Faʼ Ghaŋántɔ́b 8
8
1Sɔlə kɛ pɛ́ ndzɔ́ʼɔ́ pɔŋ pɛ́ pɔ́b kɛ psyɛ́ ŋgâ pe nɔ́ʼ Etyɛŋ nɛ́.
Sɔlə twɔ́ ndzəb Pǔkristo
A kɛ pé kpaʼ zhyémve yéré, pé zyé ndzááne pǔkristo pɛ́ pɔ́b kɛ pɛ́ Yerʉ́salɛm nɛ́ ne pɛ ŋgəʼo zááme. Ŋkɔŋɔ pɔŋ náá gbáʼá ndzó ŋgɔŋ Zhʉdé pú ŋgɔŋ Samari. Ndaʼ ghaŋántɔ́b Yěsô mbé gbáʼá yɔ́b pó. 2Pɔŋ pɛ́ pɔ́b kɛ tséʼé pɔ́ɔ́ Mboʼmvé nɛ́, cʉ́ Etyɛŋ, mbó ŋkhɔ́ wé kaʼatɛ. 3Ŋgɛ́ ŋkhú ne Sɔlə, a sáʼá yé tʉ̌ŋ pé ne mbône pǔkristo. A tsáʼa pɛ ndáb pé ne ŋkaŋ, tubɔ ghaŋá psyɛ́ndzɔʼ ndzóó, mbzíŋi pwɛ pěŋgyé máʼá ndátsáŋ. 4Pɔŋ pɛ́ pe kɛ zhyɛ́ pɔ́b gbéʼé nɛ́, ke ghú ywoʼ ywoʼ, ncʉ́rɛ Ŋkəŋ Sʉ́ʼʉ.
Pe cʉrí Nsómboʼmvé ndzó ŋgɔŋ Samari
5A kɛ pé néré, Filipo wɛ́ a kɛ pfiŋɛ yé ndzó taʼ mbɛ́lʉ́ŋ Samari nɛ́, cʉ́rɛ no Kristo yóʼó. 6Ŋkɔŋɔ ŋɔŋ náá yóʼó psyé təŋé mɔ́b, ndzóʼ nsó wɛ́ Filipo kɛ tsɔ nɛ́, ne taʼ ndzɔʼ. Ŋkyé ŋgâ pe kɛ zóʼó mbó njʉ́ meno shʉyédme pɛ a kɛ zhyɛ́ nɛ́. 7Pɛ zhʉye kəpɔŋ zááme kɛ ghéʼe né tʉ̌ŋ twɔ̌ mbəb pɔŋ. Pɛ kʉ́ŋʉ́ pwɛ pɛ pfɔ́mbəb zááme tsɛ́ʼɛ́ fwôghɔŋ. 8Néré, ndebéne zááme pɛ́ ndzó mbɛ́lʉ́ŋ yéré.
9A kɛ ghɛ́ mbɛ néré, taʼ ŋɔŋ kɛ pɛ́ ndzó mbɛ́lʉ́ŋ yéré tíí pé Símo. A ntsɔ́ ŋgâ a tséʼé ghebe kaʼatɛ. A kɛ pé taʼ máʼndzə́b. No péré pɛ́ a kɛ zhyɛ́ nɛ́, tsɛ̂ mbéŋgɔŋ Samari kaʼatɛ, ŋkɔŋ ŋkhoʼ náá. 10Mendzyǎŋandzɔ́rɔ́ njʉ́ ŋgəkód nɛ́, ke mbɛ́ɛ́ ndzəb yé, ntsɔ́ ŋgâ: «Ŋɔŋ wɔŋ, a kpaʼ yé mbé tʉ̌ŋ Mboʼmvé yɛ́ pe fú ne tʉ̌ŋ kəkwéʼe nɛ́.» 11Pɔ́b kɛ yɛ́rɛ́ mbəb yé ne tʉ̌ŋ kɛ́ʼɛ́, ŋkyé ŋgâ a kɛ ghɛmbɛ a kɛ kyáŋá njʉ́ a kɛ máʼndzə́b yéré ne míí mɔ́b, a pe shʉrɛ́no né pɔ́b nɛ́. 12Ntsʉʼmbé, a njʉ́ Filipo kɛ cʉrí Ŋkəŋ Sʉ́ʼʉ ne Nofɔŋ Mboʼmvé mbó cʉrí tíí Yěsô Kristo ne pɔ́b nɛ́, pɔ́b tséʼé psyɛ́ndzɔʼ kpênse, pěŋgyé njʉ́ mbzíŋi nɛ́. 13Ŋkɔ́ʼɔ́ tómbəb Símo ke mbzyɛ́ yé Mboʼmvé kaʼatɛ ke kpéé yé nse. Ntsʉ́ʼ ŋkhoʼyɔŋ ke ndɛrɛ mbəb Filipo. A kɛ tiŋɛ́ pɛ kiŋi pwɛ pɛ meno shʉyédme pɛ́ Filipo kɛ zhyɛ̂ nɛ́, a pó ntaa míí mé ŋkhoʼyɔŋ ntaa yaʼ.
14Ŋkhoʼyɛ́ pɛghaŋantɔ́b Yěsô pɛ́ pɔ́b kɛ pɛ Yerʉ́salɛm nɛ́ kɛ zóʼ ŋgâ mbéŋgɔŋ Samari kɛ psyɛ́ Nsómboʼmvé nɛ́, pɔ́b twɔ́ Pětro pú Zhâŋ yóʼó. 15Njʉ́ pɔ́b kɛ páŋ yóʼó nɛ́, pɔ́b ntsɛ́ʼɛ́ Mboʼmvé ŋkyé Mbéŋgɔŋ Samari, yânéré ŋgâ Zhʉye Yáŋme shʉyí mbəb pɔ́b. 16Ŋkyé ŋgâ a kɛ ghɛmbɛ Zhʉye Yáŋme pé kɛ shʉyí mbəb taʼ ŋɔŋ ndzɔ́ʼɔ́ pɔ́b pó. Pɔ́b kɛ ké kpê ndaʼ nse ne tíí Ntsɛɛpɔŋ Yěsô. 17Mbé kɛ́ʼɛ́, Pětro pú Zhâŋ záb mbwó mɔ́b nɛ́ mbəb mbéŋgɔŋ Samari, Zhʉye Yáŋme shʉyí mbəb pɔ́b.
18Ntsʉʼmbé, ŋkhoʼyɛ́ Símo kɛ zhʉ́ ghaŋántɔ́b Yěsô zába mbwó mɔ́b mbəb pɔŋ, zhʉye Yáŋme shʉyí mbəb pɔ́b nɛ́, a zɔŋɔ fɛ́ mbób ne pɔ́b, 19ntsó ŋgâ: «Puŋ zhyɛ́ ŋgâ kpaʼ mo yáá, mə ké ntséʼé tʉ̌ŋ mɔŋ. Yânéré ŋgâ ŋkɔŋɔ pɔŋ pɛ́ mə ndzab á mbwó máá mbəb pɔ́b náá nɛ́, Zhʉye Yáŋme shʉyí mbəb pɔ́b.» 20Ntsʉʼmbé, Pětro pɔ́rɔ́ pwó yé ŋgâ: «Yɔ́b yɛ́ Mboʼmvé fɛ́ pwó ŋɔŋ pé ndzəndzoʼ nɛ́, njʉ́ wo kpǎŋ ŋgâ tɛɛmbɛ wo zúŋ ne mbób nɛ́, wo, puŋ mbób wo yéré kaa náá ŋgʉŋi! 21No yɛ́ a záʼá ghaŋ nɛ́, yo mbɛd, kii yo yɔ́b ndúŋú pó. Ŋkyé ŋgâ ndzɔʼ wo nsé ŋgerɛŋgéd síŋ Mboʼmvé pó. 22Sěd mbziʼe wo yé kəpɔŋ nɛ́, mbó ntsɛ́ʼɛ́ Ntsɛɛpɔŋ, cyó ŋkhoʼ a máʼ vɔ̌no ndɔ́ɔ́ wo, ŋkyé kpaŋ yekénɛ́ a ndzó ndzɔʼ wo nɛ́. 23Mə njʉ́ ŋgâ wo tséʼé pɛ ndzyě mwɔ̌kəpɔŋ ndzó ndzɔ́ʼ wo, kpii kəpɔŋ pó kwód wo.» 24Símo pód ŋgâ: «Mə mbóʼómbwó, ŋ ŋkɔʼɔtómbəb yúŋ, puŋ tséʼé Ntsɛɛpɔŋ ŋkyé ya, ŋgâ kii yɔŋ zhǐ no yɛ́ puŋ ntsɔ́ nɛ́ ndɛ ŋkúŋɔ ya.»
25Ŋkhoʼyɛ́ Pětro pú Zhâŋ kɛ mě kpêntáŋ pú ncʉríne nsó Ntsɛɛpɔŋ nɛ́, pɔ́b ghɛ́ mbɔ́rɔ́ Yerʉ́salɛm, ndzáʼá ndzó pɛ yáʼ zááme pɛ́ ndzó ŋgɔŋ Samari nɛ́, ncʉ́rɛ ŋkəŋ sʉ́ʼʉ yóʼó.
Filipo fɛ́ kpênse pwo taʼ ŋɔŋ Étyopya
26Aŋgere Ntsɛɛpɔŋ tsɔ́ pwó Filipo ŋgâ: «Wo ŋgú nɛ́ pe ne mboʼ ndzáʼámbab, ndúŋú mɛndɔ́b Egibto, mɛndɔ́b wɛ́ a ŋǎ mbɛ́lʉ́ŋ Yerʉ́salɛm mviŋɛ́ né mbɛ́lʉ́ŋ Gáza nɛ́. Ŋɔŋ, mɛndɔ́b nɛ́ ŋkhoʼyɔŋ pó.» 27Filipo ghú kii púbú táb. Ŋgɛmbɛ taʼ ŋǔ Étyopya wɛ́ pe kɛ swə́ə́ wé nɛ́, tsé mviŋɛ́ mɛndɔ́b wéré. Ŋɔŋ wéré kɛ pé taʼ ŋgaŋafaʼ kəkwéʼe pwó fɔŋ məŋgʉyé Étyopya wɛ́ tíí kɛ pé Kandasə nɛ́. A kɛ tíŋɛ yé ndíŋɛ ŋkɔŋɔ foʼ fɔŋ məŋgʉ́yé wéré náá. A kɛ ghɛ́ mbɛ a ghú Yerʉ́salɛm kɛ́ʼɛ́ ghúʼɔ Mboʼmvé, 28tsé mbɔ́rɔ́ ywoʼ yé. A kɛ ghɔ́rɔ́ ndzó kéré naapeʼe, tsé fú poʼŋweʼe ŋgaŋatsɔ́kpaŋató Mboʼmvé Ezaya. 29Zhʉye Mboʼmvé tsɔ́ pwó Filipo ŋgâ: «Nyǐ mbɛ́rɛ́ kéré naapeʼe wékénɛ́.» 30Filipo kí ndéé, ndzóʼ ŋɔŋ wéré fú poʼ ŋweʼe ŋgaŋatsɔ́kpaŋató Mboʼmvé Ezaya. A psirɛ́ wé ŋgâ: «Wo kɛ́ʼɛ́ tsé ndzóʼó yɔ́b yɛ́ wo fú kɛ́ʼɛ́ nɛ́?» 31A pɔ́rɔ́ pwó yé ŋgâ: «Tɛɛmbɛ mə ndzóʼó níŋ kii ŋɔŋ kéʼé ne mo?» A tsɔ́ pwó Filipo ŋgâ: «Kɔ́ʼ ŋgɔ́rɔ́ pfuŋɔ mo.» 32Ywoʼɔ́ Ŋweʼe yéré yɛ́ a kɛ fú nɛ́ kɛ tsɔ́ɔ́ ŋgâ:
«Njʉ́ taʼ Mɔ́ŋ njʉyǐnjʉyî wé məŋgʉ́yé wɛ́ pe tsé njʉ́yi nwɔ̂ mé kii a khó nɛ́,
Njʉ́ Mɔ́ŋ njʉ̌njʉyî wɛ́ pé ghú tiʼɛ́ nɛ́,
A ke mbé ŋáʼ ntswee yé nɛ́ pó.
33A kɛ fɛ́ mbəb yé syé kaʼatɛ mbzyé no ŋgerɛ́ŋged yɛ́ pé kɛ ghɛ́ ŋgyɛ́ mbəb ye nɛ́.
Pe náʼá mbɔ́rɔ́ ntsɔ́ no ŋgɔbɔ ŋɔŋ yé ŋkʉ́rʉ́ pé níŋ?
ŋkyé ŋgâ pé kɛ póó yé tsómvé ndúŋú tsetsáʼ.»
34Ŋɔŋ Étyopya tsɔ́ pwó Filipo ŋgâ: «Mə mbóʼómbwó, ŋgaŋatsɔ́kpaŋató Mboʼmvé tsɔ̂ wɔ̂ kɛ́ʼɛ́? Tómbəb yé kii ŋɔŋ ndúŋ?» 35Néré Filipo záʼá ndúŋú yéré ywoʼ ŋweʼe, ŋáʼ ntswee yé, ncʉ́ri Ŋkəŋ Sʉ́ʼʉ Yěsô pwó yé. 36Njʉ́ pɔ́b kɛ ghú nɛ́, pɔ́b móó ndúŋú taʼ nse. Ŋɔŋ Étyopya ntsɔ́ pwó Filipo ŋgâ: «Ŋgâ nse pé nɔŋ nɛ́! A pó naŋa kɔ́ ŋgâ mə ndɛ kpéé nse?» [ 37Filipo tsɔ́ pwó yé ŋgâ: «A pɛ́ɛ́ yɛ́ wo psyɛ́ ne ŋkɔŋɔ ndzɔʼ wo náá nɛ́, mbǒ wo kpéé nse.» Ŋɔŋ wéré pɔ́rɔ́ pwó yé ŋgâ: «Mə mbzyɛ́ ŋgâ Yěsô Kristo Mɔ́ŋ Mboʼmvé.»] 38A zhyɛ́ kéré naapeʼe tsébé. Pɔ́b pépáá kpáʼ náá shʉyí nse, Filipo fɛ́ kpênse pwó ŋɔŋ wéré. 39Ŋkhoʼyɛ́ pɔ́b kɛ twɔ́ nse nɛ́, Zhʉye Ntsɛɛpɔŋ zhyɛ́ Filipo ŋʉyí kaʼatɛ ŋɔŋ Étyopya pó mbé tsé njʉ́ wé ŋkʉ́rʉ́ pó. Ntsʉʼmbé a ghɛ́ ŋgú yé ndebɛ yɛbɛ́. 40Filipo pó ŋgɛ́ mvuwɛ́ mbɛɛ ndzó mbɛ́lʉ́ŋ Azotosə. Ke ncʉ́rɛ Ŋkəŋ Sʉ́ʼʉ ndzó ŋkɔŋɔ mbɛ́lʉ́ŋ pɛ́ a kɛ záʼa náá ndzóó nɛ́, kaʼatɛ mbáŋa ŋgɔŋ Sezare.
ទើបបានជ្រើសរើសហើយ៖
Faʼ Ghaŋántɔ́b 8: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
