Faʼ Ghaŋántɔ́b 27
27
Pɔ́lə yɔ́ɔ́ mɛndɔ́b Italya
1Ŋkhoʼyɛ́ pe kɛ tíí ŋgâ psi ghú Italya nɛ́, pe fɛ́ Pɔ́lə pwɛ pecyó ghaŋátsáŋ pwó taʼ ntsɛ́ssó mkpǐ káŋató wɛ́ tíí ye kɛ pé Zhʉlyʉsə nɛ́, ndzɔ́ʼɔ́ ntsóʼ mɛdzɔŋ yɛ́ pe kɛ fû ne Ogʉ́sta nɛ́. 2Néré, psi kɔ́ʼɔ́ ndzó páŋ Adramitiwum, yɛ́ a kɛ ghɛ́ ŋgú ndzó pɛ mbɛ́lʉ́ŋ pɛ́ a ne gháánse pɛ́rɛ́ ŋgɔŋ Azi nɛ́. Néré, psi yɔ́ɔ́ mɛndɔ́b. Taʼ ŋɔŋ kɛ pɛ ndzɔ́ʼɔ́ psi, mbé ŋɔŋ ŋgɔŋ Makadoniya ndzó mbɛ́lʉ́ŋ Tésalonikə, tíí ye pe Arisətáákə. 3Keemvé, njʉ́ psi kɛ tsɛ́bɛ Sidɔŋ nɛ́, Zhʉlyʉsə wɛ́ a kɛ náá Pɔ́lə njʉ́ ŋuməsɔŋ nɛ́, tee wé ŋgâ a ghú njʉ́ sɔ́ŋ pé, kɛ́ʼɛ́ ŋgâ pú pɔ́b pó zhʉ́ mbəb wɔ́b, ndébé. 4Psi ŋáá yóʼó, ŋkɔ́ʼɔ́ ndzó páŋ, ndɔ́ɔ́ mɛndɔ́b Shiiprə, ŋkyé ŋgâ, a kɛ ghɛmbɛ fəfod pó ntwɔ̌ siŋ pɔsi. 5Néré, psi siʼá lepaanse yɛ́ a ne gháá pɛ́rɛ́ ŋgɔŋ Silisya pú Paŋfilya nɛ́, ntsebɛ ndzó mbɛ́lʉ́ŋ Míí yɛ́ a Lisya nɛ́. 6Ntsɛ́ssó mkpǐ káŋató wɛ́, zhʉ́ taʼ páŋ yóʼó, yɛ́ a kɛ twɔ́ Aleʼzandri ŋgú ne Italya nɛ́. A zhyɛ́ psi kɔ́ʼɔ ndzó. 7Nsěnyí ywí kɛ náʼ tsʉ́ŋɔ ne pɔ́ŋ zhyémve, kaʼatɛ psi ghɛ́ tsé njʉ́ mbɛ́lʉ́ŋ Kənidə, njʉ́ ŋgəʼo kaʼatɛ. Njʉ́ fəfod kɛ váʼa ywí ne ŋgúne ndzó ywoʼ yɛ́ psi kɛ zɔŋɔ nɛ́, psi syɛ́ mbó ndzáʼa tsî ŋkə́ŋnse Krɛtə, póʼ ywoʼ yɛ tsetsáʼ zɔ nse, pe fû ne Saləmɔnə nɛ́, 8a kaa yɔ́b, psi tɔ́ ndúŋú. Psi siʼá, mbáŋa ndzó cyó ywoʼ yɛ́ pɛ kɛ fú ne Ywoʼɔ́tsyɛpaŋ pǔme nɛ́, pfúŋɔ́ mbɛ́lʉ́ŋ Lase.
