Faʼ Ghaŋántɔ́b 17
17
Pɔ́lə cʉrí Nsómboʼmvé Tésalonikə
1Pɔ́b záʼ ne Anfipolisə pú Apoloni mbáŋá Tésalonikə, ndzó ywoʼ yɛ́ pɛ Yúda kɛ tséʼé ndántéré nɛ́. 2Pɔ́lə ŋkúŋɔ́ ndzóó, njʉ́ a kɛ pě ŋkúŋɔ nɛ́. Ne kpaʼ zhyéze yíkyéd ntsiŋɛ ntsiŋɛ́, a yɔ́ɔ́ Ŋweʼe yáŋme fɛ́ ntʉ́ʉ́ núŋ ne pɔ́b. 3A kéʼ mbó nyóʼ ne pɔ́b ŋgâ Kristo kɛ ghɛ̌ njʉ́ ŋgəʼo mbɔ́rɔ́ njʉyɛ́ ne vó. A pó nsó ŋgâ: «Kristo wéré, a Yěsô wɛ́ mə ncʉ́rɛ ne puŋ kaʼa nɛ́.» 4Pecyó pɛ Yúda, Gerɛʼ zááme pɛ́ pɔ́b kɛ ke ŋguʼɔ yɔ́b Mboʼmvé nɛ́, pwɛ pěŋgyé zááme pɛ pɔ́b kɛ pé pɛ mɛ́tó nɛ́, psyɛ́ nsó wɛ́ Pɔ́lə pú Silasə kɛ tsɔ́ nɛ́, ntsʉʼɔ́ ndzəb pɔ́b.
5Ntsʉʼmbé pecyó pɛ Yúda tsɛ́ʼɛ́ zuʼɔ́ ŋgyé, fú pɛ ntʉ̌ŋɔtó pɛ́ pɔ́b kɛ ŋkɛrɛ ndzó pɛ ntʉ́ʼé mɛndɔ́b nɛ́, pɔ́b tsiŋɛ pɔŋ, pɔ́b máʼ vaʼ ndzó mbɛ́lʉ́ŋ. Pɔ́b ŋáá ŋgú ndáb Zhasɔŋ ne ntáʼne Pɔ́lə pú Silasə ŋkyé ŋgâ pɔ́b kɛ zɔŋɔ fiʼɛ wɔ́b tétáá. 6Njʉ́ pɔ́b kɛ pé zhʉ́ wɔ́b nɛ́ pó, pɔ́b gbáá Zhasɔŋ pwɛ pecyó pǔkristo ŋgú ne wɔ́b síŋ pɛ ntsɛ́ssó mbɛ́lʉ́ŋ, nsó ŋgâ: «Pɔŋ pɔ́ŋ pɛ́ pɔ́b ghaŋ kaʼa nɛ́, a pɔŋ pɛ́ pɔ́b máʼ vaʼ ndzó ŋkɔŋɔ ŋgɔŋ náá nɛ́. A kiʼi mbɛ ne ŋkhoʼyɔŋ, pɔ́b kɛ nyi nɛ́ kaʼatɛ mbáŋa ghaŋ. 7Zhasɔŋ kii ghəyɛ́ wɔ́b. Ŋɔŋ ndzɔ́ʼɔ́ pɔ́b nyí njʉ́ kaŋ fɔŋ pɛ Roma tsɔ́ nɛ́ pó. Pɔ́b gháá cyó fɔŋ yóʼó tíí ye pe Yěsô.» 8Mbziʼe njʉ́ pɔ́b kɛ tsɔ́ ŋgeʼe nɛ́, no yéré kɛ́bɛ́ pɛ ntsɛ́ssó mbɛ́lʉ́ŋ pwɛ ŋkɔŋɔ pɔŋ náá, 9pɔ́b pfiri ŋgâ Zhasɔŋ péé tó ye pwɛ ye pɛkpee pé ŋkɔŋ, pe pɔ́rɔ́ ntee wɔ́b.
