Rawma iyi 9
9
Bizlaf abə hedi mbiŋ mə mamay iyi
(9–11)
1Ma sa mə mba i zlap seh, ar zlap məndiwiŋ. Sa kəbərəsl ma səku, məŋgəvday sa hedi tə Almasihu. Wulək na, a mandaha kəɗi Mimiɗ sə Kweɗek seh, a kəɗal sedewe, sa kəzlap zlap məndiwiŋ. 2Nəf na mə gweɗi abə tuwah mbeh səku, sa kəzləŋ takwaŋ hwayhway. 3Sa abə talaŋ na, sa mba gay a ndəra Bizlaf, sa mba wuɗak abə Almasihu, məŋgəvday zliŋmana Yahuda iyi, vəŋ na iyi. 4Tata seh, ar ntaŋw tə Israyila iyi: Bizlaf kəmbaɗta za əŋ wuziyi ŋga iyi, kəgizeŋta səndawl ŋga za, jaw ma ŋga za, vəl tə ma majaw ŋga za, dar malakw, abə məsəkəŋ iyi mbiŋ mə zlap a vəl za sey. 5Tata seh, ar hedi tə əŋ ntaŋw tə dide tə dide tini titʉz iyi, kwa Almasihu bahayim, hedi dəgənak, ar hedi tata iyi. Bizlaf, hedi tə a talaŋ məsəkəŋ iyi fuk, həmən mə nja əŋ mbiŋ kwa a pipi a pipi. Amen#9:5 Kəzəɗ tə Mələɓ iyi 2:29.!
Zlap tə Bizlaf seh, kəkuɗəp səntaŋ ŋga halla
6Məsəkəŋ Bizlaf mə zlap a vəl za seh, kəmbaɗ əŋ məsəkəŋ seh haya halla. Məŋgəvday ar hedi mambuwaha tə əŋ ntaŋw tə Israyila iyi fuk, i mə nda i ɗal əŋ hedi tə Israyila iyi məndiwiŋ səku. 7Wuziyi tə Ibrahima iyi seh, ar tata fuk wuziyi ŋga iyi məndiwiŋ səku. Məŋgəvday Bizlaf kəzlapaŋ za əŋ Ibrahima: «Ar kəɗi Isiyaku hwa nda i lim wuziyi iyi mənaŋ sa mə zlap sa vəlah wuziyi za wa#9:7 Mar tə məsəkəŋ iyi 21:12..» 8Mənaŋ zlap ta seh, wuziyi mambuwaha mənaŋ mba tə hedi dəganak seh, ar wuziyi tə Bizlaf iyi səku. Sey wuziyi mambuwaha mənaŋ Bizlaf mə zlap a vəl za taataɗ dap, i kəɗiyta za mənaŋ wuziyi mambuwaha məndiwiŋ iyi. 9Məŋgəvday Bizlaf kəzlap za a məsəkəŋ mbiŋ mə zlap a vəl za wa, mənaŋ wa: «Ha əŋ va mənaŋ wawa seh, sa ziŋgehe za, sa lim Saratu za, kəmbuwaha mbu muwul za#9:9 Mar tə məsəkəŋ iyi 18:10. .»
10Ar wawa taataɗ dap səku, mazukwa i wulək a Rebeka bahayim: Wuziyi ŋga musa sə bək iyi wa, tata abə baba ntaɗ, dide tə dide takwa Isiyaku. 11Wuziyi ta, i kəmbuwaha halla ndagwa seh, i kəɗal məsəkəŋ səntaŋ halla ndagwa, kwa məsəkəŋ madawar halla ndagwa, əŋ Bizlaf mə zlapaŋ əŋ Rebeka, amba məsəkəŋ mbiŋ mə wulək ley ɗal, mə ɗal wa. 12May məsəkəŋ tə Bizlaf seh mə geri a talaŋ wulək ŋga dap, a talaŋ ɗaf ma mbiŋ mə ɗafaŋta ma əŋ hedi iyi, ama a talaŋ kəzəɗ tata iyi səku. Bizlaf kəzlap za, a zla: «Mbu səndawl seh, a ɗalaŋ kəzəɗ za əŋ mbu mekedek.» 13Mənaŋ ma mawuzlel tə əŋ Ɗerewel tə Bizlaf mə zlap, a zla: «Sa kəmba Yakubu za, ama sa kəmba Isuwa halla#9:13 Malakiya 1:2-3..»
14Nakwa iyi nda i cukwaɗ zlap ta seh viŋgey? Mənaŋ wa, Bizlaf seh, hedi sə delele səku vaw? Məndiwiŋ ta seh, mənaŋ mba səku! 15Məŋgəvday kəzlapaŋ za əŋ Musa, a zla: «Sa nda i səŋ nje həhər seh, əŋ hedi sa mə mba ley səŋgaŋ nje həhər, sa nda i ɗal məsəkəŋ səntaŋ seh, əŋ hedi sa mə mba ley ɗalaŋ məsəkəŋ səntaŋ#9:15 Təɗaha 33:19..» 16Məŋgəvday a ɗek, məsəkəŋ ta seh, a kəɗal abə mba tə hedi dəgənak səku, kwa abə fagay ŋga iyi səku, ama ar məŋgəvday Bizlaf taataɗ ŋga mə səŋ nje həhər. 17Əŋ ma mawuzlel tə əŋ Ɗerewel sə Kweɗek seh, Bizlaf a zlapaŋ əŋ Firawna bay tə Misra, a zla: «Sa kəɗiyah za əŋ bay, amba ley gizehe fagay na kəɗi a hwa, amba miya na mə səŋ əŋ məŋhayak fuk.» 18Mənaŋ wa, Bizlaf a ɗal nje həhər seh, əŋ hedi mbiŋ mə mba ley səŋgaŋ nje həhər, a ɗal talaŋ tawytawy seh, əŋ mbiŋ mə mba ley ɗalaŋ talaŋ tawytawy.
