1 Korɛŋto 12
12
Pɛ fɛ Zhʉye Yáŋme
1Pɔ́ŋmɛ́ páá, ŋgɛ ŋkhú ndúŋú pɛ meno pɛ́, Zhʉye Yáŋme zhyɛ́ nɛ́, mə tsé mbé zɔŋɔ nɛ́ ŋgâ, puŋ tséʼé f wɔ̂ ne ndúŋú pó. 2Puŋ zé ŋgâ a kɛ pe ŋkhoʼyɛ́ puŋ kɛ pe zɛ́ Mboʼmvé nɛ́ pó, pe purɔ wúŋ ŋgú nuŋ pfúŋɔ́ pɛ záʼá, pɔ́b pɛ́ pɔ́b tsé mbé tsɔ́ no nɛ́ pó. 3A zhyɛ́ yéré nɛ́, mə sɔ́ŋɔ́ wúŋ ŋgâ, ntsye ŋɔŋ yóʼó yɛ́ tɛɛmbɛ Zhʉye Mboʼmvé pɛ mbəb ye, a pó tsé ntsɔ́ ŋgâ: «Ndɔŋ tó Yěsô» nɛ́ pó. Tɛɛmbɛ ŋɔŋ ke mbó mbé nsó ŋgâ: «A Yěsô mbé Ntsɛɛpɔŋ» kii a zhyɛ́ Zhʉye Yáŋme pó.
4Pɛ fɛ́ foʼndzəndzoʼ yóʼó mbziʼe mbziʼe, ntsʉʼmbé kəŋe náá ke ntwɔ̌ ndaʼ pwó Zhʉye Yáŋme wéré. 5Fǎʼne pwó Mboʼmvé yóʼó mbziʼe mbziʼe, ntsʉʼmbé pe kaa náá ke fáʼa pwó ndaʼ taʼ Ntsɛɛpɔŋ wéré. 6Pɛ mbziʼe ŋgyɛ̌ne no pɛ yóʼó, ntsʉʼmbé a ke mbé ndaʼ taʼ Mboʼmvé, yé wɛ́ a záʼá mbəb ŋkɔŋɔ pɔŋ náá, ŋgyɛ́ ŋkɔŋɔ no náá nɛ́. 7Mbɛwɔ̂ ndzɔ́ʼɔ́ piŋi ke tsɛ́ʼɛ́ wé mɔ́ŋ yɔ́b wɛ́, Zhʉye Yáŋme fɛ́ pwó ye, ne ŋgyɛ̌ne pe zɛ wé nɛ́. Néré, ne ndɔ̌ne ŋgébɛ ŋkɔŋɔ pɔ́ŋmɛ́ náá nuŋ nɛ́. 8A pwó cyó ŋɔŋ, Zhʉye Yáŋme fɛɛ nsó zé, mbɛ pwó cyó, a pɛɛ nsó zɛ́no. A ké mbé ndaʼ Zhʉye Yáŋme wéré fɛ ŋkɔŋɔ yé náá. 9Ke mbɛɛ ne Zhʉye Yáŋme wéré, cyó ŋɔŋ tsɛ́ʼɛ́ yé pé psyɛ́ndzɔʼ. Mbɛ pwó cyó ŋɔŋ, Zhʉye Yáŋme wéré fɛ̂ tʉ̌ŋ pɛ́rɛ ghɔŋ. 10Mbɛ pwó cyó ŋɔŋ, mbɛɛ ŋgyɛ̌ne pɛ shʉrɛ́meno. Mbɛ pwó cyó ŋɔŋ, mbɛɛ ntsóne kpaŋató Mboʼmvé. Mbɛ pwó cyó ŋɔŋ, mbɛɛ mkpeʼéne pɛ zhʉye. Mbɛ pwó cyó ŋɔŋ ŋkʉ́rʉ́, mbɛɛ ne ntsóne pɛ mbziʼe mbziʼe nsó. Ŋgɛmbɛ pwó cyó ŋɔŋ, mbɛɛ ne kéʼene nsó wéré. 11Ntsʉʼmbé a kembé ndaʼ Zhʉye Yáŋme wéré ne ndúŋ ye faʼa ŋkɔŋɔ faʼ péré náá, fɛ́ ye ŋɔŋ fɛ pwó ye njʉ́ a kʉ́yé nɛ́.