Pɛ Yúda ghəyɛ́ Pɔ́lə pú Silasə Bere
10Pǔkristo nyáʼá ŋgyɛ́ Pɔ́lə pú Silasə ghú mbɛ́lʉ́ŋ Bere netsúʼ. Pɔ́b ke ŋgɛ́ mbáŋa, ŋkúŋɔ ndántéré pɛ Yúda. 11Pɛ Yúda pɛ́ pɔ́b kɛ pɛ́ Bere nɛ́, kɛ ghébé mvé kaʼatɛ ntsɛ́ɛ́ pɔ́ŋmɛ́ pɔ́b pɛ́ pɔ́b kɛ pɛ́ Tésalonikə nɛ́. Pɔ́b kɛ zóʼ Nsó Mboʼmvé níŋí tó yɔ́b. Ŋkɔŋɔ zhyémve náá, pɔ́b kpɛ́ʼɛ Ŋweʼe yáŋme ne njʉ́ne mbéyɛ́, meno pɛ́ Pɔ́lə kɛ tsɔ́ ne pɔ́b nɛ́ kɛ cʉ̌yi mbé néré sísíŋ nɛ́. 12Pɔŋ zááme ndzɔ́ʼɔ́ pɔ́b tséʼé psyɛ́ndzɔʼ, mbɛ pɛ pěŋgyé Gerɛʼ pɛ́ pɔ́b kɛ pé pɛ mɛ́tó nɛ́, pwɛ mbzíŋi zááme.
13Ntsʉʼmbé, ŋkhoʼyɛ́ pɛ Yúda pɛ́ pɔ́b kɛ pɛ́ Tésalonikə nɛ́ kɛ zóʼ ŋgâ Pɔ́lə tsé ncʉ́rɛ Nsómboʼmvé Bere nɛ́, pɔ́b ke mbó ndɔ́ɔ́ mɛndɔ́b ne ŋkʉ́yóne máʼ vaʼ yóʼó mbó tsiŋɛ pɔŋ ŋkʉ́rʉ́. 14Néré, pǔkristo zhyɛ́ Pɔ́lə ghú ne gháá lepaanse, ŋgɛ́ ŋgú, ntéé Silasə pú Timoté yóʼó. 15Pɔŋ pɛ́ pɔ́b kɛ tyáŋa Pɔ́lə nɛ́ ghú ne yé kaʼatɛ mbáŋa mbɛ́lʉ́ŋ Atɛ́ɛ́nə, ŋgɛ́ mbɔ́rɔ́ ndzəb a ntsɔ́ ne pɔ́b ŋgâ, pɔ́b ntsɔ́ pwó Silasə pú Timoté ŋgâ pɔ́b nyí zǎŋazâŋa mbɛ́rɛ́ wé.