9Njʉ́ pɔ́ŋ ŋkhoʼmvé kɛ záʼ nɛ́, ntsyɛ́ne páŋ pó ŋkhú taʼ no ntʉ̌ŋme, ŋkyé ŋgâ a kɛ ghɛmbɛ ndebéne Ndzɛ́ nse kɛ záʼ. Pɔ́lə zɔŋɔ ntsɔ́ no yɛ́ a kɛ kpaŋ nɛ́. 10A ntsɔ́ ne pɔ́b ŋgâ: «Sɔŋ páá, mə ntsé njʉ́ ŋgâ piŋi ghǔ ne ssó ne nsěnyi, mbǒ mɔ́b piŋi mbúbɔ́ kaʼatɛ, piŋi pó mbzyé páŋ pwɛ mɔ́b pɛ y ndzó nɛ́, ké mbó mbzyé ŋuməsɔŋ psyé.» 11Mbɛ néré, ntsɛ́ssó mkpǐ káŋató ke tíí ndzɔʼ yé pé mbəb ntswəpáŋ pú ŋgaŋapáŋ kaʼatɛ ntsɛ́ɛ́ no yɛ́ Pɔ́lə kɛ tsɔ́ nɛ́. 12Njʉ́ a kɛ ghɛmbɛ a pe ŋgabmvé yɛ́ fóó gháʼmbwo nɛ́, ywoʼ tsyɛ́ páŋ pe pû pó. Puzááme nsó ŋgâ, pe ké mbó ndɔ́ɔ́ mɛndɔ́b ŋgǔ ne ssó, njʉ́ mbéyɛ́ tɛɛmbɛ pe páŋá Fenisya, tsó yóʼó ŋgábmvé yéré záʼ nɛ́. Fenisya, cyó ywoʼɔ tsyɛpáŋ yɛ́ a mbɛ́lʉ́ŋ Krɛtə nɛ́, mbɛ́lʉ́ŋ yɛ́ cyó ndzáʼ ye tiŋɛ́ ntswɛɛ ménab ye mboʼpfe, cyó tiŋɛ́ ntswɛɛ ménab ye mboʼmbab nɛ́.
Fəfod ntʉ̌ŋme záʼa ndúŋú nse
13Mɔ́ntiʼa fəfod kɛ twɔ́ ndzaʼ mboʼmbab, pɔ́b zhʉ́ kɛ́ʼɛ́ ŋgâ, no yɛ́ pɔ́b kɛ kpáŋa nɛ́, nyí. Pɔ́b kee páŋ, ntaʼa mɛndɔ́b ne gháánse mbɛ́lʉ́ŋ Krɛtə. 14Ntsʉʼmbé, kpaʼ fǐme wéré, taʼ mɛ́mɛ́ syépfíí yɛ́ pe fu ne Ərakilɔŋ nɛ́, twɔ́ ŋkə́ŋnse ŋkʉ́yó mbɛ́rɛ́ wɔ́b. 15Fəfod kyɛ́ páŋ kaʼatɛ a pó mbé kúʼɔ́ ne mbǒdne ŋkʉ́rʉ́ pó. A tee mbəb ye pwó ye, kaʼatɛ psi syɛ ŋgʉ́ywʉ́. 16Psi záʼ ne gháá Mɔ́ŋ ŋkə́ŋnse ndzaʼ mboʼmbab yɛ́ pe kɛ fú ne Koda nɛ́. Psi zhʉ́ ŋgəʼo kaʼatɛ, tɛ́ Mboʼmvé pó mbe pɛ ne psi pó, mbǒ psi kaa pó mbé kúʼɔ́ ne gbǎne pɔŋtii paŋ kpéémbəb ŋkʉ́rʉ́ pó. 17Ŋkhoʼyɛ́ psi kɛ nyʉʼe kaʼatɛ níŋ i pɔŋ páŋ pɛ́ ndzó páŋ nɛ́, psi taʼ pɔ́ŋ mpkii, ŋkwód ŋkɔʼɔ páŋ núŋ ndzyɛ. Njʉ́ psi kɛ pɔ́ɔ́ ŋgâ a ndɛ ŋgú mvɔ́ ndúŋú pɛ pfiŋɛ səsé pɛ́ a ne yiŋi ndzaʼ Mbɛ́lʉ́ŋ Sitə nɛ́, psi máʼ yɔ́b tsyɛ́ páŋ nse. Mbɛ néré, páŋ ké mbó ŋgʉ́ ywʉ̌ ŋkʉ́rʉ́, ŋgǔ. 18Keemvé, njʉ́ fəfod kɛ ke nyʉ́ ywí nyʉ́ kaʼatɛ nɛ́, pe túbú mɔ́b pɛ́ a kɛ pɛ ndzó páŋ nɛ́, maʼá nse. 19Zhyémve pekyéd ghɛ́ ndzáʼa, ŋkɔʼɔ tómbəb ghaŋátswɛpáŋ túbú mwɔ̌páŋ máʼá nse. 20A kɛ pé ŋkhoʼyɔŋ, zhyémve zááme njʉ́ ménab kii ndíí saŋ kɛ nyóʼó mbzítíí ye mvé nɛ́ pó. Mbɛ néré, fəfod ké mbó ntʉ̂ŋɔ ntʉ̌ŋɔ, njʉ́ pe kǎ kɛ zhʉ́ nɛ́ pó, kaʼatɛ ndzyěne néré, kpaŋató ndzǔne twɔ́ tó psi.
21Psi kɛ pe zó cyó yɔ́b féré zhyémve pó, ŋkhoʼyɛ́ Pɔ́lə kɛ ŋáá syé tsetsɛrɛ pɔ́ŋ, nsó ŋgâ: «Sɔŋ páá, puŋ zhʉ́! A ghɛmbɛ a zɔŋɔ ŋgâ puŋ zóʼ ntswee ya, mbé ŋáá Krɛtə pó. Mbǒ piŋi psyé mɔ́b pɔ́ŋ pɛ́ a púbú nɛ́ pó, mbɛ pɛ́ a pwó nɛ́. 22Ntsʉʼmbé, a ne ŋkhoʼyɔŋ, mə ntsɔ́ ne puŋ ŋgâ puŋ tséʼé gbǎndzɔʼ, ŋkyé ŋgâ ntsyé ŋɔŋ ndzɔ́ʼɔ́ puŋ mpfó pó. A ndaʼ páŋ yɛ́ piŋi mbzyé nɛ́. 23Kpaʼ netsúʼ ndzebé, taʼ aŋgere Mboʼmvé wɛ́ mə mbɛ ya pe pwó ye, mbó fáʼa pwó ye nɛ́, nyóʼ mbəb ye ne mo, 24nsó ŋgâ: “Pɔ́lə, wo ndɛ mbɔ́ɔ́. A zɔŋɔ ŋgâ pe fiʼ wo síŋ fɔŋ pɛ Roma. Mboʼmvé pó ntee tsómvé ŋkɔŋɔ pɛkpee pó náá ndzó mbwó mó.” 25Puŋ tséʼé gbǎndzɔʼ kɛ sɔŋ páá! Mə ndzɛ́ Mboʼmvé ya! A ŋké ntwɔ̌ njʉ́ a tsɔ́ ne mo nɛ́. 26Páŋ yiŋi ntsyɛ́ ndúŋú taʼ ŋkə́ŋnse.»
Psi zú pwó fəfod ntʉ̌ŋme
27A kɛ pe zhʉbɛ́ ntsɔ̌b netsúʼ yíkwa njʉ́ psi kɛ ywʉ́ ndúŋú lepaanse Adryatikə nɛ́. Ne ywɔ̌ ghəghóʼŋgɔŋ, ghaŋátswɛpáŋ zóʼ ŋgâ pɔ́b tsé mbáŋa pfúŋɔ́ tsetsáʼ. 28Pɔ́b maʼ fuʼ ye, njʉ́ ŋgâ a kɛ sɛ̌ ne metaa ghúbmekyéd ne yísambáá. Pɔ́b náʼ mbó nyi, ké mbó fuʼ ŋkʉ́rú, njʉ́ ŋgâ a kɛ sě ne metaa ghúbmebaa ne yifwɔ̂. 29Njʉ́ pɔ́b kɛ tsé mbɔɔ ŋgâ tɛɛmbɛ pɔ́b ntɔ́ ndúŋú pɛ yɛ́dŋgɔʼ nɛ́, pɔ́b maʼ ywɔ̌ tsyɛpáŋ yíkwa ndzəb, tsé swɔ̂ ŋgâ mvé kee zǎŋazâŋa. 30Njʉ́ ghaŋátswɛpáŋ kɛ táʼa yɔ́b mɛndɔ́b pe ne ŋkíne nɛ́, pɔ́b zɔŋɔ máʼ mɔ́ŋ páŋ mkpêpɔŋ nse. Ŋgyɛ́ ŋgɔ́b ŋgâ pɔ́b zɔŋɔ máʼá ywɔ̌tsyɛ́páŋ yɛ́ a ssó nɛ́, nse. 31Pɔ́lə tsɔ́ pwó ntsɛ́ssó mkpǐ káŋató pwɛ káŋató ŋgâ: «A pɛɛ yɛ́ pɔŋ pɔŋ tsʉʼɔ́ ndzó páŋ nɛ́ pó, mbǒ mbɛ tómbəb yúŋ, puŋ ndzú pó.» 32Ŋkhoʼyɛ́ a kɛ nsó néré nɛ́, pɛ káŋató tséé pɛ kpii pɛ́ a kɛ pɛ ndúŋú mɔ́ŋ páŋ mkpêpɔŋ nɛ́, ntéé a ghú.
