Faʼ Ghaŋántɔ́b 28
28
No Pɔ́lə kɛ zhyɛ́ Maltə nɛ́
1Ŋkhoʼyɛ́ psi kɛ zú nɛ́, psi zóʼ ŋgâ pe fú ŋkə́ŋnse yéré pe ŋgâ Maltə. 2Mbéŋgɔŋ wéré ghəyɛ́ɛ́ ywí njʉ́ pé ndɛ ŋgəyɛ́ pumésɔŋ nɛ́. Nə́b taʼ mɔ́ɔ́ kəkwéʼe, psi kʉ́yó tsé ndzɔ̂. Ŋkyé ŋgâ mbuŋ kɛ tsé ŋgʉyo, fóó pó tsé kpɛ́ɛ́. 3Pɔ́lə ŋwê káʼá mkpáŋ máʼá mɔ́ɔ́. Ywoʼ fǐ kaʼatɛ, taʼ vii twɔ́ ŋɔ́rɔ́ ndúŋú pwó Pɔ́lə. 4Ŋkhoʼyɛ́ mbé ŋgɔŋ yéré kɛ zhʉ́ nɔ́ wéré ŋɔ́rɔ́ ndúŋú pwó yé nɛ́, pɔ́b tsɔ́ tsetsɛrɛ pɔ́b ŋgâ: «Ŋɔŋ wɔŋ póʼ ghɛmbɛ́ taʼ nɔʼŋɔŋ. A zú pwó lepaanse, ntsʉʼmbé ŋgerɛ́ŋged Mboʼmvé ghɛ́ mbé tee wé pó.» 5Pɔ́lə mii pwó yé, nɔ́ vɔ́ mɔ́ɔ́ kii a zóʼ cyó ndzúʼune. 6Pɔ́b kɛ nzwəʼɛ yɔ́b pé njʉ́ ywoʼ ŋkɔ́ʼɔ́ kii ŋgâ a mvɔ́ pfɔ́ nɛ́. Ntsʉʼmbé ŋkhoʼyɛ́ pɔ́b kɛ kyáŋá mbé zhʉ́ cyó yɔ́b tsé ŋgyɛ́ wé nɛ́ pó, ndzəb nsó wɔ́b sed. Pɔ́b nsó ŋgâ: «Ŋɔŋ wékénɛ́ taʼ Mboʼmvé!»
7A kɛ pɛ ne gháá ywoʼ yɛ́ psi kɛ pé nɛ́, cyó ywóʼ pɛ yóʼó, mbé yé ntsɛ́ssó ghəkód ywoʼ yéré, wɛ́ pe fú ne Pʉbilʉsə nɛ́. Psi ghú ywoʼ yé, a ghəyɛ́ɛ́ ywí njʉ́ sɔŋ pé nɛ́, ne zhyémve pékyéd. 8Fóó ne ncʉ́ŋpaŋ kɛ pɛ́ mbəb tɛd yé kaʼatɛ a nû kúŋ. Pɔ́lə ghú pfúŋɔ́ kúŋ ye ndzab pwó yé mbəb yé, ntsɛ́ʼɛ́ Mboʼmvé, a fwó. 9Néré, ŋkɔŋɔ pɔŋ pɛ́ pɔ́b kɛ tséʼé ghɔŋ ndúŋú ŋkə́ŋnse yéré náá nɛ́, kʉ́yó pfúŋɔ́ yé, a zhyɛ́ ghɔŋ pɔ́b fwó. 10Pɔ́b fɛ́ ŋgúʼune né psi kaʼatɛ ŋkhoʼyɛ́ psi kɛ ghɛ̌ ndɔ́ɔ́ páŋ ŋgú nɛ́, pɔ́b fɛ́ mɔ́b pɛ́ a kɛ zɔŋɔ nɛ́ ne psi.