Taʼ mbəb tséʼé pɛ ywoʼɔ́ mbəb zááme
12Piŋi yɔ́ɔ́ taʼ fuʼ no. Mbəb taʼ ye, tsʉ́ʼŋgɛmbɛ ntséʼé pɛ ywoʼɔ́ mbəb zááme. Ntsʉʼmbé ŋkɔŋɔ pɛ ywoʼɔ́ mbəb náá, mbɛ njʉ́ pɔ́b záá nɛ́, kaa náá nzwə́ré, mbé taʼ mbəb. A ké mbé nɛ́ njʉ́ Kristo ghu nɛ́. 13Ŋkyé ŋgâ, ŋkɔŋɔ wíŋi náá, kii wo kɛ pɛɛ ŋɔŋ Yúda, kii ŋɔŋ Gerɛʼ, kii wo kɛ pɛɛ mkpaŋ, kii ŋɔŋ ywʉŋíme, piŋi kɛ kaa náá ke mkpênse pé ne taʼ Zhʉye Yáŋme, néré kɛ́ʼɛ́ ne mbéne taʼ mbəb. Mbǒ Mboʼmvé kɛ kaa náá fɛɛ taʼ Zhʉye Yáŋme wéré ne piŋi. 14Néré kɛ́ʼɛ́, mbəb tsɛ́ʼɛ́ taʼ ywoʼɔ́ mbəb pó. Ntsʉʼmbé, a tséʼé pɛ ywoʼɔ́ mbəb zááme. 15A ghɛmbɛ kpee nsó ŋgâ: «Njʉ́ mə pwó nɛ́ pó, mə tséʼé cyó no ndúŋú mbəb pó.» Á tsó kii ke mbɛɛ ndúŋú mbəb? 16A ghɛmbɛ təŋé nsó ŋgâ: «Njʉ́ mə mbzítíí nɛ́ pó. Mə tséʼé cyó no ndúŋú mbəb pó.» Á tsó kii ke mbɛɛ ndúŋú mbəb? 17A ghɛmbɛ ŋkɔŋɔ mbəb náá ke mbɛɛ mbzítíí, mbǒ ywoʼɔ́ zóʼó no pɛ́ yé pɛɛ? A ghɛmbɛ ŋkɔŋɔ mbəb náá pɛɛ ntəŋé nɛ́, mbǒ ywoʼɔ́ zóʼó tsuwɔ̌ yɔ́b pɛ́ yé pɛɛ? 18Ntsʉʼmbé Mboʼmvé kɛ nʉʉ pɛ ywoʼɔ́ mbəb ndúŋú mbəb ŋɔŋ, pé njʉ́ a kɛ kʉyě nɛ́. 19A ghɛmbɛ ŋkɔŋɔ ywoʼɔ́ mbəb péré náá ke kpaʼ náá mbɛɛ taʼ ywoʼɔ́ mbəb, mbǒ mbəb twɔ́ pɛɛ? 20Yéré nyóʼó nɛ́ ŋgâ, pɛ ywoʼɔ mbəb yóʼó zááme. Ntsʉʼmbé a ké mbé ndaʼ taʼ mbəb. 21Tɛɛmbɛ mbzítíí pe tsɔ́ pwo pwó ŋgâ: «Wo tséʼé ghebe ne mo pó.» Kii tó pó tsɔ́ pwo pɛ kpee ŋgâ: «Puŋ tséʼé ghebe ne mo pó.» 22Mbɛ pɛ ywoʼɔ́ mbəb pɛ́ a ndáá pé pɔdme nɛ́, ke tsɛ́ʼɛ́ yɔ́b ghebe kaʼatɛ. 23Mbó mbɛ ne pɛ ywoʼɔ mbəb pɛ́, pe náá wɔ́b mgbáŋa mgbáŋá nɛ́, a pó mbé péré mbé pɛ, pe cʉ̌yi ŋguʼɔ wɔ́b nɛ́. Pɛ pe tsé mbé fɛ́rɛ fu tíí yɔ́b nɛ́ pó, a pó mbé péré mbé pɛ́ pe cʉ̌yi ndɔ́ɔ́ ŋgəʼo ndúŋú nɛ́. 