Zəm nəf abə səŋ nje həhər tə Bizlaf
19Kəganah hwa zlapaka za kəvah: «Bizlaf a vəlanakwa hem mənaŋ wa baha dap seh, məŋgəvday a mey? Mə gula i tak məsəkəŋ mbiŋ mba i ɗal seh, viyey?» 20Ama hwa seh, hwa viyey, hwa hedi dəgənak, ley ɗal yawa abə Bizlaf wa? Duguzl a gula i zlapaŋ əŋ hedi mə ləmahaw: «Hwa ɗalaka mənaŋ wa seh, məŋgəvday a mey za vaw#9:20 Esaya 29:16; 45:9.?» 21Hedi mə ləm duguzl, a gula i ɗal məsəkəŋ mbiŋ mə mba abə dəris ta: abə dəris sə ndeɓek ta mba, a gula i wuɗak dəris ta mba bək, abə ntaɗ a ləm duguzl maŋgəm sə mbeh səku, abə məzəwindi bahayim, a ləm duguzl mənaŋ məzəwindi iyi wa dap#9:21 Yeremiya 18:6..
22Mənaŋ wa, Bizlaf seh, ar hedi səntaŋ mə ləm duguzl, kəmba za ley gizehe zəm nəf ŋga, abə ley gizehe fagay ŋga a talaŋ duguzl dakayta iyi. Ɗəba, kəɓəs za abə dak nəf mbeh səku hedi tiɗe ley lim zəm nəf ŋga iyi, abə hedi tiɗe mə nda ley lim kuɗəp tata iyi. 23Ama wulək ŋga seh, ar ley gizehe səndawl ŋga sə mbeh səku wa əŋ duguzl məzəwindi iyi, mbiŋ mə səŋgaŋta nje həhər, mbiŋ mə ɗiyta mar zlezle ley lim səndawl ŋga.
24Ehe, hedi iyi ta mba seh, ar nakwa, kəɗafanakwa ma za, əŋ faŋw tə Yahuda iyi taataɗ dap səku, ama əŋ faŋw tə hedi Yahuda iyi səku bahayim. 25-26Mənaŋ wa, Bizlaf mə giz tə əŋ Ɗerewel tə hedi mə giz ma abə miya tə Bizlaf, Uziya mə zlap, a zla:
«Hedi iyi ta i kəmbaɗ əŋ hedi na iyi halla, sa nda i ɗafaŋta ma hedi na iyi,
hedi iyi sa mə mbata səku wa, sa ɗafaŋta ma za hedi na mamba iyi.
Əŋ lay, i mə zlapaŋta:
“heni seh, hedi na iyi səku”,
a namba, i ɗafaŋta ma za wuziyi tə Bizlaf iyi tə abə nje#9:25-26 Səcer ta 25: Uziya 2:25. – Səcer ta 26: Uziya 2:1..»
27Hedi mə giz ma abə miya tə Bizlaf, Esaya, kəɗi kəv ŋga bahayim, kəhaŋ za a talaŋ ma tə Israyila iyi, a zla: «Kwa Israyila iyi wa mbeh səku mənaŋ vakw tə lakwat seh, ar hedi dakayta iyi tə əŋ faŋw tata i mə nda i reh. 28Məŋgəvday ma Bay Bayta mə zlap, a ɗal məsəkəŋ ta za fuk, viyu a talaŋ məŋhayak#9:28 Esaya 10:22-23..» 29Mənaŋ Esaya mə zlap mar zlezle, a zla:
«Əŋgah Bay Bayta mə sla tə a talaŋ məsəkəŋ iyi fuk, kəyakanakwa hedi mambuwaha dakayta iyi halla seh,
nakwa iyi mbaɗ za mənaŋ hedi tə Sawdawma iyi,
nakwa iyi nda i gər mənaŋ hedi tə Gwamawra iyi.»
Micimbiɗim kətaw Israyila iyi za
30Nakwa iyi nda i cukwaɗ zlap ta seh, viŋgey? Mənaŋ wa seh, hedi Yahuda iyi səku, mə mba i pələk ley mbaɗ əŋ hedi sə delele iyi səku a ma tə Bizlaf wa seh, i kəmbaɗ cuza əŋ hedi sə delele iyi a ma ŋga kəɗi kuw ma. 31Mənaŋ wa, Israyila dakayta iyi i mə pələk ley mbaɗ əŋ hedi sə delele iyi a ma tə Bizlaf kəɗi ma majaw wa seh, i kəgwar əŋ maɗ ma tə zlap tə ma majaw seh halla. 32Məŋgəvday a mey? Məŋgəvday i kəpələk ley ŋgəmaŋ a nje tə Bizlaf abə kuw ma səku, ama i kəpələk sey abə kəzəɗ iyi dap. I kəɗal micimbiɗim za abə «nvəŋ mə ɗal micimbiɗim», 33mənaŋ ma mawuzlel tə əŋ Ɗerewel tə Bizlaf mə zlap, a zla:
«Ehe, sa kəɗiy nvəŋ mə ɗal micimbiɗim əŋ hayak tə Siyawna,
nvəŋ mə ndəv hedi iyi.
Ama kwa viyey mə ɗiy kuw ma ŋga a mbiŋ seh,
a kənda i haŋ marava halla.»
ទើបបានជ្រើសរើសហើយ៖
Rawma iyi 9: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
