Faʼ Ghaŋántɔ́b 18
18
Pɔ́lə fɛ́ Nsó Mboʼmvé ndzó mbɛ́lʉ́ŋ Korɛŋto
1Pɔ́lə kɛ ŋáá ndzó mbɛ́lʉ́ŋ Atɛ́ɛ́nə ŋgú ndzó mbɛ́lʉ́ŋ Korɛŋto. 2Ŋkhoʼyɛ́ a kɛ páŋa yóʼó nɛ́, a zhʉ́ taʼ ŋɔŋ Yúda, tíí yé pé Akilasə, ŋgɛmbɛ mbé ŋɔŋ pɛ́rɛ́ ŋgɔŋ Pɔ́ŋ. A kɛ ké kɛ ŋaa ŋǎ Italya pú ŋgʉyé Prisilya. A kɛ ghɛmbɛ Kôlodə, fɔŋ pɛ Roma ŋwéʼé taʼ ŋweʼe fɛ́ ŋgâ, ŋkɔŋɔ pɛ Yúda náá ŋáá ndzó mbɛ́lʉ́ŋ Roma. Pɔ́lə suʼú mbəb yé mbɛ́rɛ́ wɔ́b 3ŋkyé ŋgâ pɔ́b kɛ ke fáʼa taʼ mbziʼe faʼ. Pɔ́b kɛ pe ghaŋákúrɔntab. Néré, á tsó yóʼó pwɛ pɔ́b tsé fáʼa. 4Ŋkɔŋɔ pɛ zhyéze pɛ Yúda náá, Pɔ́lə yɔ́ɔ́ nsó ndántéré pɔ́b, ntáʼa ndzáʼ yé njʉ́ pɛ Yúda pwɛ pɛ Gerɛʼ mbzyɛ nsó yé nɛ́. 5Ntsʉʼmbé, ŋkhoʼyɛ́ Silasə pú Timoté kɛ twɔ́ Makadoniya mbáŋá yóʼó nɛ́, Pɔ́lə yɔ́ɔ́ yé ŋkɔŋɔ ŋkhoʼ náá pe ne ntsóne Nsó Mboʼmvé, ndwɛ́ keʼe sə́ŋɛ pɛ Yúda ŋgâ a Yěsô mbé Kristo. 6Ntsʉʼmbé, pɔ́b pé tsé mbzyɛ́ pó, mbó nto Pɔ́lə tó. Pɔ́lə pód pfuŋ yé, ntsɔ́ ne pɔ́b ŋgâ: «Nsə múŋ ke ŋkhú nɛ́ pe tó puŋ! Mə sǒ ya nɛ́ ndáŋ. Ne Ndzyěne ŋkhoʼyɔŋ, mə ŋgúú pfúŋɔ́ pɔŋ pɛ́, pɔ́b pɛ Yúda nɛ́ pó.» 7A ŋǎ yóʼó, ŋgú yóʼó cyó taʼ ŋɔŋ, tíí pé Tityʉ́sə Zhʉstʉsə, mbé taʼ ŋɔŋ ŋgúʼɔ Mboʼmvé, ndáb yé pɛ́ ne ŋgə́ ndántéré pɛ Yúda. 8Krispʉsə wɛ́ a kɛ pe ntsɛ́ssó ndántéré pɛ Yúda nɛ́, psyɛ́ Ntsɛɛpɔŋ pwɛ ŋkɔŋɔ ndǎ ndáb yé náá. Puzááme ndzó mbɛ́lʉ́ŋ Korɛŋto pɛ́ pɔ́b kɛ zóʼ nsó Pɔ́lə nɛ́, psyɛ́ Mboʼmvé mbó kpênse. 9Taʼ netsúʼ, Ntsɛɛpɔŋ ntsɔ́ pwó Pɔ́lə ndzɔ́ʼɔ́ zhʉ́ywoʼ ŋgâ: «Ndɛ ntséʼé pɔ́ɔ́, ke ntsɔ̌ no yɛ́ wo tsɛ́ʼɛ́ ne ntsóne nɛ́, wo ndɛ móʼ ntswee wo, 10ŋkyé ŋgâ, a paʼa nɛ́. Cyó ŋɔŋ wɛ́ tɛɛmbɛ a máʼ pwó yé mbəb wo, ndzáá wo ne ŋgəʼo nɛ́, ghú pó. Ŋkyé ŋgâ, a ndzó mbɛ́lʉ́ŋ yɔ̂ŋ, puzááme kɛ pɛ́ ne mo.» 11Pɔ́lə tsó yóʼó ne taʼ ŋgǒʼmvé ne pénab péntóó, fɛ́ Nsó Mboʼmvé.
Galyɔŋ kirɛ́ ne sǎbne fiʼ Pɔ́lə
12Ŋkhoʼyɛ́ Galyɔŋ kɛ pé ŋgɔ́bmenaʼ ndzó pɛ́rɛ́ ŋgɔŋ Akayi nɛ́, pɛ Yúda tséʼé taʼ ntswee, nyí menaŋ, gbâ Pɔ́lə ŋgú ne yé ŋgâ pe fiʼɛ wé. 13Pɔ́b nsó ŋgâ: «Ŋɔŋ wɔ̂ŋ zɔŋɔ tsíŋɛ́ pɔŋ, pé pó mbé tsé ŋgúʼɔ Mboʼmvé pé njʉ́ a zɔŋɔ nɛ́ pó!» 14Pɔ́lə kɛ ghɛ́ ndɔ́ɔ́ nsó, ŋkhoʼyɛ́ Galyɔŋ kɛ pɔ́rɔ́ pwó pɛ Yúda ŋgâ: «Mə ŋgâ kâ pɛ Yúda! A ghɛmbɛ ŋɔŋ wɔ̂ŋ nɔ́ʼɔ́ ŋɔŋ kii ŋgyɛ̌ cyó no yɛ́ a fɛ́ pfɔ́shʉ́ŋ nɛ́, mbǒ mə ndzóʼ fiʼ yúŋ. 15Ntsʉʼmbé, a kii ŋgɛ́ mbɛ́ njʉ́ puŋ fiʼɛ́ wé pé ŋkyé pɛ́ ntʉ́ʉ́, pɛ́ tíí pwɛ pɛ kaŋ pɛ a tiŋɛ́ wúŋ nɛ́, a zhʉ́ʉ́ wúŋ. Tɛɛmbɛ, mo, mə mbé nsé tsé fiʼɛ ŋkɔ́rɔ́ meno pe ké nɛ́ pó.» 16Ŋkhoʼyɛ́ a kɛ nsó kɛ́ʼɛ́ nɛ́, a núʼɔ́ wɔ́b. 17Ŋkɔŋɔ wɔ́b náá gbáá Sɔsəthɛŋ, ntsɛ́ssó ndántéré pɛ Yúda, mvɔ́ tó ye ne ŋkɔd ndzó ywoʼɔ́ sábáfiʼ. Ntsʉʼmbé Galyɔŋ zyé mbé tiŋi pó.
Pɔ́lə pód ndzəb Aŋtyoshə
18Pɔ́lə kɛ cʉ̌yi cʉ̌yi kyáŋá Korɛnto. Ntéé pǔkristo ŋkhoʼyɔŋ, ndɔ́ɔ́ Prisilya pú Akilasə pwɛ pɔ́b kɔ́ʼɔ́ ndzó páŋ ŋgú ne Sirya. A zhyɛ́ pe k wɔ̂ tó yé ndzó mbɛ́lʉ́ŋ Saŋkré, ne ndûŋune kaʼ yɛ́ a kɛ kaʼa pwó Mboʼmvé nɛ́. 19Pɔ́b páŋá Éfɛ̂zə. Pɔ́lə tee pɛkpee pé yóʼó, ŋgú yé ndántéré pɛ Yúda, pwɛ pɛ Yúda tsé ntsɔ́. 20Pɛ Yúda gháá pwɛ pɔ́b pó náʼ ndaʼ pɔ́ŋ zhyémve, ntsʉʼmbé, Pɔ́lə kíri. 21A ghɛ́ ŋǎ ŋgú, ntsɔ́ ne pɔ́b ŋgâ: «A pɛ́ɛ́ yɛ́ Mboʼmvé psyɛ́ nɛ́, mbǒ mə náʼá mbɔ́rɔ́ ŋkʉ́yó cyó kɛɛ pfúŋɔ́ puŋ.» A yɔ́ɔ́ páŋ Éfɛ̂zə 22ntsébɛ́ Sezare, kɔ́ʼɔ́ ndáméted, ntsɛ́ʼɛ́ pǔkristo, mbɔ́rɔ́ mviŋɛ Antyoshə, 23ywoʼ yɛ́ a kɛ náʼ kyáŋá yóʼó nɛ́. A pó ndɔ́ɔ́ mɛndɔ́b, ŋkɛ́rɛ́ ndzó pɛ́rɛ́ ŋgɔŋ Galasi pú Firizhi, ne níŋine ndzɔʼ ŋkɔŋɔ pǔkristo.
Apolosə ghú Éfɛ̂zə mbó ŋgú Korɛŋto
24Taʼ ŋɔŋ Yúda wɛ́ pe kɛ fú wé ne Apolosə, ŋgɛmbɛ pe pfɛ́ wé pé ndzó mbɛ́lʉ́ŋ Aleʼzandri nɛ́, kɛ páŋá Éfɛ̂zə. Á kɛ pe taʼ ndzɛ́no, mbó níŋí tó yé ndúŋú Ŋweʼe Mboʼmvé kaʼatɛ. 25Pe kɛ nyóʼó wé ne mɛndɔ́b Ntsɛɛpɔŋ. A tsɔ́ Nsó Mboʼmvé mbó nyóʼó wɔ́b ne no Yěsô kpaʼ ŋgerɛ́ŋged ne ŋgîne kaʼatɛ. Ntsʉ́ʼmbɛ a kɛ ke ndzɛ́ yé pe ndaʼ kpênse yɛ́ Zhâŋ kɛ fɛ́ nɛ́. 26A tsé ntsɔ́ no ndántéré, tsɔ̌ ne kɔbɔ́ndzɔʼ. Ntsʉʼmbé ŋkhoʼyɛ́ Prisilya pú Akilasə kɛ zóʼó wé nɛ́, pɔ́b yɔ́ɔ́ wé, mbó ndwɛ̌ nyóʼ ndáá mɛndɔ́b Mboʼmvé pwó yé. 27Njʉ́ Apolosə kɛ zɔŋɔ ŋgú Akayi nɛ́, pǔkristo níŋi ndzɔʼ yé, ŋweʼe taʼ ŋweʼe pwó pǔkristo ndzó pɛ́rɛ́ ŋgɔŋ yéré, ŋgâ pɔ́b ghəyɛ́ wé sʉ́ʼʉ. A ke ŋgɛ́ mbáŋa, Mboʼmvé, ye wɛ́ a tséʼé pǔpfob nɛ́, zhyɛ́ a tséʼé ndáá ghebe pwó pǔkristo 28ŋkyé ŋgâ, mbziʼe yɛ́ a kɛ yɔ́ɔ́ Ŋweʼe nyóʼó pwó pɛ Yúda tétáá ŋgâ a Yěsô mbé Kristo nɛ́, a kɛ ghɛmbɛ pɔ́b pó mbé kúʼɔ́ ne ŋáʼne ntswee wɔ́b ŋkʉ́rʉ́ pó.
ទើបបានជ្រើសរើសហើយ៖
Faʼ Ghaŋántɔ́b 18: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