33Pɔ́b ghɛ́ tsé ndzwəʼɛ ŋgâ mvé kee, Pɔ́lə tsɔ́ pwó ŋkɔŋɔ pɔŋ náá ŋgâ pɔ́b páʼ ntswee wɔ́b. A kɛ tsɔ́ ne pɔ́b ŋgâ: «Yɔŋ zhyémve ntsɔ́byikwa ndzebé njʉ́ puŋ zhʉ́ ŋgəʼo, ntsáŋa kii zó yɔ́b nɛ́. Puŋ kembé zó yɔ́b pɔɔ? 34Mə ntsɔ́ nɛ́ ne puŋ ŋgâ puŋ zó mɔ́b ŋkyé ŋgâ a mkpéé yéré nɛ́ mkpee wúŋ. Mə ntsɔ́ nɛ́ ne puŋ ŋkʉ́rʉ́, mbɛ mkpee nwɔ̌tó taʼ ŋɔŋ ndzɔ́ʼɔ́ puŋ mbwó pó.» 35Ŋkhoʼyɛ́ a kɛ nsó néré nɛ́, a yɔɔ mbré, fɛ́ ŋgúʼune pwó Mboʼmvé ndúŋú síŋ ŋkɔŋɔ ŋɔŋ náá, mboʼ, tsé mpfɔ́rɔ́. 36Néré, ŋkɔŋɔ wɔ́b náá tséʼé zyaŋámbəb, ndɔ́ɔ́ pɔ́b mɔ́b ndzó. 37Psi kɛ kaa náá mbé ŋɔŋ kpǐ yípáá ne ghúbmesambáá ne yintóó ndzó páŋ. 38Ŋkhoʼyɛ́ pe kɛ zó mɔ́b kaʼatɛ ndzód nɛ́, pe máʼ bele nse, kɛ́ʼɛ́ ŋgâ páŋ zyaŋa.
39Ŋkhoʼyɛ́ mvé kɛ kee nɛ́, ghaŋátswɛpáŋ pó mbé kúʼɔ́ ne ndzéne ywoʼ yɛ tsetsáʼ yóʼó nɛ́ ŋkʉ́rʉ́ pó. Ntsʉʼmbé pɔ́b zhʉ́ taʼ ywoʼ yɛ́ nse nɔ́ tsetsáʼ, ywoʼ yɔ́ɔ́ fóó pɛ yóʼó nɛ́, kpáŋa tó pɔ́b pe ŋgâ tɛɛmbɛ pɔ́b ghú yóʼó cyó ŋkhoʼ páŋ ntsyɛ́ nɛ́. 40Néré, pɔ́b kee kpii ndúŋú ywɔ̌ tsyɛ́ páŋ, ntéé a ghú nse, ŋkee sitya páŋ yɛ́ a ndzəb, sǐ ghubi páŋ ŋkuʼu fɛ́ nsó, ndɔ́ɔ́ mɛndɔ́b ywoʼ yɔ́ɔ́ fóó yɛ́. 41Ntsʉʼmbé, pɔ́b vɔ́ ndúŋú pfiŋɛ səsé, páŋ tɔʼɔ yóʼó, kaʼatɛ tó páŋ kúŋɔ ndzɔ́ʼɔ́ səsé kaʼatɛ ŋəréne pó mbé pé ŋkʉ́rʉ́ pó. Mbaʼnse sáʼá ndzəb paŋ náá. 42Cyó kpaŋ kʉ́yó tó pɛ káŋató ŋgâ pɔb nɔ́ʼ ghaŋátsáŋ, kɛ́ʼɛ́ pɔ́b ndɛ mboʼzháʼá kí. 43Ntsʉʼmbé, ntsɛ́ssó mkpǐ káŋató sɛ́ɛ́ ŋgâ a mkpéé Pɔ́lə, náŋa pɛ káŋató ne ŋgyɛ̌ne no yɛ́ pɔ́b kɛ kpáŋa nɛ́. A tsɔ́ pwó pɔŋ pɛ́ pɔ́b kɛ zɛ́ poʼzháʼá nɛ́, ŋgâ pɔ́b kpɛ́ɛ́ ssó mvɔ́ nse, ŋgú ndúŋú tsetsáʼ, 44pecyó ghɛ́ ndzɔŋɔ wɔ́b ndúŋú pɛ pəláŋ kii ŋgâ ndúŋ pɛ pɛ́rɛ́ páŋ. A pe nɛ́ njʉ́ pɔ́b kɛ zhyɛ́ ntwɔ́ ndúŋú tsetsáʼ kii ŋɔŋ pfó nɛ́.
ទើបបានជ្រើសរើសហើយ៖
Faʼ Ghaŋántɔ́b 27: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