Meno pɛ Pɔ́lə kɛ ntsɔ́ Atɛ́ɛ́nə nɛ́
16Ŋkhoʼyɛ́ Pɔ́lə kɛ nzwəʼɛ pɛkpee pé Atɛ́ɛ́nə nɛ́, no ntsɛ́ɛ́ wé ŋkyé ŋgâ pɛ záʼá ne tíí pɛ mboʼmvé kɛ yúŋɔ ndzó mbɛ́lʉ́ŋ yéré. 17Pɔ́lə pwɛ pɛ Yúda, mbɛ pwɛ pɔŋ pɛ́ pɔ́b pɛ Yúda nɛ́ pó, ntsʉʼmbé tsé ŋgúʼɔ Mboʼmvé nɛ́, kɛ tsɔ́ no Mboʼmvé ndántéré pɛ Yúda. Ŋkɔŋɔ zhyémve náá, a kɛ ke ntsɔ́ Nsó wéré pwó ŋkɔŋɔ pɔŋ pɛ́ pú pɔ́b kɛ sɛ́rɛ náá ndzó pɛ záŋ nɛ́. 18A kɛ ke ntsɔ́ pwɛ pɛ ghaŋákʉyé kpaŋató pɛ́ pé kɛ fú wɔ́b ne pú Epikʉrə pwɛ pɛ́ pe kɛ fú wɔ́b ne pú Zénɔŋ nɛ́. Pecyó tsɔ́ ŋgâ: «Yɔ̂ŋ zɔd zɔŋɔ ntsɔ́ɔ́ ŋgâ kɔ́?» Pecyó ké mbó ntsɔ́ ŋgâ: «A taʼ ŋgaŋantsɔ́ nsó pɛ Mboʼmvé pɛ́ pé zé nɛ́ pó.» Ŋkyé ŋgâ, Pɔ́lə kɛ ncʉrɛ́ Yěsô pwɛ njʉyɛ́ne ne vó. 19Njʉyí ghɛ́ mbɛ, pɔ́b yɔ́ɔ́ Pɔ́lə pú pɔ́b ghú síŋ ntéré kəkwéʼe mbɛ́lʉ́ŋ yɛ́ pé kɛ fú ne Areyopaazhə nɛ́, mvirɛ́ wé ŋgâ: «Tɛɛmbɛ wo sə́ŋɛ́ ywí, yɔ̂ŋ no ffé yɛ́ wo nyóʼó nɛ́ kɔ́? 20Psi zɔŋɔ ndzɛ́ kéétsi nsó ffé yékénɛ́, wo póʼó ntəŋé myí núŋ kɛ́ʼɛ́ nɛ́.» 21A zɔŋɔ ŋgâ pe zé ŋgâ ŋkɔŋɔ mbe Atɛ́ɛ́nə náá pwɛ pushʉyɛ pɛ́ pɔ́b kɛ tsó yóʼó nɛ́ kɛ záʼa záá ŋkhoʼ pé yóʼó ne ntsóne kii ne ndzóʼne pésaʼakɔ ffé.
22Kɛ́ʼɛ́, Pɔ́lə tsɛ́ tsetsɛrɛ Areyopaazhə, nsó ŋgâ: «Mbe Atɛ́ɛ́nə, mə fɛ́ ŋgúʼune zááme ne puŋ ŋkyé ŋgâ puŋ pɔŋ pɛ́, puŋ kʉ́yé no Mboʼmvé kaʼatɛ nɛ́. 23Ŋkhoʼyɛ́ mə nyǐ mbɛ́lʉ́ŋ puŋ nɛ́, mbzítíí ya záʼá ndúŋú mɔ́b pɛ́ puŋ pwɔ̂ a pɛ́ ne puŋ, mbé yé tʉŋɔndɔŋ nɛ́. Mə mbó njʉ́ cyó taʼ yé yɛ́ pé ŋwɛʼɛ yóʼó ŋgâ: “A pwó taʼ Mboʼmvé wɛ́ pe zé nɛ́ pó” wɛ́ puŋ ghuʼɔ wé kii zɛ́ wé nɛ́. Mo, mə ŋkʉ́yó cʉ́rɛ pé yé nɛ́. 24Mboʼmvé wɛ́ a kɛ poʼ mvé mbó ntéŋé ŋkɔŋɔ mɔ́b pɛ a ndzóó náá nɛ́, á yé mbé Ntsɛɛpɔŋ pépéé pú tsetsáʼ. A ndɛ mbé tsó ndzó ndáb yɛ́ a ŋkwód pumésɔŋ nɛ́ pó. 25Ŋkhoʼyɛ́ a tsé fáʼá faʼ yé nɛ́, a pe yɔŋɔ́ mbwó pumésɔŋ njʉ́ kii cyó no yóʼó ntsɛ́ɛ́ wé nɛ́ pó. Yé wɛ́ a fɛ́ tsómvé, fɛ́ zhʉye pwɛ ŋkɔŋɔ yɔ́b náá, pwó ŋkɔŋɔ pɔŋ náá nɛ́.
26A kɛ yǎ mbəb ndaʼ taʼ ŋɔŋ, ŋgyɛ ŋgâ ŋkɔŋɔ mvémvé náá pe, ntsó ndúŋú ŋkɔŋɔ tsetsáʼ náá. A tíí yé tíí pɛ ŋgabmvé pwɛ ndii ŋgɔŋ pɛ́ pɔ́b tsó yóʼó nɛ́, 27kɛ́ʼɛ́ ŋgâ pɔ́b táʼá Mboʼmvé, cyó ŋkhoʼ pɔ́b ghɛ́ tsé mébɛ, njʉ́ wé. Mbɛ njʉ́, kpaʼsísiŋ taŋa yé sáá pfúŋɔ́ ntsye ŋɔŋ ndzɔ́ʼɔ́ piŋi nɛ́ pó.
28Ŋkyé ŋgâ a zhyɛ́ yé piŋi tsó mvé, ŋérɛ mbó mbɛ yóʼó njʉ́ pecyó ghaŋáŋweʼɛ́ ŋweʼe púŋ nsó ŋgâ:
“Ŋkyé ŋgâ piŋi pɔ́ŋ pé” nɛ́.
29Néré, njʉ́ piŋi pɔ́ŋ Mboʼmvé nɛ́, a tsé mbé zɔŋɔ ŋgâ piŋi kpáŋ ŋgâ Mboʼmvé fwɛ́ɛ́ tʉŋɔ́paŋ kii mbób, kii yɔ́b yɛ́ pé pwɔ̂ ne tsetsáʼ nɛ́, kii yɔ́b yɛ́ ŋɔŋ k wɔ̂ k wɔ̂ nɛ́, kii yɔ́b yɛ́ ŋɔŋ kpaŋa ne tó yé nɛ́ pó. 30A kiʼi ŋgɛmbɛ Mboʼmvé tsé mbé ntiŋɛ ŋkhoʼyɛ́ pé kɛ tsó ndzɔ́ʼɔ́ fwɔ̂ne nɛ́ pó. Ŋkyé ŋgâ a ntsɔ́ nɔŋ ŋkhoʼyɔŋ pwó ŋkɔŋɔ pɔŋ náá ndzó ŋkɔŋɔ ywoʼ náá, ŋgâ pɔ́b séd mbziʼe yɔ́b. 31A tíí taʼ zhyémvé mbó ntsɔ́ʼ ŋɔŋ wɛ́ a sábá fiʼ ŋkɔŋɔ pɔŋ náá pé ne ŋgerɛ́ŋged nɛ́, njʉ́ a kɛ zhyɛ́ ŋɔŋ wéré zhʉyɛ́ ne vó, a pé kiŋi nɛ́.»
32Njʉ́ a kɛ nsó no njʉyɛ́ne ne vó nɛ́, pecyó pɔŋ túŋɔ wé, pecyó nsó ŋgâ: «Psi ŋkʉ́yó ndzóʼó wo ndúŋú no yekénɛ́ pé cyó kɛɛ.» 33Kɛ́ʼɛ́, Pɔ́lə ŋáá pfúŋɔ pɔ́b. 34Ntsʉ́ʼ ŋgɛmbɛ pecyó pɔŋ kɛ zɔŋɔ wé ntsʉ́ʼ ghaŋá psyɛ́ndzɔʼ. A kɛ pé Denisə, cyó ŋgaŋa Areyopaazhə wéré, Damarisə cyó məŋgʉ́yé wɛ́ a kɛ pɛ́ ndzɔ́ʼɔ́ pɔŋ péré nɛ́, pwɛ pecyó pɔŋ ŋkʉ́rʉ́.
ទើបបានជ្រើសរើសហើយ៖
Faʼ Ghaŋántɔ́b 17: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
