Pe ke mbó fú Dɔɔkasə ne Tapita. Kéétsi Dɔɔkasə wéré pɛ́ɛ́ ŋgâ ŋgáb. ke kɛ tswɔtwɔ́ ŋkhoʼyɛ́ pú pɔ́b mbé nɛ́. 40Pětro zhyɛ́ ŋkɔŋɔ pɔŋ náá twɔ́ ndáb. A féd kwuʼé mé syé ntsɛ́ʼɛ́ Mboʼmvé, séd mbəb yé náá pfɔ́ yé, nsó ŋgâ: «Tapita, ŋáá syé!» Tapita ŋáʼ míí mé, njʉ́ Pětro, mbúʼú mbəb ŋgód. 41Pětro gbáá pwó yé, ŋgyɛ́ a ŋáá syé. A fú pǔkristo pwɛ pɛ pfʉ́ʉ́pfʉ́ʉ́, nyóʼ Tapita ne pɔ́b, ŋgɛmbɛ a kɛ zhʉyɛ́ ne vó. 42Ŋkɔŋɔ mbé Zhópe náá zóʼ no yɛ́ a kɛ záʼ nɛ́. Ndǎ ndúŋú puzááme ndzɔ́ʼɔ́ pɔ́b psyɛ́ Ntsɛɛpɔŋ. 43Pětro tsó Zhópe kaʼatɛ kyáŋá, yóʼó cyó ŋɔŋ wɛ́ pe kɛ fú wé ne Símo, a pe taʼ ŋgaŋatɛŋɛ́ŋgɔb nɛ́.
ទើបបានជ្រើសរើសហើយ៖
Faʼ Ghaŋántɔ́b 9: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