24Pɛ pɔ́b ndzó ywoʼɔ zhyáŋá nɛ́, pé tsé mbé zhʉ́ cyó ŋgəʼo mbəb pɔ́b pó. Ntsʉʼmbé puŋ zɛ́ nɛ́ ŋgâ, Mboʼmvé kɛ ghɛ̂ tɛŋɛ mbəb, fɛ́ ŋgúʼune zááme pwó ywoʼɔ mbəb pɛ́, pe mgbáŋá wɔ́b mgbáŋa nɛ́. 25Néré kɛ́ʼɛ́ ŋgâ, fǎne ndɛ mbɛ ndúŋú mbəb. Yânéré kɛ́ʼɛ́ ŋgâ mbɛ yɛ́rɛ́ ywoʼɔ mbəb yɔ́ɔ́ ŋgəʼo mbəb mɔ́ŋmɛ́ ye. 26A pɛɛ yɛ taʼ ywoʼɔ mbəb tséʼé ŋgəʼo nɛ́, a zɔŋɔ ŋgâ pwɛ ŋkɔŋɔ pecyó ywoʼɔ́ mbəb náá, kpaʼ njʉ yéré ŋgəʼo. Mbó mbéyɛ́ pe tsé fɛ ŋgúʼune pwó taʼ ywoʼɔ mbəb nɛ́, mbǒ a nzɔŋɔ ŋgâ pwɛ pecyó ywoʼɔ mbəb kpaʼ náá ndebe. 27Kɛ́ʼɛ́, puŋ kaa náá mbé mbəb Kristo, mbɛwɔ̂ pe ywoʼɔ mbəb yé. 28Pɔŋ pɛ́ Mboʼmvé tíí ndzó ndáméted nɛ́ pe nɔŋ: sɔ́ ye pɛghaŋantɔ́b, zhʉbɛ́ yepáá pé pɛ ghaŋátsɔ́kpaŋató Mboʼmvé. Zhʉbɛ́ yekyed pé ghaŋá fɛ́ ntʉ́ʉ́. Pɔŋ pɛ́ pɔ́b kʉyo ndzəb pɔ́b nɛ́, pe nɔŋ: pɛ ghaŋá zhyɛ́ pɛ shʉrɛ́meno. Pɛ ghaŋá pɛ́rɛ ghɔŋ, pɛ́ ghaŋá ghɛ́bɛ́ pɔŋ, pɛ ghaŋá tyáŋa pɔŋ, pwɛ pecyó pɔŋ pɛ́ pɔ́b tsɔ́ pɛ mbziʼe mbziʼe nsó nɛ́. 29A ŋkɔŋɔ wɔ́b náá mbé ghaŋántɔ́b? A Ŋkɔŋɔ wɔ́b náá mbé ghaŋátsɔ́kpaŋató Mboʼmvé? A Ŋkɔŋɔ wɔ́b náá mbé ghaŋáfɛ́ ntʉ́ʉ́? A Ŋkɔŋɔ wɔ́b náá mbé ghaŋáŋgyɛ́ pɛ shʉrɛ́meno? 30A ŋkɔŋɔ wɔ́b náá mbé ghaŋá pɛ́rɛ́ ghɔŋ? A ŋkɔŋɔ wɔ́b náá tsɔ̂ mbziʼe mbziʼe nsó? A ŋkɔŋɔ wɔ́b náá keʼe nsó? 31Á puŋ ntséʼé ndzye pɛ fɛ́ pɛ́ a tsɛɛ ŋkɔŋe náá nɛ́. Mə mbó nyóʼó wúŋ ne ndáá mɛndɔ́b wɛ́ a tsɛɛ ŋkɔŋe náá nɛ́.
ទើបបានជ្រើសរើសហើយ៖
1 Korɛŋto 12: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល