Rawma iyi 10
10
1Zliŋmana iyi, məsəkəŋ sa mə mba tə abə nəf na ntaɗ seh, sa kəɗalaŋ mbuh əŋ Bizlaf məŋgəvday Yahuda iyi, i mə reh. 2Məndiwiŋ ta seh, sa gula i ɗal sedewe a talaŋ tata, tata i kəvəl talaŋ za ley waŋgaŋ talaŋ əŋ Bizlaf, ama vəl talaŋ tata ta seh, kəgizehe kəɗi səŋ məsəkəŋ seh halla. 3Məŋgəvday i kəsəŋ halla, Bizlaf mə mbaɗ hedi iyi əŋ hedi sə delele iyi a ma ŋga seh, viŋgey seh halla, i kəpələk za ley nja delele mənaŋ tata mə mba. Mənaŋ wa, i kəwaŋgaŋ talaŋ əŋ vəl tə Bizlaf mə ɗalaŋta əŋ hedi dəgənak iyi abə ley mbaɗta əŋ hedi sə delele iyi seh halla. 4Məŋgəvday kəzəɗ tə ma majaw tə Musa seh, ar ley deɓ hedi iyi əŋ kelek Almasihu amba hedi iyi fuk i mə ɗiy kuw ma tata tə a mbiŋ wa seh, i mə səŋta əŋ hedi sə delele iyi.
Hedi mə ɗafaŋ ma əŋ Bay Bayta iyi fuk, i reh za.
5Ehe, zlap Musa mə wuzlel tə a talaŋ ma kə mbaɗ əŋ hedi sə delele kəɗi ma majaw seh: «Hedi mə ɗal kəzəɗ tə abə ma matak iyi tə ma majaw seh, a nja za abə tata#10:5 Məsəkəŋ matak tə Lewiŋki iyi 18:5..» 6Ama, ehe, ma mbiŋ mə zlap tə a talaŋ ma kə nja əŋ hedi sə delele kəɗi kuw ma seh: «Hwa mba i zlap əŋ talaŋ təkwa: “Mə nda i tap əŋ wuzlaf seh, viyey?” Səku» (Mənaŋ zlap ta seh: ley bəreŋgehe Almasihu). 7Hwa mba i zlap: «Mə nda i bəreŋgehe əŋ məŋhayak tə jiɓ sə seleleŋ seh viyey? Səku» (Mənaŋ zlap ta seh: ley garaha Almasihu mar tə əŋ faŋw tə hedi maməc iyi). 8Zlap ta, a mba i zlap seh, viŋgey? Mənaŋ wa: «Zlap ta seh, mbehmbeh abə hwa, mbə əŋ pakwam təkwa, mbə əŋ nəf təkwa.» Mənaŋ zlap ta seh, ar zlap tə kuw ma nakwa mə giz wa. 9Əŋgah abə ma təkwa, hwa kəɗal sedewe a ma tə hedi iyi fuk, Yesu seh, ar Bay Bayta, əŋgah hwa kəkuw ma za abə nəf təkwa ntaɗ Bizlaf kəgarahaw za əŋ faŋw tə hedi maməc iyi seh, hwa reh za. 10Məŋgəvday ar kəɗi əŋ nəf, hedi a kəkuw ma, Bizlaf a mbaɗ hedi əŋ hedi sə delele seh, kəɗi kuw ma. Ar kəɗi ma, hedi a kəɗal sedewe, Bizlaf a kəreh hedi mə ɗal məsəkəŋ mənaŋ wawa. 11Ma mawuzlel tə əŋ Ɗerewel tə Bizlaf mə zlap, a zla: «Kwa viyey mə ɗiy kuw ma ŋga a mbiŋ seh, a kənda i haŋ marava halla.» 12Mənaŋ wa, məsəkəŋ mə wuɗak Yahuda iyi abə hedi Yahuda iyi səku seh halla. Tata fuk abə Bay Bayta ntaɗ dap, hedi mə vəl məsəkəŋ ŋga iyi fuk əŋ hedi mə ɗafaŋ ma iyi. 13Məŋgəvday a kəzlap, a zla: «Kwa viyey mə ɗafaŋ ma əŋ Bay Bayta seh, a reh za#10:13 Yuwel 3:5..»
14Ama, i nda i ɗal ley ɗafaŋ ma, kwa i kəɗiy kuw ma tata a mbiŋ halla seh viŋgey? I nda i ɗiy kuw ma a mbiŋ kwa i kəzlim zlap ta halla wa seh, viŋgey? I nda i zlim zlap, əŋgah hedi mə giz zlap halla wa seh, viŋgey? 15I nda i giz zlap, əŋgah i kələɓahata halla wa seh, viŋgey? Mənaŋ ma mawuzlel tə əŋ Ɗerewel tə Bizlaf mə zlap, a zla: «Ləlaw diya ley gər hedi mə ndaha ley giz Labara Səntaŋ Lawayaŋ iyi#10:15 Esaya 52:7.!» 16Ama, hedi iyi fuk i kəwaŋgaŋ talaŋ əŋ Labara Səntaŋ Lawayaŋ seh halla. Esaya kəzlap za zlezle, a zla: «Bay Bayta, mə kuw labara nini mə giz wa seh, viyey?» 17Mənaŋ wa, kuw ma seh, a kəndaha kəɗi zlap i mə zlim labara magiz məndiwiŋ, labara ta seh, ar giz tə zlap tə Almasihu.
Bizlaf kəkap hedi ŋga iyi seh halla
18Mənaŋ wa izey, sa kəɗəp: Yahuda iyi seh, i kəzlim labara ta halla vaw? Ama məndiwiŋ ta seh, i kəzlim Labara ta za! Ma mawuzlel tə əŋ Ɗerewel tə Bizlaf mə zlap, a zla:
«Wula tata iyi i kəzlimehe a talaŋ hayak iyi fuk,
zlap tata iyi i kəgwar za ha əŋ məmələm tə məŋhayak.»
19Sa kəɗəp baha: Hedi tə Israyila iyi i kəsəŋ Labara ta halla vaw? Ehe, Musa kəziŋgeŋta zlap mənaŋ wa:
«Bizlaf a zlap, a zla: Sa nda i mbaɗaheni əŋ hedi mə ɗal sərah iyi a talaŋ hedi mə tak mbaɗ əŋ hedi məndiwiŋ səku iyi,
sa nda i ɗal amba nəf təheni mə dəm a talaŋ hedi mə tak səŋ məsəkəŋ iyi.»
20Esaya kətəl za bahayim ley giz ma ta, a zla:
«Hedi mə pələkaka səku iyi seh, i kəlimeke za abə nje tata.
Sa kəgizehe talaŋ na za əŋ hedi mə tak ɗəp zlap tə ndəra na iyi.»
21Ama a talaŋ ma tə Israyila iyi seh, a kəfəfəl zlap baha, a zla:
«Əŋ waŋ iyi fuk, sa kəɗef ndəra na iyi
kəɗi hedi mə waŋ talaŋ iyi səku, abə kəɗi məsəgər iyi.»
ទើបបានជ្រើសរើសហើយ៖
Rawma iyi 10: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