Pɔ́lə ŋáá Maltə ŋgú Roma
11Njʉ́ psi kɛ zhyɛ́ pénab pékyéd ndúŋú ŋkə́ŋnse yéré nɛ́, psi kɔ́ʼɔ́ ndzó taʼ páŋ Aleʼzandri yɛ́ a kɛ záʼ ŋgabmvé kəpɔŋ pé ndúŋú ŋkə́ŋnse yéré nɛ́. Záʼá Dyosəkʉrə kɛ pɛ́ ndúŋú páŋ yéré njʉ́ mafwɔ ye nɛ́. 12Ŋkhoʼyɛ́ psi kɛ páŋa Sirakʉsə nɛ́, psi ntsébɛ́ yóʼó ne zhyémve pékyéd. 13Ŋgɛ́ ŋáá yóʼó, ké nyíí ne gháánse, mbáŋa Régyo. Keemvé, njʉ́ fəfod ntʉ̌ŋme kɛ ŋáá nɛ́, psi zhyɛ́ zhyémve pépáá mbɔ́rɔ́ mbáŋá Puzɔlə, 14ndzó ywoʼ yɛ́ psi kɛ zhʉ́ pǔkristo, pɔ́b fú ywí ŋgâ psi pɔ́b zhyɛ́ taʼ ŋgâptáŋ ywoʼ pɔ́b nɛ́. Yekénɛ́ mbziʼe njʉ́ psi kɛ zhyɛ́ mbáŋá Roma nɛ́. 15Ndzyěne mbɛ́lʉ́ŋ yéré, pǔkristo pɛ́ pɔ́b kɛ zóʼ mbáŋne myí nɛ́, kʉ́yó ntsérɛ́ ywí kaʼatɛ mbáŋá ntáŋ Apyʉsə, ghɛmbɛ́ ndzó Ywoʼ yíkyéd yɛ́ pe pee mbɔ́rɔ́ ndaʼa nɛ́. Ŋkhoʼyɛ́ Pɔ́lə kɛ zhʉ́ wɔ́b nɛ́, ndzɔʼ yé ŋkú ndzó, a fɛ́ ŋgúʼune pwó Mboʼmvé.
No yɛ́ Pɔ́lə kɛ zhyɛ́ Roma nɛ́
16Njʉ́ psi kɛ páŋá Roma nɛ́, Pɔ́lə wɔ̂ŋ, pé fɛ́ taʼ ywoʼ yáʼá ne ndúŋ yé, mbó fɛ́ taʼ káŋató ne mvyébne wé. 17Ŋkhoʼyɛ́ zhyémve pékyéd kɛ záʼ nɛ́, a fú ŋkɔŋɔ pɛ ghəkód pɛ Yúda pɛ́ pɔ́b kɛ pɛ yóʼó náá nɛ́, ne taʼ ntéré. A ntsɔ́ ne pɔ́b ŋgâ: «Pɔ́ŋmɛ́ páá, mə sháŋá mbəb pú piŋi pó, ké mbó mbé sháŋá ndúŋú núŋú tɛd tɛd piŋi pó. Mə ndátsáŋ féré Yerʉ́salɛm, pe fí ya pwó pɛ Roma. 18Ŋkhoʼyɛ́ pɔ́b kɛ táʼ tsî kaʼatɛ njʉ́ ŋgâ mə ŋgyɛ́ cyó no yɛ́ a tsyɛ́ ŋgâ pe nɔ́ʼ ya ndúŋú nɛ́ pó, pɔ́b zɔŋɔ ntéé ya. 19Ntsʉ́ʼmbé, a njʉ́ pɛ Yúda kɛ pé psyɛ́ nɛ́ pó, mə nsó ŋgâ pe tyáŋa ya síŋ fɔŋ pɛ Roma, kɛ́ʼɛ́ ŋgâ kɔʼɔ tómbəb yé fíʼ ya. Mə ŋgú yóʼó pe ne sɔ́bne mbéŋgɔŋ wíŋi pó. 20A zhyɛ́ yéré mə fú wúŋ ŋgâ piŋi sə́ŋé. Ŋkyé ŋgâ yɔŋ tsáŋ mbəb mo kaʼa, ŋkyé shʉríne yɛ́ pɔ́ŋ Issayɛ tséʼé nɛ́.» 21Pɔ́b pɔ́rɔ́ pwó yé ŋgâ: «Cyó ŋweʼe twɔ́ Zhʉdé mbáŋá ne psi ndɛ́d wo pó. Cyó mɔ́ŋmɛ́ ké mbó mbé páŋá ghaŋ, fú tíí yo, kii ŋgâ ntsɔ́ no kəpɔŋ yɛ́ wo zhyɛ́ nɛ́ pó. 22Ntsʉʼmbé psi zɔŋɔ ndzóʼó yo kpaŋató ne yɔ̂ŋ no, ŋkyé ŋgâ no yekénɛ́ wo kʉ́yó núŋ nɛ́, pɔŋ kirɛ kirɛ́.» 23Pwɛ pɔ́b tíí taʼ zhyémve, pɔb ŋkʉ́yó mbɛ́rɛ́ wé ne pɔŋ zááme ntswědáb yé. Ndzɔ́ʼɔ́ no yɛ́ Pɔ́lə kɛ tsɔ́ nɛ́, a kɛ ntsɔ́ njʉ́ Nofɔŋ Mboʼmvé ghú nɛ́, ndzyěne ne ndzɔ́ʼɔ́ wáá kaʼatɛ mbáŋ ne ŋkhoʼfwɔ̂nab. A taʼa mbziʼe njʉ́ a ŋgyɛ́ pɔ́b séd kpaŋató yɔ́b nɛ́. Ndzyěne ndúŋú ŋweʼe kaŋ Mǔsê kaʼatɛ mbáŋá ndúŋú ŋweʼe ghaŋátsɔ́kpaŋató Mboʼmvé, a nsó no Yěsô ne pɔ́b. 24Pecyó záʼá ndúŋú no yɛ́ a kɛ ntsɔ nɛ́, ntséʼé psyɛ́ndzɔʼ, pecyó ke ndzɛɛ zɛ̌. 25Ŋkhoʼyɛ́ pɔ́b kɛ ghɛ́ ŋgú nɛ́, nsó ndzóʼ pe pɛ́ tsetsɛrɛ pɔ́b pó. Pɔ́lə pó mvíí taʼ no ne pɔ́b ŋgâ: «Nsó Zhʉye Yáŋme wɛ́ ŋgaŋatsɔ́kpaŋató Mboʼmvé Ezaya kɛ ntsɔ́ pwó tɛd tɛd puŋ nɛ́, sísíŋ. No yéré pɛ́ɛ́ ŋgâ:
26“Ghú njʉ́ mbé ŋgɔŋ yɔ̂ŋ, ntsɔ́ ne pɔ́b ŋgâ:
Puŋ kʉ́yé ndzwəʼɛ́ kaʼatɛ, náʼá mbé zóʼ pó.
Puŋ kʉ́yé ndiŋɛ́ kaʼatɛ, náʼá mbé zhʉ́ pó.
27Ŋkyé ŋgâ ndzɔʼ pɔŋ pɔŋ shʉʉ,
Ntəŋé mɔ́b pó kpǐ,
Pɔ́b pwɔ̌ míí mɔ́b,
Yânéré ŋgâ míí mɔ́b ndɛ tsé njʉ́,
Kii pó ndzwəʼé ne ntəŋé mɔ́b,
Kii pó ndzóʼ ne ndzɔʼ yɔ́b
Kɛ́ʼɛ́ ŋgâ pɔ́b ndɛ séd ndzɔʼ yɔ́b fɛ́ ne Mo, Mo Mboʼmvé.
Mbǒ, mə kɛ pɛ́rɛ́ wɔ́b !”
28Puŋ zé nɛ́ ŋgâ, a twɔ́ Mboʼmvé ntwɔ́ nsó ndzǔne wɔ̂ŋ pwó pɔŋ pɛ́ pɔ́b pɛ Yúda nɛ́. Pɔ́b náʼá ndzóʼó, mbzyɛ́.» [29Ŋkhoʼyɛ́ Pɔ́lə kɛ nsó néré nɛ́, pɛ Yúda ghú, nyi mɛʼɛ ntswee tsetsɛrɛ pɔ́b.] 30Pɔ́lə pó tsó yóʼó ne ŋgǒʼmvé yípáá ŋgerɛ́ŋged, ŋgɛmbɛ a ke mbě yé mbě ndáb ye, mbó ŋgəyɛ́ ŋkɔŋɔ pɔŋ pɛ́ pɔ́b kɛ kʉ́yó pfuŋ yé nɛ́, 31ncʉ́rɛ Nofɔŋ Mboʼmvé, mbó fɛ́ ntʉ́ʉ́ ne no Ntsɛɛpɔŋ Yěsô Kristo ne kɔbɔ́ndzɔʼ kii ŋɔŋ pó fɛ́ wé né ŋgəʼo.
ទើបបានជ្រើសរើសហើយ៖
Faʼ Ghaŋántɔ́b 28: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
